يوميات مراهق بدون الألف🖕🏻

حفلة

صحيت العصر اصلي
وكان الجو ممطر مره ولا كلفت نفسي اروح بسياره ولا حتى اخذ مظله

وش احس فيه ؟ مدري

مشيت بالمطر ابيه يغسل روحي ابي اكون خفيففففف
وغصت بأفكاري لين وصلت حد الباب

بعدها استوعبت قد ايش أنا مبلول

رحت دوره المياه وجففت نفسي بمناديل لعل وعسى
وماتغير شيء
لكن اهم شيء اني ما اقوطررر ماء

صادفت واحد اعرفه وبيني وبينه ماضي شين وحلو
بين وبين
أنا مدري حاليا أصنفه صديق او صاحب او شخص وانطوت صفحته

انصدمت وش يبي في هالمسجد

قال كنت اتمشى بالمطر ونزلت اصلي العصر هنا

وكانه عارف اني كنت اتسأل وش جابه

قلت وفيه احد يتمشى هنا ؟
قال يوه قفطتني كنت اهوجس فيك وابي أصادفك ، ياشيخ دز

قلت ذي افكارك انت أنا ماقصدت كذا
ومشيت ماعطيته فرصه يرد
والصراحه كاني سمعته تكلم بس والله طنشت

لما خرجت من المسجد
لمحت ابوي ومعاه اخوانه وجدي يمشون سوا
وقفت شوي عشان يروحون مابي اكون على نفس المستوى من المشي معاهم
واستغربت وين الشباب اللي هم عيالهم يعني
وانا عارف ان اليوم جدي مسوي فطور فـ اكيد كلهم فيه

لكن جاني اللي اقولكم واحد اعرفه

فـ زبدت له ومشيت
مره مالي خلق ناس سامه

على العموم

هم يمشون يمين وانا على اليسار امشي

ناداني جدي
مارديت
ناداني مره ثانيه
لفيت بشويش وانا احاول استعد للكلام البايخ اللي بسمعه
قال تعال معنا الفطور
أتوقع شافني متجه يم بيتنا
الاخ كان واثق اني بجي بس أنا ما طرالي اجي
ومشى
ماعطاني مجال ارد اساسًا

مشيت بيتنا وانا مالي نيه اجي اساسًا

ولما دخلت البيت بكيت بكيت
مو عشان شيء

بس جدتي قالت للعامله تعالي عندنا وقالت لها ماتسوي اكل
طبعاً توقعت كذا لان شفت المطبخ فاضي ونظيف ومافي علامات طبخ ولا حتى فيه قدر
فتحت الثلاجه على امل ولا حصلت
وفتحت الفرن ولا حصلت

انغثيت
أنا فيني تراكمات والله صحت

ادري اني اقدر اطلب مطعم وتنحل او حتى بسطات وأسر منتجه واشياء كثير بتحل السالفه وانتهينا
لكن نرفزتني وش ذا الحركه

ولاني كنت زعلان قبل من موقف
فـ انفجرت على شيء تافه كذا

اخذت تمره وقهوه ورقيت لبست وكشخت وصليت

أنا أوريها عجوز النار
بجي افطر عندهم وبكون مستانس
كذا تفطسسس

ورحت اخذت معاي حلا
وجيت وكان دوب الناس طالعه من صلاة المغرب
عماني وابوي وجدي مابعد جو
بس الشباب شفتهم برا وكان يصلون جماعه