« ياقلب دقات الهوى لاعبتني قامت تمايل بالدلع كانه العود »

البارت التاسع عشر

ما اسامح الي يقرو بدون لايك‼️
بسم الله الرحمن الرحيم
•
•
« بيت ابو طارق »
اشتد غضب طارق من شاف فهد يدخل مجلسهم هو وابوه وعيال من قبيلته ، عزام : ياهلا ارحبوا ، طارق رح خل الاهل يزهبون القهوه
عض شفايفه وهو يناظر في فهد المبتسم والكاشخ : ابشر
خرج من المجلس متجهه لغزال : قومي قومي زهبي لنا قهوه
تركت ما بيدها ونطقت بتسأل : من الي جونا ؟
رص على اسنانه بغضب : اهل فراج
غزال بصدمه : غريبه صايرين تزورون بعض الله علي جمعتكم!
تنهد من اخته البزره : روحي الله يهديتس سوي القهوه
دخلت المطبخ وهي صدق مستغربه زيارتهم .
« في المجلس »
طال صمت ابوه الي مركز مع تعابير طارق وابوه ، طارق الوحيد الي مايدانيهم لانه مسبقا يعرف سبب الزياره !
ابتسم عزام : غريبه وش سبب هالزياره الحلوه ؟
فراج بتردد : احنا يا عزام نبي القرب ، نبي بنتكم لولدي فهد ويشهد علي ربي بنتكم زي بنتي الوحيده
وقف طارق وجلسه عزام قبل يروح يهجم : صعبه يافراج الله يستر عليكم
وقف فهد وكله حزن من رفض ابوها : يا عم جيتك لحد بيتك .. ليد بنتك اتقدم !! ، بشرع الله ونص الدين ابا اتمه طلبتك قولها لي تم
تصدد وجه عزام وطال صمته ثم قال : اسمع .. بنتي لأبن خالها !
عض شفايفه ونطق وهو يترجاه : لاترمي الشوك فعيني وقلبي المغرمّ ، بطهر الأرض عرفنا بعض لا توقف في طريق الحلم وخذ مني وعد أنّي أخليها فمجرى الدم
تمايل راس عزام يمين وشمال ينكر قوله وهو يقترب من فهد همس في اذنه ونطق : نصيبك مع سواها تنال
ناظر في عزام الي واضح اليأس بعيونه : بعد بنتك احلف لك تحرم علي بنات آدمّ !
اشر فهد بيده اليمنى على جهه صدره اليسرى : وهذا القلب .. يا عمي صعب حلف بعشقها ،، بقولّك شي دامني حي أموت وغيرها يحرمّ ..!
التفت وخرج مع ابوه وعيال قبيلته ..
« بمكان ثاني لكن بنفس البيت عند باب المجلس »
اتسعت عيونها بصدمه تتسمع لهم هي وصديقتها لحكي فهد مع ابوها : ليه يرفضه !
اريام "صديقه غزال " : تبينه !
تكت على الباب وهي تفكر بحكيهم انفتح الباب وطاحت قدام طارق : ملاعين جدف انتِ وياها تتسمعن لرجال !
التفت عزام لبنته : تعالي ..
بلعت ريقها وهي ترجف ، اتجهت عند ابوها وخلفها طارق : ليكون تحبينه وتبينه ؟
ناظرت في طارق الغاضب وعروقه البارزه وناظرت في اريام صديقتها : مـ.. •
•
« غرفه عذاري »
جلست وهي مهمومه من ضيقه سعود ، اخذت جوالها تكتب له : بزعل منك لو تدخن الحين !
طلت على شباكها وناظرت له جالس يدخن ، ناظر لجواله الي جته رساله ونقز ياخذه بعد ماشاف الاسم ضحكت بصمت عشان لاينتبه لها ، قرا محتوى الرساله ورمى الدخان بسرعه يكتب : ما ادخن
ضحكت وهي تكتب له : تسذوب شايفتك !
ارتفعت نظراته لشباكها وضحك : واحنا لمتى بنجلس كاننا حراميه ؟ تراتس زوجتي يعني اقدر اخذتس
عذاري بابتسامه : ولو لازم يصير زواجي وبعدها اجي معك لبيتك !
اتسعت ابتسامته : تقصدين بيتنا !
همهمت بهدوء وهي سانده حالها على كفها وتناظر له : عطني شعر !
ابتسم ونطق : ذا الشعر لتس .. يقوولتس
حبيت بنت ملكت كل العجايب
ست حسن ودين وبنت اجاويد
-
رفرفلها قلبي مثل حمال السحايب
وسكنت فيه بدون شوري ومواعيد
-
خطفت قلبي وسكنت في الآعاذيب
وعيني ماشافت غيرها تصيد الريشه
« في طريق الرجعه بديره ابو طارق »
نطق واحد من عيال ديرته يسال : ليه تبيها هالكثر ؟
بحزن وهو يناظر لطريقه : لاني حبيت حاره موب حارتي حبيت قبيله موب قبيلتي حبيت اسم موب اسمي .. بس عشانها ..
ابتسم وهو يطبطب عليه : يافهد بسمعك شي لعيونك يقولون ..
اهل الدار اتهموها بالعار
وجاها الغريب يناديها الشريفه
-
اخوها وعدها يجيب لها الثار
اثاري ثاره طلقه بظهرها ..!
تنهد تنهيده طوويله : موب اخوها الي طلق عليها عامل عمهم الي طلق ..!
بصدمه : ليه ..؟
فهد ببعض الغضب : جاي عشان تاخذ العلوم ؟
ابتسم باحراج : لا والله شدعوه فضول بس
رن جواله وماكان الا طارق وبهمس : يارب تفتحها بوجهي
رد على طارق وسرعان ماعبس : ابوي يقول تعالوا مايصير تطلعون من الديره تالي الليالي
فهد : الله يعطيكم العافيه خلاص بنطلـ..
قاطعه طارق : موب من علومنا نترك الضيف يمشي تعال يافهد انت وابوك وعيال قبيلتك نخدمكم بعيونا
اعطى ابوه الي جالس جنبه الجوال ورد فراج وهو يحاول يسلك ومايروح لهم ثاني مره لين اصر طارق وانحرج فراج منه ، رمى الجوال على الطبلون وناظر بولده ، وقفت سياره فهد قدام باب بيت الضيوف ، نزلوا من السيارات وبقى فهد بسيارته .. تذكر ذيب واتصل عليه : ارحب وش صار ؟؟
ابتسم ونطق بضحكه وهو داخله مكسور : انرفضت
صمت ذيب لثواني ونطق : لو اني بنت قبلت بدون افكر !
ضحك فهد : يبونا نجلس عندهم بعد ، واضح يبون يكسرون قلبي اكثر ! •
•
« مر يوم كامل صعب على فهد والغزال »
تذكرت كلامها مع ابوها واستحت من تذكرت وقت سالها اذا هي موافقه وكانت اجابتها " مادري " طلعت مع اريام لسوق الديره وهي بتبيع قلادتها: وش بتسوين بفلوسها ؟
ناظرت لقلادتها العزيزه عليها : ابوي يمر بازمه الفتره ذي وناقصه فلوسه اكيد بعطيه اياها !
اريام ببعض الحزن : غزال ذي موب قلاده امتس !
تنهدت : اي بس ..
اريام : لا بس ولا شي ترى بيزعل منتس !!
بتردد وهي توقف عند اول محل : بس انا قررت !
دخلت المحل تنطق : لو سمحت تشتري قلاده ؟
ناظر للي بيدها : لا الله يرزقتس
طلعت تدور بين المحلات وهي مغطيه نصف وجهها عشان مايعرفونها ،، وقفت عند رابع محل : تشري قلاده ؟
اخذ منها القلاده يتفحصها : اي تبيعي بـ 500؟
بصدمه : بس ذي من ألماس !
نطق وهو يناظر للقلاده : خلاص 700 تبيعي ؟
تنهدت ونطقت : زود شوي
هز راسه بالنفي : بعت ..!
ابتسم واخذ القلاده يعلقها وطلع الفلوس من جيبه ، طلعت بحزن وهي تعد فلوسها ، اريام: ابوي يتصل
ردت عليه وماكان الا يطالبها ترجع البيت ، ودعت غزال الحزينه.
ناظرت بالارجاء وبيدها عصير بارد ، تنهدت باسى : ياااربي شسويت والله لو يدري يدْبحني !
تنحت بالشخص الي جا عندها وبيده كيس ، بلعت ريقها بخوف ووقفت تناظر في الفهد الجاي : فهد !
مد لها الكيس بابتسامه وبدورها اخذته بتوتر تشوف وش فيه ، اتسعت عيونها وهي تشوف قلاده امها : ذي قلادتي الي بعتها وش جابها عندك ؟
ابتسم وهو يناظر عيونها : جابتها عيني الي تتبعتس من كل محل .. وقلبي الي يدلني على مكانتس
اخذتها بيدها والعبره خنقتها : الله لا يلحقني عزاك
اخذ نفس ونطق وعيونه بها لمعه : كفي عن الكلام الي يتعب الخاطر وانا ابن فراج .. تهياتي فيني حب ناشفات عروقه .. تقبليني رجال أتزوجك على سنه الله ورسوله ؟
اتسعت عيونها وهي الي ماقدرت ترد على حكيه
انظارهم طالت و انربط لسانها ماقدرت على الحكي معه ، شل لسانها وحركتها من صدمتها وجرائته !
فهد بهدوء : غزال ..
ناظرت بعيونه الجاده وماكان يحمل بها أي مزح او كذب ، فهد بحزن : غزال انا احاكيتس !
رجعت لوعيها من شافت نظراته الحزينه والي كسرت خاطرها: شوري من شور ابوي واخوي ..!
عض شفايفه ونطق وهو يبتعد : صدقيني ما برتاح الا وانتِ على ذمتي ياصيدي !
ابتسمت بحزن وهي تشوف ظهره : والله اني احبك بس اهالينا ..
تنهدت ومشت هي بعد للبيت .
•
•
« بيت متعب »
وقفت وهي تحس بوخز ببطنها وهو اليوم موعدها ، اتجهت لصاله عند متعب لكن استوقفها صوته : لا لا ياعيوني مطلق بس اقدر اخذ الثانيه
اتسعت عيونها وهي ماتنكر انها كانت شاكه به من اول ! ، اتجهت له وهي تمثل الالم : مـ.. متـ..ـعب !
ناظرها وهمس بالجوال : يلا بعدين اكلمتس
قفل الجوال متجهه له : بسم الله علامتس ؟؟
ناظرت له بألم مزيف : مادري بطني يعورني وخايفه يصير شي بولدي ودني المستشفى !
تافف وهو يرجع لمكانه : مالي خلق اوديتس خلي حفيد يوديتس
ناظرت له ببعض الغضب : ليه حفيد ! الورع الي ببطني ضناك ، يعني انت الي بتوديني المستشفى!
اتجهه للكنبه ينطق : ميهاف ! قلت لتس مالي خلق لاتزودين حتسي !
التفتت له بغضب : انت علامك !! ،، وش صاير ليه متغير ؟! فهمني وش بك ! علامك علي ليه ماتحترمني !
وقف قبالها بغضب : مزاجي !
ضربت صدره بيدها اليمنى بغضب : المفروض من خذيتك وشفتك تسذا طلبت الطلاق !!
نطق ببرود : اطلبي الطلاق وش تنتظرين ؟
رجعت بخطواتها للخلف والغضب يستحلي عليها: الحين! بعد ووش !! هشرها موب عليك هشرها علي انا الي معتمده على ذكر !
التفت لها بغضب وهو يقترب منها شد على معصمها : تعديتي حدودتس ياميهاااف تعديتيها !
ابعدت يدها ونطقت : فك يدييي الحقيقه توجعك ! ، تبي تنكر انك ماتقدر تتحمل المسؤوليه ؟ يالخسيـس !!
طاحت على الارض والتف راسها من حست بالكف القوي الي جا على خدها الايمن وشعرها القصير انتثر على وجهها ، تحسست بيدها اليمنى خدها وبكت بالم : تمد يدك !!
ناظر بيده بصدمه ونطقت ببكى : والله ماجلس عندك !!
ركضت لفوق وهي موب قادره تشيل حالها تحس بتتقطع من ألم بطنها ، رمت اكثر ملابسها بشنطه وبيدها الجوال تحاول تتصل بحفيد وهي تصيح واخيرا رد ، اتسعت عيونه وهو يسمعها تشاهق وتتكلم بلغه ما فهمها : اهدي ميهاف ! شفيتس يابنت اهدي واهرجي
اخذت نفس عميق وبدات تبكي اكثر : مـ.. مـ.. متعب ضربنيييي
وانهارت اكثر على نهايه كلامها ، سمعت اخوها بالجوال يسب ويتشتم به : الحين اجي والله لاوريه التسلب
مامرت دقايق كثيره لان بيتهم قريب بشارعين وجاء حفيد، اتجهه متعب بغضب لميهاف : انتِ على طول تقولين لاهلتس البيت له اسرار !!
ضحكت ميهاف ونطقت : يوو تناقض اقوول انقلع افتح الباب ولا بروح انا ، شكلك متروع ومسويها بنفسك ؟
ضحكت على اخر كلامها وهي تجر شنطتها لتحت وهو خلفها يحاول بها تجلس ، فتحت لحفيد الباب ودخل بسرعه بدون يناظر لها حتى واتجهه لمتعب الواقف عند الباب الداخلي ، رفع حفيد يده على متعب بغضب : معطينك اياها عشان تضربهااا !! ومالقيت تضربها الا وهيييي حااامل بولدككك لهدرجه انت رخمه !!
صفقه حفيد لين عض الارض ووقفته ميهاف بخوف ، دخلوا السياره ونطق بغضب من شاف اثر الكف على خدها : على جىًتي ترجعين ! ، تولدين وياخذ ولده وينقلع مانشوفـ..
قاطعته ميهاف بخوف : ماياخذ ولدي الي بياخذ ولدي الله ما ياخذه هوو !!
تنهد حفيد وحرك السياره لبيت ابوه مطحس
« في بيت متعب »
سند حاله على الجدار وهو يلاقط انفاسه ، مرتعب من قوه حفيد ماقدر يدافع عن حاله ، مسح الد*م عن وجهه جبينه انفه فمه كلهم يصبون بلا توقف واثار حفيد عليهم !
اخذ جواله وهو يتالم يتصل على ريان : ر__ ريان فاضي ؟
نطق ريان وهو يناظر لمروان : رايحين لسامري بغيت شي ؟ وصوتك علامه تسذا ؟
اخذ نفس ونطق : ياولد تعال لبيتي احس بمو*ت
ريان بخرشه : وش بك ؟؟
سمع صوت مروان الي اخذ الجوال وواضح هو الي يسوق : متعب ؟؟ وش بك ؟؟
متعب بألم : حفيد صفقني
سمع صوت عجلات السياره تتوقف بقوه ويرتد مروان وريان بقوه لقدام ، مروان بالم من الضربه الي جت على راسه : اصبر الحين اتصل عليك به حادث قدامنا ! بغينا نصدمهم
متعب بغضب : ديور وتعال اقولك بمو*ت بمكاني الله ياخذ عدوك !!
لف مروان السياره ورجع لديره : مسافه الطريق وجايين
قفل الخط ومتعب جازف انه مايقفل عيونه ، مرت ربع ساعه او اكثر بشوي وانفتح باب الحوش ودخل منه ريان ومروان متروعين ، مروان : اعوذ بالله علامك ؟!
اقتربوا منه يشيلونه ، تاوه بالم وتركوه : اتصل بالاسعـ_
قاطعه متعب بالم : لا .. بياخذون حفيد ويطردونه من وظيفته يمكن ! ، انا سببت المشكله بس خذوني لداخل بيتي
شالوه ونطق ريان وهو يتنحنح : طريق ياولـ..
قاطعه متعب بابتسامه حزينه : موب هنا خذ راحتك
ناظروه باستغراب ودخلوا للمجلس ، ريان : شسالفه ليه صفقك ؟؟
اخذ الفاين من مروان ومسح فمه وهو يناظر بالمرايه : امور عائليه
مروان بسخريه : الله ياذي الامور الي ماتخليك تقوم وتمشي خربت علينا الطلعه !
مسح ريان على دقنه : اي والله خربها بغيت ارقص واطلع كل الي بي !
متعب بسخريه : ومن متى انت عندك هموم ؟
تكى ريان على المركى وابتسم : هموم اكبر من البحر وسمكاته
متعب نطق بدون وعي : ولل كل ذا عشان زوجه سعود ؟
ناظره مروان بحده وسكت وهو يحس بتورط من شاف نظرات ريان الي بردت : وبه شي سويته موب عشانها ؟ ماشوفها الا دنياي وعندي امل انها لي وبتصير حرمي يوم من الايام !
متعب بشك : حتى لو جابت ورعان من سعود ؟
التفت ريان بحده لمتعب : حتى لو جابت عشر وراعين !! حتى لو بعد عشرين سنه بتصير حرمي يامتعب بس انتظر
تنهد مروان : امسح الد*م الي على فمك يامتعب واقطع الشر جايين عشانك لاتفتح مواجع !
ابتسم متعب : ماكان قصدي والله بس فضول ولا اني مستوعب وش اقول
ريان ببرود : ماعليه معذور
مروان بتذمر : يوووه والله كنت ابي ارقص الليله كله منك
ضحك متعب رغم مواجع قلبه : تعوضونها بليله ثانيه واكون معكم
« في بيت مطحس »
دخل حفيد للمجلس وهو يعرف ابوه مايرقد هالحزه : لعنبوهم من عيال
التفتوا للباب الي انفتح ودخل منه حفيد وميهاف الي وراه ، قذله بصدمه : ميهاف ..!
مطحس : وراتس موب عند زوجتس ؟!
ناظرت في ابوها وبدات تبكي : مابي ارجع له ابي الطلااق !!
قذله بصدمه اكثر : ميهاف تعالي يامي شبلاتس !!
جلست جنب امها وبدات تبكي اكثر ، حفيد بغضب : ماتطب بيته الخسيس !!
مطحس بغضب : اقول سد حلقك وخل نفهم !!
عدل جلسته مطحس وناظر لميهاف الي تهديها امها ، حفيد بغضب : قاايل لكم متعب مااايصلح لها مااايصلح لها !! ،، الخسيس ضربهاا صفقها وهييي حااامل بولده !!
التفت مطحس بغضب لحفيد : مايخسى الا هو !
ناظرت ميهاف بصدمه لابوها وهي الي كانت على بالها راح يقولها ارجعي كله كف بس الي صدمها انها دافع عنها ، مطحس : اييي مايخسى الا هو ترجع يضرب بنتي الي ماقد مديت يدي عليها يضرربهااا !
قذله بتوتر : مطحس هد الضغط عندك لايرتفع
التفت مطحس بحده لولده : عساك ماضربته !!
حفيد بابتسامه فخوره : خليته يعض الارض والد*م لرجله
مطحس بفخر : بعدي بعدي والله
« يوم السبت بالمجلس بيت رزنه العصر »
التفتت الجازي لعذاري : في واحد فاقعن تسبدي وودي اسوي به حركه تخليه مايقربن لـ عيال خوالنا
شربت من الشاهي عذاري وناظرت في الجازي الي أكملت : اقولتس فاقعن تسبدي تشربين جغمه جغمه من هالشاهي لعنبوك خلصتي علي الدله
شرقت عذاري وهي تضحك على لهجه الجازي الغريبه امداها تغيرها : وش بعد تحكين انتِ !!
الجازي بابتسامه : قصيمي يابعد حيي شرايتس بس ؟
ضحكت ونطقت : عشان بكره به دوام لتس تمين بعد خلينا نفلها بس من ذا ؟؟
ابتسمت الجازي بخبث : والله اني افكر بها من امس وبعد تحليلات حسيت محدن بيعرفنا
تربعت عذاري تناظر لها : وان عرفونا ياخبله مروان ؟
نبض قلب الجازي بعنف من اسمه : وش خبله مروان وش دخله هالحين بس ماعليتس ابن امه يعرفنا
عذاري وهي تاكل من الفصفص وترمي قشره بالكيس : تم وش عندتس ؟
الجازي رفعت يدها توصف قد ايش حارق دمها : اقولتس يصفق زياد وصقر وتبيني اسكت عنه ! معصي ولد خالي ذا
ضحكت عذاري : والله شكلك تحبين اخوه موب هـ..
جمدوا بمكانهم من تنحنح احد الرجال عند الباب : ياهل البيت
ناظرت في الجازي الي مطيره عيونها عند الباب لايدخل احد وصرخت باقوا ماعندها وهي مخروشه من مروان الموجود خلف هالباب : لاااتدخل !
بلع ريقه مفجوع من صراخها : يامَره اقصري حستس !!
استحت الجازي وهي لاول مره ترفع صوتها على شخص غير اخوها : ماعليش وش تبيني اسوي وانت ورا الباب بتدخل ! ، وش تبي ؟
تنهد مروان : ابي جدتي مابيتس
رصت على اسنانها بغضب من كلمته " مابيتس " وهي تحس وصلت لها الكلمه شعور سيء ، عذاري : عند الغنم
همهم وابعد عن الباب ، التفتت عذاري للجازي الي سرعان ما ابتسمت وقلبها مكسور من كلمته : نسويها ؟
عذاري بابتسامه تهون على الجازي : وش بتسوين طيب ؟
الجازي بتذكر : تعالي اوريتس وش مسويه
اقتربت عذاري وهي تحس حالها مرووقه
« مر يومين على مصيبتهم والوضع هاجد والجازي من المدرسه للبيت »
رزنه ناظرت لعذاري والجازي : الله يستر الله يستــر
ضحكوا البنات على وجهه عذاري والجازي ، عذاري : شدعوه يارزه !
غاليه بشك : أي والله الله يستر
قذله ضحكت : زوجوهم يعقلون هاجده عذاري خلاص بيت زوجها اصلا جنبها
ابتسمت بدره : لا عاد احسكم تكبرونها عذاري احسها هاديه
ابتسمت عذاري برضى لكن قاطعتها الجازي : اعوذ بالله شهاده زوور !! والله انـ..
التفتوا لبندر الي دخل : العيال العيااال يتهاوشون عيضه وولده سعيد مع مروان وريان وسعوود وكاايد !!
ناظرو عذاري والجازي ببعض وقلوبهم تدق بسرعه وش جاب عيضه وولده لهم ،، طلعت رزنه وتغطت متجهه لهم : بس بس !! شسالفه ؟؟
عيضه بغضب : ماتعرفوووون تربون بنااتكم اناا رحْيص !! ماهقيتها منتس يارزنه ! ، ذا وسمعتكم تسبقكم !!
رزنه : اقول عض على شحم وقل شسالفه !!
عيضه وهو يزداد غضبه : بناتكم الرديات عارضين ارضي في الحراج كاتبين بها ما ارخص من الارض الا راعيهاا !! ليييه انااا قا*تلن لهم احد !
سعيد بغضب : ليكون الرديه بنت غاليه على بالها ان ابوي قا*تلن ابـ..
سكته سعود الي ضربه بغضب : طاريها لايطرى على لسانك يابن الكـ*ـلب
دخلت رزنه للبيت متجهه لغرفه عذاري متجاهله اسالتهم ، دخلت عليهم وواضح الغضب عليها والشيب بدل لايطلع من شعرها بيطلع بعيونها : الرجال يتصافقون وانتم تضحكن هنا من فيكم المرديه الي عارضه ارض جارنا عيضه في الحراج وكاتبه ما ارخص من الارض الا راعيها !!
ناظروا في بعض والرجفه واضحه على أجسامهم : اعوذ بالله من تساتب تسذا عيب مايستحون !!
رزنه بغضب : حتى لهجه مافلحتي بها ! اجل تساتب !! ، اقول امشي قدامي
الجازي بخوف : جده والله موب هي انا اناا الي سويتها !
رزنه بغضب اكثر : اقول اص ادري بك تدافعين عنها بس هين هييين انتِ وياها سواتكم عندي
عضت شفايفها بخوف من غضب جدتها الي اول مره تشوفه ، رزنه بغضب : امشن معي انتِ وياها !!
تحركوا وراها بتوتر لكنهم ماسكين ضحكتهم كلما يتذكروا وش كاتبين ، انفجعوا الثنتين من رمت عليهم رزنه براقعهم ولبسوها بدون تردد لاحقينها للمجلس ، عذاري : مايخسى الا هو والله مانعتذر !
رزنه : سدي فمتس !!
بغت تنطق بس انفتح الباب ودخلت رزنه ووراها البنات ، ناظرت عذاري بسعود الجالس واعصابه مشدوده ،
رزنه : وش بيسكتكم ولا تفضحونا بين العرب ؟ اعتذار وجبناهم يعتـ..
عيضه بغضب قاطعها : بعد ماتكلموا عنا وتقولون وش يسكتنا !! واعتذاار ليه وش نبي به
سعيد بابتسامه : يبه تعال احاكيك
اخذ ابوه على جنب يتكلم وياه ، واخذ كايد الجازي يكلمها : وش مسويه تعرفين انه مايصير ، وان الرسول استوصى بالجار و مانزعجه ؟
نزلت انظارها الجازي بتوتر للارض : بنتي ماينزل راسها حتى لو مسويه غلط ! ، ارفعي راستس وانا ابوتس
ابتسمت عذاري بحزن وهي الي كانت تتمنى اب نفس كايد ! ، نطقت بداخلها : ماهقيتك يا عذاري تحسدين خويتك !
ناظرت بسعود الي قرب وغضبه انمحى من نظراتها: موب ثنينا نكمل بعض ؟ صدقيني ياريشتي انتس بتطلعين منها مثل الشعره بالعجين
ابتسمت بخجل : رزنه تناظر ابعد
وقف جنبها يناظر بسعيد الي قرب وابتسامه خبيثه كبيره بوجهه : قلتي نقول شرطنا ؟
همهمت رزنه وهي تسند حالها على العكاز ، عيضه بابتسامه : شرطنا يارزنه نبي الجازي لسعيد
بغت تطيح رزنه بس مسكها كايد بسرعه ، اتسعت عيونهم وسكتوا جميعم ماعدا مروان : تعقب و تخسي وتاكل تبن ، ماهي لك ولا بتاخذها ولا بتتخيل انها تصير لك يالكـ*ـلب !! ، ليه مستنكر كلامهم موب ذا ينطبق عليكم !
سعيد بغضب : اقول انت شدخلك لاهي بزوجتك ولا اختـ..
قاطعته الجازي واعصابها مشدوده : اعلى مابخيلك اركبه يالدجاجه ياوجه التيس ميــن انــت عشان اواافق عليك !!
اتسعت عيون سعيد بصدمه يناظر لها ، كايد بغضب : الجازي عذاري ادخلوا داخل !!
ناظرت الجازي في سعيد وهي تمشي : الردي طووول عمره ردي ماينفع معه المعروف
اول ماطلعوا من المجلس انحاشوا للغرفه وقفلوا الباب بالمفتاح ، صفقت وجهها بتوتر : يمه يمه يمــه وش سوويت والله لا يسلـ*ـخوني!!
انسدحت عذاري على سريرها وصوت ضحكها ينسمع : ياربيي وجـ..ـهه يضحكك !! اخ بطنييي حتى ابوك انفجع ومروان بغت تطلع عيونه يااربييي
الجازي بخرشه : يابنت اقولتس بودع تضحكين !
تربعت عذاري وهي تضرب على صدرها : ماعليك بوجهه سعود !
الجازي : ابك وش دخل زوجتس والله بيساعدهم علي يمه ياعذاري احس بمو*ت ، اسوي نفسي اغمى علي ؟ تكفين اضربي راسي بقوه خليني ادوخ وبينسون عيضه ويهتمون بحٍرحي
ربتت على كتف الجازي : بوجهه سعود قلت !
الجازي بتوتر : ابك سعود متهاوش مع العجيز تبينه يوقف بوجهها !!
اخذت عذاري جوالها ترسل لسعود : احنا بوجهك !
رد سعود عليها اول ماسمع اشعار رسالتها : وبشنبي بس واضح هنا بيطلع ياقـ*ـاتل يامقـ*ـتول
بتوتر : ليه شسالفه ؟
سعود ببعض الغضب الطفيف : لو طلعتي انتِ مسويتها وسببتي هالمشكله بحش رجولتس حش
عذاري بابتسامه : تحش رجول ريشتك ! ابك بعدين من وين بتحصل نفسي !! ، افا ياذا العلم بس افا
اتسعت ابتسامته : المشكله الي يوقفني عيونتس و نظراتس و حكيتس يابعد حيي
استحت وناظرت للجازي الي تدور بالغرفه وحاست شعرها وهي تفكر : الي عندي بتنفجر امن لنا قلت لها اننا بوجهه زوجي حبيبي قلبي شرياني عيوني روحي وش بعد
نبض قلبها من رسالته : يالريشه ترا بستعجل بالزواج دامه لسانتس معسول تسذا اويليي بس!!
ضحكت بخجل : يويلي سعود ترا تخجلني !
ابتسم متجاهل الي حوله و المشادده الي تصير : ياازين الي تخجل ياازينها ! ، تدرين اني جالس من شهرين ارتب لي شعر يوصفتس بالزواج اوصف الزين الي بيهب لي ؟
ابتسمت بصدق وهي تقرا محتوى رسالته ، سعود باستنكار من خفته : فضحت حالي كله من غزلتس !!
ضحكت بحب له : يلا باي بيبي اسمع صوت مروان انتبه لايجلد سعيد ونتورط اكثر
قفل سعود وهو الي توه استوعب وناظر برزنه الي تناظره بحده تذكر حلفانه انه ماراح يدخل مجلسها لكنه عشان المساله بها الريشه مستحيل يسكت !
كايد بغضب : والله انك تحلم بها انقلع ولا اشوووف وجهك تبي تقوول لديره عنهم رح قل ياقليل الخاتمه !!
طلع سعيد وابوه عيضه وكلهم غضب : طيب نتقابل بالمفااخر !!
مروان وصوته ينسمع لهم :وبعيدها لككك اعلى مابخيلك اركبه
اختفوا من قدامهم وناظروا لثواني ببعض يفكرون وش بيسوون ، انتبه سعود لنظرات رزنه اتجاهه مافهم نظرتها ابدا ولا يبي يفهمها ، وقف ريان الي كان جالس بهدوء وواضح ماسك اعصابه : لوو بتجلس تسذا بتسوي اشياااء اكثر والحين شف وصل للمخفر !!
رزنه بتوتر وهي تعرف ان ريان ماصار يتحمل الي كذا ويعصب : هد ماحصل الا كل خير
شد على شعره ينطق : ماحصل الا كل خير وهو بيوصل لشرطه !! مااابرضى ان اختي تنسجــن مااابرضى !!
كايد : اعوذ بالله والله ماتنسجن وشوله تنسجن
التفت لابوه بغضب : انت يايبه ليه متهااون فيهااا سجن ذي !! اجل تروح تعرض ارض موب ارضها وش متوقع ذي تعتبر سرقــه !! وفوقها يسبوونه ليه وش مسوي لهم هووو !!
ربت مروان على كتف ريان : ولا يهمك وانا اخوك بشوف لامرهم ومابيصير لسمعتهم شي
همز كايد مابين جبينه : رزنه اذا ماعليتس امر نادي لي بنتي وخليها تلحقني لسياره
مروان بخوف : وين بتاخذها !
التفتوا جميعهم يناظرونه مستغربين خوفه ماعدا كايد الي كانت نظراته كلها قسوه وحِده ، رزنه بتوتر : اي وين بتاخذها !
كايد بغضب وهو الي ماوده يقول وين بياخذها بذات قدام " مروان " : بنتي ومالكم دخل جيبيها يا رزنه !!
دخلت رزنه تطق الباب على البنات : الجازي الجاازي ابوتس يقول البسي و الحقيه لسياره
طلعت الجازي بعباتها وهي اصلا سامعه اصواتهم من تحت ، لحقت جدتها وجسدها يرتعد وتستنجد بنظراتها لعذاري ، وقفت قدام الباب الفاصل بين الحوش والشارع : يمه تكفين والله بيـ..
قاطعتها رزنه : ذا كايد ! مايرضى على بنته مستحيل يسوي لتس شي
طلعت الجازي وركبت بسرعه سياره ابوها : السـ.. السلام عليكم
التفت لها ويده شاده على الدركسون : وعليكم السلام
حرك السياره ونطق بعد صمت داام طويل : بتجلسين ببيتي بدون جوال ! عقاب لتس !!
اتسعت عيونها بصدمه من العقاب التافه : وش ذا العقـ..
واكمل : وبتنحرمين من السباقات لمده شهر حتى البيت تجلسين فيه لشهر بدون تروحين لامتس ولا بيت رزنه من البيت للمدرسه !!
الجازي بصدمه : لاا يبه الا السباقاات ابي اتعود على ناقه مـ.. مر_
قاطعها ابوها بغضب : ناقه مروان !! قلتيها لمروان موب لتس برجعها لمروان مانبي تعويض وهو ماله دخل !!
سكتت وطال الصمت بينهم واخيرا سالت السوال الي ببالها من زمان : يبه ليه تكرهه مروان ؟
التفت لها وبعدها ناظر لطريق : ماكرهه
هزت راسها بالنفي تنكر اجابته : تصرفاتك تقول تكرهه وش مسوي هو لك؟
رمى شماغه بالخلف مايبي يجاوب على سوالها الصعب وناظر فيها : تبين الاجابه صدز ؟
هزت راسها بايجاب بتوتر : لانه كبير عليتس فرق بينتس وبينه عشر سنوات !
فتحت فاهه بصدمه : وش دخل العمر ؟ وانا شدخلني به !!
تنهد تنهيده طويله : تعرفين القيل والقال وانتم وصغار يقولونكم لبعض
نزلت انظارها بخجل وهي تلعب باصابعها ، اكمل كايد وهو يناظر لطريق : مروان ماحسه مناسب لتس بعد تصرفه الهمجي اول ما شافتس تحققين حلمتس طيرته من بالي ،، و__
سكت لثواني وناظرت له الجازي باستغراب من صمته واكمل : ولا شـ..
قاطعته الجازي تبي الاجابه : وش و؟
عض شفايفه بغبنه : وقده تقدم لتس قبل شهرين ورفضته
التفتت له بصدمه وتهجم : وليه رفضته !!
وقف السياره على جنب مستنكر رده فعلها : كيفي ! ، ليكون تحبينه وهو الي كان بيحرمتس حلمتس ؟؟
الجازي بخوف : لا لا
ناظر لها لثواني وشغل السياره مكمل طريقه لبيته ، بلعت ريقها بخوف وتوتر بس صدق ليه رفضه ولا كلمني ! ، ا__ انا احبه !! ،، طوال ذي المده ابوي ماقال لي ولا مروان قال لي شـ__ ! لا شدخل مروان وش بيقول لي اصلا
وصلت لبيت ابوها وتكلم : الليله اجيب لتس اغراضتس وشهر شهــر بدون الي قلت لتس عنه
قوست شفايفها بحزن : وشسوي اذا انا قلت الصدز ! ، يعني هو تسلب ليه يضرب زياد وصقر !
كايد بغضب من عنادها : اعقبي ! شدخلتس بزياد وصقر !
« بمكان ثاني »
تقدم مروان لريان وكلهم ضايقه بهم الدنيا : والله انها مقفله بوجهي يا مروان تكفى قم ودني لسامري خل نردح هناك
تنهد مروان وهو اصلا ماله خلق يرفض : قم
وكانت خطوه خطيره وباب مغلق راح ينفتح على ريان بسبب خطوتهم الجاهلين بها .
طوال الخط ساكتين والصمت سيد الموقف ، وصلوا لسامري ونزلوا يسمعون لدق الطبل القوي والرجال يرقصون بالوسط ، اقترب منهم وخلفه مروان الي يناظر للارض ، ارتفعت نظراته عقب ماوصل لهم ووقفوا الاثنين وهم يناظرون للاشخاص الغير طبيعيين " البعض " ، مروان : بهم مس الله يفرجها عليهم
انجذبت مسامع ريان لسامري الجميل الي توصفه : عيني تفجر تنوح فراق خلي
نزل شماغه على اكتافه وسرعان مادخل بين الرجال الي يرقصون واندمج معهم بسرعه ، دار على حاله مغمض عيونه وحواسه بالاغنيه الي اخذت له عقله توصف حاله ، مسك اطراف شماغه ودار حول الرجال يرقص ويردح وينقز بينهم زي المجنون الممسوس وهو مابه الا العافيه لكن ذا هو رقص السامري ، زاد الدق بقوه يخترق سمعه لكنه وفجاه اختلط بصوت رقيق لانثى تهمس باسمه قريب من اذنه —ريــان— صوتها الجميل والعذب اخترق قلبه بدل لا يخترق مسمعه ، التفت حول نفسه يدورها لكنه ماحصل احد وماكان جوابه الا " اتخيل " كمل رقصه لكنه استوقفه الصوت مره ثانيه : ريــان !
صوتها جميــل لدرجه مايقدر يوصفه تمنى يشوف صاحبه الصوت الجميل ذي ، دورها بعيونه متلهف يبي يعرف صاحبه الصوت الرقيق ،، هل بيكون شكلها نفس صوتها الجميل ؟ ، حس بيد بارده شديده البروده على خديه ونطقت عند اذنه بابتسامه : رقصك عجبني ريان ..!
ماكان يقدر يشوفها لكونها خلفه ،ابتسم برضى على حكيها ونطقت بصوتها الرقيق الي كل ثانيه يزداد حلاوه : تسمح لي يا ريــان ؟
ابتسم بدون شعوريا : اسمح لتس يا بعد حيي وحياني وانا ماعرف وش مطلبتس
ضحكت ضحكتها الرقيقه الي اخترقت قلب ريان : اااه يازين هالضحكه ،، انتِ مين شلون تعرفين اسمي ؟
ابتسمت تنطق : موب لازم تعرف مين انا ،، بس انا اعشق الرقص ياريان وانت سمحت لي
ابتسم لكنه ما استمر بابتسامته من حس بحراره تسري داخله وكانه يغلي وألم استحوى جميع انحاء جسده ، فتح عيونه وارتعب من مكانه الي تغير فجأه ! ، كان بوسط السامري هالحين هو تحت شجره سدر ، ناظر بالبنت الي تقترب بابتسامه وايديها خلف ظهرها : انا نائلــه .. ذا اسمي انسخه ريــان
فستان ابيض يشع بظلمه الليل ، شعر اسود يشبه سواد الليل ، ناظر لعيونها الزرق شبيه لـ موج البحر ، بس المخيف انها تملك قرون سود ! ، رفع ايدينه لاشعوريا يلمس قرونها السود لكنه ابعدها بسرعه من الحراره الي داهمت اصابعه ، ضحكت وقربت تقبل له خده وهمست عند اذنه بصوتها الجميل : تذكرني احب الرقص بذات الســامري !!
مطت بالكلمه الاخيره دليل انها تعشـق السامري .

استغفر الله العظيم واتوب اليه 💗