ﻭﺩ ﺩﺍﺭ ﺍﻟﺰﻳﻦ ﻭﺩﻉ ﺍﻟﺸﻴﺦ .. ﻭﻣﻄﻤﺌﻦ ﺑﻲ ﻛﻼﻣﻮ .. ﻭﻣﻮﻗﻦ ﺍﻧﻮ ﺩﻋﻮﺗﻮ ﻣﺴﺘﺠﺎﺑﺔ .. ﺍﻟﺸﻴﺦ ﻗﺎﻝ ﻟﻴﻬﻮ ﺍﻫﺎ ﺑﻌﺪ ﺑﺎﻛﺮ ﺍﻟﺴﺒﺖ ﺑﺘﺠﻲ ﺍﻟﺪﺭﺱ؟ .. ﻗﺎﻝ ﻟﻴﻬﻮ ﺍﻧﺎ ﻳﺎ ﺷﻴﺨﻨﺎ ﻟﻮ ﺍﻟﺪﻧﻴﺎ ﺍﺗﻘﻠﺒﺖ .. ﺩﺭﺳﻲ ﻣﺎﺑﻔﻮﺗﻮ .. ﻧﺤﻦ ﻛﻨﺎ ﻋﻤﻲ ﻭﻃﺮﺵ .. ﻭﺑﻲ ﺩﺭﻭﺳﻚ ﺩﻱ ﺍﻟﺤﻤﺪ ﻟﻠﻪ ﺭﺑﻨﺎ ﻧﻮﺭ ﺑﺼﺎﻳﺮﻧﺎ .. ﻭﺩﻋﻮ ﻭﻣﺸﻰ ..
ﺍﻫﺎ ﻳﺎﺯﻭﻝ ﻓﻲ ﺍﻟﻘﺼﺮ ﺑﻲ ﻏﺎﺩﻱ .. ﻓﻲ ﻭﺍﺣﺪ ﻣﻦ ﺍﻟﺸﻐﺎﻟﻴﻦ ﻓﻲ ﺍﻟﻘﺼﺮ .. ﺍﺳﻤﻮ ﺍﻟﺘﻮﻳﻢ .. ﻣﻦ ﺍﻟﻨﺎﺱ ﺍﻟﺒﻤﺘﺎﺯﻭ ﺍﻟﺨﺴﺎﺳﺔ ﻭﻧﻘﻞ ﺍﻻﺧﺒﺎﺭ .. ﻭﻫﻮ ﺻﺎﺣﺐ ﻭﺍﺣﺪ ﻣﻦ ﺣﺮﺍﺱ ﺍﻻﻣﻴﺮ .
. ﻭﺍﻟﻈﺎﻫﺮ ﺻﺎﺣﺒﻮ ﺍﻟﺤﺎﺭﺱ ﻛﻠﻤﻮ ﺑﻲ ﻗﺼﺔ ﺍﻟﻨﺴﻴﻢ .. ﺍﻫﺎ ﺍﻟﺘﻮﻳﻢ ﺩﻩ ﻻﻗﻰ ﺍﻻﻣﻴﺮ ﻭﻗﺎﻝ ﻟﻴﻬﻮ . ﻳﺎﻣﻮﻻﻱ ﺍﻧﺎ ﻋﻨﺪﻱ ﺧﺒﺮ ﻭﺑﺪﻭﺭ ﺍﻟﻬﺪﻳﺔ .. ﻗﺎﻝ ﻟﻴﻬﻮ ﺍﻫﺎ ﻗﻮﻝ ﺍﻟﻬﺪﻳﺔ ﻫﻴﻨﺔ ..
ﻗﺎﻝ ﻟﻴﻬﻮ ﺍﻟﻠﻴﻠﺔ ﺟﺎﺀ ﻭﺩ ﺩﺍﺭ ﺍﻟﺰﻳﻦ ﻳﺸﻜﻴﻚ ﻟﻠﻤﻠﻚ .. ﻭﺍﻟﻤﻠﻚ ﺭﺳﻠﻨﻲ ﻟﻲ ﺍﻟﻔﻜﻲ ﻭﺩ ﺟﺎﺭ ﺍﻟﻨﺒﻲ .. ﻭﺩ ﺟﺎﺭ ﺍﻟﻨﺒﻲ ﻗﺎﻝ ﺍﻟﻤﻠﻚ ﺳﺄﻟﻮ .. ﺑﺪﻭﺭ ﻳﻌﺮﻑ ﻓﺘﻮﻯ ﻣﻦ ﻋﺪﺓ ﺍﻟﻤﺮﺓ ﺍﻟﻤﻄﻠﻘﺔ ..
ﻗﺎﻝ ﻟﻴﻬﻮ ﺍﻧﺖ ﻋﺮﻓﺖ ﻛﻴﻒ ﺍﻧﻮ ﺍﻟﻜﻼﻡ ﺩﻩ ﻋﺎﻧﻴﻨﻲ ؟؟ ( ﺑﺨﺼﻨﻲ ) .. ﻗﺎﻝ ﻟﻴﻬﻮ ﻣﻮﺵ ﺍﻧﺖ ﻗﺖ ﺩﺍﻳﺮ ﺑﺖ ﻭﺩ ﺩﺍﺭ ﺍﻟﺰﻳﻦ .. ؟؟
ﻗﺎﻝ ﻟﻴﻬﻮ ﺍﻟﻘﺎﻝ ﻟﻚ ﻣﻨﻮ .. ﻗﺎﻝ ﻟﻴﻬﻮ ﻗﺎﻝ ﻟﻲ ( ﺍﻟﻀﻴﺐ ) .. ﺍﻟﻀﻴﺐ ﺩﻩ ﻭﺍﺣﺪ ﻣﻦ ﺣﺮﺱ ﺍﻻﻣﻴﺮ ﺍﻟﺘﻼﺗﺔ ﺩﻳﻚ .. ﺍﻟﺒﻤﺸﻮ ﻣﻌﺎﻫﻮ ﺍﻟﺼﻴﺪ .. ﻭﻫﻢ ﻋﺎﺭﻓﻴﻦ ﻗﺼﺔ ﺍﻟﻨﺴﻴﻢ ..
ﻗﺎﻝ ﻟﻴﻬﻮ ﺍﻟﻀﻴﺐ ﺧﻠﻮ ﻟﻲ ﺑﻨﻈﻤﻮ .. ﺍﻟﻜﻠﺐ ﻳﻄﻠﻊ ﺍﻻﺳﺮﺍﺭ .. ﻟﻜﻦ ﻫﺴﻊ ﺍﻧﺖ ﺍﻣﺶ ﻟﻲ ﻭﺩ ﺟﺎﺭ ﺍﻟﻨﺒﻲ .. ﻭﻧﺎﺩﻭ ﻟﻲ ﻫﺴﻊ .. ﻭﺩ ﺟﺎﺭ ﺍﻟﻨﺒﻲ ﺟﺎﺀ ﺧﺎﺿﻐﺎ " ﺑﻜﻞ ﻣﺎﻟﺪﻳﻪ .. ﺍﻟﻔﻜﻲ ﻭﺩ ﺟﺎﺭ ﺍﻟﻨﺒﻲ . ﻣﻦ ﺍﻟﻨﺎﺱ ﺍﻟﺪﺍﺭﺳﻴﻦ ﻓﻲ ﺍﻻﺯﻫﺮ .. ﻓﻲ ﺭﻭﺍﻕ ﺍﻟﺴﻨﺎﺭﻳﺔ ﺍﻟﻤﺸﻬﻮﺭ ..
ﺭﻭﺍﻕ ﺍﻟﺴﻨﺎﺭﻳﺔ ﺍﺗﺨﺮﺝ ﻣﻨﻪ ﻛﻤﻴﺔ ﻣﻦ ﺍﻟﻔﻘﻬﺎﺀ .. ﻟﻜﻦ ( ﺟﺰﺋﻴﻪ ﻛﺒﻴﺮﺓ ) ..
ﻣﻦ ﻫﻮﻻﺀ ﺍﻟﻔﻘﻬﺎﺀ ﺍﺗﺒﻌﻮ ﺍﻟﻄﺮﻕ ﺍﻟﺼﻮﻓﻴﺔ ﻓﻲ ﻣﺼﺮ .. ﺍﻟﻜﺎﻧﺖ ﻣﻨﺘﺸﺮﺓ ﻫﻨﺎﻙ ﻓﻲ ﺍﻟﻜﺖ ﺩﺍﻙ .. ﻭﺟﻮﺍ ﺍﻟﻰ ﺍﻟﺴﻮﺩﺍﻥ .. ﻭﻟﻢ ﻳﺪﺭﺳﻮ ﺍﻟﻨﺎﺱ ﺍﻟﻔﻘﻪ .. ﻭﻟﻜﻦ ﻧﺸﺮﻭ ﺍﻓﻜﺎﺭ ﻭﺍﻭﺭﺍﺩ ﺗﻠﻚ ﺍﻟﻄﺮﻕ ﺍﻟﺼﻮﻓﻴﺔ ﺍﻟﻤﺨﺘﻠﻔﺔ .. ﺗﺮﻛﻮ ﺍﻟﻌﻠﻢ ﺍﻟﺬﻱ ﺩﺭﺳﻮﻫﻮ .. ﻭﺑﺪﺃ ﻳﻨﺸﺮﻭﻥ ﺛﻘﺎﻓﺔ ﻋﻠﻢ ﺍﻟﺒﺎﻃﻦ .. ﻭﻣﺤﺎﺭﺑﺔ ﺍﻟﺸﺮﻳﻌﺔ .. ﻭﺍﻟﺘﻌﻮﻳﻞ ﺍﻟﻌﻠﻢ ﺍﻟﻠﺪﻧﻲ .. ﻭﻋﻘﻴﺪﺓ ﺍﻟﺤﻠﻮﻝ ﻭﺍﻻﺗﺤﺎﺩ .. ﻭﻳﺪﻋﻮﻥ ﺍﻟﻨﺎﺱ ﺍﻟﻰ ﺍﻟﺘﻮﺟﻪ ﺍﻟﻴﻬﻢ ﻓﻲ ﻗﻀﺎﺀ ﺍﻟﺤﻮﺍﺋﺞ .. ﻭﺍﻟﺘﻤﺴﺢ ﺑﺎﺛﺎﺭﻫﻢ .. ﻭﺷﺮﺏ ﻣﺎﺀ ﻭﺿﻮﺋﻬﻢ .. ﺣﺘﻲ ﺍﻟﻮﺍﺣﺪ ﻓﻴﻬﻢ ﺑﻘﻮﻝ .. ( ﺍﺫﺍ ﻛﻨﺖ ﻓﻲ ﻫﻢ ﻭﻏﻢ ﻓﻨﺎﺩﻧﻲ ﺍﺗﻴﻚ ﺑﺴﺮﻋﺔ ) ..
ﻓﻔﺴﺪﺕ ﻋﻘﺎﺋﺪ ﺍﻟﻨﺎﺱ ﻭﻧﺴﻮ ﺩﻋﺎﺀ ﺍﻟﻠﻪ .. ﻭﺍﻻﻋﺘﻤﺎﺩ ﻋﻠﻰ ﺍﻟﻠﻪ .. ﻭﻛﺎﻧﻮ ﻳﻄﻠﺒﻮﻥ ﺍﻟﺤﻮﺍﺋﺞ ﺍﻟﺘﻲ ﻻﻳﻘﺪﺭ ﻋﻠﻴﻬﺎ ﺍﻻ ﺍﻟﻠﻪ ﻳﻄﻠﺒﻮﻥ ﻣﻦ ﺍﻟﻤﺸﺎﻳﺦ .. ﺣﺘﻰ ﺍﻻﻣﻮﺍﺕ ﻣﻨﻬﻢ . ﻣﺘﻞ ﺍﻟﻌﺎﻓﻴﺔ ﻭﺍﻟﺬﺭﻳﺔ . ﻭﺍﻟﺮﺯﻕ . ﻭﺍﻟﺴﻌﺎﺩﺓ .. ﻭﺍﻧﺘﺸﺮﺕ ﺍﻟﻘﺼﺺ ﺑﺘﺎﻋﺔ ﺍﻻﺳﺘﻐﺎﺛﺎﺕ .. ﻭﺍﻟﺨﺮﺍﻓﺎﺕ ﻭﺍﻟﻘﺼﺺ ﺍﻟﺘﻲ ﺗﻨﺴﺞ ﺍﻻﺳﺎﻃﻴﺮ ﺍﻟﺒﻄﻮﻟﻴﺔ ﻋﻦ ﻋﻦ ﻫﻮﻻﺀ ﺍﻟﻤﺸﺎﻳﺦ . ﺣﺘﻰ ﺍﻟﻤﻌﺘﺪﻟﻴﻦ ﻣﻨﻬﻢ ﻓﻜﺎﻥ ﺗﻼﻣﻴﺬﻫﻢ ﺑﺆﻟﻔﻮﻥ ﻋﻠﻴﻬﻢ ﺍﻻﻛﺎﺫﻳﺐ ﺑﻌﺪ ﻣﻮﺗﻬﻢ .. ﻟﺘﻜﺜﻴﺮ ﺍﻟﺘﺒﻌﻴﺔ . ..
ﺣﺘﻲ ﻛﺘﺒﺖ ﺍﻟﻤﺨﻄﻮﻃﺎﺕ ﻭﺍﻟﻔﺖ ﺍﻟﻜﺘﺐ .. ﻓﻲ ﻛﺮﺍﻣﺎﺕ ﺍﻻﻭﻟﻴﺎﺀ .. ﻭﻣﺼﺎﺩﺭﻫﺎ ﻫﻲ ﻗﺼﺺ ﺗﻮﺧﺬ ﻣﻦ ﺍﻓﻮﺍﻩ ﺍﻟﻌﺎﻣﺔ .. ﻭﻗﺼﺎﺋﺪ ﻓﻴﻬﺎ ﺫﻛﺮ ﻛﺮﺍﻣﺎﺕ ﺗﺸﻴﺐ ﻟﻬﺎ ﺍﻟﻨﻮﺍﺻﻲ . ﻣﻌﻈﻤﻬﺎ ﻏﻴﺮ ﺣﻘﻴﻘﻴﺔ .. ﻣﺜﻞ ﺍﺣﻴﺎﺀ ﺍﻟﻤﻮﺗﻰ .. ﻭﺗﺤﻮﻳﻞ ﺍﻟﺠﻨﺲ ﻣﻦ ﺫﻛﺮ ﺍﻟﻰ ﺍﻧﺜﻰ ﺍﻟﻌﻜﺲ .. ﻭﻛﺎﻧﺖ ﺍﻟﻨﺘﻴﺠﺔ ﺍﻥ ﺍﻻﻧﺴﺎﻥ ﻻﻳﺴﺘﻄﻴﻊ ﺍﻥ ﻳﻔﺮﻕ ﺑﻴﻦ ﺍﻟﺸﻴﺦ ﺍﻟﺼﺎﻟﺢ .. ﻭﺍﻟﺸﻴﺦ ﺍﻟﻄﺎﻟﺢ .. ﺍﻻ ﻗﻠﻴﻞ ﻣﻦ ﺍﻟﺬﻳﻦ ﺗﺮﻛﻮﺍ ﺑﺼﻤﺎﺗﻬﻢ ﺑﺎﻟﺤﻖ ﻭﺍﺿﺤﺔ . ﺍﻣﺜﺎﻝ ﺍﻟﺸﻴﺦ ﻓﺮﺡ . ﻭﺍﻟﺸﻴﺦ ﺍﺩﺭﻳﺲ ﻭﺩ ﺍﻻﺭﺑﺎﺏ . ﻭﺍﻟﺸﻴﺦ ﻭﺩ ﺑﺪﺭ . ﻭﺍﻟﺸﻴﺦ ﻣﺼﻄﻔﻰ ﺍﻟﻔﺎﺩﻧﻲ . ﻭﺍﻟﺸﻴﺦ ﻧﻌﻴﻢ ﺍﻟﺒﻄﺤﺎﻧﻲ ﻭﻏﻴﺮﻫﻢ .. ﻣﻦ ﺍﻟﻤﺸﺎﻳﺦ ﺍﻟﻔﻀﻼﺀ ﻭﺍﻟﻌﻠﻤﺎﺀ . ﻟﻼﺷﺎﺭﺓ ﻻ ﻟﻠﺤﺼﺮ ..
ﻧﺮﺟﻊ ﻟﻠﻘﺼﺔ .. ﺍﻟﺸﻴﺦ ﻭﺩ ﺟﺎﺭ ﺍﻟﻨﺒﻲ ﺟﺎﺀ ﻟﻼﻣﻴﺮ .. ﻭﺣﻜﻰ ﻟﻴﻬﻮ ﺍﻟﺤﺼﻞ ﺑﻴﻨﻮ ﻭﺑﻴﻦ ﺍﻟﻤﻠﻚ .. ﻭﺍﻻﻣﻴﺮ ﺯﻋﻞ ﺷﺪﻳﺪ .. ﻛﻴﻒ ﻭﺩ ﺩﺍﺭ ﺍﻟﺰﻳﻦ ﻳﺠﻲ ﻳﺸﻜﻴﻬﻮ ﻻﺑﻮﻫﻮ .. ﻭﺑﻘﻰ ﻳﻌﻀﻌﺾ ﻓﻲ ﻳﺪﻳﻬﻮ .. ﻭﻗﺎﻝ ﻟﻲ ﻭﺩ ﺟﺎﺭ ﺍﻟﻨﺒﻲ ﻳﻼ ﻏﻮﺭ ﻣﻦ ﻗﺪﺍﻣﻲ ..
ﻭﺑﻘﻰ ﺯﻋﻼﻥ ﻣﻦ ﺍﻟﻀﻴﺐ ﺑﺮﺿﻮ .. ﻓﻲ ﺍﻧﻮ ﻣﺎﺣﻔﻆ ﺍﻟﺴﺮ ﻭﻣﺸﻰ ﻛﻠﻢ ﺍﻟﺘﻮﻳﻢ ..
ﺍﻟﻤﻬﻢ ﺍﻟﻀﻴﺐ ﻟﻘﻮﻫﻮ ﻣﻘﺘﻮﻝ ﺑﻌﺪ ﻳﻮﻣﻴﻦ ﻣﻦ ﺍﻟﺤﻜﺎﻳﺔ ﺩﻱ .. ﻭﻣﺠﺪﻭﻉ ﻓﻲ ﺣﻔﺮﺓ ﺷﺮﻕ ﻣﻨﻄﻘﺔ ( ﻏﺮﻳﺴﻠﻲ ) ..
ﻭﻳﻮﻡ ﺍﻟﺴﺒﺖ ﻃﻠﻊ ﻭﺩ ﺩﺍﺭ ﺍﻟﺰﻳﻦ ﺍﻟﺼﺒﺎﺡ ﺑﺪﺭﻱ .. ﻭﻣﺸﻰ ﻟﻠﻘﺼﺮ .. ﻭﺣﻀﺮ ﻣﺠﻠﺲ ﺍﻟﺸﻮﺭﻯ .. ﻭﺍﻟﻤﻠﻚ ﻧﺎﺩﺍﻫﻮ .. ﻭﻗﺎﻝ ﻟﻴﻬﻮ ﺍﻋﻤﻞ ﺣﺴﺎﺑﻚ ﻣﻦ ﺍﻻﻣﻴﺮ ﻏﻀﺒﺎﻥ ﻋﻠﻴﻚ ﺷﺪﻳﺪ .. ﻭﻫﺎﻳﺞ ﻳﻘﻄﻊ ﻓﻲ ﺍﻟﺰﺑﺪ .. ﺍﺑﻌﺪ ﻣﻦ ﺩﺭﺑﻮ .. ﺳﻠﻢ ﺭﻭﺣﻚ ﻭﺍﺩﻳﻬﻮ ﺍﻟﺒﺖ ﺍﻟﻮﻟﺪ ﻣﺘﻬﻮﺭ ..
ﻗﺎﻝ ﻟﻴﻬﻮ ﺭﺑﻨﺎ ﻛﺮﻳﻢ ﻳﺎ ﻣﻮﻻﻱ ..
ﻭﺑﻌﺪ ﺍﻟﻤﺠﻠﺲ .. ﻭﺩ ﺩﺍﺭ ﺍﻟﺰﻳﻦ ﻻﻗﺎﻫﻮ ﺍﻻﻣﻴﺮ .. ﻳﺘﺒﺨﺘﺮ ﻓﻲ ﺍﻟﻘﺼﺮ .. ﻗﺎﻝ ﻟﻴﻬﻮ ﺗﻌﺎﺍﺍﺍﺍﺍﺍﻝ ﻳﺎ ﻭﺩ ﺩﺍﺭ ﺍﻟﺰﻳﻦ .. ﺍﻟﺘﻤﺎﻧﻴﺔ ﻳﻮﻡ ﺍﻧﺘﻬﻦ ﺻﺢ ؟؟ ﻗﺎﻝ ﻟﻴﻬﻮ ﻟﺴﻊ .. ﻟﻜﻦ ﻳﺎﻣﻮﻻﻱ ﺍﻟﺒﺖ ﻟﺴﻊ ﻋﻴﺎﻧﺔ .. ﻗﺎﻝ ﻟﻴﻬﻮ ﺍﺳﻤﻊ ﻳﺎ ﺑﻬﻴﻤﺔ .. ﻛﺎﻥ ﻋﻴﺎﻧﺔ ﻭﻻ ﻛﺎﻥ ﻣﻴﺘﺔ ﺑﺴﻮﻗﺎ ﺑﺴﻮﻗﺎ .. ﻭﺍﻟﻠﻪ ﺍﺳﻮﻗﺎ ﻭﺍﺧﻠﻲ ﺧﺸﻤﻚ ﺣﻨﻀﻞ .. ﺍﻟﺘﻤﺎﻧﻴﺔ ﻳﻮﻡ ﺫﺍﺗﻬﺎ ﻛﺘﻴﺮﺓ ..
ﻭﺩ ﺩﺍﺭ ﺍﻟﺰﻳﻦ ﺳﻜﺖ ﺳﺎﻱ ﻭﻃﻠﻊ ﻣﻦ ﺍﻟﻘﺼﺮ .. ﻣﺸﻰ ﺍﻟﺪﺭﺱ ﺑﺘﺎﻉ ﺍﻟﺸﻴﺦ ﺍﺏ ﻛﻒ ﺭﺣﻤﻪ ﺍﻟﻠﻪ ﻋﻠﻴﻪ .. ﻭﻫﻨﺎﻙ ﻟﻘﻰ ﺍﺑﺨﻮﺳﺔ ﻗﺎﻋﺪ ﻣﻊ ﺍﻟﺸﻴﺦ .. ﺟﺎﻱ ﻳﺤﻀﺮ ﺍﻟﺪﺭﺱ .. ﻭﺍﺗﺴﺎﻟﻤﻮ ﻭﺍﺗﻄﺎﻳﺒﻮ .. ﻭﺍﺑﺨﻮﺳﺔ ﺳﺄﻝ ﻭﺩ ﺩﺍﺭ ﺍﻟﺰﻳﻦ ﻣﻦ ﺍﻟﻨﺴﻴﻢ ﻭﺍﻣﻬﺎ .. ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﻮ ﺍﻧﺖ ﻭﺑﺘﻲ ﺿﺤﻴﺔ ﻇﻠﻢ ﻳﺎ ﺍﺑﺨﻮﺳﺔ .. ﻭﺣﻜﻰ ﻟﻴﻬﻮ ﺍﻟﺤﺎﺻﻞ ﻣﻦ ﺟﻴﺔ ﺍﻻﻣﻴﺮ ﻓﻲ ﺍﻟﺒﻴﺖ ﻭﻛﻼﻡ ﺍﻟﻤﻠﻚ .. ﺑﺎﻟﺘﻔﺼﻴﻞ ﻭﺍﺏ ﺧﻮﺳﺔ ﺩﻩ ﺑﻘﻰ ﻳﺘﻤﻠﻤﻞ ﻣﻦ ﺍﻟﺰﻋﻞ ﻭﺍﻟﻐﻀﺐ .. ﻭﺩ ﺩﺍﺭ ﺍﻟﺰﻳﻦ ﺣﺴﺔ ﺑﻴﻬﻮ .. ﻗﺎﻝ ﻟﻴﻬﻮ ﻳﺎ ﺍﺑﺨﻮﺳﺔ .. ﺭﺑﻨﺎ ﻋﺰ ﻭﺟﻞ ﻗﺎﻝ .. ﻭﻻﺗﻠﻘﻮ ﺑﺎﻳﺪﻳﻜﻢ ﺍﻟﻰ ﺍﻟﺘﻬﻠﻜﺔ .. ﺍﻧﺖ ﺑﺲ ﺧﻠﻴﻚ ﺻﺎﺑﺮ .. ﻭﺩﻱ ﻭﺻﻴﺔ ﺷﻴﺨﻨﺎ .. ﻭﺭﺍﺟﻴﻦ ﺭﺑﻨﺎ ﻳﻔﺮﺟﻬﺎ ..
ﺍﻟﺸﻴﺦ ﻗﺎﻝ ﻟﻲ ﻭﺩ ﺍﻟﺰﻳﻦ ﻛﻼﻣﻚ ﺻﺎﺡ .. ﺑﺲ ﺍﻧﺖ ﺑﺎﻛﺮ ﺍﻟﺼﺒﺎﺡ ﺗﻌﺎﻝ ﻟﻲ ﻧﻤﺸﻲ ﻟﻲ ﺍﻟﻤﻠﻚ ﻟﻠﻤﺮﺓ ﺍﻻﺧﻴﺮﺓ ..
ﻗﺎﻝ ﻟﻴﻬﻮ ﻳﺎﺷﻴﺨﻨﺎ ﻣﻮﻻﻧﺎ ﺍﻟﻤﻠﻚ ﻣﺎ ﺑﻘﺪﺭ ﻳﺘﻜﻠﻢ ﻣﻊ ﻭﻟﺪﻩ .. ﻭﻳﺒﻘﻰ ﻟﻲ ﺧﺎﻳﻒ ﻣﻨﻮ ﻋﺪﻳﻞ .. ﻻﻧﻮ ﻗﺒﻴﻞ ﻗﺎﻟﻲ ﻗﺎﻟﻲ .. ﻭﺍﻻﻣﻴﺮ ﻻﻗﺎﻧﻲ ﻭﻫﺪﺩﻧﻲ .. ﻭﻗﺎﻝ ﻗﺎﻝ .. ﻟﻜﻦ ﺑﺎﻛﺮ ﺑﺠﻴﻚ ﻋﻠﻰ ﺣﺴﺐ ﺗﻌﻠﻴﻤﺎﺗﻚ .. ﻳﺒﻘﻰ ﻣﺸﻴﺘﻚ ﻓﻴﻬﺎ ﺍﻟﺒﺮﻛﺔ ..
ﺍﻟﺪﺭﺱ ﻛﻤﻠﻮ ﺍﻟﺪﺭﺱ ﻭﻣﺸﻮ ..
ﺑﺎﻟﻨﺴﺒﺔ ﻟﻲ ﺍﻟﻐﺎﻟﻴﺔ ﺍﻟﻨﺴﻴﻢ .. ﻣﻦ ﺍﻟﻬﻢ ﻭﺍﻟﻐﻢ ﻣﺎﻗﺎﻋﺪﺓ ﺗﺎﻛﻞ .. ﻻﻣﻦ ﺟﺴﻤﻬﺎ ﺿﻌﻒ .. ﻭﺍﻣﻬﺎ ﺑﻘﺖ ﺗﻌﺎﻳﻦ ﻟﻴﻬﺎ ﻭﺗﺒﻜﻲ .. ﻭﻛﺖ ﺗﺸﻮﻑ ﺍﻣﻬﺎ ﺑﺘﺒﻜﻲ ﺗﻘﻮﻡ ﺗﺎﻛﻞ .. ﻭﺭﺍﻗﺪﺓ ﻓﻮﻕ ﺍﻟﻌﻨﻘﺮﻳﺐ .. ﻃﻮﻝ ﺍﻟﻴﻮﻡ ﻣﺎﻗﺎﺩﺭﺓ ﺗﻘﻮﻡ .. ﺑﺲ ﺳﺎﺭﺣﺔ ﻭﺗﻌﺎﻳﻦ ﻟﻠﺤﻴﻂ ..
ﺍﻫﺎ ﺑﺎﻛﺮ ﻭﺩ ﺩﺍﺭ ﺍﻟﺰﻳﻦ ﻣﺸﻰ ﺳﻨﺎﺭ .. ﻟﻲ ﺍﻟﺸﻴﺦ ﺍﺏ ﻛﻒ .. ﻻﻧﻮ ﻭﻋﺪﻭ ﻳﻤﺸﻲ ﻣﻌﺎﻫﻮ ﻟﻠﻤﻠﻚ .. ﻟﻘﻰ ﺍﻟﺸﻴﺦ ﻋﻴﺎﻥ .. ﻭﺣﺘﻰ ﻣﺎﻗﺪﺭ ﻳﻘﺎﺑﻠﻮ .. ﺭﻛﺐ ﺗﺎﺍﺍﺍﺍﺍﺍﺍﺍﺍﺍﻧﻲ ﺟﺎ ﺭﺍﺟﻊ ﺍﻟﺤﻠﺔ ..
ﻏﺎﻳﺘﻮ ﻓﻲ ﺍﻻﺳﺒﻮﻉ ﺩﻩ ﻭﺩ ﺍﺭ ﺍﻟﺰﻳﻦ ﺗﻌﺐ ﻋﺪﻳﻞ ﻣﻦ ﺍﻟﻤﺸﺎﻭﻳﺮ .. ﻣﻦ ﺍﻟﺤﻠﺔ ﻟﻲ ﺳﻨﺎﺭ ﺍﻟﻤﺪﻳﻨﺔ .
ﺍﻟﻤﻬﻢ ﻫﺴﻊ ﺟﺎﺀ ﺗﻌﺒﺎﻥ .. ﺭﻗﺪ ﻧﺎﻡ ﻣﻦ ﺍﻟﻀﻬﺮﻳﺔ .. ﻻﻗﺮﻳﺐ ﺍﻟﻤﺴﺎﺀ ..
ﻗﺎﻡ ﻗﺎﻝ ﻟﻲ ﺍﻟﺘﺎﻳﺔ .. ﻭﻳﻦ ﺍﻟﻨﺴﻴﻢ؟؟ ﻧﺎﺩﻳﻬﺎ ﻟﻲ ﺍﺗﻮﻧﺲ ﻣﻌﺎﻫﺎ ﺷﻮﻳﺔ .. ﻗﺎﻟﺖ ﻟﻴﻬﻮ ﻣﻦ ﺍﻟﺼﺒﺎﺡ ﻗﺎﻓﻠﺔ ﻋﻠﻴﻬﺎ ﺑﺎﺏ ﺍﻻﻭﺿﺔ .. ﻭﻣﺎﻣﺮﻗﺖ ﻻ ﻟﻲ ﻓﻄﻮﺭ ﻻ ﻟﻲ ﻏﺪﺍ .. ﻭﺍﻧﺎ ﺑﻜﻮﺭﻙ ﻟﻴﻬﺎ ﻣﺎﺑﺘﺮﺩ ﻟﻲ ..
ﻗﺎﻝ ﻟﻴﻬﺎ ﻣﻌﻘﻮﻝ؟؟ ﺍﻟﻜﻼﻡ ﺩﻩ ﻣﻦ ﻣﺘﻴﻦ ؟ ﻗﺎﻟﺖ ﻟﻴﻬﻮ ﻣﻦ ﺍﻟﺼﺒﺎﺡ ﺍﻧﺎ ﻣﺎﺭﻗﺔ ﻋﻠﻰ ﺍﻟﺴﻮﻕ ﺧﻠﻴﺘﻬﺎ ﻃﻴﺒﺔ .. ﺟﻴﺖ ﻟﻘﻴﺖ ﺑﺎﺏ ﺍﻻﻭﺿﺔ ﻣﻘﻔﻮﻝ .. ﻭﻗﺪﺭ ﻣﺎ ﺩﻗﺪﻗﺖ ﻟﻬﺎ ﺍﺑﺖ ﺗﻔﺘﺢ ﻟﻲ ..
ﻭﺩ ﺩﺍﺭ ﺍﻟﺰﻳﻦ ﺍﻧﺰﻋﺞ ﺟﺪﺍ .." ﻗﺎﻝ ﻟﻴﻬﺎ ﺍﻳﻤﻜﻦ ﺍﻟﺒﺖ ﺩﻱ ﺣﺎﺻﻠﻪ ﻋﻠﻴﻬﺎ ﻣﺼﻴﺒﺔ .. ﺟﺎﺀ ﺟﺎﺭﻱ .. ﻋﻠﻰ ﺍﻻﻭﺿﺔ ﺍﻟﺒﺘﺮﻗﺪ ﻓﻴﻬﺎ ﺍﻟﻨﺴﻴﻢ .. ﻭﺑﻘﻰ ﻳﻜﻮﺭﻙ ﻟﻴﻬﺎ .. ﻳﺎ ﺍﻟﻨﺴﻴﻢ ؟ ﺍﻟﻨﺴﻴﻢ؟ .. ﺍﻟﻔﺘﺤﻲ ﺍﻟﺒﺎﺏ ﺩﻩ .. ﻗﺒﺎﻝ ﺍﺭﻓﺴﻮ ﻟﻴﻚ ﻓﻮﻕ ﺭﺍﺳﻚ .. ﺍﻟﻨﺴﻴﻢ ﺧﻠﻲ ﺍﻟﻌﻮﺍﺭﺓ ﻭﺍﻟﺘﻼﻓﺔ ﺍﻟﺒﺘﺴﻮﻱ ﻓﻴﻬﺎ ﺩﻱ ..
ﻳﻜﻮﺭﻙ ﻟﻴﻬﺎ ﻗﺮﻳﺐ ﺍﻟﻌﺸﺮﺓ ﺩﻗﺎﻳﻖ .. ﻭﻻ ﺣﻴﺎﺓ ﻟﻤﻦ ﺗﻨﺎﺩﻱ ..
ﺑﺎﻟﻤﺮﻛﻮﺏ ﺍﻟﻼﺑﺴﻮ ﺭﻓﺲ ﺍﻟﺒﺎﺏ ﺑﻲ ﻛﺮﺍﻋﻮ ﻛﺪﻱ .. ﻻﻣﻦ ﺍﻟﺒﺎﺏ ﻭﻗﻊ ﻣﻦ ﺩﺳﺎﺗﻴﺮﻭ .. ﻭﻭﻗﻊ ﻓﻲ ﻧﺺ ﺍﻻﻭﺿﺔ .. ﻭﺍﻟﺘﺮﺍﺏ ﻗﺎﻡ ﻋﺠﺎﺝ .. ﻭﺩ ﺩﺍﺭ ﺍﻟﺰﻳﻦ ﺑﻘﻰ ﻳﻬﺶ ﻓﻲ ﺍﻟﻐﺒﺎﺭ ﻣﻦ ﻗﺪﺍﻡ ﻋﻴﻮﻧﻮ . ﺯﻱ ﺍﻟﺰﻭﻝ ﺍﻟﺒﻨﻬﺮ ﻓﻲ ﺍﻟﻨﺎﻣﻮﺱ .. ﻭﺍﻟﻔﺎﺟﻌﺔ ﺍﻟﻜﺒﻴﺮﺓ ﺍﻧﻮ ﻟﻘﻰ ﺍﻟﻌﻨﻘﺮﻳﺐ ﺣﻖ ﺍﻟﻨﺴﻴﻢ ﻓﺎﺿﻲ ..
ﻭﺍﻻﻭﺿﺔ ﻣﺎﻓﻲ ﻳﻬﺎ ﺍﻱ ﺍﺛﺮ ﺯﻭﻝ .. ﻓﺘﺢ ﺍﻟﺴﺤﺎﺭﺓ ﻳﺸﻮﻓﻬﺎ .. ﺍﻳﻤﻜﻦ ﺗﻜﻮﻥ ﺩﺧﻠﺖ ﻓﻴﻬﺎ .. ( ﺍﻟﺴﺤﺎﺭﺓ ﺻﻨﺪﻭﻕ ﻛﺒﻴﺮ ﻣﻦ ﺍﻟﺨﺸﺐ .. ﻳﺸﺒﻪ ﺻﻨﺪﻭﻕ ﺍﻟﺠﺜﺚ . ﻟﻜﻦ ﺑﻜﻮﻥ ﻋﻤﻴﻖ ﻭﻗﺼﻴﺮ ﻭﻋﻨﺪﻭ ﺍﺭﺑﻌﺔ ﻛﺮﻋﻴﻦ ) ﺑﺴﺘﻌﻤﻠﻮﻩ ﺯﻣﺎﻥ ﻓﻲ ﺣﻔﻆ ﺍﻟﻤﻼﺑﺲ .. ﻭﺍﻟﻤﻬﻤﺎﺕ ..
ﺍﻟﻤﻬﻢ .. ﻣﺎﻟﻘﺎﻫﺎ ﻓﻲ ﺍﻟﺴﺤﺎﺭﺓ . ﻭﺍﻟﺠﻦ ﺭﻛﺐ ﺭﺍﺳﻮ .. ﻭﺍﻟﺘﺎﻳﺔ ﺑﻘﺖ ﺗﺒﻜﻲ ﻭﺗﻮﺻﻒ ..
ﺍﻟﻠﻴﻠﺔ ﻭﺏ ﻋﻠﻲ ﻳﺎ ﺍﻟﻨﺴﻴﻢ .. ﺍﻟﻠﻴﻠﺔ ﺳﺠﻢ ﺧﺸﻤﻲ ﻳﺎ ﺍﻟﻨﺴﻴﻢ ..
ﺍﻧﺎ ﻛﻠﻤﺘﻚ .. ﻗﻠﺖ ﻟﻴﻚ ﺍﻟﺒﺖ ﺩﻱ ﺑﺘﺠﻴﺒﻬﺎ ﻟﻴﻨﺎ .. ( ﺿﻘﻼ ﻳﻜﺮﻛﺐ ) .. ﺍﻫﺎ ﺗﺮﺍﻫﺎ ﺷﺮﺩﺕ ..
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﺎ ﺍﻟﺘﺎﻳﺔ .. ﻭﺍﻟﻠﻪ ﺍﻧﺎ ﺑﻄﻘﻚ ﺑﺎﻟﻌﺼﺎﻳﺔ ﺩﻱ .. ﺑﻠﻮﻱ ﺧﺸﻤﻚ .. ﺍﺳﻜﺘﻲ ﻣﺎ ﺗﺠﻴﺒﻲ ﻟﻴﻨﺎ ﻧﺎﺱ ﺍﻟﺤﻠﺔ .. ﺍﺻﺒﺮﻱ ﺧﻠﻴﻨﻲ ﺍﺟﻤﻊ ﻣﺨﻲ .. ﻭﺩ ﺩﺍﺭ ﺍﻟﺰﻳﻦ ﻗﻌﺪ ﻓﻲ ﻧﺺ ﺍﻟﻮﺍﻃﺔ .. ﻭﺧﺖ ﺍﻳﺪﻳﻬﻮ ﻓﻮﻕ ﺭﺍﺳﻮ ..
ﻭﻗﺎﻝ ﺍﻧﺎ ﺗﺎﻧﻲ ﺍﻗﺎﺑﻞ ﺍﻟﺮﺟﺎﻝ ﻛﻴﻒ؟ . ﺍﻧﺎ ﺗﺎﻧﻲ ﺍﻗﻮﻝ ﺷﻨﻮ ﻭﺍﻗﻮﻝ ﻣﻨﻮ ؟
ﺍﺳﻤﻌﻲ ﻳﺎ ﺍﻟﺘﺎﻳﺔ .. ﺍﻭﻋﻚ ﺗﻔﺘﺤﻲ ﺧﺸﻤﻚ ﺗﻘﻮﻟﻲ ﺑﺘﻲ ﺷﺮﺩﺕ ..
ﻻﻣﻦ ﻧﻠﻘﺎﻫﺎ ﻭﺗﺠﻲ ﺑﺮﺍﻫﺎ ..
ﺍﻟﺘﺎﻳﺔ ﻗﺎﻟﺖ ﻟﻴﻬﻮ ﻣﺘﻴﻤﻨﺔ ﺍﻟﻴﻤﻴﻦ ﺍﻟﺴﺪﺍﺩﻭ ﻋﻤﺮ .. ﻱ ﻣﺎﺑﺴﻜﺖ .. ﺍﻧﺖ ﻳﺎﺭﺍﺟﻞ ﺍﻇﻨﻚ ﺟﻨﻴﺖ .. ﻳﻌﻨﻲ ﺳﻤﻌﺘﻚ ﻋﻨﺪﻙ ﺍﻏﻠﻰ ﻣﻦ ﺑﺘﻚ؟؟ .. ﻭﺣﺎﺕ ﺭﺑﻲ ﻣﺎﺑﺴﻜﺖ ..
ﻗﺎﻝ ﻟﻴﻬﺎ ﺍﺻﺒﺮﻱ ﺍﻟﻨﻤﺸﻲ ﺍﺷﻮﻑ ﺧﺸﻢ ﺍﻟﺒﺎﺏ ﺑﺮﻩ .. ﺍﻛﺎﻥ ﺍﻗﺪﺭ ﺍﻗﺺ ﺍﻟﺪﺭﺏ .. ﻃﻠﻊ ﺑﺮﻩ .. ﻟﻘﻰ ﺍﻟﺸﺎﺭﻉ ﻛﻠﻮ ﺩﺭﻭﺏ ﻭﺍﺛﺎﺭ ﻏﻨﻢ ﻭﻧﻌﺎﺝ .. ﺍﻟﻜﻼﻡ ﺩﻉ _ ﻋﺼﺮﺍ " ﻫﺎﻟﻚ ( ﻗﺮﻳﺐ ﺍﻟﻐﻴﺒﺔ ) .. ﻭﺍﻟﻨﺴﻴﻢ ﺷﻜﻠﻬﺎ ﻣﺮﻗﺖ ﻣﻦ ﺍﻟﺼﺒﺎﺡ .. ﻓﻲ ﻭﻗﺖ ﻣﺮﻗﺔ ﺍﻣﻬﺎ ﻟﻠﺴﻮﻕ .. ﻳﻌﻨﻲ ﻣﺎﻓﻲ ﺍﻱ ﺍﺣﺘﻤﺎﻝ ﺍﻟﺰﻭﻝ ﻳﻠﻘﻰ ﻟﻴﻬﺎ ﺍﺛﺮ ﺍﻗﺪﺍﻡ .. ﺑﺲ ﺍﻟﺘﺎﻳﺔ ﺑﺎﻟﻐﺖ ﺑﻮﻟﻴﻎ ﺍﺻﻠﻮ ﻣﺎ ﻣﻌﻘﻮﻝ .. ﻳﻌﻨﻲ ﻗﺮﻳﺐ ﺍﻟﺘﻤﺎﻧﻴﺔ ﺳﺎﻋﺎﺕ ﻣﺎﻋﺎﺭﻓﺔ ﺑﺘﻬﺎ ﻣﻮﺟﻮﺩﺓ ﻭﻻﻻ ..
ﻭﺍﻟﺘﺎﻳﺔ ﺧﻠﺖ ﻭﺩ ﺩﺍﺭ ﺍﻟﺰﻳﻦ ﻓﻲ ﻗﻌﺪﺗﻮ ﺩﻳﻚ .. ﻭﻃﻠﻌﺖ ﺣﻔﻴﺎﻧﺔ .. ﻭﺗﺴﺄﻝ ﻓﻲ ﻧﺎﺱ ﺍﻟﺸﺎﺭﻉ ﻧﻔﺮ ﻧﻔﺲ .. ﺃﻧﺎﺱ ﻫﺎ ﻣﺎﺷﻔﺘﻮ ﺍﻟﻨﺴﻴﻢ .. ﻳﺎﻧﺎﺱ ﺍﻟﻨﺴﻴﻢ .. ﺍﻧﺎﺱ ﻣﺎﺷﻔﻮﺗﻬﺎ .. ﻣﺎﻓﻲ ﺍﻱ ﺯﻭﻝ ﺍﺩﺍﻫﺎ ﻛﻼﻡ ؟ ﺑﺲ ﺍﻟﻨﺎﺱ ﻳﻘﻮﻟﻮ ﻟﻴﻬﺎ ﺍﻭﻝ ﺍﻟﻨﺴﻴﻢ ﻣﺘﻴﻦ ﺑﻘﺖ ﺗﻤﺮﻕ ﻣﻦ ﺑﻴﺘﻬﺎ؟ ﺍﻣﺸﻲ ﻛﻮﺳﻴﻼ ﺟﻮﺓ؟ ﻟﻴﻬﺎ ﺟﻮﺓ ﺑﺘﻠﻘﻴﻬﺎ ﻛﺎﻥ ﻓﻲ ﺍﻟﺘﻜﻞ ﻛﺎﻥ ﻓﻲ ﺍﻟﺴﺤﺎﺭﺓ ..
ﻭﺩ ﺩﺍﺭ ﺍﻟﺰﻳﻦ ﺑﻘﻰ ﻳﺘﺬﻛﺮ ﻓﻲ ﺗﻬﺪﻳﺪﺍﺕ ﺍﻻﻣﻴﺮ .. ﺍﻧﻮ ﺍﻻﻣﻴﺮ ﻗﺎﻝ ﻟﻴﻬﻮ { ﺍﺳﻤﻊ ﻳﺎ ﺑﻬﻴﻤﺔ .. ﻛﺎﻥ ﻋﻴﺎﻧﺔ ﻭﻻ ﻛﺎﻥ ﻣﻴﺘﺔ ﺑﺴﻮﻗﺎ ﺑﺴﻮﻗﺎ .. ﻭﺍﻟﻠﻪ ﺍﺳﻮﻗﺎ ﻭﺍﺧﻠﻲ ﺧﺸﻤﻚ ﺣﻨﻀﻞ .. ﺍﻟﺘﻤﺎﻧﻴﺔ ﻳﻮﻡ ﺫﺍﺗﻬﺎ ﻛﺘﻴﺮﺓ } ..
ﻛﺪﺍ ﻋﺮﻑ ﺍﻧﻮ ﺍﻻﻣﻴﺮ ﻧﻔﺬ ﻛﻼﻣﻮ ﺍﻟﻘﺎﻟﻮ .. ﻭﻛﺖ ﺟﺎﺕ ﺍﻟﺘﺎﻳﺔ ﻣﻦ ﺍﻟﻜﻮﺍﺳﺔ .. ﻗﺎﻝ ﻟﻴﻬﺎ ﺍﻫﺎ ﻟﻘﻴﺘﻴﻬﺎ ﻳﺎ ﺍﻟﺘﺎﻳﺔ ؟ ﻗﺎﻟﺖ ﻟﻴﻬﻮ ﺍﻟﻘﺎﻫﺎ ﻭﻳﻦ ﻳﺎ ﺍﺑﻮ ﺍﻟﻨﺴﻴﻢ ?? .. ﺑﺘﻲ ﺧﻼﺹ ﻻﻫﺴﻊ ﺗﻜﻮﻥ .. ﻳﺎ ﻛﺘﻠﻮﻫﺎ .. ﻳﺎ ﺑﺎﻋﻮﻫﺎ ﻓﻲ ﻛﻮﺗﺔ ﺧﺪﻡ ..
ﺍﻟﺘﺎﻳﺔ ﻣﺮﻗﺖ ﺗﺎﻧﻲ ﻭﺍﻟﻤﺮﺓ ﺩﻱ ﻻﺑﺴﺔ ﻧﻌﻼﺗﻬﺎ .. ﻭﻻﻛﻠﻤﺖ ﻭﺩ ﺩﺍﺭ ﺍﻟﺰﻳﻦ ﺗﺎﻧﻲ ﻣﺸﺖ ﻟﻲ ﺍﻫﻼ ﻧﺎﺱ ﻣﺨﺘﺎﺭ ﺗﺎﻧﻲ ﻓﻲ ﻗﺮﻳﺔ ﻓﻲ
ﻣﻨﻄﻘﺔ ﻋﻠﻰ ﺍﻟﺸﻤﺎﻝ ﺷﻮﻳﺔ . ﻗﺮﻳﺐ ﺍﻟﺨﻤﺴﺔ ﺍﻟﻌﺸﺮﺓ ﻛﻴﻠﻮ .. ﺟﺎﺭﻳﺔ ﺑﻲ ﻛﺮﻋﻴﻬﺎ ﺯﻱ ﺍﻟﻤﺠﻨﻮﻧﺔ .. ﻭﺻﻠﺖ ﺍﻫﻠﻬﺎ ﺩﻳﻞ .. ﻗﺮﻳﺐ ﺻﻼﺓ ﺍﻟﻌﺸﺎﺀ .. ﻭﺑﻘﺖ ﺗﻜﻮﺭﻙ ﻟﻲ ﺍﺧﻮﺍﻧﻬﺎ .. ﻧﻔﺮ ﻧﻔﺮ .. ﻳﺎ ﺍﻟﺼﺪﻳﻖ ﻭﺩ ﻣﺨﺘﺎﺭ .. ﺍﻟﺤﻘﻨﻲ .. ﻳﺎ ﺑﺨﻴﺖ ﻭﺩ ﻣﺨﺘﺎﺭ ﺍﻟﺤﻘﻨﻲ .. ﻳﺎﻋﻄﻴﺔ ﻭﺩ ﻣﺨﺘﺎﺭ ﺍﻟﺤﻘﻨﻲ .. ﺍﻟﻤﻬﻢ ﺣﺴﺒﺖ ﺍﺧﻮﺍﻫﺎ ﺍﻟﺴﺖ .. ﻭﻛﻠﻬﻢ ﻓﺮﺳﺎﻥ ﻳﻘﺎﺑﻠﻮ ﺍﻟﻜﺘﻴﺒﺔ .. ﻣﻦ ﺍﻟﺒﻄﺎﺣﻴﻦ .. ﻭﻋﻨﺪﻫﻢ ﻋﻼﻗﺔ ﺭﺣﻤﻴﺔ ﺑﺎﻟﺸﻴﺦ ﻓﺮﺡ .. ﺍﺟﺘﻤﻌﻮﺍ ﻟﻴﻬﺎ ﺍﻟﺴﺘﻪ .. ﻛﻠﻬﻢ ﺳﺎﻛﻨﻴﻦ ﻓﻲ ﻓﺮﻳﻖ ﻭﺍﺣﺪ ﻓﻲ ﺳﺎﺣﺔ ﺍﺑﻮﻫﻢ ﺍﻟﻤﻌﺮﺱ ﻭﺍﻟﺼﺒﻲ .. ﺟﻮﻫﺎ ﺍﻟﺴﺘﺔ ﺷﺎﻳﻠﻴﻦ ﺳﻴﻮﻓﻬﻢ ﺑﺪﻭﻥ ﺟﻔﺎﻳﺮ ..
ﺍﻟﺘﺎﻳﺔ ﺣﻜﺖ ﻟﻴﻬﻢ ﺍﻟﺤﻜﺎﻳﺔ .. ﻣﻦ ﺍﻭﻟﻬﺎ ﻟﻲ ﺍﺧﺮﻫﺎ .. ﻭﻗﺎﻟﺖ ﻟﻴﻬﻢ ﻧﺤﻦ ﻛﻨﺎ ﻗﺎﺩﺭﻳﻦ ﻧﺴﻮﻱ ﺳﻮﺍﺗﻨﺎ .. ﻭﻭﻧﺴﺘﺮ ﺣﺎﻟﻨﺎ ﺑﻼ ﻣﺸﺎﻛﻞ ﻭﻻ ﺩﻡ .. ﻟﻜﻦ ﻫﺴﻊ ﺍﻧﺎ ﺧﻼﺹ ﻏﻠﺒﻨﻲ ﺍﻟﺼﺒﺮ .. ﺭﻓﻌﻮ ﺳﻴﻮﻓﻬﻢ .. ﺳﻴﻮﻓﻬﻢ ﻭﺟﻬﺰﻭ ﺣﺼﻴﻨﻬﻢ .. ﻭﻗﺎﻟﻮ ﻟﻴﻬﺎ ﺍﻟﻠﻴﻠﺔ ﻳﺎ ﻧﻘﻠﻊ ﺍﻟﻨﺴﻴﻢ ﻣﻦ ﺍﻟﻮﻟﺪ ﺍﻟﺮﻣﺔ ﺩﻩ .. ﻳﺎ ﺍﻣﺎ ﻧﻤﻮﺕ ﺍﻟﺴﺘﺔ ..
ﻭﺍﺣﺪ ﻓﻴﻬﻢ ﺍﺳﻤﻮ . ﺑﺨﻴﺖ ﻭﺩ ﻣﺨﺘﺎﺭ .. ﻗﺎﻟﻠﻴﻬﺎ ..
..
ﻓﻲ ﺯﻭﻻ " ﻗﺎﻝ ﻭﻻﺩ ﻣﺨﺘﺎﺭ . ﺍﻏﺎﺭﻭ ﻭﺧﺎﺑﻮ؟
. ﻓﻮﻕ ﺍﻋﺮﺍﺿﻨﺎ . ﻧﺎﻛﻠﻮ ﻋﺪﻭﻧﺎ . ﻧﺘﻨﻲ ﺣﺮﺍﺑﻮ ..
ﺧﻠﻴﻚ ﻣﻦ ﻋﺮﻭﺿﻨﺎ . ﻭﻣﺎﻝ ﺑﻨﺘﻨﺒﺎﺑﻮ
ﻧﺤﻦ ﺑﻨﻘﻠﻊ ﺍﻟﺤﻖ ﻣﻦ ﻋﻴﻮﻥ ﺍﺻﺤﺎﺑﻮ .
.
ﻗﺎﻟﺖ ﻟﻴﻬﻢ ﻗﺒﺎﻝ ﻣﺎﺗﻤﺸﻮ ﺍﻱ ﻣﻜﺎﻥ ﺍﻏﺸﻮ ﺍﺑﻮ ﺍﻟﻨﺴﻴﻢ ﻓﻲ ﺑﻴﺘﻮ .. ﺍﺑﻘﻰ ﺍﻟﻨﺴﻴﻢ ﺟﺎﺕ ﺭﺍﺟﻌﺔ .. ﻓﺸﺎﻥ ﻧﺤﻦ ﻣﺎﻧﻲ ﻣﺄﻛﺪﻳﻦ ﺍﻟﻨﺴﻴﻢ ﺳﺎﻗﻬﺎ ﺍﻻﻣﻴﺮ . ﺍﻣﻜﻦ ﺗﻜﻮﻥ ﺷﺮﺩﺕ ﺑﺮﺍﻫﺎ ..
ﻗﺎﻟﻮ ﻟﻴﻬﺎ ﻛﺎﻥ ﺷﺮﺩﺕ .. ﻛﺎﻥ ﺳﺎﻗﻬﺎ ﻧﺤﻦ ﺍﻻﻣﻴﺮ .. ﻻﺯﻡ ﺗﻜﺘﻠﻮ ﻭﻧﺮﻳﺢ ﺍﻟﻨﺎﺱ ﻣﻦ ﺷﺮﻭ .. ﻻﻧﻮ ﺍﻟﺰﻭﻝ ﺩﻩ ﻛﻞ ﻣﺎﻳﺸﻮﻓﻠﻮ ﺑﺖ ﺳﻤﺤﺔ ﻭﺯﻳﻨﺔ .. ﻳﺠﻲ ﻳﺴﻮﻗﻬﺎ ﺯﻧﺪﻳﺔ .. ﻭﻛﺎﻥ ﺍﻫﻠﻬﺎ ﻗﺎﻭﻣﻮ ﻳﻘﻄﻊ ﺭﻭﺳﻴﻬﻢ .. ﻧﺤﻦ ﻣﺎﺑﻨﺨﻠﻴﻬﻮ .. ﺍﻻ ﻧﻜﻤﻞ ﻛﻠﻨﺎ .. ﺍﺑﻮﻫﻢ ﻗﺎﻝ ﻟﻬﻢ ﻻ .. ﻣﺎ ﺗﻤﺪﻭ ﻋﻠﻴﻬﻮ ﺍﻳﺪﻛﻢ ﺍﻻ ﺗﺘﺎﻛﺪﻭ ﺍﻧﻬﺎ ﻣﻌﺎﻫﻮ .. ﺳﻤﻌﻮ ﻛﻼﻡ ﺍﺑﻮﻫﻢ ..
ﻭﺍﺗﻌﺎﻫﺪﻭ ﺍﻟﺴﺘﺔ ﻋﻠﻰ ﺍﻟﻤﻮﺕ ﻓﻲ ﺳﺒﻴﻞ ﺍﻟﻌﺮﺽ ﻭﺍﻟﺸﺮﻑ . ﻭﻣﻦ ﺍﺟﻞ ﺍﻟﻨﺴﻴﻢ ﺑﺖ ﺍﻟﺘﺎﻳﺔ ﺑﺖ ﻣﺨﺘﺎﺭ .. ﺍﺻﻼ ﺍﻟﺒﻄﺎﺣﻴﻦ . ﺍﻫﻞ ﻧﺨﻮﺓ ﻭﻛﺮﻡ ﻭﺷﺠﺎﻋﺔ . ﻭﺍﻱ ﺷﻲ ﻋﻨﺪﻫﻢ ﻭﻻ ﺍﻟﻌﺮﻭﺽ .. ﻭﻳﻜﻔﻲ ﻣﻨﻬﻢ ﻋﻨﻮﺍﻧﻬﻢ ﻭﺩ ﺗﻜﺘﻮﻙ .. ﺣﻼﻝ ﺍﻟﻤﺸﺒﻮﻙ .. ﺍﻟﻌﻤﺮﻭ ﻣﺎﺧﻀﻊ ﻟﻲ ﻣﻠﻚ .. ﻏﻴﺮ ﺭﺏ ﺍﻟﻤﻠﻮﻙ ..
ﺭﻛﺒﻮ ﺣﺼﻴﻦ ﺳﻮﺩ .. ﻭﺷﺎﻟﻮ ﺳﻴﻮﻓﻬﻢ .. ﻭﻣﺮﻗﻮ ﻣﻦ ﺍﻟﺤﻠﺔ .. ﻧﺎﺱ ﺣﺮﺏ ﺗﺐ .. ﺍﺧﻮﺍﺗﻬﻢ ﻭﺍﻣﻬﻢ ﻛﺒﻴﺮﺓ ﻓﻲ ﺍﻟﺴﻦ .. ﻗﺪﻣﻨﻬﻢ ﺑﺎﻟﺰﻏﺎﺭﻳﺪ ﻭﺍﻟﺘﺤﻔﻴﺰ .. ﻭﺍﺧﺘﻬﻢ ﺍﻻﺻﻐﺮ ﻣﻦ ﺍﻟﺘﺎﻳﺔ ﻗﺎﻟﺖ ﻟﻴﻬﻢ .. ﺍﻥ ﻣﺎ ﺟﺒﺘﻮ ﺍﻟﻨﺴﻴﻢ .. ﺍﻧﺎ ﻣﺎﺑﺨﻠﻴﻜﻢ ﺗﺪﺧﻠﻮ ﺍﻟﺒﻴﺖ ﺩﻩ ﺑﻜﺘﺤﻜﻢ ﺑﺎﻟﺘﺮﺍﺏ ..
ﻳﺎﺗﺠﻴﺒﻮﻫﺎ ﻳﺎﺗﻤﻮﺗﻮ .. ( ﻫﻼ ﻫﻼ ﻳﺎﺑﺖ ﺑﻄﺤﺎﻥ ) ..
ﺍﻟﻮﺍﻃﺎ ﻛﺎﻧﺖ ﻟﻴﻞ .. ﻭﻣﺮﻗﻮ ﻣﺎﺑﺸﻮﻓﻬﻢ ﻣﻦ ﺳﻮﺍﺩ ﺍﻟﻠﻴﻞ .. ﻣﻊ ﺳﻮﺍﺩ ﺍﻟﺤﺼﻴﻦ .. ﺑﺲ ﺗﺴﻤﻊ ﻛﺸﻜﺸﺔ ﺍﻟﺤﺼﺤﺎﺹ ﻣﻊ ﺣﻮﺍﻓﺮ ﺍﻟﺨﻴﻞ .. ﻛﺸﺘﻚ ﻛﺸﺘﻚ ﻛﺸﺘﻚ .. ﻭﻫﻢ ﻣﺘﺒﻠﻤﻴﻦ ﻭﺳﺎﻛﺘﻴﻦ .. ﻭﺍﺣﺪ ﺑﺘﻜﻠﻢ ﻣﻊ ﺍﻟﺘﺎﻧﻲ ﻣﺎﻓﻲ .. ﺍﻭﻻﺩ ﻣﺨﺘﺎﺭ ﺩﻳﻞ ﻣﻌﺮﻭﻓﻴﻦ .. ﺍﻟﺪﻧﻴﺎ ﻛﻠﻬﺎ ﺑﺘﻌﻤﻞ ﻟﻴﻬﻢ ﺣﺴﺎﺏ .
ﺍﻛﺒﺮ ﻭﺍﺣﺪ ﻓﻴﻬﻢ ﻋﻤﺮﻭ 42 ﺳﻨﺔ .. ﻭﺍﺻﻐﺮ ﻭﺍﺣﺪ ﻋﻤﺮﻭ 20 ﺳﻨﺔ .. ﻭﻫﻢ ﺍﻭﻻﺩ ﺭﺍﺟﻞ ﻭﺍﺣﺪ ﻭﻣﺮﺓ ﻭﺍﺣﺪﺓ .
ﻭﻣﺮﻗﺘﻬﻢ ﺩﻱ ﻣﺮﻗﺔ ﺧﻄﺮﻳﺔ ﺷﺪﻳﺪ .. ﻭﺍﻻﺧﻄﺮ ﻓﻲ ﺍﻻﻣﺮ ﺍﻧﻬﻢ ﻫﺴﻲ ﻣﺎ ﻣﺆﻛﺪﻳﻦ .. ﺍﻧﻮ ﺍﻻﻣﻴﺮ ﺧﻄﻒ ﺍﻟﺒﺖ ﻭﻻ ﻻ .. ﻭﺍﺣﺘﻤﺎﻝ ﻳﺪﺧﻠﻮ ﺍﻧﻔﺴﻬﻢ ﻓﻲ ﺧﻄﻮﺭﺓ ﻛﺒﻴﺮﺓ .. ﺍﻟﻤﻬﻢ ﻭﺻﻠﻮ ﺍﻟﺒﻴﺖ ﺑﺎﻟﻠﻴﻞ .. ﺑﻴﺖ ﺍﻟﺘﺎﻳﺔ .. ﻭﻟﻘﻮ ﻭﺩ ﺩﺍﺭ ﺍﻟﺰﻳﻦ .. ﻣﻔﺮﺵ ﻣﺼﻼﻳﺘﻮ ﻭﺷﻐﺎﻝ ﺻﻼﺓ ..
ﺭﺑﻄﻮ ﺣﺼﻴﻨﻬﻢ ﺑﺮﻩ ﻭﻗﻌﺪﻭ ﺍﻧﺘﻈﺮﻭﻫﻮ ﻻﻣﻦ ﺧﻠﺺ ﻣﻦ ﺻﻼﺗﻮ .. ﻭﺍﺣﺪ ﻓﻴﻬﻢ ﺍﺳﻤﻮ ﻋﻄﻴﺔ .. ﺻﻌﺐ ﺧﻼﺹ . ﻗﺎﻝ ﻟﻴﻬﻮ ﺷﻨﻮ ﻳﺎﻋﻢ ؟ ﺑﺘﻚ ﺭﺍﻳﺤﺔ .. ﻭﺍﻧﺖ ﺍﻧﻘﻠﺒﺖ ﻓﻜﻲ ﻋﻠﻰ ﺍﺧﺮ ﻋﻤﺮﻙ ؟ ﺍﻟﺒﺖ ﺟﻤﻌﺖ ﻭﻻ ﻣﺎﺟﻤﻌﺖ؟ ﻗﺎﻝ ﻟﻬﻮ ﻭﺍﻟﻠﻪ ﻣﺎﺟﻤﻌﺖ ﻳﺎ ﻋﻄﻴﺔ ..
ﻗﺎﻝ ﻟﻴﻬﻮ ﺧﻼﺹ ﻧﺤﻦ ﻣﺪﺍﻫﻤﻴﻦ ﺍﻟﻘﺼﺮ ﻓﻲ ﻟﻴﻠﻨﺎ ﺩﻩ .. ﻭﺩﺍﻳﺮﻳﻦ ﻧﻘﺘﻞ ﺍﻻﻣﻴﺮ ﺍﻟﻜﻠﺐ ﻓﻲ ﻋﺰ ﻧﻮﻣﻮ .. ﻭﺑﻌﺪﻳﻦ ﺍﻟﺠﺎﻳﺔ ﻣﻦ ﺍﻟﻠﻪ ﺣﺒﺎﺑﺎ ..
ﻗﺎﻝ ﻟﻴﻬﻢ ﻻﻻ ﺩﻩ ﺍﻛﺒﺮ ﻏﻠﻂ .. ﻧﺤﻦ ﻟﺴﻊ ﻣﺎ ﻣﺘﺎﻛﺪﻳﻦ ﺍﻟﻨﺴﻴﻢ ﻃﺸﺖ ﺑﺮﺍﻫﺎ .. ﻭﻻ ﻓﻲ ﺯﻭﻝ ﺧﺘﻔﻬﺎ .. ﺍﻧﺘﻮ ﺍﺻﺒﺮﻭ ﻟﻲ ﻻﺑﺎﻛﺮ ﺍﻧﺎ ﺍﻣﺸﻲ ﺍﺳﺄﻝ ﺍﻻﻣﻴﺮ .. ﺍﺻﻠﻮ ﻛﺎﻥ ﺳﺎﻗﻬﺎ ﻣﺎﺑﻨﻜﺮ .. ﻋﻄﻴﺔ ﻗﺎﻝ ﻟﻴﻬﻮ ﺍﺣﺘﻤﺎﻝ ﻳﻨﻜﺮ ﻭﻳﺨﺎﻑ ﻣﻦ ﺍﺑﻮﻫﻮ ..
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﻮ .. ﻟﻮﻓﺮﺿﻨﺎ ﺍﻧﻜﻢ ﻣﺸﻴﺘﻮ ﻗﺘﻠﺘﻮﻫﻮ .. ﺍﻟﻨﺴﻴﻢ ﺗﻠﻘﻮﻫﺎ ﻭﻳﻦ؟؟ .. ﺩﻩ ﺍﻟﻤﻠﻚ ﺑﻘﺘﻠﻜﻢ ﻭﻳﻘﺘﻞ ﺍﻟﻨﺴﻴﻢ ﻓﻮﻕ ﻭﻟﺪﻭ .. ﻳﺎﺟﻤﺎﻋﺔ ﺍﻟﺘﻬﻮﺭ ﻣﻀﺮ .. ﺍﻧﺘﻮ ﻗﺎﻳﻠﻴﻦ ﺍﻧﺎ ﻏﺎﻟﺒﻨﻲ ﺍﻗﺘﻞ ﺍﻻﻣﻴﺮ؟ .. ﻟﻜﻦ ﺍﻟﻔﺎﺋﺪﺓ ﺷﻨﻮ .. ؟؟
ﺍﻧﺘﻮ ﺍﺻﺒﺮﻭ ﻻﻣﻦ ﺍﺗﺄﻛﺪ ﺍﻧﻬﺎ ﻣﻌﺎﻫﻮ .. ﻛﺎﻥ ﺍﺗﺄﻛﺪﺕ ﺑﺮﺍﻱ ﺑﺠﻲ ﺑﺮﻛﺐ ﻣﻌﺎﻛﻢ .. ﺍﻧﺎ ﺑﺘﻲ ﻛﻤﺎﻥ ﻋﻨﺪﻱ ﻓﻴﻬﺎ ﻟﻌﺐ؟ .. ﺩﻩ ﻋﺮﺿﻲ ﺍﻛﺘﺮ ﻣﻨﻜﻢ ..
ﻗﺎﻟﻮ ﻟﻴﻬﻮ ﻳﺎﻫﺪﺍ ﺍﻟﻠﻴﻞ ﺍﻧﻘﺴﻢ ﻭﺍﻟﺒﻴﺎﺡ ﺷﺒﻪ .. ﻗﻮﻡ ﺑﺪﺭﻱ .. ﺍﻣﺶ ﺍﻟﻘﺼﺮ .. ﻭﻻﻗﻮ ﺷﻮﻑ ﻛﻼﻣﻮ ﻭﺗﻌﺎﻝ ﻟﻨﺎ ﺳﺮﻳﻊ ..
ﻗﺎﻝ ﻟﻬﻢ ﺍﻧﺎ ﺑﺲ ﺧﺎﻳﻔﻮ ﻳﻜﻮﻥ ﺍﺧﺪ ﺍﻟﺪﺍﻳﺮﻭ .. ﻭﺑﺎﻋﻬﺎ ﻓﻲ ﺍﻟﺮﻗﻴﻖ ..
ﻭﻻ ﻳﻜﻮﻥ ﺩﺧﻼ ﺍﻟﺤﻮﺵ .. ﺍﻟﺤﻮﺵ ﺩﻩ ﺍﻟﺤﻮﺵ ﺍﻟﻔﻴﻬﻮ ﺧﺪﻡ ﺍﻟﻤﻠﻚ .. ﺍﻇﻦ ﻗﺮﻳﺐ ﺍﻻﻟﻒ .. ﻣﻦ ﺫﻛﺮ ﻟﻰ ﺍﻧﺜﻰ ﻓﻴﻬﻢ ﺍﻟﻌﺠﻮﺯ ﻭﺍﻟﻄﻔﻞ .. ﺯﻱ ﺍﻟﺴﺠﻦ ..
ﻭﺍﺣﺪﻳﻦ ﺍﺳﺮﻯ ﺣﺮﺏ .. ﻭﺍﺣﺪﻳﻦ ﻣﺎﺧﺪﻫﻢ ﺑﻲ ﺣﺮ ﻣﺎﻟﻪ .. ﻣﻦ ﺗﺠﺎﺭ ﺭﻗﻴﻖ ﻣﺸﻬﻮﺭﻳﻦ ﻓﻲ ﺳﻨﺎﺭ .. ﻭﺍﻟﻤﻮﺿﻮﻉ ﻛﺎﻥ ﻣﺒﺎﺡ .. ﺍﻻﺗﺠﺎﺭ ﻓﻲ ﺍﻟﺒﺸﺮ .. ﻟﻜﻦ ﻛﻮﻧﻚ ﺗﺠﻲ ﺗﺴﻮﻕ ﺍﻟﺤﺮﺓ ﻣﻦ ﺑﻴﺖ ﺍﻫﻠﻬﺎ .. ﻭﺗﺒﻴﻌﻬﺎ .. ﺩﻱ ﻛﺎﻧﺖ ﺟﺮﻳﻤﺔ ﻣﺎﺑﻌﺪﻫﺎ ﺟﺮﻳﻤﺔ
ﺍﺻﺒﺤﺖ ﻭﺍﻃﺎﺕ ﺍﻟﻠﻪ .. ﻭﺩ ﺩﺍﺭ ﺍﻟﺰﻳﻦ ﺷﺪ ﺟﻤﻠﻮ .. ﻭﻗﺎﻡ ﻋﻠﻰ ﺳﻨﺎﺭ .. ﻭﺍﻟﻔﺮﺳﺎﻥ ﺍﻟﺴﺘﺔ .. ﺍﺧﻮﺍﻝ ﺍﻟﻨﺴﻴﻢ .. ﺳﺎﻟﻴﻦ ﺳﻴﻮﻓﻬﻢ .. ﻭﻗﺎﻋﺪﻳﻦ ﻓﻲ ﺑﻴﺖ ﺍﺧﺘﻬﻢ ..
ﺭﺍﺟﻴﻦ ﻭﺩ ﺩﺍﺭ ﺍﻟﺰﻳﻦ ﻳﺠﻴﻬﻢ ﺑﺪﺭﻱ .. ﻳﺪﻳﻬﻢ ﺍﻟﺨﺒﺮ .. ﻭﺩ ﺩﺍﺭ ﺍﻟﺰﻳﻦ ﻣﻮﻋﺎﺭﻑ ﺍﻟﺮﺍﺟﻴﻬﻮ ﻫﻨﺎﻙ . ؟؟
ﺍﻟﻰ ﺍﻟﻠﻘﺎﺀ
أنت تقرأ
أســرَار الـزمان .. طارق اللبيب
Randomﺍﻟﻘﺼﺔ ﺩﻱ ﺣﺼﻠﺖ ﺑﺪﺭﻱ ﺷﺪﻳﺪ .. ﻳﻌﻨﻲ ﻗﺒﻞ ﺍﻟﻌﻬﺪ ﺍﻟﺘﺮﻛﻲ ﺫﺍﺗﻮ .. ﻓﻲ ﺯﻣﻦ ﺍﻟﺴﻠﻄﻨﺔ ﺍﻟﺰﺭﻗﺎﺀ ﻳﺎﺯﻭﻝ ﺍﻟﺰﻣﻦ ﺩﺍﻙ ﻣﺎﻛﺎﻥ ﻓﻲ ﺣﺎﺟﺔ ﺍﺳﻤﻬﺎ ﺭﺋﻴﺲ ﺍﻟﺠﻤﻬﻮﺭﻳﺔ ﻭﺍﻟﺤﻜﻮﻣﺔ .. ﻭﺍﻟﻤﺤﺎﻓﻆ ﻭﺍﻟﻤﻌﺘﻤﺪ ﻭﻛﺪﺍ .. ﻛﺎﻥ ﻓﻲ ﻣﻠﻮﻙ ﻭﺍﻣﺮﺍﺀ ﻭﺳﻼﻃﻴﻦ ﻭﺣﺎﺟﺎﺕ ﺯﻱ ﺩﻱ .. ﻭﻧﺴﺒﺔ ﻻﻧﻬﺎ ﺍﻟﻘﺼﺔ ﻓﻲ ﻋﻬﺪ ﻣﻤﻠﻜﺔ ﺳﻨﺎﺭ . ﺍ...
