باوعنا جان امير واكف لازم بيدة سلاح ويرمي بالجو انصدمت من شفتة شلون صاير فرد مرة ضعيف ومبين سكران لحد ما اجوي مجموعة ولد جروا السلاح منة واخذوا من الشارع
انهبطت وكلبي ضل يوجعني جرني ابراهيم وهو يتفقد الجامة نزل البردة عليها علمود ما كل شوية أشوفهة رجع يشوف الحايط ولكة الطلقة بالكاع شالها شمرها بسلة النفايات
ابراهيم : الحمداللة بالحايط ولا بغير شي
نبأ : عزا هذا شلون صاير ليش هيج
ابراهيم : من المخدرات شتردي يصير يعني أمشي خل انام ليضل على بالج
لاحضت علية منزعج ومتوتر وتغيرت تصرفاتة مادري ليش نام ودار وجهة عني حتى محضني مثل كل مرة استغربت شبي
تمددت واني الف حسبة براسي ليش هيج صار وعلمود شنو خاف اجة على بالة الماضي
وراح يكلب علية ضليت احوص بمكاني لحد ما غفيت..
صادف ثاني يوم جمعة محد عندة دوام كعدت متأخرة شوية انتجيت وجريتلي صفنة درت وجهي شفتة بعدة نايم استغربت هو صاير بأيام العطل يكعد من وكت شبي اليوم !!
كمت بدلت ملابسي غسلت ونزلت سويت ريوك وكلت البزازين الي بالباب ودخلت صعدت فوك دخلت للغرفة وهم بعدة نايم رحت كعدتة
