القلوب تعرف من حبها يا غرامي

جزء 5

جد جبر تقدم لين عند العيال وهو ماسك عصاته يستند فيها:وش سالفة الغبار الي هب علينا فجاء والصراخ العالي ها؟
رائد:ياجد شوف بصراحه كنا نفحط تدري طفش وكذا
جد جبر بحده:مين الي فحط فيكم؟
العيال قمطو ام العافيه وماردو
جد جبر وهو يعيد نفس السؤال بحده وعصبيه:مين الي فحط فيكم؟؟
العيال كلهم تقبلو امر الواقع واشرو على خالد لانهم يفضلون خالد يجلدهم بالدس ولا جدهم يجلدهم قدام الكل
جد جبر وهو يطالع خالد بحده تصاحبها نظرات استغراب:انت يا خالد ؟!
خالد :اي نعم يا جد
جد جبر باستغراب وضح على وجهه وخيبة امل:افا يا خالد وانا كنت اشوفك العاقل اخرتها كذا!
عبدالله بهمس لحمد:واضح انه عاقل هو ما شافه معنى وربي بيتبرا منه
حمد بهمس:اي ولله
خالد:السموحه يا جد
جد جبر:خلاص ما عليه روحو اخمدو ولاعد تعودونها
العيال بصوت واحد:ابشر
راحو الاباء والجد وضلو العيال بصمت الين ما كسر الصمت خالد ونطق بحده :هين تخليتو عني بهذي البساطه؟!
عبدالله بربكه:شوف خالد انت هد وخلنا نتفاهم
خالد بعصبيه :نتفاهم؟
كمال بتوتر:اي نتفاهم
خالد وهو يضحك بصوت عالي واستغربو العيال بس لانت ملامحهم من الخوف والتوتر والربكه الى الراحه
خالد:شفيكم توترتو؟
رائد :ياشيخ انت شايف نظراتك قسم تخرش وما تبينا نتوتر!
كمال:قسم جانتي ام الركب
حمد:ماعد عرفت ابلع ريقي من الخوف
خالد: لا ما توصل لذي الدرجه
تميم:الا توصل واكثر
عبدالله:اقول امشو خلونا نرقد الساعه صارت1:30
حمد:اوف الوقت مر سريع
خالد:اي ولله المهم امشو خل نروح فيني نوممم
تميم:حتنى ولله
راحو كلهم خيمتهم ونامو
(عند البنات)
غرام :هي بنات شوفو جدي قاعد يهاوش العيال
جت بثينه تطالع مع غرام بفضول:اي ولله بس ليش
غرام:شدراني انا معهم قاعده؟
نهى وهي جايه عندهم تشوف:اوف شكل جدي معصب حيل
نوف وهي جايه لهم تطالع بفضول وحلطمه:اوفف كيف انام وانا ما عرفت
غرام:مو لازم نعرف مالنا دخل
ليلى وهي تبعد راس نهى عشان تشوف:عادي باسحب كلام من اخوي بعدين واقولكم
غرام:كثر الله خيرك يلا امشو ننام
نهى:اوففف جينا ولا فيه فعاليات للحين
ليلى:اصبري الفعاليات بتبداء بكرا تونا جينا اليوم
نهى :اي صح بنات انا اخذت سماعتي البلوتوث معي واختفت قلت يمكن نسيتها عندكم شفتوها؟
البنات بصوت واحد:لا
غرام:دورتي برا لان اذكر طلعتي وهي معك اكيد طاحت برا
نهى:اي هذا الغريب طلعت فيها ودورت بكل مكان مالقيتها تكفون دوروها معي
بثينه:صاحيه انني بالله عليك تبين تطلعينا بعز الليول ندور على سماعتك ؟
نهى بحلطمه:ماقلت ذحين
شوق وهي تترك جوالها وتجيهم:شفيكم
ليلى :الحمدالله على السلامه توك تجين؟
غرام:خلاص لا تتهاوشون امشو خلونا ننام
بالفعل كلهم انسدحو بفرشهم ونامو
"الساعه 4:30"
غرام وهي تقوم من النوم تتمغط:اخخخ الساعه كم
طالعت غرام جوالها لقتها الساعه 4:30 :يوهه اذن غريبه ما جت جدتي محطتنا نقوم عاد هي عامره بالايمان
هزت غرام على كتف نهى الي نايمه جنمبها:نهىىى بنت نهىى يا القرده قومييي
نهى وهي نص نايمه وصاحيه:همم خلوني اناممم
غرام:قومي صليييي
نهى وهي تجلس وتتلحف زين:غريبه ما صحانا حد
غرام:حتنى مستغربه عاد جدتي عامره بالايمان مستحيل تخلينا كذا واذا هي ما انتبهت على الاقل وحده من عماتي تجي
نهى:غريب يلا مو مهم انا بروح اتوضى وانتي شوفيهم يمكن راحت عليهم نومه وما انتبهو لا نسيئ الضن
غرام:اي ولله صدق يلا بروح اتوضى وانتي صحي الحمير الي جنبك
نهى:اوكي
راحت غرام تتوضى وراحت لخيمة نوم الحريم لقتهم نايمين وصحتهم اما نهى صحت البنات والكل توضى وراحو خيمة جلست الحريم وقررو يصلو جماعه
جده هيله:الكل موجود؟
خلود:اي الكل
جده هيله:تمام يلا
بعد ما خلصو صلاه راحو الحريم يسوون فطور و وبثينه وشوق قعدو في مجلس الحريم مع جدتهم هيله يسولفون ونوف وليلى مع الحريم في المطبخ يسوون الفطور ونهى وغرام راحو يدورون السماعه
نهى بحلطمه:ياربي فين اختفت ذي السماعههه
غرام:مدري عنك ماتذكرين المكان الي مريتي من عنده؟
نهى:الا مريت من هنا الين رحت مجلس الحريم ومالقيت سماعتي رجعت ادور عليها بس كان ضلام
غرام:بس؟
نهى وهي تتذكر:اوه صح وبعد وانا امشي لقيت رائد واقف عند مكان هناو متنح وسالته وقالي يبي بنادول بس كان متوتر شويه
غرام:ايوههه ليه كان متوتر ؟؟
نهى باستغراب:شفيه اكيد لقطتي شي وش عندك
غرام :اول جاوبيني ليه كان متوتر؟
نهى : مدري شدراني عطيته بنادول ومشيت
غرام:بسسس؟؟؟
نهى :اي اي و قعد يسالني عن موديلها وشكلها ولونها ولما قلت له ابتسم شوي ولما سالته قال عشان يقول للعيال يدورونها
غرام:اهااااا ليه يسال اكيد وراه بلا تبين اقولك الصراحه احس رائد لقاها واخذها اكيد ناوي فيها شي
نهى:لااا عاد ذي السماعه غاليه ابوي بينحرني لو دري ان صار لها شي او انها ضاعت
غرام:ماعندنا مشتبه به الا رائد روحي تفاهمي مع اخوك وقولي له لاني متاكده ان رائد اخذها
نهى:وليه متاكده؟
غرام:ياشيخه مو شايفه وش قاعد يسوي هذا وانتي بس تقوليلي شكيت كيف انتي وانتي كنتي معه؟
نهى بحلطمه:اوفففف لاتهاوشيني خلاص بعلم اخوي يسأله خلاص ارتحتي افف
غرام:امشي خلينا نروح الخيمه ابي اخذ جوالي وبعدها خلينا نروح نتمشي عند التل الي هناك
نهى :اوف ترا مره بعيد ممكن نضيع
غرام:ماعليك ما بنضيع حفظت الطريق
نهى:اك يلا ابي اخذ جوالي حتى انا ابي اصور ستريك
غرام:اذا صورتي ارسلي لي تصويري خايس انتي تصويرك حلو
نهى:ابشري ماطلبتي شي
غرام :يلا مشينا
"في مكان ثاني عند العيال "
حمد:افف ملل
رائد :احس جينا على الفاضي
خالد:اسكتو وخلونا ندخل الخيمه خل نشوف سوالفهم
كمال:اوفف ما خبرتك تهتم لسوالفهم
خالد:انت شايف الطفش الي حنا فيه عاد لا تلوموني
عبدالله:عاد اخاف ندخل ويذكرونا بتفحيط امس
تميم :يوههه مالي وجه اقابل جدي وابوي عاد انا كانو يشوفوني الهادي المؤدب
خالد:حتى انا بس عادي
رائد:عاد انت لا مودب ولا هادي هذا بس قدام الخلق اما معنا عكس ولا تبيني اذكرك وش تسوي معنا
خالد:استرو علي الله يستر عليكم ماله داعي الفضايح
رائد:اي ادب
كمال:ياشيخ اسكت انت راس المصايب اصلا
حمد:اسمعو شرايكم باليل نركب الدبابات احسها صارت زينه ماحد ركبها
رائد:اخيرا جبت لنا فكره مفيده
حمد بغرور:طول عمري اجيب افكار زينه مو جديده علي
خالد:بروح ارقد
كمال :مين يرقد بصباح الله خير؟
خالد بعصبيه:انا عندك اشكاليه؟
كمال بتوتر:لا
خالد :حلو مع السلامه
الكل:مع السلامه
راح خالد ونطق رائد بعد صمت:اوف فجعني
تميم:هو كذا متقلب المزاج تعرفونه عاد ماله داعي اقول
حمد :اي اي نعرفه هو كذا مزاجي
رائد :شكلي صدق بروح انام انا بعد
كمال:روح روح انا بدخل عند الشيبان
حمد:شقلت الحيا ذي شيبان! ترضى تقول لابوك شايب !!
كمال:ياليللل خلاص خلاص وش تبيني اقول الرجال الذين لازالو بالشباب؟
حمد:اي
كمال:اجل يلا مع السلامه بروح عند الرجال الذين لازالو بالشباب
ضحكو كلهم وراح كمال وراح معه تميم وعبدالله اما حمد راح مع رائد ينامون
"عند نوف وليلى"
خلود: نوف لاتكثرين سكر بالشاهي
نوف :ابشري
ليلى :وين الملح ابي احطه على الشكشوكه
اشواق :هنيه جنبك ماتشوفينه حوله؟
ليلى بفشله:اوه معليش
نوف انتبهت لها وضحكت
اشواق:اقول انطمي لا اصفقك ذحين امسكي ذا الصحن وديه مجلس الرجال
نوف:اوفف يمه قولي لليلى
ليلى وهي تقلب بالاكل :قاعده اطبخ ماني فاضيه
هنوف:هاتيه هاتيه انا بوديه
نوف:لا لا خلاص انا بوديه مع السلامه
الكل :مع السلامه
"عند العيال"
دخل الجد على حمد ورائد وخالد الي نايمين وضربهم على رجولهم بعصاته
قام خالد وهو يتحسس مكان الضربه: اح من ضربني
جد جبر بعصبيه:انا عندك اشكاليه ؟
صحصح خالد:لا ياجد السموحه
قام حمد على الازعاج ونطق بصوت عالي:اوففف اسكتووو بنام مانمت امس زيننن
طالعه جد جبر وعيونه تطلع شرار ومحطه على رجلينه بقوه
حمد بصراخ:اححح ميننن صفقنيييي؟؟؟
رائد صحى وراح للزاويه عند خالد عشان يتجنبون العصا حقت الجد
رائد بهمس لخالد:ويي يخوفي يجي دورنا
خالد بهمس:الحمدالله قد محطني مارح يمحطني مرتين انت الي ممكن تنمحط
رائد بهمس :ياليل بدال ما تهون علي تزيد علي
خالد بهمس:اقول امش البس ثوبك الساعه صارت 7:8 دقايق بيفطرون بعد شوي قوم
لبسو اثوابهم وخرجو اما حمد بلع له كم محطه وخرج الجد بعدها بشوي اما حمد لبس ثوبه وحط الشماغ على كتفه ودخل مجلس الرجال يدور على خالد ورائد ولمحهم وجلس جنبهم:ابك يا الخاينين سحبتو علي و تركتوني انمحط ؟؟
خالد:نقص صوتك تبي تفضحنا انت واي سحبنا عليك بالله تبينا ننمحط عشان حضرتك؟
رائد :محد قالك تصرخ على جدي تعرفه عصبي
حمد وهو يتحسس رجلينه وضهره:اخخ حتى ضهري ماسلم انمحط وبعدين ماكنت ادري
رائد بضحك:تستاهل
خالد:اسكتو خلاص
رائد:بخرج اخذ نفس
حمد:روحه بلا رده
رائد بغرور:بسم الله علي اعوذ بالله منك
حمد:اقول انقلع لاهفك بالجزمه ذحين (اكرمكم الله)
رائد وهو يقوم :اي اي يلا مع السلامه
خالد وحمد:مع السلامه
خرج رائد يتفس وفتح جواله يفرفر فيه
"عند نوف"
اوفف برددد ياربي ليتني اخذت الفروه
لمحت نوف اخوها واقف عند باب خيمة جلست الرجال:اخخخ اجا منقذي الحمدالله ما كنت ابي ادخل
راحت له نوف ولمحها رائد
نوف :ورع امسك ذا الفطور حقكم بروح اجيب ثلاجه الشاهي استنى
رائد:طيب بوديه وارجع
راحت نوف تجيب الشاهي ورائد دخل الصحن
وحطه على السفره والكل جلس وهو خرج يستناها تجيب الشاهي الين لمحها من بعيد ونطق:الحمدالله اجت بطني تقرقر جوع
نوف:ورع امسك يلا انا بروح افطر لا يلهطو الاكل علي
رائد: تمام مع السلامه
"عند غرام ونهى"
غرام:خلصتي تصوير
نهى :اي اي شوفي شرايك بذي
غرام:يهبلونننن
نهى:يلا نرجع جيعانه اكيد حطو الفطور
غرام:اي يلا
مشو نهى وغرام الين مرت فتره ونطقت نهى:غرام احنا فين قاعدين نمشي طولنا
غرام بتوتر:تبين الصراحه شكلنا ضعنا ماني عارفه الطريق
ناظرتها نهى وبدات تضحك بعدم استيعاب وطالعت لغرام ونطقت:تستهبلين صح؟
غرام وهي تهز راسه بالنفي:لا للاسف
نهى ضربت غرام برجلينها
غرام:احح يعوررر هدي ترا معنا جوالاتنا ببساطه نقدر ندق على اي احد يجون يدورونا وبعدين احنا مو مره بعيد بيلقونا ان شاء الله
نهى وهي تبكي وتشهاهق بصوت عالي:مستحيل خلاص احنا بنقعد هنا وماعد بشوف اهلي
غرام وهي تضحك :اوف يا الدراما كوين هدي علينا بدق على وحده من البنات يقولون لاعمامي يجون ولا واحد من العيال
نهى وهي تمسح دموعها وتشهق وتطالع بغرام:انتي ليه كذا بارده؟؟؟؟
غرام:ببساطه لان مافيه داعي ابكي اكيد بيلقونا ماله داعي الدموع
نهى وهي تبكي وبصوت مهزوز نطقت:اوففف ترفعين الضغط ببرودك هذي تخيلي نبقى عالقين هنا وما يلقونا
صرخت غرام عليها :ياربيييي انطمي خلاص تراك اوفر انطمي خليني ادق عليهم
نهى وهي تكمل بكيها وتصد عن غرام اما غرام تجاهلتها ودقت على شوق
غرام:هي بنت الو
شوق:يا حيوانات فينكم الدنيا مقلوبه تدوركم
غرام لا بس رحنى عند التل وضعنا بالله عليك اذا ماعليك امر قولي لاحد يجي لنا لان ضعنا صدق وماندري فين الدرب ونهى اشغلتي قاعده تصايح وتتبكبك عند راسي عاد تعرفينها بكايه
نهى بصوت عالي وهي تبكي :ماني بكايهههه
شوق :شفيها تصرخ ؟
غرام:مافيها شي انتو بس تعالولنا وربي بموت جوع
شوق:احنا ما كلينا اصلا ندور عليكم ولا احنا قادرين نقول لجدي نخاف يرتفع ضغطه
غرام:وييي طيب قولو لاعمامي لاتقولون له ولا قولو للعيال لاشغله ولا مشغله ملا يتسدحون
شوق:طيب طيب يلا بسكر بروح اطمن جدتي وام نهى حرفيا منهاره
غرام:وييي ياروحي هي وربي اني كلبه لو اني مارحت بسس
شوق:هههه يلا باي
غرام:باي
سكرت شوق وغرام طالعت بنهى الي جالسه على التراب وحاطه راسه على رجلينه وتبكي
غرام:خلاص هدي بيجون لاتبكين
تجاهلتها نهى وكملت بكي وغرام جلست وتربعت على التراب وبدت تهوجس
"عند الحريم"
ليلى :وهذا هو الشاهي يلا اقلطو خل ناكل بموت جوع
جلسو كلهم وقبل ما ياكلون طالعت جده هيله في البنات تدور على احد
نوف:شفيك ياجده
جده هيله:وين نهى وغرام؟
هدى وهي تطالع بالبنات :ماشفتوهم؟
بثينه : بروح ادور عليهم
شوق:بجي معك
راحو شوق وبثينه ودورو بكل مكان ورجعو وهم يلهثون من التعب
بثينه :مالقيناهم
جده هيله بتوتر وخوف:كيف مالقيتوهم
هدى بخوف:يويلي فين بنتييي؟؟؟؟؟
خلود :يامره صلي على النبي موجوده يمكن عند اخوها ولا ابوها ولا بمكان
هدى بخوف :مستحيلل فين بنتتييي
شوق:ياعمه اول صلي على النبي
هدى بخوف وتوتر:صلى الله عليه وسلم
شوق:شوفي ياعمه انا بروح عند الرجال اسألهم ممكن عندهم
جده هيله بخوف :مهبوله انتي لا لا اقعدي
شوق:طيب ما نتغطى عنهم جدي واعمامي والعيال شفيه
جده هيله بعصبيه:قلت لك اجلسي لا اهفك ذحين بالعصي حقتي
شوق:ابشري
هدى:طيب ما لاحضتو انهم مو موجودين؟؟؟
البنات بصوت واحد:لا
بثينه :طيب خل ندق عليهم
شوق بروح اجيب جوالي انا عندي رصيد
راحت شوق تدور جوالها الا تلقى اتصال من غرام وردت شوق وقفلت وراحت عند الحريم تبشرهم وحكتهم وش قالت غرام
جده هيله بعصبيه بس ارتياح باين على وجهها :وذولي الدلخات وش ودهان عند التل؟
شوق:مدري المهم جيبو احد يدورهم
هدى:طيب كيفها نهى
شوق:مدري سمعتها من المكالمه تصرخ بكلمات ما سمعتها وسالت غرام وقالت مابها شي
هدى بعصبيه وخوف :يارب يارب اوفففف
جده هيله:خلاص يا مره اهدي واشربي ماء وكلي بيرجعون
هدى وهي تبكي:لا لا ماباكل ولا اشرب الا لما ترجع لي بنتي
جده هيله:لاحول ولا قوة الى بالله
هدى وهي تمسح دموعها:نادولي خالد بسرعه
ليلى:انا بروح
راحت ليلى ولقت حمد ورائد واقفين برا
رائد:شتسوين هنيه
ليلى :ناد خالد
رائد بعصبيه بانت على وجهه:شتقولين يابنت!!
ليلى:يادلخ امه تبيه
رائد بانت على ملامحه الارتياح:اها طيب قولي من اول طيرتي نيتي
ليلى:شسوي اذا انت ماتعرف تحسن الضن
رائد:كلي تبن المهم حمد رح ناده
حمد:طيب
ليلى :يلا انا بروح
رائد :طيب بس دقيقه ليه امه تبيه؟
ليلى بتردد :اااا مدري يمكن تبيه بحاجه
رائد :طيب خلاص روحي
ليلى:مع السلامه
رائد مع السلامه
"عند حمد "
حمد بصوت جهوري:السلام عليكم
الكل:وعليكم السلام
حمد توجهه عند خالد:هي ورع امك تبيك
خالد:ليه
حمد:مدري شدراني رح عندها
خالد: طيب
راح خالد عند امه ودخل ولقها تبكي والكل عندها يهديها وحتى فطور ما اكلوه اجا عنها خالد بخوف وتوتر:شفيس يا يمه فيك شي ؟
هدى وهي تبكي:اختك ..
خالد بتوتر وخوف:شفيها اختي؟!
هدى وهي تبكي وتشهق:ضاعت وحدها مدري فينها
جده هيله بعصبيه:هدى لاتحرفين غرام معها شف خالد نهى وغرام ضاعو عند التل الي هنيك ورا شوي بعيد هو ومايدرون كيف يرجعون ضاعو رح جيبهم
فز خالد من اسم غرام ونطق:اذا كذا الموضوع ابشرو ان شاء الله القاهم ويا يمه هدي ما يسوى
هدى وهي تبكي :وش الي ما يسوى اختك مدري فينها وتقلي مايسوى!
خالد وهو يطبطب على امه :خلاص يا يمه انا رايح وماني راجع ان شاء الله الا وهي بحضنك اهدي
هدى وهي تمسح دموعها:توعدني
خالد وهو يضحك:وانا قد خلفت بوعدي؟
هدى :رح يا ولدي رح
خالد :ابشري
بثينه بهمس لنوف:اب اول مره اشوف خالد يضحك وبعد احلو اخر مره شفته من زمان
نوف بهمس:اي ولله وبعدين اكيد ما بنشوفهم قليل نتجتمع
بثينه بهمس:اص اص جدتي تطالعنا
وسكتو البنات
"عند خالد"
راح خالد عند مجلس الرجال وبصوت جهوري مليئ بالهيبه :السلام عليكم
الكل:وعليكم السلام
خالد :انا بروح عندي شغله بقضيها ساعه وانا راجع
جد جبر:وش عندك ؟
خالد:يعني كم شغله
مصعب:وش هي
جد جبر : خله يا مصعب خله روح ياولدي دام كذا الوضع رح
خالد:شكرا
راح خالد وركب سيارته ومشى فيها وبدا يدور الين لمح ثنتين جالسين ودقق شوي ولقى نهى حاطه راسها على رجلها ولف عينه لقى غرام وفز من شافه وسرح فيها وبشعرها الطويل المفكوك الي يتطاير من الهواء وصحى على نفسه من انتبهت غرام لسياره جايه وتنحنح وجا عندهم
"عند غرام ونهى"
كانت نهى تبكي اما غرام تهوجس وتتذكر ذكرياتها مع امها وابوها الين لمحت سياره ودققت فيها لقتها خالد وسرحت بجماله البشره البيضاء واللحيه المرتبه وحواجبه الي تتوسطها خدش بسيط زادت رجولته وعيونه الناعسه وشعره الكثيف وانفه المسلول مثل السيف حرفيا سرحت بجماله وانتبهت على نفسها وتنحنحت وقامت وناظرت بنهى ونطقت:نهى اجو يلا امشي اضن اخوك الي جاء
فزت نهى وقامت بفرح تمسح دموعها
وصل عندهم خالد ونزل من السياره ركضت نهى لعنده وحضنته وانهارت بكى
خالد انفجع منها وبغى يطيح بس تمسك بالسياره ونطق:نهى شفيس
نهى وهي تبعد وا تمسح دموعها:لا لا ولاشي خلنا نركب ابي اروح عن امي
خالد وهو يبتسم:هي اصلا تدور عليك
طالعته غرام وشافت ابتسامته وسرحت فيها وذابت زياده ولاحضها خالد وهي انتبهت وصدت وهو ابتسم ابتسامه هاديه تعكس كل مشاعره المتضاربه بسبب نظراتها له
خالد وهو يحاول يتجاهل مشاعره وتنحنح ونطق:اركبو الكل خايف عليكم
نهى وهي تبتسم ووجهها صار احمر من الدموع :ابشر
ركبت نهى جنبه اما غرام ورا مقعد خالد
"عند الحريم"
جده هيله:خلاص يامره هدي ولدك راح يجيبها خلاص
هدى وهي تمسح دموعها:اخخ كيف اهدا وبنتي مو معي
جده هيله بعصبيه:خلاص قفلو الموضوع امشو كلو والي مايبي ياكل لا ياكل
مشو كلهم ياكلون وهدى اكلت لقمتين وقامت قعدت بالزاويه
جد هيله:شفيس ياهدى ماكليتي شي
هدى :شبعانه مالي نفس
جده هيله وهي تتنهد:طيب
اكلو وخلصو وجلسو يستنون جيتهم
هدى:ابوها يدري
خلود :الواضح لا
ليلى :اي مايدري
بثينه :تبون اقول له؟
جده هيله:كل هذا وما يدري كيف انا بنفسي بروح اقول له كيف ابوها ما يدري دلخ ذا مايعرف ينتبه لوراعينه !
وقفت اشواق وهدى يمنعون هيله
هدى :ياعمه اهدي ماله داعي
جده هيله وهي تبعد :الى له داعي بنته ضايعه وهو جالس ما ومايدري؟
هنوف وهي تتنهد:ترا صدق بنته من حقه يعرف
جده هيله :انا بروح اقول له
راحت هيله ولحقوها البنات والحريم دخلت هيله وبصوت جهوري نطقت:السلام عليكم
الكل باستغراب:وعليكم السلام
جد جبر:شفيس يامره شعندك؟
جده هيله وهي تطالع بمصعب:جابه اقول كم كلمه لمصعب
مصعب بتوتر:تكلمي يايمه شفيه
جده هيله:بنتك ضايعه وانت جالس تتقهوى وما تدري عن هوا دارها؟
وقف مصعب بصدمه ونطق:فينها بنتي شفيها ؟
كلهم سكتو ومحد رد اما الرجال والعيال والجد منصدمين ويستنون رد اما مصعب وجه نظره لهدى:هدى وين بنتي وليه انا اخر من يعلم
جده هيله:لاتعاتبها خلاص البنت راح لها خالد يجيبها
جد جبر:وحدها ولا حد معها
شوق:غرام معها
جد جبر:وانتو بس مهتمين لنهى مادريتو عن ذي المسيكينه ما سالتو عنها ؟
جده هيله : الى سألنا بس خلاص قفلنا الموضوع بيجيبهم خالد وانتهى
هدى:انا بروح استناهم برى
جد جبر:كلنا جايين معك
راحو كلهم ووقفو برا يستنون رجعتهم
"عند خالد ونهى وغرام"
كان خالد كلشوي يناظر بعيون غرام ويرجع ينزل عيونه وعلى ذا الحال الين وصلو ونزلو ولقو الحريم كلهم برا يستنون ووراهم الرجال
خالد بنفسه:ابك شدراهم مو هم ماكانو يدرون؟
توجهت نهى لامها تحضنها وهدى تمسكت فيها وهي تبكي و..........
_____________________________
بس اتمنى عجبكم ذا البارت وادري اني كلشوي اخلف وعودي واتاخر بالتنزيل بس تدرون شويت ضروف بس وعد المره الجايه ما بخالف وعودي وبس مع السلامه اشوفكم بالبارت الجاي🥹🫶🏻
(اعذروني على الاخطاء الاملائيه)
الكاتبه :جوجو ال منصور