අවීලා සමඟින් එක් වී චීචා සැකසූ ඇඩෙලිටා, පේද්රෝ ට ඉන් කොටසක් ගෙන ගොස් දීම ස්වේච්ඡාවෙන්ම භාර ගත්තාය. ඇය මේ මාන බලමින් ඉන්නේ පේද්රෝ ව කතාවට අල්ලා ගන්නට ය.
අනෙක, ගොවිපළ නැරඹීමට ත් තවම බැරිවුණා නොවැ. මොකක්දෝ කෝන් කමක් සිතේ රජයන බැවින් ඔහු හා සංවාදයක් ඇරඹීම තවම උගහටය. අව්ලා සිටියදී, වැඩි හරියක් සන්නිවේදන කටයුතු වන්නේ ඈ හරහාය. එහෙත් ඇඩෙලිටා ට ඇවැසි වන්නේ ඔහු සමඟ තනිපංගලමේ කතාබහක නිරත වීමය.
මේ වෑයම ඒ කාරණාව සාක්ෂාත් කරගනු පිණිසය .
ඇගේ ඉදිරිපත් වීමේ යම් අමුත්තක් දිස් වුවද, සියල්ල වන්නේ යම් හේතුවක් මත යැයි අදහන අවීලා, ඇයට බාධා කිරීමට නොසිතුවාය.
'ඇයට ඕනෑ නම් ගියාවේ .
යමක් සිදු වන්නට ඇත්නම් එය වළක්වන්නට බැහැ නේ. .'
ඉතින් වීදුරු බෝතලයකට වත් කර ගත් චීචා ද, වීදුරු දෙකක්ද, ආහාරයට අව්ලා සාදා ඇති ඇල්ෆාහෝරෙස් විස්කෝතු ටිකක් ද මල්ලකට ලා ගත් ඇඩෙලිටා ගීයක් මුමුණමින්, ගොතා ගත් කොණ්ඩා කරල් දෙකද පද්දවමින් සතුටින් ගොවිපල බලා පිය මැන්නාය. ඔබට ඇසුණා නිවැරදිය. කලකට පසුව ඇය සතුටින් පසු වේ.
මමා මායා ගේ නිසැක ඖෂධ වල මහිමය දෑසින් දැක බලා ගන්නට මහාචාර්ය රොඩ්රිගස් මෙහි නොමැති වීම අභාග්‍යය ක් නොවන්නේද ?
ඈ පිටත්ව යන අයුරු කවුළුවෙන් නරඹමින් සිටි අවීලා තමාටම මුමුණාගත්තේ නිසැකවම එවැනි යමකි.
ඊළඟ වතාවේ විස්මයෙන් දෑස් විසල් වූයේ පේද්රෝ මමානි ගේය. මෙන්න ඇඩෙලිටා ඔහුව සොයා ගෙන ඇවිත් ; ආහාරපානත් රැගෙන !
පේද්රෝ අලි අමාරුවක වැටුණේ ඉන් අනතුරුව ය. ඔහුට ආහාරත්, පානයත් පිළිගැන්වූ ඇඩෙලිටා ඔහු සමග ගොවිපළේ ඇති බංකුවක වාඩි වී ආහාර ගනිමින් සිටියි. ඇයට වගේ වගක් නැතිය.
ඇඹරෙමින්, කැරකෙමින් හාත්පස නිරීක්ෂණය කරයි. කුඩා කල මතක ඇගේ මනසට ඇදී එන්නා හාම ඇය මදින් මද දොඩමළු වන්නට පටන් ගත්තාය.
ළමා කල සිද්ධි ආවර්ජනය කරන ඇය මඳහසකින් මුව සරසා ගත්තාය.
ඇගේ සොඳුරු මදහස..!
ඇගේ පිරුණු රෝස පැහැ දෙතොල්, පරිපූර්ණ, කුඩා මුතු වන් දත් දෙපෙළ, පේද්රෝ ගේ සිහිය විකල් කරවන්නට පටන් ගත්තේය.
