أســرَار الـزمان .. طارق اللبيب

( 2 )

ﻭﻛﺖ ﺟﺎﺕ ﺍﻟﺘﺎﻳﺔ ﺑﺖ ﻣﺨﺘﺎﺭ .. ﻭﺣﻜﺖ ﻟﻲ ﻭﺩﺍﺭ ﺍﻟﺰﻳﻦ .. ﻗﻌﺪ ﻳﻀﺤﻚ .. ﻗﺎﻝ ﻟﻴﻬﺎ
.. ﻭﺍﻟﻠﻪ ﻳﺎ ﺍﻟﻨﻮﺭ ﺣﻜﺎﻳﺘﻚ ﺣﻜﺎﻳﺔ .. ﻣﺎﻗﺎﻝ ﺭﺍﺟﻞ ﻭﻓﺎﺭﺱ .. ﺯﻭﻝ ﻣﺎﻗﺪﺭ ﻋﻠﻰ
ﺍﻟﺒﺸﻴﺮ .. ﺗﺎﻧﻲ ﺩﺍﻳﺮ ﻳﻘﺪﺭ ﻋﻠﻰ ﺷﻨﻮ؟ ..
ﺍﻟﻨﺴﻴﻢ ﻗﺎﻋﺪﺓ ﻓﻲ ﺍﻟﻀﻞ ﺑﺘﻀﻔﺮ ﻟﻴﻬﺎ ﻓﻲ ﺳﻌﻒ ﻟﻲ ﻫﺒﺎﺑﺔ .. ﻭﺭﺍﺧﻴﺔ ﺍﺿﺎﻧﺎ
ﻟﻠﻜﻼﻡ ..
ﻭﺍﻟﻜﻼﻡ ﺩﻩ ﺯﻱ ﺍﻟﻀﺤﻰ ﻛﺪﻱ .. ﻓﻲ ﺯﻭﻝ ﺩﻕ ﺍﻟﺒﺎﺏ .. ﻣﺸﻰ ﻭﺩ ﺩﺍﺭ ﺍﻟﺰﻳﻦ ﻓﺘﺢ
ﺍﻟﺒﺎﺏ ﻟﻘﺎﻫﻮ ﺩﻩ ﻭﺍﺣﺪ ﺍﺳﻤﻮ ﻭﺩ ﻣﻜﺘﻮﻝ ..
ﻣﻦ ﺍﻟﺤﻠﺔ ﺍﻟﺠﻨﺒﻬﻢ .. ﺭﺍﺟﻞ ﻛﺒﻴﺮ ﻃﺎﻋﻦ ﻓﻲ ﺍﻟﺴﻦ ﻗﺮﻳﺐ ﺍﻟﺴﺒﻌﻴﻦ ﺳﻨﺔ .. ﻳﻌﻨﻲ
ﻟﻮ ﻣﺎﻭﺻﻼ ﻗﺮﺏ ﻟﻴﻬﺎ ..
ﺳﻠﻢ ﻋﻠﻰ ﻭﺩ ﺩﺍﺭ ﺍﻟﺰﻳﻦ .. ﻭﺩ ﺩﺍﺭ ﺍﻟﺰﻳﻦ ﻳﻌﺠﺒﻚ ﻓﻲ ﺍﻟﺘﺮﺣﺎﺏ ﻭﺍﻟﻜﺮﻡ .. ﺣﺒﺎﺑﻮ ..
ﺣﺒﺎﺑﻮ .. ﺍﻟﻠﻪ ﻳﻜﺮﻣﻚ ﺑﺎﺭﻙ ﺍﻟﻠﻪ ﻓﻴﻚ .. ﺷﺮﻓﺖ ﻭﺍﻧﺴﺖ ﻳﺎﺣﺎﺝ ﻭﺍﻟﻠﻪ ﺍﻟﻠﻴﻠﺔ ﺩﻱ
ﺷﻘﺔ ﻏﺮﻳﺒﺔ ..
ﻃﺒﻌﺎ ﺍﻭﻝ ﺣﺎﺟﺔ ﺧﻄﺮﺕ ﻋﻠﻰ ﺑﺎﻝ ﻭﺩ ﺩﺍﺭﺍﻟﺰﻳﻦ .. ﺍﻧﻮ ﻭﺩ ﻣﻜﺘﻮﻝ .. ﺩﺍﻳﺮ ﺍﻟﻨﺴﻴﻢ
ﻟﻲ ﻭﺍﺣﺪ ﻣﻦ ﺍﻭﻻﺩﻭ .. ﻻﻧﻮ ﻫﻮ ﺍﻛﺒﺮ ﻣﻦ ﻭﺩﺩﺍﺭ ﺍﻟﺰﻳﻦ ﺑﻲ ﻋﺸﺮﺓ ﺳﻨﺔ
ﻭﻻﺷﻲ ..
ﺟﺮﺍ ﻟﻴﻬﻮ ﺍﻟﻌﻨﻘﺮﻳﺐ ﺍﻟﻬﺒﺎﺑﻲ .. ﻭﺟﺪﻉ ﻟﻴﻬﻮ ﻓﻮﻗﻮ ﺑﺮﺩﻋﺔ ‏(ﻣﺨﺪﺓ ﻣﺤﺸﻴﺔ ﺻﻮﻑ
ﻏﻨﻢ ‏) ﻭﻗﺎﻝ ﻟﻴﻬﻮ ﻛﻮﻉ ﺩﺍﺏ ﻣﺎﺟﺎﺕ ﺍﻟﻘﻬﻮﺓ .. ﻗﺎﻝ ﻟﻴﻬﻮ ﻭﺍﻟﻠﻪ ﺍﻧﺎ ﺷﺎﺭﺏ ﺍﻟﻘﻬﻮﺓ
ﻭﺟﺎﻱ ﻋﻠﻴﻚ ..
ﺍﻧﺎ ﺟﺎﻳﻴﻚ ﻓﻲ ﻣﻮﺿﻮﻉ ﺧﺼﻮﺻﻲ ﻛﺪﻱ .. ﻗﺎﻟﻮ ﻟﻲ ﻋﻨﺪﻙ ﺑﺖ ﺑﻘﺖ ﻟﻠﻌﺮﺱ ..
ﻭﺍﻧﺎ ﻭﺍﻟﻠﻪ ﺯﻱ ﻣﺎﻙ ﻋﺎﺭﻑ ﺧﺎﻟﺘﻚ ﻧﻔﻴﺴﺔ .. ﺧﻼﺹ ﺑﻘﺖ ﻛُﺴّﺎﺭ؟ ..
ﺩﺣﻴﻦ ﺍﻧﺎ ﺟﻴﺖ ﺍﺷﻮﻑ ﺍﻟﺒﺖ .. ﻭﺑﺘﺸﺮﻑ ﺣﺮﻡ ﺑﻲ ﻧﺴﺒﻚ .. ﻭﺷﺎﻳﻞ ﻫﺪﻭﻣﻲ ﺗﺐ
ﻣﻌﺎﻱ .. ﻛﺎﻥ ﺍﻟﺒﺖ ﻋﺠﺒﺘﻨﻲ .. ﻃﻮﺍﻟﻲ ﻣﻦ ﺩﺭﺑﻲ ﺩﻩ ﻣﺎﺷﻲ ﻋﻠﻰ ﺍﻟﺒﺸﻴﺮ ﻓﻲ
ﺑﻴﺘﻮ .. ﺍﻡ ﺑﻘﻰ ﺩﺍﻳﺮ ﺍﻟﻤﺴﻮﺡ ﻭﺍﻟﺪﻟﻜﺔ .. ﺑﻤﺴﺤﻮ ﻭﺑﺪﻟﻜﻮ ..
ﺍﺻﻠﻚ ﻣﺎﺗﺸﻴﻞ ﻫﻢ ﺍﻟﺒﺸﻴﺮ ﺩﻩ ,, ﺑﻘﺪﺭ ﻋﻠﻴﻬﻮ ﺗﺐ ﻭﺣﺎﺕ ﺍﻟﻠﻪ .. ﻭﺍﻥ ﺑﻘﻰ ﻣﺎﺟﺒﺖ
ﻟﻴﻚ ﻣﻨﻮ ﺍﻟﺤﺠﻞ .. ﺍﻧﺎ ﺍﻛﻮﻥ ﻭﺩ ﺣﺮﺍﻡ ..
ﺗﺎﻧﻲ ﺩﺍﻳﺮ ﺷﻨﻮ؟
ﻭﺩ ﺩﺍﺭ ﺍﻟﺰﻳﻦ ﻛﺎﻥ ﻭﺍﻗﻒ ﻋﻠﻰ ﺣﻴﻠﻮ .. ﻗﻌﺪ ﻓﻲ ﺍﻟﻮﺍﻃﺔ .. ﻭﻋﺮﻑ ﺍﻧﻮ ﺍﻟﺮﺍﺟﻞ ﺩﻩ
ﺑﻨﺠﺢ ﺑﻨﺠﺢ .. ﻻﻧﻮ ﺯﻭﻝ ﻣﻜﺎﺭ ﻭﺛﻌﻠﺐ ﻓﻲ ﺷﻜﻞ ﺍﻧﺴﺎﻥ .. ﻗﺎﻝ ﻟﻴﻬﻮ ﺩﻩ ﻛﻼﻡ
ﺷﻨﻮ ﻳﺎ ﻭﺩ ﻣﻜﺘﻮﻝ ؟ ﻟﻜﻦ ﺍﻟﻨﺴﻴﻢ ﺑﺘﻲ ﺻﻐﻴﺮﺓ . ﻗﺎﻝ ﻟﻴﻬﻮ ﻧﺎﻥ ﻣﺎﻟﻮ؟ .. ﺍﻟﺸﻴﺎﺏ
ﺍﻟﻌﺮﺳﻮ ﺍﻟﺒﻨﻮﺕ ﺍﻟﺼﻐﺎﺭ ﺷﻮﻳﻪ؟
ﺑﺲ ﺑﻘﺖ ﻋﻠﻲ ﺍﻧﺎ؟ .. ؟ ﻭﺍﻥ ﺑﻘﻴﺖ ﻧﻄﻴﺖ ﻣﻦ ﻛﻼﻣﻚ ﺍﺧﻮﻱ .. ﻛﻤﺎﻥ ﻗﻮﻝ ﻟﻲ
.. ﺧﻠﻨﻲ ﺍﻟﻨﻤﺸﻲ ..
ﻃﺒﻌﺎ" ﻭﺩ ﺩﺍﺭ ﺍﻟﺰﻳﻦ ﺩﺧﻞ ﻓﻲ ﺣﺘﺔ ﺿﻴﻘﺔ ﺑﺎﻟﺠﺪ .. ﻳﻌﻨﻲ ﻟﻮ ﻗﺎﻝ ﻟﻴﻬﻮ ﻛﺪﻱ
ﻭﻻﻛﺪﻱ .. ﺍﻟﺰﻭﻝ ﺩﻩ ﻳﻤﺸﻲ ﻳﻨﺸﺮ ﺍﻟﺨﺒﺮ ﺑﺎﻟﺒﻠﺪ ﻭﺍﻟﺒﻠﺪﻳﻦ .. ﻭﻳﺸﻮﻩ ﺻﻮﺭﺓ
ﺍﻟﺮﺍﺟﻞ ﺍﻟﻌﻤﺪﺓ ﺩﻩ .. ﻗﺎﻝ ﻟﻴﻬﻮ ﺧﻼﺹ .. ﺍﻧﺎ ﻣﺎﻋﻨﺪﻱ ﻣﺎﻧﻊ .. ﺑﺲ ﺍﻧﺖ ﺍﻣﺸﻲ
ﻟﻠﺒﺸﻴﺮ ﺑﻜﺮﺓ ﻣﻮ ﺍﻟﻠﻴﻠﺔ ..
ﻗﺎﻝ ﻟﻴﻬﻮ ﻳﺎﺧﻲ ﺍﻧﺎ ﻣﺴﺘﻌﺠﻞ ﻋﻠﻰ ﺍﻟﻌﺮﺱ .. ﻣﺎﺗﺨﺴﺮﻧﻲ ﻳﻮﻡ ﻛﺎﻣﻞ ..
ﻟﻜﻦ ﺧﻼﺹ ﻳﺎﺯﻭﻝ ﺍﻧﺎ ﺑﺎﻛﺮ .. ﻣﻦ ﺍﻟﺼﺒﺎﺡ ﻣﺎﺷﻲ ﻋﻠﻰ ﺍﻟﺒﺸﻴﺮ ..
ﺍﻫﺎ ﻫﺴﻊ ﺩﺍﻳﺮ ﺍﺷﻮﻑ ﺍﻟﺒﺖ .. ﻗﺎﻝ ﻟﻴﻬﻮ ﻻﻻ ﺷﻮﻓﺖ ﺍﻟﺒﺖ ﺑﻌﺪ ﺍﻟﺤﺠﻞ ..
ﺍﻟﻤﻬﻢ ﺍﻟﺮﺍﺟﻞ ﺍﻗﺘﻨﻊ ﻭﻃﻠﻊ .. ﺍﻭﻝ ﺍﻟﺮﺍﺟﻞ ﻣﻦ ﻃﻠﻊ ﺍﻟﻨﺴﻴﻢ ﺟﺎﺕ ﻻﺑﻮﻫﺎ .. ﻗﺎﻟﺖ
ﻟﻴﻬﻮ ﻳﺎﺑﺎ ﺩﻩ ﺷﻨﻮ؟؟ ﺍﻟﺮﺍﺟﻞ ﺍﻟﻤﻀﺒﻠﻦ ﻭﺍﻟﻜﻼﻡ ﺍﻟﺒﻘﻮﻝ ﻓﻴﻬﻮ؟؟ .. ﻭﺣﺎﺕ ﺍﻟﻠﻪ
ﻳﺎﺍﺑﻮﻱ ﺍﻧﺎ ﺍﻟﺰﻭﻝ ﺩﻩ ﺑﺎﻛﺮ ﻳﻤﻮﺕ ﻟﻲ ﻳﺎﺑﺎ .. ﻳﺎﺑﺎ ﻣﺎﺗﻜﺘﻠﻨﻲ ﻗﺒﺎﻝ ﻳﻮﻣﻲ ..
ﻗﺎﻝ ﻟﻴﻬﺎ ﺍﻟﻨﺴﻴﻢ ﺍﺻﺒﺮﻱ .. ﺍﻧﺎ ﺫﺍﺗﻲ ﻣﺎ ﻧﻲ ﺭﺿﻴﺎﻥ ﺑﻴﻪ .. ﺑﺲ ﺍﻧﺘﻲ ﺷﻴﻠﻲ
ﺍﻟﺼﺒﺮ .. ﺍﻟﻨﺴﻴﻢ ﺑﻘﺖ ﻋﺎﻳﺸﺔ ﻓﻲ ﻗﻠﻖ .. ﻻﻧﻬﺎ ﺳﻤﻌﺖ ﻛﻼﻡ ﻭﺩ ﻣﻜﺘﻮﻝ ﻣﻦ ﺍﻭﻟﻮ
ﻟﻲ ﺍﺧﺮﻭ .. ﻭﻋﺮﻓﺖ ﺛﻘﺘﻮ ﻓﻲ ﻧﻔﺴﻮ ..
ﺍﺑﻮﻫﺎ .. ﻗﺎﻝ ﻟﻴﻬﺎ ﺍﺻﺒﺮﻱ ﺑﺲ .. ﻭﺷﻮﻓﻲ ﻋﻤﻚ ﺍﻟﺒﺸﻴﺮ ﺑﻄﻔﺸﻮ ﻛﻴﻒ ؟
ﻟﻜﻦ ﻣﺎﺍﺍﺍ ﺍﻇﻨﻮ ﻭﺍﻟﻠﻪ ﺍﻟﺮﺍﺟﻞ ﺩﻩ ﻣﻌﺮﻭﻑ ﻳﺴﻮﻗﻚ ﺍﻟﺒﺤﺮ ﻭﻳﺠﻴﺒﻚ ﻋﻄﺸﺎﻥ ..
ﺍﻟﻤﻬﻢ ﻳﺎﺯﻭﻝ ﻭﺩ ﺩﺍﺭ ﺍﻟﺰﻳﻦ .. ﻣﺸﻰ ﻟﻲ ﻋﻤﻮ ﺍﻟﺒﺸﻴﺮ .. ﻭﻗﻌﺪ ﻣﻌﺎﻫﻮ ﻧﺺ ﻳﻮﻡ
ﻛﺎﻣﻞ ﻳﺤﺬﺭ ﻓﻴﻬﻮ .. ﻭﻳﻮﺻﻲ ﻓﻴﻪ .. ﻗﺎﻝ ﻟﻴﻬﻮ ﺍﻟﺰﻭﻝ ﺩﻩ ﻳﺎﻋﻤﻲ ﺯﻭﻝ ﻣﻜﺎﺭ .. ﺍﻧﺎ
ﺩﺍﻳﺮﻭ ﻻﻋﻨﺪ ﺍﻟﻔﻠﻲ .. ﻳﺴﻮﻱ ﻟﻴﻚ .. ﺍﻟﻔﻠﻲ ‏(ﻗﺼﻊ ﺍﻟﻘﻤﻞ ‏) ..
ﻗﺎﻝ ﻟﻴﻬﻮ ﺍﺻﺒﺮ ﻟﻲ .. ﻭﺍﻟﻠﻪ ﺍﻟﻜﻠﺐ ﺍﺧﻠﻴﻬﻮ ﻳﺤﻠﻖ ﻟﻲ ﺍﺑﺎﻃﺎﺗﻲ .. ﻫﻬﻬﻪ
ﻏﺎﻳﺘﻮ ﺟﻨﺲ ﺣﺎﻟﺔ !!
ﺍﻟﻤﻬﻢ ﻧﺸﻮﻑ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺴﺘﺮ ﻋﻠﻰ ﺍﻟﻨﺴﻴﻢ ﻣﻦ ﺍﻟﺮﺍﺟﻞ ﺍﻟﻌﺠﻮﺯ
ﺍﻟﻤﺨﺎﺩﻉ ﺍﻻﺳﻤﻮ ﻭﺩﻣﻜﺘﻮﻝ ﺩﻩ ..
ﺍﻟﺰﻭﻝ ﺩﻩ ﻗﺎﻟﻮ ﻣﻦ ﺍﻟﺼﺒﺎﺡ ﺟﺎ ﺟﺎﻫﺰ . ﻭﻗﺎﻝ ﻟﻴﻬﻮ ﺍﺳﻤﻊ ﻳﺎ ﺍﻟﺒﺸﻴﺮ ﻋﺸﺎﻥ
ﻣﺎﻧﺒﻘﻰ ﻧﺎﺱ ﻛﻼﻡ ﻓﺎﺿﻲ .. ﺍﻧﺎ ﻟﻮ ﺧﺪﻣﺘﻚ 15 ﻳﻮﻡ ﻭﻣﺎ ﺷﻜﻴﺖ ﻭﻻ ﻣﻠﻴﺖ ..
ﺑﺘﻮﺭﻧﻲ ﻣﺤﻞ ﺍﻟﺤﺠﻞ؟
ﻗﺎﻝ ﻟﻴﻬﻮ ﻳﺎﺯﻭﻝ ﻣﺎﺑﺘﻘﺪﺭ .. ﺍﻧﺖ ﻓﺸﺎﺭ ﺳﺎﻛﺖ .. ﻗﺎﻝ ﻟﻴﻬﻮ ﺑﺲ ﻗﻮﻝ ﻟﻲ .. ﻗﺎﻝ
ﻟﻴﻬﻮ ﺍﻱ ﺑﻮﺭﻳﻚ ﻟﻴﻬﻮ .. ﺑﺲ ﺍﻧﺖ ﺗﻢ ﺍﻟﺨﻤﺴﻄﺎﺷﺮ ﻳﻮﻡ ..
ﻭﺍﻟﻠﻪ ﺍﻟﺰﻭﻝ ﺩﻩ ﻗﺎﻟﻮ ﺍﻟﺒﺸﻴﺮ ﺳﻮﺍ ﻟﻴﻬﻮ ﺳﻮﺍ .. ﻣﺎﺧﻼ ﺣﺎﺟﺔ ﻓﻲ ﺍﻟﺪﻧﻴﺎ ﺩﻱ
ﺑﺘﻨﺨﺪﻡ ﻣﺎﺧﺪﻣﻮ ﻟﻴﻬﺎ .. ﻃﺤﻦ ﺍﻟﻌﺶ ﻭﻋﺠﻦ ﺍﻟﻌﺠﻴﻦ ﻭﺳﻮﺍ ﺍﻟﻌﺼﻴﺪﺓ ﻭﻋﺎﺱ
ﺍﻟﻜﺴﺮﺓ ﻭﻓﺮﻙ ﺍﻟﻤﻼﺡ ﻭﺧﺶ ﺍﻟﺮﻭﺏ .. ﻭﺩ ﻣﻜﺘﻮﻝ ﻳﺨﺪﻡ ﻭﻳﻐﻨﻲ ﻃﺮﺑﺎﺍﺍﻥ ..
ﻭﻣﺒﺴﻮﻁ ﻭﻣﺘﻜﻴﻒ .. ﻭﻗﺎﻝ ﻟﻴﻬﻮ ﻳﺎ ﺣﺎﺝ ﺍﻟﺒﺸﻴﺮ .. ﻳﺎﻫﻦ ﺍﻟﺨﻤﺴﻄﺎﺷﺮ ﻳﻮﻡ ﺩﻳﻞ
ﻭﻻ ﺑﻼﻫﻦ .. ﻋﻠﻰ ﺑﺎﻟﻄﻼﻕ ﻛﺎﻥ ﺩﺍﻳﺮ ﻟﻚ ﺳﻨﺔ ﺍﻗﻌﺪ ﻣﻌﺎﻙ .. ﺍﺕ ﻣﺎﻙ ﻳﺎﺍﻛﺎ ؟ ﺍﻧﺎ
ﻭﻛﺖ ﻟﻘﻴﺖ ﻟﻲ ﺑﻨﻴﺔ ﻋﻤﺮﻫﺎ 18 ﺳﻨﺔ ﻭﻧﺎﺳﺒﺖ ﻭﺩ ﺩﺍﺭ ﺍﻟﺰﻳﻦ ﺑﺘﻌﻠﺒﻨﻲ
ﺍﻟﺨﻤﺴﺘﺎﺷﺮ ﻳﻮﻡ؟؟
ﻋﻠﻰ ﻛﻞ ﺣﺎﻝ ﺍﻟﺒﻠﺪ ﻛﻠﻬﺎ ﻣﺘﺎﺑﻌﺔ ﺍﻟﻮﺿﻊ ﺑﻲ ﺗﻮﺟﺲ ﺷﺪﻳﺪ .. ﻭﺍﻟﻨﺎﺱ ﻣﻄﻠﻌﻴﻦ
ﻭﺩ ﺩﺍﺭ ﺍﻟﺰﻳﻦ ﻏﻠﻄﺎﻥ .. ﻛﻴﻒ ﻳﺨﺖ ﺑﺘﻮ ﻓﻲ ﻣﺤﻚ ﺯﻱ ﺩﻩ .. ﻭﺩ ﺩﺍﺭ ﺍﻟﺰﻳﻦ ﺧﺎﻳﻒ
ﻣﻦ ﻭﺩ ﻣﻜﺘﻮﻝ ﻳﻘﻀﻲ ﺍﻝ15 ﻳﻮﻡ ﻭﺗﺎﻧﻲ ﻫﻮ ﻣﺎﻳﺒﻘﻰ ﻋﻨﺪﻭ ﻛﻠﻤﺔ ﻭﺍﻟﻨﺸﻮﻑ
ﺍﻟﺒﺤﺼﻞ ..
ﻳﻮﻡ ﺍﻟﺴﺒﺖ ﻣﺸﻰ ﻭﺩ ﺩﺍﺭ ﺍﻟﺰﻳﻦ ﻟﻲ ﺳﻨﺎﺭ ﺍﻟﻤﺪﻳﻨﺔ ﻭﻋﻨﺪﻭ ﺻﺎﺣﺒﻮ ﻣﻦ ﻧﺎﺱ
ﺍﻟﻤﺠﻠﺲ ﺍﺳﻤﻮ ‏( ﺑﺎﻣﺒﻲ ‏) .. ﻭﺩ ﺩﺍﺭ ﺍﻟﺰﻳﻦ ﺣﻜﺎ ﻟﻴﻬﻮ ﺍﻟﻬﻢ ﺍﻟﻌﻠﻴﻬﻮ .. ﺑﺎﻣﺒﻲ ﻗﺎﻝ
ﻟﻴﻬﻮ ﻳﺎﺯﻭﻝ ﻣﺎﺗﺸﻴﻞ ﻫﻢ ﺍﻧﺖ ﻣﺮﻗﺘﻨﻲ ﻣﻦ ﻭﺭﻃﺎﺕ ﻛﺘﻴﺮﺓ ﺍﻧﺎ ﺑﺤﺎﻭﻝ ﺍﻣﺮﻗﻚ
ﻣﻨﻬﺎ .. ﺍﻥ ﺷﺎﺀ ﺍﻟﻠﻪ ﺍﻗﺪﺭ ..
ﺍﻫﺎ ﻃﺒﻌﺎ ﻗﺒﻞ ﻓﺘﺮﺓ ﻳﻤﻜﻦ ﻗﺒﺎﻝ ﺷﻬﺮﻳﻦ .. ﻛﺎﻥ ﻓﻲ ﻣﺸﻜﻠﺔ ﺣﺎﺻﻠﺔ ﻓﻲ ﺍﻟﻘﺼﺮ
ﺍﻟﻤﻠﻜﻲ ﻓﻲ ﻣﺪﻳﻨﺔ ﺳﻨﺎﺭ .. ﻭﺍﻟﻤﺸﻜﻠﺔ ﻛﺎﻧﺖ ﻛﺎﺭﺛﺔ ﻫﺰﺕ ﺍﻟﻘﺼﺮ ﺍﻟﻤﻠﻜﻲ
ﻭﻫﺰﺕ ﻛﻞ ﺍﺭﻛﺎﻥ ﻣﻤﻜﺔ ﺍﻟﻔﻮﻧﺞ .. ﺍﻟﻤﺸﻜﻠﺔ ﺑﺪﺍﻳﺘﻬﺎ ﻛﺎﻻﺗﻲ ..
ﺍﻟﻤﻠﻚ ﻛﺎﻥ ﻓﻲ ﻣﺸﻜﻠﺔ ﺑﻴﻨﻮ ﻭﺑﻴﻦ ﺍﻟﻤﻠﻜﺔ .. ﺍﻡ ﺍﻻﻣﺮﺍﺀ .. ﻭﺣﻠﻒ ﺍﻻ ﻳﺘﺰﻭﺝ ﻓﻴﻬﺎ
.. ﺍﺗﺰﻭﺝ ﻟﻴﻬﻮ ﺑﺖ ﺻﻐﻴﺮﺓ ﻭﺟﻤﻴﻠﺔ .. ﻣﻦ ﻣﻨﻄﻘﺔ ﻋﻠﻰ ﺑﺤﺮ ﺍﺑﻴﺾ ..
ﻭﺍﻟﻤﻠﻜﻪ ﺍﻻﻡ ﺣﻘﺪﺕ ﺣﻘﺪ ﺷﺪﻳﺪ ﺧﻼﺹ .. ﻭﺣﻠﻔﺖ ﺍﻻ ﺗﻜﺘﻞ ﺍﻟﻤﻠﻜﺔ ﺍﻟﺠﺪﻳﺪﺓ ..
ﺍﻟﻤﻠﻜﺔ ﺍﻻﻡ ﻋﻨﺪﻫﺎ ﺍﺭﺑﻌﺔ ﺍﻭﻻﺩ .. ﺻﺒﻴﺎﻥ ﺑﺎﻟﻐﻴﻦ ﺷﺒﺎﺏ ﻳﻌﻨﻲ ..ﻭﺟﺎﻳﻴﻦ ﻭﺭﺍ
ﺑﻌﺾ ﻛﻞ ﻭﺍﺣﺪ ﻓﺮﻗﻮ ﻣﻦ ﺍﻟﺘﺎﻧﻲ ﺳﻨﺘﻴﻦ ..
ﻭﻛﺎﻧﻮ ﻣﻐﺮﻣﻴﻦ ﺑﺎﻟﺼﻴﺪ ﺯﻱ ﺍﺑﻮﻫﻢ .. ﺍﻫﺎ ﻳﻮﻡ ﺍﻻﺗﻨﻴﻦ ﺍﻟﺼﻐﺎﺭ ﻭﻣﻌﺎﻫﻢ ﺍﻻﺧﻮ
ﺍﻟﻜﺒﻴﺮ .. ﻃﻠﻌﻮ ﺍﻟﺼﻴﺪ .. ﻭﺧﻠﻮ ﻭﺍﺣﺪ ﺍﻟﻠﻬﻮ ﻧﻤﺮﺓ ﺍﺗﻨﻴﻦ .. ﺧﻠﻮﻩ ﻓﻲ ﺍﻟﻘﺼﺮ ..
ﻭﻃﻠﻌﻮ ﺍﻟﺼﻴﺪ ﺍﺗﺎﺧﺮﻭ ﻟﻐﺎﻳﺔ ﺍﻟﻠﻴﻞ .. ﻭﺍﻣﻬﻢ ﻓﻲ ﻧﻔﺲ ﺍﻟﻴﻮﻡ ﺩﻩ ﻧﺎﻭﻳﺔ ﺗﺴﻤﻢ
ﺍﻟﻤﻠﻜﺔ ﺍﻟﺠﺪﻳﺪﺓ .. ﻭﺍﻟﻤﻠﻜﺔ ﺍﻟﺠﺪﻳﺪﺓ ﻛﺎﻧﺖ ﺑﺘﺘﺰﻳﻦ ﻓﻲ ﺍﻟﺠﻨﺎﺡ ﺍﻟﺨﺎﺹ ﺑﺘﺎﻋﻬﺎ ﻭﻣﺎ
ﺍﺗﻌﺸﺖ .. ﻭﺍﻟﻌﺸﺎﺀ ﺑﺘﺎﻋﻬﺎ ﺭﺯ .. ﻣﻮﺟﻮﺩ ﻓﻲ ﺍﻟﻤﻄﺒﺦ ﺍﻟﻤﻠﻜﻲ .. ﻭﺍﻟﻘﺎﺋﻢ ﻋﻠﻰ
ﺍﻟﻄﺒﺎﺧﺔ ﺷﺎﺏ ﺍﺳﻤﻮ ﺍﺑﻮ ﺧﻮﺳﻪ .. ﺍﺑﻮ ﺧﻮﺳﺔ ﺍﺻﻼ ﻛﺎﻥ ﺟﻨﺪﻱ ﻣﻦ ﺍﻟﻤﺤﺒﻴﻦ
ﻟﻠﻤﻠﻚ .. ﻭﺍﻟﻤﻠﻚ ﻋﻤﻠﻮ ﺭﺋﻴﺲ ﺍﻟﻄﺒﺎﺧﻴﻦ ﻣﺨﺼﻮﺹ ﻻﻧﻮ ﺯﻭﻝ ﺍﻣﻴﻦ ﻭﺑﺨﺎﻑ ﺭﺑﻨﺎ
..
ﺍﻫﺎ ﺍﻟﻤﻠﻜﺔ ﺧﻠﺖ ﺍﺑﻮ ﺧﻮﺳﺔ ﺍﻟﻄﺒﺎﺥ ﻧﺎﻡ .. ﻭﺟﺎﺕ ﺩﺧﻠﺖ ﺍﻟﻤﻄﺒﺦ ﻭﻛﺒﺖ ﺍﻟﺴﻢ
ﺍﻻﺑﻴﺾ ﻓﻲ ﺍﻟﺮﺯ ﺑﺘﺎﻉ ﻋﺸﺎ ﺍﻟﻤﻠﻜﺔ ﺍﻟﺠﺪﻳﺪﺓ ..
ﻭﺍﺑﻮﺧﻮﺳﺔ ﺻﺤﻰ ﺑﻲ ﺑﺎﻟﺤﺮﻛﺔ ﻭﺷﺎﻑ ﺍﻟﻤﻠﻜﺔ ﺩﺧﻠﺖ ﺍﻟﻤﻄﺒﺦ ﻭﻃﻠﻌﺖ ..
ﻭﺍﺳﺘﻐﺮﺏ ﺷﺪﻳﺪ ..
ﻻﻥ ﺍﻟﻤﻠﻜﺔ ﻣﺎﺑﺘﺪﺧﻞ ﺍﻟﻤﻄﺒﺦ ﻧﻬﺎﺋﻲ ..
ﻟﻜﻦ ﻣﺎﺧﺖ ﻓﻲ ﺭﺍﺳﻮ ﺍﻱ ﺍﺣﺘﻤﺎﻝ ﺍﻧﻮ ﻣﻤﻜﻦ ﺍﻟﻤﻠﻜﺔ ﺗﻜﻮﻥ ﻛﺒﺖ ﺍﻟﺴﻢ ﻓﻲ
ﺍﻟﻌﺸﺎﺀ ..
ﺍﻫﺎ ﻳﺎﺯﻭﻝ ﺭﺑﻨﺎ ﺣﻔﻆ ﺍﻟﻤﻠﻜﺔ ﺍﻟﺠﺪﻳﺪﺓ .. ﻭﻧﺎﻣﺖ ﺑﺪﻭﻥ ﻋﺸﺎﺀ .
ﻻﻧﻬﺎ ﻛﺎﻧﺖ ﻣﻨﺘﻈﺮﺓ ﺍﻟﻤﻠﻚ .. ﻭﺍﻟﻤﻠﻚ ﺍﺗﺎﺧﺮ ﻣﻊ ﻗﺎﺩﺓ ﺍﻟﺠﻴﺶ .. ﻛﺎﻧﺖ ﻓﻲ ﻣﺸﻜﻠﺔ
ﺑﺘﺨﺺ ﺍﻟﺠﻴﺶ .. ﻛﻮﻳﺲ؟؟ ..
ﺍﻫﺎ ﻛﺎﻧﺖ ﺍﻟﻤﻠﻜﺔ ﺍﻟﺠﺪﻳﺪﺓ ﻣﻨﺘﻈﺮﺍﻫﻮ ﺗﻘﻀﻲ ﻟﻴﻬﻮ ﺍﺣﺘﻴﺎﺟﺎﺗﻮ ﺍﻟﺨﺎﺻﺔ ﺣﺘﻦ
ﺑﻌﺪﻳﻦ ﺗﺘﻌﺸﻰ .. ﺑﺲ ﺭﺑﻨﺎ ﺣﻔﻈﻬﺎ ﻭﻧﺎﻣﺖ .. ﻗﺒﻞ ﻣﺎﻳﺠﻲ ﺍﻟﻤﻠﻚ ..ﻭﺍﻟﻤﻠﻚ ﺟﺎ
ﻣﺘﺄﺧﺮ .. ﻟﻘﺎﻫﺎ ﻧﺎﻳﻤﺔ ﻓﻲ ﺍﻟﺴﺮﻳﺮ ﺑﺎﻟﻌﺮﺽ .. ﺻﻠﺤﻬﺎ ﻭﻋﺪﻝ ﻟﻴﻬﺎ ﺭﻗﺪﺗﻬﺎ ..
ﻏﻄﺎﻫﺎ ﻭﻧﺎﻡ ..
ﻓﻲ ﺍﺧﺮ ﺍﻟﻠﻴﻞ ﺟﻮ ﺍﻻﻣﺮﺍﺀ ﺍﻟﺘﻼﺗﺔ ﻣﻦ ﺍﻟﺼﻴﺪ .. ﻭﻛﺎﻧﻮ ﻣﺘﺄﺧﺮﻳﻦ ..
ﻭﺍﺣﺪ ﻓﻴﻬﻢ ﻗﺎﻝ ﻟﻴﻬﻢ .. ﻧﺤﻦ ﺍﻟﻠﻴﻠﺔ ﺷﺒﻌﻨﺎ ﻟﺤﻢ ﺻﻴﺪ .. ﻧﺪﺧﻞ ﺍﻟﻤﻄﺒﺦ ﺩﻩ ﻧﺸﻮﻑ
ﻛﺎﻥ ﺍﻟﻘﺎ ﻟﻲ ﺷﻲ ﺣﻠﻮ ..
ﻫﻨﺎ ﺍﺏ ﺧﻮﺳﺔ ﺳﻤﻊ ﺍﻟﻜﻼﻡ ..ﻭﻗﺎﻝ ﻟﻴﻬﻮ ﺍﻳﻮﺓ ﻳﺎﻣﻮﻻﻱ ﺍﻻﻣﻴﺮ ﻓﻲ ﺍﻟﻌﺸﺎ ﺣﻖ
ﺍﻟﻤﻠﻜﺔ ﺍﻟﺼﻐﻴﺮﺓ .. ﻭﻣﺎﺟﺎﺗﻮ .. ﺍﻟﻈﺎﻫﺮ ﻧﺎﻣﺖ .. ﺍﺟﻴﺒﻮ ﻟﻴﻜﻢ؟؟
ﻗﺎﻝ ﻟﻴﻬﻮ ﺟﻴﺒﻮ .. ﺟﺎﺑﻮ ﻟﻴﻬﻢ .. ﻭﻫﻮ ﻣﺎﻋﺎﺭﻑ ﺍﻻﻛﻞ ﻣﺴﻤﻮﻡ .. ﺍﻫﺎ ﺍﻛﻠﻮ ﺍﻟﺘﻼﺗﺔ
.. ﻓﻲ ﺍﻟﺮﺯ ﺍﻟﻤﺴﻤﻤﺎﻫﻮ ﺍﻣﻬﻢ ﻻﻣﻦ ﺷﺒﻌﻮ .. ﻭﻣﺎﺗﻮ ﺍﻟﺘﻼﺗﺔ ﻗﺒﻞ ﺍﻟﻔﺠﺮ ..
ﺍﻟﺼﺒﺎﺡ ﺟﻮ ﻟﻘﻮﻫﻢ ﻣﻴﺘﻴﻦ ﺍﻟﺘﻼﺗﺔ .. ﻧﺎﺩﻭ ﺍﻟﻄﺒﻴﺐ ﺍﻟﻤﻠﻜﻲ ﻗﺎﻝ ﺍﻟﻨﺎﺱ ﺩﻳﻞ ﻣﺎﺗﻮ
ﻣﺘﺴﻤﻤﻴﻦ .. ﻃﺒﻌﺎ" ﻣﺎﻓﻲ ﺯﻭﻝ ﻋﺎﺭﻑ ﺍﻧﻬﻢ ﺍﻛﻠﻮ ﺍﻟﺮﺯ ...
ﺍﻻ ﺍﻟﻄﺒﺎﺥ ﺍﺏ ﺧﻮﺳﻪ .. ﻭﺍﻟﻄﺒﺎﺥ ﻃﺒﻌﺎ" ﻣﺴﺆﻭﻝ ﻣﻦ ﺍﻱ ﺍﻛﻞ ﻳﺘﻌﻤﻞ ﻓﻲ
ﺍﻟﻤﻄﺒﺦ ﺍﻟﻤﻠﻜﻲ .. ﻳﻌﻨﻲ ﻣﻤﻜﻦ ﻳﻨﻜﺮ ﻋﺎﺩﻱ .. ﻭﻳﻘﻮﻝ ﻳﻌﻤﻴﻨﻲ ..
ﺍﻫﺎ ﻟﻤﻦ ﻧﺎﺩﻭﻫﻮ .. ﻭﺳﺄﻟﻮﻫﻮ .. ﻓﻲ ﺍﻟﺘﺤﻘﻴﻘﺎﺕ ﺍﻻﻭﻟﻴﺔ ..
ﺳﺄﻟﻪ ﺍﻟﻘﺎﺿﻲ ﺍﻟﻤﻠﻜﻲ .. ﺍﻻﻣﺮﺍﺀ ﺩﻳﻞ ﻟﻤﻦ ﺟﻮ ﻣﻦ ﺍﻟﺼﻴﺪ ﺍﻛﻠﻮ ﺣﺎﺟﺔ ﻭﻻ ﻧﺎﻣﻮ
ﻃﻮﺍﻟﻲ ؟؟
ﻗﺎﻝ ﻻ ﺟﻮ ﻗﺎﻟﻮ ﺩﺍﻳﺮﻳﻦ ﻟﻬﻢ ﺣﻠﻮ ..
ﻭﺍﻧﺎ ﺩﺧﻠﺖ ﺍﻟﻤﻄﺒﺦ ﺟﺒﺖ ﻟﻴﻬﻢ ﺍﻟﻌﺸﺎ ﺍﻟﻜﺎﻥ ﻣﻔﺮﻭﺽ ﺗﺎﻛﻠﻮ ﺍﻟﻤﻠﻜﺔ ﺍﻟﺼﻐﻴﺮﺓ ..
ﻛﺎﻥ ﺭﺯ ﺑﺎﻟﻠﺒﻦ ﻭﺍﻟﺴﻤﻦ .. ﻭﺍﻟﻤﻠﻜﺔ ﺍﻟﺼﻐﻴﺮﺓ ﻣﺎ ﻃﻠﺒﺘﻮ ﺍﻟﻈﺎﻫﺮ ﻧﺎﻣﺖ ﺑﻼﻋﺸﺎ ..
ﻗﺎﻝ ﻟﻴﻬﻮ ﺍﻟﺮﺯ ﺍﻟﺴﻮﺍﻫﻮ ﻣﻨﻮ؟؟ ..
ﻗﺎﻝ ﻟﻴﻬﻮ ﺳﻮﻳﺘﻮ ﺍﻧﺎ .. ﻗﺎﻝ ﻟﻴﻬﻮ ﻳﻌﻨﻲ ﺍﻧﺖ ﻛﺒﻴﺖ ﺍﻟﺴﻢ ﻟﻲ ﺍﻟﻤﻠﻜﺔ
ﺍﻟﺼﻐﻴﺮﺓ ؟؟ ..
ﺍﺏ ﺧﻮﺳﺔ ﻗﺎﻝ ﻟﻴﻬﻮ ﺍﺑﺪﺍ ﻣﺎ ﻛﺒﻴﺘﻮ .. ﻭﻣﺎﻋﻨﺪﻱ ﻣﺼﻠﺤﺔ ﺍﻧﻮ ﻣﻮﻻﺗﻲ ﺗﻤﻮﺕ ..
ﺍﺏ ﺧﻮﺳﺔ ﻓﻲ ﺍﻟﻠﺤﻈﺔ ﻛﺎﻥ ﺩﺍﻳﺮ ﻳﺤﻜﻲ ﻗﺼﺔ ﺍﻟﻤﻠﻜﺔ ﺍﻟﻜﺒﻴﺮﺓ ﺍﻟﺠﺎﺕ ﺑﺎﻟﻠﻴﻞ
..ﻭﺩﺧﻠﺖ ﺍﻟﻤﻄﺒﺦ ﻭﻣﺮﻗﺖ .. ﻭﻫﻮ ﻣﺘﺎﻛﺪ ﺍﻧﻮ ﺍﻟﻤﻠﻚ ﺡ ﻳﺼﺪﻗﻮ ..
ﻟﻜﻦ ﺍﺏ ﺧﻮﺳﺔ ﺳﻜﺖ ﻭﺑﻘﻰ ﻳﺘﻜﻠﻢ ﻣﻊ ﻧﻔﺴﻮ .. ﻗﺎﻝ ﻳﺎﺍﺏ ﺧﻮﺳﺔ .. ﺍﻟﻤﺮﺍﺓ
ﻓﻘﺪﺕ ﺗﻼﺗﺔ ﺍﻭﻻﺩ ﻓﻲ ﻟﻴﻠﺔ ﻭﺍﺣﺪﺓ .. ﻭﻫﻲ ﺍﻟﻜﺘﻠﺘﻬﻢ .. ﺍﻧﺎ ﺗﺎﻧﻲ ﺍﺭﻣﻲ ﻓﻮﻗﻬﺎ
ﺗﻬﻤﺔ ﺑﻌﺪ ﺍﻟﺤﺰﻥ ﻭﺍﻟﻤﺼﻴﺒﺔ ﺍﻟﻌﺎﻳﺸﺔ ﻓﻴﻬﺎ ﻫﺴﻊ ﺩﻱ؟ ..
ﺭﻓﻊ ﺭﺍﺳﻮ ﻭﻗﺎﻝ ﻟﻠﻘﺎﺿﻲ ﺍﻧﺎ ﺑﺴﺘﺤﻤﻞ ﻣﺴﺆﻭﻟﺔ ﺍﻻﻛﻞ .. ﻟﻜﻦ ﻭﺍﻟﻠﻪ ﻣﺎ ﻛﺒﻴﺖ
ﻓﻴﻬﻮ ﺳﻢ .. ﻭﻣﺎﻋﺎﻳﺰ ﺍﺗﻬﻢ ﻟﻲ ﺯﻭﻝ ﺍﻧﺎ ﻣﺎﺷﻔﺘﻮ .. ﻭﺭﺑﻨﺎ ﻳﻌﻠﻢ ﻣﺎﺷﻔﺖ ﺑﻲ
ﻋﻴﻨﻲ ﺯﻭﻝ ﻛﺐ ﺳﻢ ﻓﻲ ﺍﻻﻛﻞ ..
ﻭﺍﻧﺎ ﻣﺴﺘﻌﺪ ﻻﻱ ﻋﻘﺎﺏ ﻳﻨﺰﻝ ﻋﻠﻲ .. ﻻﻧﻬﺎ ﺩﻱ ﻣﺴﺆﻭﻟﻴﺘﻲ ﺍﻧﺎ ..
ﻗﺎﻡ ﺍﻟﻤﻠﻚ ﻋﺎﻳﻦ ﻟﻲ ﺍﺏ ﺧﻮﺳﺔ ﻛﺪﺍ ﻓﻲ ﻋﻴﻮﻧﻮ .. ﻭﻗﺎﻝ ﻟﻴﻬﻮ ﻳﺎ ﺍﺏ ﺧﻮﺳﺔ ﺍﻧﺖ
ﻛﺬﺍﺏ .. ﺍﻧﺖ ﺻﺎﺡ ﻣﺎ ﺳﻤﻤﺖ ﺍﻻﻛﻞ .. ﻟﻜﻦ ﻋﺎﺭﻑ ﺍﻟﺴﻤﻢ ﺍﻻﻛﻞ ﻣﻨﻮ ﻭﺩﺍﻳﺮ
ﺗﺴﺘﺮﻭ ..
ﻟﻜﻦ ﻳﺎ ﺍﺏ ﺧﻮﺳﺔ ﺑﻲ ﺳﺘﺮﻙ ﻟﻲ ﺍﻟﺰﻭﻝ ﺩﻩ .. ﺑﺎﻛﺮ ﺑﻜﺮﺭ ﺍﻟﺴﻢ ﻟﻠﻤﻜﻠﺔ ﺍﻟﺼﻐﻴﺮﺓ
..
ﺍﺏ ﺧﻮﺳﺔ ﻗﺎﻝ ﻟﻴﻬﻮ ﺣﺎﺷﺎ ﻭﻛﻼ ﻳﺎﻣﻮﻻﻱ .. ﺍﻟﻤﻠﻜﺔ ﺍﻟﺼﻐﻴﺮﺓ ﺭﺑﻨﺎ ﺯﻱ ﻣﺎ
ﺣﻔﻈﻬﺎ ﺍﻟﻠﻴﻠﺔ .. ﺑﺤﻔﻈﻬﺎ ﻣﻦ ﺍﻳﺪﻱ ﺍﻟﺨﻮﻧﺔ ﻟﻲ ﻗﺪﺍﻡ ..
ﻗﺎﻟﻮ ﻓﻲ ﺍﻟﻠﺤﻈﺎﺕ ﺩﻱ ﺍﻟﻤﻠﻜﺔ ﺍﻟﻜﺒﻴﺮﺓ ﺑﻲ ﻏﺎﺩﻱ ﺗﺒﻜﻲ ﻋﻠﻰ ﺍﻭﻻﺩﻱ ﻭﺗﻜﺐ
ﻓﻲ ﺍﻟﺮﻣﺎﺩ ﻓﻮﻕ ﺭﺍﺳﻬﺎ .. ﻭﺑﻘﺖ ﺯﻱ ﺍﻟﻤﺠﻨﻮﻧﺔ .. ﻭﺗﺘﻜﻠﻢ ﺑﺮﺓ ﻣﻦ ﺭﺍﺳﻬﺎ ..
ﻭﻗﺎﻟﺖ ﺍﻟﺴﻢ ﻛﺒﻴﺘﻮ ﺍﻧﺎ .. ﻭﺍﻧﺎ ﺍﻟﻜﺘﻠﺖ ﻭﻟﻴﺪﺍﺗﻲ ..
ﻭﺍﻟﻤﻠﻚ ﻗﺎﻝ ﺍﺻﻼ ﻣﺎﺗﺘﻌﺎﻗﺐ .. ﻋﻔﺎﻫﺎ .. ﺑﺲ ﻧﻔﺎﻫﺎ ﻟﻲ ﻣﻨﻄﻘﺔ ﻓﻲ ﺟﻨﻮﺏ ﻛﺴﻼ
..ﻗﻌﺪﺕ ﻓﻲ ﻗﺼﺮ ﺭﻳﻔﻲ ﻫﻨﺎﻙ ..
ﻭﺍﺏ ﺧﻮﺳﺔ ﺍﻟﻤﻠﻚ ﻃﺮﺩﻭ ﻣﻦ ﺍﻟﺸﻐﻞ .. ﻭﺟﺮﺩﻭ ﻣﻦ ﺍﻣﻼﻛﻮ .. ﻭﻣﻨﻌﻮ ﻣﻦ
ﺣﻘﻮﻗﻮ .. ﻟﻜﻦ ﻣﺎﻋﺎﻗﺒﻮ .. ﻻﻧﻮ ﻋﺎﺭﻓﻮ ﺻﺎﺩﻕ .. ﻭﻋﺎﺭﻓﻮ ﻋﻤﻞ ﻛﺪﺍ ﻟﻴﻪ .. ﻋﺸﺎﻥ
ﻗﻠﺒﻮ ﺣﺎﻧﻲ ﻋﻠﻰ ﺍﻟﻤﺮﺍﺓ ﺍﻟﻔﻘﺪﺕ ﺍﻭﻻﺩﻫﺎ ﺍﻟﺘﻼﺗﺔ .. ﺍﺏ ﺧﻮﺳﺔ ﻃﻮﺍﻟﻲ ﺍﺗﻠﻤﻠﻢ
ﻣﻦ ﺍﻟﻘﺼﺮ ﻭﻣﺸﻰ ﻗﺮﻳﺘﻮ .. ﻭﺍﺷﺘﻐﻞ ﺣﻄﺎﺏ .. ﻋﺎﻳﻞ ﺍﻣﻮ ﻭﺍﺑﻮﻫﻮ ﻭﺍﺧﺘﻮ
ﺍﻟﺼﻐﻴﺮﺓ ﻛﺎﻧﺖ ﺑﺘﺮﻋﻰ ﻓﻲ ﺑﻬﺎﻳﻢ ﺷﻮﻳﺔ ﻛﺪﺍ ..
ﻭﺍﺏ ﺧﻮﺳﺔ ﺑﻘﻰ ﻳﻤﺸﻲ ﻳﻘﻄﻊ ﺍﻟﺤﻄﺐ ﻭﻳﺠﻲ ﻳﺒﻌﻮ ﻟﻠﻨﺎﺱ ﻓﻮﻕ ﺣﻤﺎﺭﺗﻮ ..
ﻭﺍﻟﻌﺰ ﺍﻟﺰﻣﺎﻥ ﺩﺍﻙ .. ﻭﺍﻟﻘﺮﻭﺵ ﺩﻳﻚ ﻛﻠﻬﺎ ﺭﺍﺣﺖ ..
ﺍﻫﺎ ﺍﺏ ﺧﻮﺳﺔ ﺩﻩ .. ﺻﺪﻳﻖ ﻣﻘﺮﺏ ﻟﻲ ﺑﺎﻣﺒﻲ ﺑﺘﺎﻉ ﺍﻟﻤﺠﻠﺲ ﺻﺎﺣﺐ ﻭﺩ ﺩﺍﺭ
ﺍﻟﺰﻳﻦ .. ﻭﺑﺎﻣﺒﻲ ﻛﺎﻥ ﻣﺘﺄﺛﺮ ﺷﺪﻳﺪ ﺑﻲ ﻗﺼﺔ ﺍﺏ ﺧﻮﺳﺔ ..
ﺑﺎﻣﺒﻲ ﻃﻮﺍﻟﻲ ﺭﻛﺐ ﻣﺸﺎﻟﻮ ﻓﻲ ﻗﺮﻳﺘﻮ ..
ﻭﻟﻘﺎﻫﻮ ﻗﺎﻋﺪ ﻳﻔﺘﻞ ﻟﻴﻬﻮ ﻓﻲ ﺣﺒﺎﻝ .. ﻭﺍﺑﻮﻫﻮ ﻭﺍﻣﻮ ﻛﺒﺎﺭ ﻓﻲ ﺍﻟﺴﻦ
ﻭﺍﺧﺘﻮ ﺍﻟﺮﺳﺎﻟﺔ ﻋﻤﺮﻫﺎ 12 ﺳﻨﺔ ﻗﺎﻋﺪﺓ ﻓﻲ ﺍﻟﻀﻞ ﺗﺼﻮﻁ ﻓﻲ ﻋﺼﻴﺪﺓ ﺩﺧﻦ ..
ﻗﺎﻝ ﻟﻴﻬﻮ ﻭﺍﻟﻠﻪ ﻳﺎ ﺍﺏ ﺧﻮﺳﺔ ﺍﻥ ﺑﻘﻰ ﺭﺑﻨﺎ ﺩﺍﻳﺮ ﻳﺮﻓﻌﻚ ﺍﻟﻠﻴﻠﺔ ﺑﺲ ﺟﺎﻙ
ﺍﻟﺴﻌﺪ ..ﻭﺍﻥ ﺑﻘﻰ ﺍﺻﻠﻚ ﺯﻭﻻ" ﺷﻘﻰ ﻭﺣﻈﻚ ﺷﻮﻡ .. ﻛﻤﺎﻥ ﺑﻨﺸﻮﻓﻚ ..
ﺍﺏ ﺧﻮﺳﺔ ﻗﺎﻝ ﻟﻴﻬﻮ ﺍﺣﻜﻲ ﻳﺎ ﻃﻴﺐ ﺍﻻﺻﻞ ..
ﺑﻘﻰ ﻳﺤﻜﻲ ﻟﻴﻬﻮ ﺑﺎﻟﻨﺴﻴﻢ ﺑﺖ ﻭﺩ ﺩﺍﺭ ﺍﻟﺰﻳﻦ .. ﻭﺟﻤﺎﻻ .. ﻭﺟﻨﻮﻥ ﺍﻟﻨﺎﺱ ﺑﻴﻬﺎ
ﻭﺍﻟﻤﺎﻝ ﺍﻟﺒﺠﻲ ﺑﻲ ﻭﺭﺍﻫﺎ .. ﻭﺍﻟﻌﺰ .. ﻗﺎﻝ ﻟﻴﻬﻮ ﻭﺍﻟﻠﻪ ﺍﻟﻨﺴﻴﻢ ﺳﻤﻌﺖ ﺑﻴﻬﺎ
ﻭﺍﻟﺪﻧﻴﺎ ﻛﻠﻬﺎ ﺑﺘﻨﻀﻢ ﺑﻬﺎ ..
ﻗﺎﻝ ﻟﻴﻬﻮ ﺩﻗﻴﻖ ﺍﻟﻨﻜﻤﻞ ﻟﻚ ﺑﺎﻗﻲ ﺍﻟﻨﻀﻢ ..
.. ﺣﻜﺎ ﻟﻴﻬﻮ ﺑﻲ ﻗﺼﺔ ﻭﺩ ﻣﻜﺘﻮﻝ ﺍﻟﻌﺠﻮﺯ ﺍﻟﺢ ﻳﺘﺰﻭﺝ ﺍﻟﺒﺖ ..
ﺍﺏ ﺧﻮﺳﺔ ﻗﺎﻝ ﻟﻴﻬﻮ ﻃﻴﺐ ﻣﺎﺩﺍﻡ ﻭﺩ ﻣﻜﺘﻮﻝ ﻫﺴﻊ ﻓﻲ ﻓﺘﺮﺓ ﺍﻻﺧﺘﺒﺎﺭ .. ﺧﺒﺎﺭﻙ
ﺍﻧﺖ ﺟﺎﻳﻨﻲ ؟
ﻗﺎﻝ ﻟﻴﻬﻮ ﻭﺩ ﻣﻜﺘﻮﻝ ﺍﻧﺎ ﺑﻌﺮﻑ ﺍﺻﺮﻓﻮ ﻟﻴﻚ ﺑﺲ ﺍﻧﺖ ﺗﻘﺒﻞ ﻟﻲ ﺑﺎﻟﻤﻮﺿﻮﻉ ﺩﻩ
ﺍﻧﺎ ﻭﺍﻟﻠﻪ ﺩﺍﻳﺮ ﺍﺑﺮﻙ .. ﻭﺑﻌﺪ ﻧﺎﺗﻌﺮﺱ ﺍﻟﻨﺴﻴﻢ ﻋﻨﺪﻱ ﻃﻠﺐ ﻣﻨﻚ ﺗﻠﺒﻴﻬﻮ ﻟﻲ .. ﻗﺎﻝ
ﻟﻴﻬﻮ ﻃﻠﺒﻚ ﺷﻨﻮ؟
ﻗﺎﻝ ﻟﻴﻬﻮ ﺩﻩ ﺳﺮ ﺑﻘﻮﻟﻮ ﻟﻴﻚ ﺑﻌﺪ ﺍﻟﻨﺴﻴﻢ ﺗﺒﻘﻰ ﻣﺮﺗﻚ ..
ﻗﺎﻝ ﻟﻴﻬﻮ ﺍﻧﺎ ﻳﺎﺧﻮﻱ ﺍﻥ ﺑﻘﻰ ﻣﺎﺷﻔﺖ ﺍﻟﺒﺖ ﻣﺎﺑﻘﺒﻞ .. ﻭﺍﻧﺎ ﻣﺎﻧﻲ ﻣﻦ ﺍﻟﻨﺎﺱ
ﺍﻟﺒﻌﺮﺳﻮ ﻋﺸﺎﻥ ﺍﻟﺴﻤﺎﺣﺔ . ﺍﻟﺴﻤﺎﺣﺔ ﺗﻄﻴﺮ .. ﺍﻧﺎ ﺩﺍﻳﺮ ﻟﻲ ﺑﺖ ﺗﺤﻤﻠﻨﻲ ﻭﺗﺤﻤﻞ
ﺍﺑﻮﻱ ﻭﺍﻣﻲ ..
ﻗﺎﻝ ﻟﻴﻬﻮ ﺧﻼﺹ ﺍﻧﺖ ﺍﺭﻛﺐ ﺣﻤﺎﺭﺗﻚ ﻭﺷﻴﻞ ﺣﻄﺒﻚ ﻭﺍﻣﺸﻲ ﺩﻕ ﺍﻟﺒﺎﺏ
ﺣﻖ ﻧﺎﺱ ﻭﺩﺍﺭ ﺍﻟﺰﻳﻦ
ﻭﺍﻟﻜﻼﻡ ﺩﻩ ﻳﻜﻮﻥ ﺑﻴﻦ ﺍﻟﺸﺮﻗﺔ ﻭﺍﻟﻀﺤﻰ ... ﻋﺸﺎﻥ ﺍﻟﻮﻗﺖ ﺩﻩ ﺍﻟﺘﺎﻳﺔ ﺑﺖ ﻣﺨﺘﺎﺭ
ﺍﻡ ﺍﻟﻨﺴﻴﻢ ﺑﺘﻜﻮﻥ ﻣﺸﺖ ﻋﻠﻰ ﺍﻟﺴﻮﻕ .. ﻭﺍﻟﻨﺴﻴﻢ ﺑﺘﻔﺘﺢ ﻟﻚ ﺍﻟﺒﺎﺏ
ﻭﺍﻧﺖ ﺑﺘﺸﻮﻓﺎ .. ﻭﺑﻌﺪ ﺗﺸﻮﻓﺎ ﺑﻨﻌﺮﻓﻚ ﻛﺎﻥ ﺑﺘﻨﺴﺘﺮ ﻭﻻ ﺑﺘﻠﺤﻖ ﻭﺩ ﺍﻟﺴﻴﺪ
ﺍﻻﻧﺸﻘﻪ ﺑﻲ ﺷﻮﻕ ﺍﻟﻨﺴﻴﻢ ..
ﺍﻟﻰ ﺍﻟﻠﻘﺎﺀ .