Idiot Seme

42-43

Sorry ပါနော် အရှေ့တပိုင်းက ကျန်နေခဲ့လို့ ထပ်ဖြည့်ထားပါတယ် အရှေ့တပိုင်းကို ပြန်ဖြည့်ပြီးဖတ်ပေးပါ ။ 😁😁😁

ယွမ်ဆွေဖုန်းသည် ကျောက်ယွင်ချီ၏ အရပ်မြင့်မြင့် ခန္ဓာကိုယ်ကြီး မိမိရှေ့မှ တမဟုတ်ချင်း ပျောက်ကွယ်သွားသည်ကို ကြောင်ကြည့်နေမိသည်။ ခေါင်းထဲတွင် “ဝုန်း” ခနဲ မြည်သံတစ်ခု ပေါ်လာကာ အရာအားလုံး ဗလာဖြစ်သွားသည်။ ထိတ်လန့်တုန်လှုပ်သွားသည့်အပြင် ရင်ထဲတွင်လည်း ပြင်းထန်သော ဝေဒနာတစ်ခု ရုတ်တရက် ထိုးနှက်ဝင်ရောက်လာသဖြင့် သူသည် ချက်ချင်းပင် ခြေမခိုင်တော့ဘဲ မြေပေါ်သို့ လဲကျသွားခဲ့သည်။

အဲဒီ အရူးကောင်... သေသွားပြီလား?

ဒီလိုပဲ အဆုံးသတ်သွားတာလား?

ထိုအတွေးက ရင်ထဲ ဖြတ်သန်းသွားသည့်အခါ ယွမ်ဆွေဖုန်း၏ တစ်ကိုယ်လုံး မထိန်းနိုင်လောက်အောင် ပြင်းပြင်းထန်ထန် တုန်ခါလာကာသူ၏ပတ်ဝန်းကျင်မှ အသံတစ်စုံတစ်ရာကိုပင် မကြားနိုင်တော့ပေ။

စိတ်ရှုပ်ထွေးမှုကြားတွင် မျက်စိရှေ့၌ အရာအားလုံး ဝိုးတဝါး နဲ့ မျက်နှာပေါ်တွင်လည်း အေးစက်စက် စိုစွတ်မှုတစ်ခုကို ခံစားရသော်လည်း သူ၏စိတ်ထဲမှာတော့ ထူးဆန်းစွာပင် ကြည်လင် ရှင်းလင်းသွားခဲ့သည်။

“ဘယ်သူက မင်းကို ဒီလို ဝင်ရှုပ်ခိုင်းလို့လဲ၊ အရူးကောင်!”

“ဘယ်သူက မင်းရဲ့ ကယ်တင်မှုကို လိုချင်လို့လဲ လို့....!”

ယွမ်ဆွေဖုန်းသည် ချောက်ကမ်းပါးစပ်နားတွင် မှိုင်တွေစွာ ဝမ်းနည်းကြေကွဲလျက် တိုးတိုးလေး ရေရွတ်နေမိတော့သည်။

ရေကန်ပေါ်တွင် မြူခိုးများ ထူထပ်စွာ ဖုံးလွှမ်းနေသဖြင့် အောက်၌ မည်သို့ဖြစ်နေသည်ကို လုံးဝ မမြင်နိုင်ပေ။

နောက်တစ်ခဏတွင် သူသည် အလိုလိုပင် အသက်ပြင်းပြင်း တစ်ချက်ရှူလိုက်ပြီး သတိမထားမိဘဲ သူ၏ လေးလံအားနည်းနေသော ခန္ဓာကိုယ်ကို ဆွဲသယ်၍ ချောက်ကမ်းပါးအနီး တရွေ့ရွေ့ သွားလေသည်။။

ထိုအခိုက်အတန့်၌ ယွမ်ဆွေဖုန်း၏ စိတ်အခြေအနေမှာလည်း ပြိုကွဲလုနီးပါး ဖြစ်နေခဲ့ပြီး  သူ့ခေါင်းထဲတွင် ကျန်ရှိနေသော အတွေးတစ်ခုတည်းမှာ ကျောက်ယွင်ချီ အသက်ရှင်သေးသလား၊ သေသွားပြီလား ဆိုသည်ကို သေချာသွားအောင် အတည်ပြုရန်သာ ဖြစ်သည်။