أســرَار الـزمان .. طارق اللبيب

( 6 )

ﺍﻟﺘﺎﻳﺔ ﻗﺎﻟﺖ ﻟﻴﻬﻮ .. ﻳﺎ ﺷﻴﺨﻨﺎ ﺍﻟﺮﺍﺟﻞ ﺩﻩ ﺗﺎﻧﻲ ﻣﺎﺻﺢ ﺍﻋﻴﺶ ﻣﻌﺎﻫﻮ ﻣﻮﻛﺪﻱ؟ ..
ﺍﻟﺸﻴﺦ ﻗﺎﻝ ﻟﻴﻬﺎ ﻛﻴﻔﻦ ﻣﺎﻟﻮ ؟ .. ﻗﺎﻟﺖ ﻟﻴﻬﻮ ﺍﻧﺎ ﺳﻤﻌﺖ ﺑﻘﻮﻟﻮ .. ﺍﻟﺮﺍﺟﻞ ﺍﻛﺎﻥ
ﺷﻚ ﻓﻲ ﻣﺮﺗﻮ .. ﺑﺘﺤﺮﻡ ﻋﻠﻴﻬﻮ ..
ﻗﺎﻝ ﻟﻴﻬﺎ ﻣﺎﻓﻲ ﻛﻼﻡ ﻣﻦ ﺩﻩ ﻓﻲ ﺍﻟﺪﻳﻦ .. ﺍﻻ ﻳﺼﻞ ﺩﺭﺟﺔ ﺍﻟﻠﻌﺎﻥ .. ﻭﺍﻻﺩﻻﺀ
ﺑﺎﻟﺸﻬﺎﺩﺍﺕ ﻗﺪﺍﻡ ﺍﻟﻘﺎﺿﻲ .. ﻟﻜﻦ ﺍﻟﺸﻚ ﻭﺍﻟﻈﻦ ﺍﻟﻌﺎﺩﻱ .. ﻣﺎﺑﺼﻞ ﺩﺭﺟﺔ ﺍﻟﺘﺤﺮﻳﻢ
.. ﺩﻩ ﻛﻼﻡ ﻗﺎﻃﻌﻨﻮ ﺍﻟﻨﺎﺱ ﻣﻦ ﺭﺍﺳﻬﻢ ﺳﺎﻛﺖ ..
ﻭﺩ ﺩﺍﺭ ﺍﻟﺰﻳﻦ ﻗﺸﻘﺶ ﺩﻣﻴﻌﺎﺗﻮ . ﻭﻗﻌﺪ ﻋﻠﻰ ﺣﻴﻠﻮ .. ﻗﺎﻝ ﻟﻴﻬﺎ ﻭﺍﻟﻠﻪ ﻳﺎ ﺍﻟﺘﺎﻳﺔ ..
ﺍﻧﺎ ﺍﺻﻼ ﻣﺎﺷﻔﺖ ﻋﻠﻴﻚ ﺷﺮ .. ﻋﻠﻰ ﺍﻟﺨﺼﻮﺹ ﻓﻲ ﺣﻤﻠﻚ ﺑﻲ ﺑﺘﻲ ﺍﻟﻨﺴﻴﻢ
.. ﻓﺸﺎﻥ ﻣﻦ ﻋﺮﺳﺘﻚ .. ﻣﺎﻓﺎﺭﻗﺘﻚ ﻻﻣﻦ ﺷﻠﺘﻲ ﺟﻨﺎﻙ .. ﺑﺲ ﻳﺎﻫﻮ ﻛﻼﻡ ﺍﻟﻔﻘﻴﺮ ..
ﻭﺍﻟﺤﺠﻞ ﺍﻟﻤﻠﻌﻮﻥ ﺩﻩ .. ﻋﻠﻰ ﻗﻮﻝ ﻋﻤﻲ ﺍﻟﺒﺸﻴﺮ .
ﺍﻟﺸﻴﺦ ﺍﺏ ﻛﻒ ﻗﺎﻝ ﻟﻴﻬﻮ ﺍﻧﺖ ﻳﺎ ﻭﺩ ﺍﺭ ﺍﻟﺰﻳﻦ .. ﻣﺎﺣﻜﻴﺖ ﻟﻲ ﺍﻟﺤﺠﻞ ﺩﻩ ﺟﺮﺑﻮﻫﻮ
ﻓﻲ ﻣﻨﻮ ﻗﺒﺎﻝ ﻛﺪﻱ؟؟ ﻭﺣﺼﻞ ﺷﻨﻮ؟؟ ﻭﻋﻤﻚ ﺍﻟﺒﺸﻴﺮ ﺑﻘﻮﻝ ﻣﻠﻌﻮﻥ ﻟﻴﻪ؟
ﻗﺎﻝ ﻟﻴﻬﻮ ﻭﺍﻟﻠﻪ ﻳﺎﺷﻴﺨﻨﺎ ﺍﻟﺸﻲ ﺩﻩ ﺳﺒﺐ ﺟﻨﺲ ﻣﺸﺎﻛﻞ .. ﻻ ﻟﻴﻬﺎ ﺍﻭﻝ ﻭﻻ ﻟﻴﻬﺎ
ﺍﺧﺮ .. ﺍﻭﻝ ﺷﻲ ﻋﻠﻰ ﺣﺴﺐ ﻣﺎﺣﻜﻮ ﻟﻴﻨﺎ ﺝ .. ﺩﻱ ﻛﺎﻥ ﻣﻌﺮﺱ ﻣﺮﺗﻴﻦ ..
ﺣﺒﻮﺑﺘﻲ ﺍﻡ ﺍﺑﻮﻱ ﺑﺖ ﻋﻤﻮ ﻟﺰﻡ .. ﻭﻣﺮﺍﺓ ﺗﺎﻧﻴﺔ ﻏﺮﻳﺒﺔ ﻣﻦ ﺍﻟﺤﺴﻨﺎﺏ .. ﻛﺎﻧﺖ ﻋﻨﻬﺎ
ﺑﺖ ﻭﻭﻟﺪ . ﻭﺍﻫﻠﻨﺎ ﻃﻠﻌﻮ ﻓﻴﻬﺎ ﺍﺷﺎﻋﺔ .. ﻗﺎﻟﻮ ﻣﺎﻫﺎ ﻋﺪﻳﻠﻪ .. ‏( ﻃﻌﻨﻮ ﻓﻲ
ﺷﺮﻓﻬﺎ ‏) .. ﻗﺎﻣﺖ ﺣﺒﻮﺑﺘﻲ ﻗﺎﻟﺖ ﺍﻧﺎ ﺟﻮﻧﻲ ﺟﻤﺎﻋﺔ ﻓﻲ ﺍﻟﻨﻮﻡ .. ﻭﻗﺎﻟﻮ ﻟﻲ ﺑﻨﺪﻳﻚ
ﺣﺠﻞ .. ﺑﻜﺸﻒ ﺍﻭﻻﺩ ﺍﻟﺤﺮﺍﻡ ﻣﻦ ﺍﻭﻻﺩ ﺍﻟﺤﻼﻝ ﻭﻣﺸﺖ ﺍﻟﺨﻼ ﺟﺎﺑﺖ ﺍﻟﺤﺠﻞ ﺩﻩ ..
ﻭﻗﺎﻟﺖ ﻟﻲ ﺟﺪﻱ ﺗﺸﻴﻞ ﺍﻟﺤﺠﻞ .. ﺗﺠﺮﺑﻮ ﻓﻲ ﺍﻭﻻﺩ ﺍﻟﻤﺮﺍﺓ .. ﻭﺍﻟﺒﻤﺮﺽ ﻣﻨﻬﻢ ﺩﻩ
ﻳﺎﻫﻮ ﻣﻮ ﻭﻟﺪﻙ .. ﻭﺟﺪﻱ ﺷﺎﻝ ﺍﻟﺤﺠﻞ .. ﻭﺟﺮﺑﻮ ﻭﻃﻠﻊ ﻭﺩ ﺍﻟﺤﺮﺍﻡ ﺍﻟﻮﻟﺪ .. ﻭﺍﻟﺒﺖ
ﻃﻠﻌﺖ ﺑﺘﻮ .. ﻗﺎﻣﻮ ﺍﻋﻤﺎﻣﻲ ﻏﺪﺭﻭ ﺑﺎﻟﺸﺎﻓﻊ ﻭﻛﺘﻠﻮﻫﻮ .. ﻭﺍﻻﻡ ﺟﺪﻱ ﻃﻠﻘﻬﺎ .
ﻭﺍﻟﺒﺖ ﺍﻟﻄﻠﻌﺖ ﺑﺘﻮ ﺟﻨﺖ ﻣﻦ ﺍﻟﻤﺼﻴﺒﺔ .. ﺑﻌﺪ ﻣﺪﺓ ﻛﺪﻱ ﻣﺎﺗﺖ .. ﻭﺍﻣﻬﺎ ﻟﺤﻘﺘﻬﺎ
ﺑﻌﺪ ﺷﻬﺮ .. ﻭﺑﻘﻰ ﺍﻱ ﺯﻭﻝ ﻳﺸﻚ ﻓﻲ ﻣﺮﺗﻮ .. ﺑﺠﻲ ﻟﻲ ﺣﺒﻮﺑﺘﻲ ﻭﻳﺸﻴﻞ ﻣﻨﻬﺎ
ﺍﻟﺤﺠﻞ .. ﻭﺣﺼﻠﺖ ﻣﺸﺎﻛﻞ .. ﻭﺣﺮﻳﻢ ﺍﻃﻠﻘﻦ .. ﻭﺷﻔﻊ ﻛﺘﻠﻮﻫﻢ .. ﻭﺑﻌﺪ ﺩﺍﻙ ﻋﻤﻲ
ﺍﻟﺒﺸﻴﺮ ﺣﺒﻮﺑﺘﻲ ﺍﺩﺕ ﻋﻤﻲ ﺍﻟﺒﺸﻴﺮ ﺍﻟﺤﺠﻞ ﻭﻗﺎﻟﺖ ﻟﻴﻬﻮ ﺍﺩﻓﻨﻮ ﻓﻲ ﻣﺤﻞ
ﻭﻣﺎﺗﻮﺭﻳﻬﻮ ﺍﻱ ﺯﻭﻝ .. ﻭﻧﺤﻦ ﻏﺎﻳﺘﻮ ﺍﺗﺼﻠﻄﻨﺎ ﻻﻣﻦ ﻣﺮﻗﻨﺎﻫﻮ ..
ﺍﻟﺸﻴﺦ ﻳﺴﻤﻊ ﻓﻲ ﺍﻟﻘﺼﺔ ﻻﻣﻦ ﺑﻜﻰ ..
ﻗﺎﻝ ﻟﻴﻬﻮ ﻳﺎﻭﺩ ﺩﺍﺭ ﺍﻟﺰﻳﻦ .. ﺣﺒﻮﺑﺘﻚ ﺍﻡ ﺍﺑﻮﻙ ﺍﻥ ﺷﺎ ﺍﻟﻠﻪ ﺭﺑﻨﺎ ﻳﺘﻮﻻﻫﺎ ﺑﻲ
ﺭﺣﻤﺘﻮ .. ﻟﻜﻦ ﺭﺣﻠﺖ ﺍﻟﺪﺍﺭ ﺍﻻﺧﺮﺓ ﺑﻲ ﺳﻴﺌﺎﺕ ﻣﺘﻞ ﺍﻟﺠﺒﺎﻝ .. ﺍﻧﺖ ﻫﺴﻊ ﺑﺘﻜﻮﻥ
ﻓﻬﻤﺖ .. ﺍﻧﻬﺎ ﺍﻟﻘﺼﺔ ﻣﺎﻗﺼﺔ ﻭﺩ ﺣﺮﺍﻡ ﻭﺩ ﺣﻼﻝ .. ﻟﻼﺳﻒ .. ﺍﻟﻈﻠﻢ ﻭﻗﻊ ﻋﻠﻰ
ﺍﻟﻤﺮﺍﺓ ﺍﻟﺤﺴﻨﺎﺑﻴﺔ .. ﻭﺑﺘﻬﺎ ﻭﻭﻟﺪﻫﺎ .. ﺭﺑﻨﺎ ﻳﻤﺮﻗﻜﻢ ﻳﻮﻡ ﺍﻟﻘﻴﺎﻣﺔ ﻣﻦ ﺣﻘﻬﻢ .. ﺩﻱ
ﻳﺎﻭﺩ ﺩﺍﺭ ﺍﻟﺰﻳﻦ .ﻣﻀﺎﺭﺭﺓ ﺿﺮﺍﺕ .. ﺍﻟﺤﺠﻞ ﻣﻌﻤﻮﻝ ﻓﻴﻬﻮ ﻋﻤﻞ ﻣﺨﺼﻮﺹ ﻋﺸﺎﻥ
ﻳﺴﺒﺐ ﺍﻟﻤﺮﺽ ﻟﻲ ﻭﺍﺣﺪ ﻓﻲ ﺍﻟﻮﻟﻴﺪﺍﺕ ﺩﻳﻞ .. ﻣﻮ ﻋﺸﺎﻥ ﻭﺩ ﺣﺮﺍﻡ ﻭﻻ ﻭﺩ ﺣﻼﻝ
..
ﻋﻠﻰ ﺣﺴﺐ ﺍﻟﻄﺒﻴﻌﺔ . ﻭﺍﻟﻮﻟﺪ ﻛﺎﻧﺖ ﻃﺒﻴﻌﺘﻮ ﻧﺎﺭﻳﺔ ﻣﺘﻞ ﻃﺒﻴﻌﺔ ﺑﺘﻚ ﺍﻟﻨﺴﻴﻢ ..
ﻭﻣﺘﻞ ﻃﺒﻴﻌﺔ ﺍﻟﺸﻔﻊ ﺍﻟﻜﺘﻠﻮﻫﻢ ﺑﺎﻟﻈﻠﻢ ﻛﻠﻬﻢ .. ﻧﺴﺄﻝ ﺍﻟﻠﻪ ﺍﻟﺴﻼﻣﺔ ..
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﻮ ﻋﻠﻴﻚ ﺍﻟﻠﻪ ﻳﺎﺷﻴﺨﻨﺎ .. ﻃﺒﻴﻌﺔ ﻧﺎﺭﻳﺔ ﻭﺗﺮﺍﺑﻴﺔ ﻛﻴﻒ ﻳﻌﻨﻲ
. ؟ ﺍﻟﻜﻼﻡ ﺩﻩ ﺍﻧﺎ ﻣﻮﻭﺍﻗﻊ ﻟﻲ ..
ﻗﺎﻝ ﻟﻴﻬﻮ ﻳﺎ ﻭﺩ ﺩﺍﺭ ﺍﻟﺰﻳﻦ .. ﺍﺻﻼ ﺍﻟﺴﺤﺮﺓ ﻭﺍﻟﻤﻨﺠﻤﻴﻦ .. ﻣﻘﺴﻤﻴﻦ ﺍﻟﺒﺸﺮ ﻋﻠﻰ
ﺍﺭﺑﻌﺔ ﻃﺒﺎﻳﻊ . ﻫﻮﺍﺋﻴﺔ ﻭﻣﺎﺋﻴﺔ ﻭﺗﺮﺍﺑﻴﺔ ﻭﻧﺎﺭﻳﺔ .. ﻭﻣﻘﺴﻤﻨﻬﺎ ﻋﻠﻰ ﺣﺴﺐ
ﺍﻻﺑﺮﺍﺝ ﺍﻟﻔﻠﻜﻴﺔ . ﻣﺜﻼ ﻳﻘﻮﻝ ﻟﻴﻚ ﻧﺎﺱ ﺑﺮﺝ ﺍﻟﻤﻴﺰﺍﻥ ﻫﻮﺍﺋﻴﺔ . ﻭﻧﺎﺱ ﺍﻟﺤﻤﻞ
ﻧﺎﺭﻳﻪ .. ﻭﻧﺎﺱ ﺑﺮﺝ ﺍﻟﺘﻮﺭ ﺗﺮﺍﺑﻴﺔ .. ﻭﻧﺎﺱ ﺍﻟﺠﻮﺯﺍﺀ ﻣﺎﺋﻴﻪ .. ﻭﻃﺒﻌﺎ" ﺍﻟﻜﻼﻡ ﺩﻩ ﻛﻠﻮ
ﺗﻨﺠﻴﻢ ﻭﻛﻔﺮ ﻓﻲ ﺍﻻﺳﻼﻡ ﻣﺤﺮﻡ ..
ﺍﻫﺎ ﺑﻘﻮﻣﻮ ﻳﺴﺄﻟﻮ ﻣﻦ ﺍﺳﻢ ﺍﻟﺰﻭﻝ .. ﻭﺍﺳﻢ ﺍﻣﻮ .. ﻭﺍﻟﺸﻬﺮ ﺍﻟﻤﻮﻟﻮﺩ ﻓﻴﻬﻮ ..
ﻭﻳﺸﻮﻓﻮﻫﻮ ﻭﺍﻗﻊ ﻓﻲ ﻳﺎﺗﻮ ﺑﺮﺝ .. ﻭﻃﺒﻴﻌﺘﻮ ﻳﺎﺗﺎ ﻓﻲ ﺍﻻﺭﺑﻌﺔ ؟ ﻭﻧﻮﻉ ﺍﻟﻄﻠﺴﻢ
ﺍﻟﺒﻨﺠﺢ ﻣﻊ ﺍﻟﻄﺒﻴﻌﺔ ﺩﻱ .. ﺍﻫﺎ ﺍﻥ ﺑﻘﻰ ﺍﻟﺪﺟﺎﻝ ﻣﻀﺮ .. ﺑﺒﻘﻰ ﺍﻟﺴﺤﺮ ﻳﻀﺮ ﻧﺎﺱ
ﺍﻟﻄﺒﻴﻌﺔ ﺑﻼ ﺣﺮﻭﻑ ﻭﻻﺗﻌﻴﻴﻦ .. ﻛﻠﻬﻢ .. ﻟﻜﻦ ﺍﻟﻄﺒﺎﺋﻊ ﺍﻟﺘﺎﻧﻴﺔ ﻣﺎﺑﻀﺮﻫﺎ ..ﻭﻛﻠﻮ
ﻛﻔﺮ ﻓﻲ ﻛﻔﺮ ﻭﺍﻟﻌﻴﺎﺫ ﺑﺎﻟﻠﻪ ..
ﻋﺎﺭﻑ ﻣﺮﺍﺕ ﻳﻜﻮﻧﻮ ﻛﺎﺷﺤﻴﻦ ﻋﻤﻞ ﺗﺮﺍﺏ ﻗﺪﺍﻡ ﺑﻴﺘﻚ ﻋﺸﺎﻥ ﻳﻀﺮﻙ ﺍﻧﺖ ﺑﺎﺳﻤﻚ
ﻭﻃﺒﻴﻌﺘﻚ .. ﻳﺠﻲ ﻳﻄﺎﻫﻮ ﺯﻭﻝ ﻏﻴﺮﻙ ﻳﻀﺮﻭ .. ﻳﺠﻲ ﻳﻄﺎﻫﻮ ﺯﻭﻝ ﺗﺎﻧﻲ ﻣﺎﻳﻀﺮﻭ
.. ﺩﻩ ﺍﻟﻔﺮﻕ .. ﻓﻲ ﺍﻟﻄﺒﺎﻳﻊ ..
ﺍﻫﺎ ﻳﺎﺧﻮﻱ ﻫﺴﻊ ﻋﻠﻰ ﺣﺴﺐ ﺣﻜﺎﻳﺘﻚ ﺩﻱ .. ﺍﻟﻈﺎﻫﺮ ﻭﺍﻟﻠﻪ ﺍﻋﻠﻢ ﺍﻧﻮ ﺣﺒﻮﺑﺘﻚ
ﺍﻟﻠﻪ ﻳﺴﺎﻣﺤﻬﺎ .. ﻋﻤﻠﺖ ﺍﻟﺴﺤﺮ ﻻﻭﻻﺩ ﺿﺮﺗﻬﺎ .. ﻭﺩﻣﺮﺕ ﺍﺳﺮﺓ ﺑﺎﻟﻜﺎﻣﻞ . ﻭﺍﻟﺸﺮ
ﺍﺗﻌﺪﺍ ﻟﻲ ﻧﺎﺱ ﺗﺎﻧﻲ .. ﻛﻠﻮ ﺑﻲ ﺳﺒﺐ ﻛﻀﺒﺔ ﺍﻟﺤﺠﻞ ﺍﻟﺒﻜﺸﻒ .. ﻭﺟﻬﻞ ﺍﻟﻨﺎﺱ .
ﺛﻢ ﺍﻧﺖ ﺑﺬﺍﺕ ﻧﻔﺴﻚ ﻛﺎﻥ ﻣﺎﻙ ﺟﺎﻫﻞ ﺗﺼﺪﻕ ﺍﻟﻔﻘﻴﺮ ﺍﻟﺒﺪﻋﻲ ﺍﻟﻐﻴﺐ .. ﻭﺗﺼﺪﻕ
ﺍﻟﻮﻫﻢ ﺩﻩ ؟؟
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﻮ ﻳﺎ ﺷﻴﺨﻨﺎ ﻣﻌﻨﺎﻫﺎ ﻳﻌﻨﻲ ﺍﻧﺎ ﻋﺎﺩﻱ ﺑﻨﺠﺐ ؟
ﻗﺎﻝ ﻟﻴﻬﻮ ﻳﺎﻭﺩ ﺍﻟﺰﻳﻦ ﻣﺎﺗﺒﻘﻰ ﺭﺍﺟﻞ ﺟﺎﻫﻞ .. ﺍﻟﺬﺭﻳﺔ ﺩﻱ ﺑﻴﺪ ﺍﻟﻠﻪ .. ﻧﺒﻲ ﺍﻟﻠﻪ
ﺯﻛﺮﻳﺎ ﺭﺑﻨﺎ ﻭﻫﺐ ﻟﻴﻬﻮ ﺍﻟﺬﺭﻳﺔ ﺑﻌﺪ ﺍﺷﺘﻌﻞ ﺭﺍﺳﻪ ﺷﻴﺒﺎ .. ﻭﻭﻫﻦ ﻋﻈﻤﻪ .. ﻭﻣﺮﺍﺗﻪ
ﻛﺎﻧﺖ ﻋﺎﻗﺮ .. ﺧﻠﻴﻚ ﺭﺍﺟﻞ ﻣﺘﻌﻠﻢ ﻭﺍﺑﻌﺪ ﻣﻦ ﺍﻟﻔﻘﺮﺍﺀ ﻭﺍﻟﻐﺸﺎﺷﻴﻦ ..
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻭﺍﻟﻠﻪ ﺩﺍﺑﻲ ﺿﻤﻴﺮﻱ ﺍﺭﺗﺎﺡ .. ﺍﻟﻠﻪ ﻳﺠﺰﺍﻙ ﺍﻟﺨﻴﺮ ﻳﺎﺷﻴﺨﻨﺎ ..
ﻭﺍﻧﺎ ﻭﺍﻟﻠﻪ ﻫﺴﻊ ﻣﺎ ﻣﺸﺘﺎﻕ ﻟﻲ ﺷﻲ .. ﻏﻴﺮ ﻣﺸﺘﺎﻕ ﺍﻣﺸﻲ ﻟﻲ ﺑﺘﻲ ﺍﻟﻨﺴﻴﻢ ..
ﻭﺍﺳﻠﻢ ﻋﻠﻴﻬﺎ ﺑﺎﻟﻤﻘﺎﻟﺪﺓ . ‏( ﺑﺎﻟﺤﻀﻦ ‏) .. ﻻﻧﻬﺎ ﻳﻮﻣﻬﺎ ﺍﻟﻤﺎﺭﻗﺔ ﻋﺮﻭﺱ .. ﻛﻨﺖ
ﻣﺘﻀﺎﻳﻖ ﻣﻨﻬﺎ .. ﻭﻻﻗﺪﺭﺕ ﺍﻋﺎﻳﻦ ﻟﻴﻬﺎ ﻓﻲ ﻭﺷﻴﻬﺎ .. ﻭﻻﻭﺍﺩﻋﺘﻬﺎ ..
ﻭﺍﻧﺎ ﻳﺎﺷﻴﺨﻨﺎ ﺍﻥ ﺷﺎﺀ ﺍﻟﻠﻪ .. ﻛﻞ ﻳﻮﻡ ﺳﺒﺖ .. ﺑﺠﻲ ﺑﺤﻀﺮ ﻣﻌﺎﻙ ﺣﻠﻘﺔ ﺍﻟﻌﻠﻢ ..
ﻏﺎﻳﺘﻮ ﺍﻟﺤﻤﺪ ﻟﻠﻪ ﺍﻟﺠﻤﺎﻋﺔ ﻗﺎﻣﻮ ﻣﻦ ﻋﻨﺪ ﺍﻟﺸﻴﺦ ﺍﻟﺼﺎﻟﺢ .. ﺭﺑﻨﺎ ﻳﺜﻴﺒﻮ ﺍﻟﺠﻨﺔ ..
ﻭﻗﺎﻣﻮ ﻣﺘﺮﺍﻭﺣﻴﻦ ﻋﻠﻰ ﺣﻠﺘﻬﻢ ..
ﻓﻲ ﺍﻟﺸﺎﺭﻉ ﺑﺘﻮﻧﺴﻮ ﺍﻻﺗﻨﻴﻦ .. ﻭﺩ ﺩﺍﺭ ﺍﻟﺰﻳﻦ ﺑﻲ ﺟﻤﻠﻮ ﺍﻟﻌﻨﺎﻓﻲ .. ﻭﺍﻟﺘﺎﺗﻴﺔ
ﺭﺍﻛﺒﺔ ﺍﻟﺒﻜﺮﺓ ﺍﻡ ﺷﺒﺮﻳﺔ .. ﺍﻟﺴﺎﺭﺕ ﺑﻴﻬﺎ ﺍﻟﻨﺴﻴﻢ ﻟﻲ ﺑﻴﺘﻬﺎ .. ﻭﺍﺏ ﺧﻮﺳﺔ ﺳﺎﻳﻖ
ﺣﻤﺎﺭﺗﻮ ﺍﻟﺤﻤﺎﻣﻴﺔ ﺍﻟﻤﺸﻬﻮﺭﺓ .. .. ﺍﻟﺘﻘﻮﻝ ﺑﻌﺎﻳﻦ ﻟﻬﻢ ﻗﺪﺍﻣﻲ ..
ﻃﺒﻌﺎ ﺍﻟﺘﺎﻳﺔ ﻣﺘﺒﻠﻤﺔ ﺗﺐ ﺑﻲ ﺩﻭﺏ ﺍﻟﺪﻣﻮﺭ ﺍﻟﻤﻐﺰﻭﻝ ﻏﺰﻝ .. ﻭﺳﺎﻛﺘﺔ ﺳﺎﻛﺖ ..
ﻭﺷﻜﻠﻬﺎ ﻻﻫﺴﻊ ﻋﻨﺪﻫﺎ ﺑﺎﻗﻲ ﺯﻋﻞ .. ﻭﻣﺤﺮﺟﺔ ﻝ .. ﻛﻦ ﺍﻻﻭﺿﺎﻉ ﻣﻄﻤﺌﻨﺔ ﻳﻌﻨﻲ
..
ﺍﻫﺎ ﻳﺎﺯﻭﻝ ﺑﻌﺪ ﻭﺻﻠﻮ ﺍﻟﺤﻠﺔ .. ﻧﺎﺱ ﻭﺩ ﺩﺍﺭ ﺍﻟﺰﻳﻦ ‏( ﺑﻨﺰﻟﻮ ‏) .. ﻭﺍﺑﺨﻮﺳﺔ ﻟﺴﻊ
ﺑﻤﺸﻲ ﺷﺮﻕ .. ﻫﻮ ﺳﺎﻛﻦ ﺑﺮﺓ ﺍﻟﺤﻠﺔ .. ﺷﻮﻳﺔ ﻓﻲ ﺣﺘﺔ ﺧﻠﻮﻳﺔ ﻛﺪﺍ .. ﺯﻱ ﺭﺑﻊ
ﺳﺎﻋﺔ ﻣﻦ ﻧﺎﺱ ﻭﺩ ﺩﺍﺭ ﺍﻟﺰﻳﻦ ..
ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﻮ ﻳﺎ ﺍﺏ ﺧﻮﺳﺔ .. ﺍﻧﺎ ﺑﺎﻛﺮ ﻣﻦ ﺍﻟﺼﺒﺎﺡ ﺑﺠﻴﻚ ﺍﺷﺮﺏ ﻣﻌﺎﻙ
ﺍﻟﻘﻬﻮﺓ .. ﻭﺟﺎﻱ ﺍﺳﻠﻢ ﻋﻠﻰ ﺍﻟﻨﺴﻴﻢ ﺑﺘﻲ .. ﻗﺎﻝ ﻟﻴﻬﻮ ﺣﺒﺎﺑﻚ ﻳﺎﺳﻴﺪ ﺍﻟﻜﻠﻤﺔ ..
ﻭﺍﺏ ﺧﻮﺳﺔ ﻭﺻﻞ ﺑﻴﺘﻮ .. ﻟﻘﻰ ﺍﻟﻨﺴﻴﻢ ﺭﺍﺟﻴﺎﻫﻮ ﻓﻲ ﻇﻞ ﺍﻟﻘﻄﻴﺔ .. ﺍﻭﻝ
ﻣﺎﻭﺻﻞ .. ﻭﻗﻔﺖ ﻟﻴﻬﻮ ﻋﻠﻲ ﺣﻴﻼ .. ﻭﺟﺎﺗﻮ ﺷﺎﻟﺖ ﻣﻨﻮ ﺍﻟﻌﺼﺎﻳﺔ .. ﻭﻃﻠﻌﺖ
ﺍﻟﻄﺎﻗﻴﺔ ﻣﻦ ﺭﺍﺳﻮ . ﻭﺧﺘﺖ ﻟﻴﻬﻮ ﺍﻟﻮﺳﺎﺩﺓ ﻓﻮﻕ ﺍﻟﻌﻨﻘﺮﻳﺐ ..
ﻭﺟﺎﺑﺖ ﺍﻟﻄﺶ ﺑﺘﺎﻉ ﺍﻟﻨﺤﺎﺱ .. ﻭﻛﺒﺖ ﻓﻴﻬﻮ ﻣﻮﻳﺔ ﻭﻣﻠﺢ .. ﻭﻏﺴﻠﺖ ﻟﻴﻬﻮ ﻛﺮﻋﻴﻬﻮ
.. ﻭﻧﺸﻔﺘﻬﻦ ﺑﻲ ﻃﺮﻑ ﻓﺴﺘﺎﻧﻬﺎ ﺣﻖ ﺍﻟﻌﺮﺱ ..
ﻓﺴﺘﺎﻥ ﻏﺎﻟﻲ ﺷﺪﻳﺪ .. ﻏﺎﺯﻟﻴﻨﻮ ﻓﻲ ﺷﻨﺪﻱ .. ﻭﺍﻣﻮ ﻗﺎﻋﺪﺓ ﻫﻨﺎﻙ ﻓﻲ ﺿﻞ
ﺭﺍﻛﻮﺑﺔ ﺍﻟﺘﺒﺲ ﺣﻘﺘﻬﺎ .. ﺗﻌﺎﻳﻦ .. ﻗﺎﻟﺖ ﻟﻴﻬﻮ ﻋﺎﺩ ﻳﺎ ﻋﻤﺮ ﻭﻟﺪﻱ .. ﺍﺑﻮﻙ ﺍﻟﻮﻟﺪﻙ
ﻣﺎﻟﻘﻰ ﻣﻨﻲ ﺍﻻﺣﺘﺮﺍﻡ ﺩﻩ .. ﻋﺎﻥ ﺍﻟﺠﻴﻬﻪ ﻭﺍﻟﺤﺎﻝ ﺍﻟﺴﻤﺢ ﺗﺤﻤﺪ ﺭﺑﻚ ﻳﺎﻭﻟﺪﻱ ..
ﺭﺑﻨﺎ ﺍﺩﺍﻙ ﺣﺴﺐ ﻧﻴﺘﻚ ..
ﻭﺍﻟﻨﺴﻴﻢ ﻣﺪﻧﻘﺮﺓ ﻭﺗﺘﺒﺴﻢ .. ﻗﺎﻝ ﻟﻴﻬﺎ ﺍﻟﺤﻤﺪ ﻟﻠﻪ ﻳﻤﺔ .. ﺭﺑﻨﺎ ﻛﺮﻳﻢ ﻋﻠﻰ ﻋﺒﺎﺩﻭ ..
ﺍﻥ ﺷﺎﺀ ﺍﻟﻠﻪ ﺍﻟﻨﺴﻴﻢ ﺭﺑﻨﺎ ﻳﺨﻠﻴﻬﺎ ﻟﻲ .. ﺯﻱ ﻣﺎﻋﺮﻓﻨﺎ ﻣﻦ ﺍﻟﻮﺍﻟﺪﺓ ﺍﻟﻌﺠﻮﺯ ﺩﻱ ..
ﺍﻧﻮ ﺍﺑﺨﻮﺳﺔ ﺍﺳﻤﻮ ﺍﻟﺤﻘﻴﻘﻲ ﻋﻤﺮ ..
ﺍﻟﻨﺴﻴﻢ ﻗﺎﻟﺖ ﻟﻴﻬﻮ ﻳﺎ ﻓﻼﻥ ﺍﻧﺎ ﻃﺎﻟﺒﻪ ﻣﻨﻚ ﺷﻲ .. ﻃﺒﻌﺎ" ﺯﻱ ﻣﺎ ﻣﻼﺣﻈﻴﻦ ..
ﻣﺎﺑﺘﻘﻮﻝ ﻟﻴﻬﻮ ﺑﻲ ﺍﺳﻤﻮ ﻧﻬﺎﺋﻲ .. ﺍﻟﻤﺮﺍﺓ ﻣﺎﺑﺘﺠﻴﺐ ﺍﺳﻢ ﺭﺍﺟﻼ ﻟﻮ ﻛﺘﻠﻮﻫﺎ ..
ﻭﻧﺴﻴﺒﻬﺎ ﺫﺍﺗﻮ ﻣﺎﺑﺠﻴﺐ ﺍﺳﻤﻮ .. ﻟﻤﻦ ﺗﺠﻲ ﺗﻨﺎﺩﻳﻬﻮ ﺑﺘﻘﻮﻝ ﻟﻴﻬﻮ ﻳﺎﻋﻤﻲ ..
ﺍﻟﻤﻬﻢ ﻗﺎﻝ ﻟﻴﻬﺎ ﺍﻫﺎ ﻳﺎ ﺍﻟﻨﺴﻤﺔ ﻃﺎﻟﺒﺎﻧﻲ ﺷﻨﻮ؟
ﻗﺎﻟﺖ ﻟﻴﻬﻮ ﺯﺡ ﺟﺎﻱ ﻗﺮﺏ ﺍﺿﺎﻧﻚ ﺍﻟﻨﻘﻮﻝ ﻟﻚ .. ﻗﺮﺏ ﻋﻠﻴﻬﺎ ﻭﺍﺩﺍﻫﺎ ﺍﺿﺎﻧﻮ ..
ﻗﺎﻟﺖ ﻟﻴﻬﻮ ﺩﺭﻭﻳﻦ ﻻﻗﺪﺍﻡ ﻛﻞ ﺯﻭﻝ ﻳﺒﻴﺖ "ﺗﻮ" !! .. ﻫﻬﻪ ﺩﻱ ﺩﺍﻳﺮﻩ ﺗﺮﺟﻤﺔ .. ﻳﻌﻨﻲ
.. ‏( ﻟﻤﺪﺓ ﺍﺳﺒﻮﻋﻴﻦ ﻛﻞ ﻭﺍﺣﺪ ﻓﻴﻨﺎ ﻳﻨﻮﻡ ﻓﻲ ﺣﺘﺔ ﺑﺮﺍﻫﻮ .. ‏) .. ﻗﺎﻝ ﻟﻴﻬﺎ ﺗﺤﺖ
ﺍﻣﺮﻙ ﻳﺎﺳﻠﻄﺎﻧﺔ ..
ﻗﺎﻟﺖ ﻟﻴﻬﻮ ﺗﺴﻠﻢ ﺍﻧﺖ ﻳﺎﺳﻴﺪ ﺍﻟﺮﺟﺎﻟﺔ .. ﺍﻟﻤﻬﻢ ﻓﻌﻼ ﻛﻞ ﺯﻭﻝ ﺑﻘﻰ ﻳﺒﻴﺖ ﺑﺮﺍﻫﻮ
ﻓﻲ ﺣﺘﺔ .. ﻧﺎﺱ ﺍﻟﺒﻴﺖ ﻛﻠﻬﻢ ﺧﻤﺴﺔ ﺑﻲ ﺍﻟﻨﺴﻴﻢ .. ﺍﻟﻤﺮﺍﺓ ﺍﻟﻜﺒﻴﺮﺓ ﻭﺭﺍﺟﻼ
ﺭﺍﻗﺪﻳﻦ ﻓﻲ ﻣﻜﺎﻥ .. ﻭﺍﻟﺮﺳﺎﻟﺔ ﻭﺍﻟﻨﺴﻴﻢ ﺭﺍﻗﻴﻦ ﻓﻲ ﻣﻜﺎﻥ .. ﻭﻋﻤﺮﺍﺑﺨﻮﺳﺔ
ﺑﺮﺍﻫﻮ ﻓﻲ ﻣﻜﺎﻥ ﺑﺮﻩ ﻫﻨﺎﻙ ﺑﺒﻴﺖ ﻗﺪﺍﻡ ﻣﻊ ﺩﻭﺩﺍﺏ ﺍﻟﺪﺭﺏ .. ‏( ﻃﺮﻳﻖ ﻣﺮﻭﺭ
ﺍﻟﻤﻮﺍﺷﻲ ‏) ..
ﺑﺎﻛﺮ ﺍﻟﺼﺒﺎﺡ .. ﺩﻏﺶ ﺍﻟﺮﺣﻤﻦ .. ﻗﺎﻡ ﺍﻟﻌﺮﻳﺲ ﺍﺑﺨﻮﺳﺔ .. ﻭﺷﺎﻝ ﻓﺎﺳﻮ .. ﻭﺣﺒﺎﻟﻮ
ﻭﺭﻛﺐ ﺣﻤﺎﺭﺗﻮ .. ﻭﻛﺒﺲ ﺍﻟﺨﻼ ﻳﺠﻴﺐ ﺍﻟﺤﻄﺐ .. ﻻ ﺷﻬﺮ ﺍﻟﻌﺴﻞ ﻭﻻ ﻟﺨﻤﺔ .. ﻧﺎﺱ
ﺩﺍﻳﺮﺓ ﺗﻜﺴﺐ ﺯﻣﻨﺎ ..
ﻭﻛﺖ ﺍﻟﻔﻄﻮﺭ ﺟﺎﺀ ﺭﺍﺟﻊ .. ﻭﺟﺎﺏ ﺣﺰﻡ ﺍﻟﺤﻄﺐ ﺍﻟﻤﻲ ﺧﻤﺠﺎﻧﺔ .. ﺍﻟﺤﻤﺎﺭﺓ ﻻﻣﻦ
ﺑﺘﻘﻨﺖ ..
ﻭﻧﺰﻝ ﺍﻟﺤﻄﺐ .. ﻭﺍﻟﻨﺴﻴﻢ ﺍﺗﻠﻘﺘﻮ ﺑﻲ ﻧﻔﺲ ﺍﻻﻫﺘﻤﺎﻡ .. ﻭﺩﺍﻳﺮﺓ ﺗﺠﻬﺰ ﺍﻟﻔﻄﻮﺭ ﻗﺎﻝ
ﻟﻴﻬﺎ ﺍﺻﺒﺮﻱ .. ﺍﻧﺎ ﺭﺍﺟﻲ ﺍﺑﻮﻙ .. ﻇﻨﻴﺘﻮ ﻳﺠﻲ ﻳﻔﻄﺮ ﻣﻌﺎﻱ ..
ﻗﺎﻟﺖ ﻟﻴﻬﻮ ﺍﺑﻮﻭﻭﻭﻭﻭﻱ ﻳﺎﺣﻠﻴﻠﻮ .. ﻗﺎﻟﻚ ﺟﺎﻱ؟
ﻗﺎﻝ ﻟﻴﻬﺎ ﺍﻳﻮﺓ ﻗﺎﻝ ﻟﻲ ﺑﺠﻲ ﺍﺷﺮﺏ ﻣﻌﺎﻱ ﺍﻟﻘﻬﻮﺓ ..
ﻗﺎﻟﺖ ﻟﻴﻬﻮ ﻋﺎﺩ ﺍﻟﻨﻘﻮﻟﻚ .. ﺍﺑﻮﻱ ﺟﺒﻨﺘﻮ ﻳﺎﻣﻊ ﺍﻟﺸﺮﻗﺔ .. ﻳﺎ ﻧﺼﺖ ﻧﻬﺎﺭ ..
ﺍﻓﻄﺮ ﻓﻄﻮﺭﻙ ﺳﺎﻛﺖ .. ﻭﺍﺗﺮﺟﺎﻫﻮ ﺍﻟﻴﺠﻲ .. ﺑﺠﻴﻚ ﺍﻟﺸﻤﺶ ﻣﻊ ﺍﻟﺼﻨﻘﻮﺭ ..
‏( ﻳﻌﻨﻲ ﺍﻟﺸﻤﺶ ﻗﺼﺎﺩ ﻧﺺ ﺍﻟﺮﺍﺱ ‏) .. ﻫﻬﻪ ﻏﺎﻳﺘﻮ ﺍﻟﻨﺴﻴﻢ ﻋﻨﺪﻫﺎ ﺟﻨﺲ ﻛﻼﻡ ..
ﻋﺴﻞ ﺑﺲ .. ﻭﺍﻟﺤﻨﺎﻛﻴﺶ ﻃﺒﻌﺎ" ﺑﺴﻄﺤﻮ ..
ﺍﻟﻤﻬﻢ ﻓﻄﺮ .. ﻭﺍﻧﺘﻈﺮ ﺷﻮﻳﺔ .. ﻋﺎﻳﻦ ﻣﻦ ﻫﻨﺎﻙ . ﻧﻔﺮﻳﻦ ﺭﺍﻛﺒﻴﻦ ﺟﻤﺎﻝ .. ﺟﺎﻳﻴﻦ
ﻋﻠﻴﻬﻮ .. ﻗﺎﻝ ﻟﻴﻬﺎ ﻳﺎ ﺍﻟﻨﺴﻴﻢ؟؟ .. ﻛﺪﻱ ﺗﻌﺎﻟﻲ ﻋﺎﻳﻨﻲ ﻫﻨﺎﺍﺍﺍﺍﻙ .. ﺩﻩ ﺍﺑﻮﻙ . ﻟﻜﻦ
ﺍﻟﻤﻌﺎﻫﻮ ﺩﻩ ﻣﻨﻮ؟؟ ﻣﺎﻋﺮﻓﺘﻮ ؟؟ .. ﻗﺎﻟﺖ ﻟﻴﻬﻮ ﺑﺮﻱ ﻣﺎﻋﺮﻓﺘﻮ ..
ﻭﻓﻌﻼ ﻫﻢ ﺷﺪﺓ ﻣﺎﺑﻌﺎﺩ .. ﻭﺍﻟﻮﺍﻃﺔ ﺳﺨﻨﻪ ..ﻭﺍﻟﺮﻫﺎﺏ ﻣﺎﻟﻲ ﺍﻟﺤﺘﺔ ..
ﺗﻌﺎﻳﻦ ﻟﻴﻬﻢ ﻳﺮﺟﻔﻮ .. ﺯﻱ ﺍﻟﺰﻭﻝ ﺍﻟﻮﺍﻗﻒ ﺑﻲ ﻭﺭﺍ ﺍﻟﻨﺎﺭ .. ﻭﺟﺎﻳﻦ ﻣﺎﺷﻴﻦ ..
ﻭﺍﺏ ﺧﻮﺳﺔ ﻳﺴﻮﻱ ﻳﺎﺭﺑﻲ ﺍﻟﻤﻌﺎ ﻭﺩ ﺩﺍﺭ ﺍﻟﺰﻳﻦ ﺩﻩ ﻣﻨﻮ؟؟
ﻭﻛﺖ ﻗﺮﺑﻮ ﻋﺎﻳﻦ ﻟﻴﻬﻢ ﺗﺎﻧﻲ .. ﻟﻘﺎﻫﻮ ﻟﻴﻚ ﺩﻩ " ﺑﺎﻣﺒﻲ" ..
ﺍﺑﺨﻮﺳﺔ ﻗﺎﻝ ﺍﺏ ﺍﺏ ﺍﺏ .. ﺍﻧﺎ ﺍﺧﻮﻙ ﺍﺕ .. ﺑﺎﻣﺒﻲ ﺍﻟﻠﻴﻠﺔ ﺟﺎﻱ ﻣﻦ ﻭﻳﻦ؟؟ ..
ﺍﺯﻭﻝ ﺍﻟﺰﻭﻝ ﺩﻩ ﻣﺎﻗﺎﻝ ﻟﻲ ﺍﻭﻝ ﻋﺮﺳﻚ ﻣﺎﻳﺘﻢ .. ﻋﻨﺪﻱ ﻃﻠﺐ ﺗﻨﻔﺬﻭ ﻟﻲ .. ﻭﺍﻧﺎ
ﻭﻋﺪﺗﻮ ..
ﻳﺎﺭﺑﻲ ﺍﻟﻠﻴﻠﺔ ﺟﺎﻱ ﻳﻄﺎﻟﺐ ﺑﻲ ﻃﻠﺒﻮ ﻭﻻ ﺷﻨﻮ؟
ﺍﻭﻝ ﻣﺎﻭﺻﻠﻮ .. ﺍﺏ ﺧﻮﺳﺔ ﻭﻗﻒ ﻟﻴﻬﻢ ﻋﻠﻰ ﺣﻴﻠﻮ .. ﻭﻗﺎﻟﻬﻢ ﺣﺒﺎﺑﻜﻢ ﺣﺒﺎﺑﻜﻢ ..
ﺳﻼﻣﺎﺕ ﻭﻣﺮﺍﺣﺐ .. ﻭﺍﻟﻨﺴﻴﻢ ﺟﺎﺕ ﺳﻠﻤﺖ ﻋﻠﻴﻬﻢ .. ﻭﺩﺧﻠﺖ ﻋﻠﻰ ﺍﻟﺘﻜﻞ ..
‏( ﺍﻟﺘُﻜُﻞ : ﺍﻟﻤﻄﺒﺦ ‏) .. ﻟﻜﻦ ﻃﺒﻌﺎ ﺑﺨﺘﻠﻒ ﻋﻦ ﺍﻟﻤﻄﺒﺦ ﺍﻻﻥ .. ﻛﺎﻥ ﻋﺒﺎﺭﺓ ﻋﻦ ﺭﺍﻛﻮﺑﺔ
ﻗﺶ .. ﻓﻴﻬﺎ ﺻﺎﺝ ﻋﻮﺍﺳﺔ .. ﺗﺤﺘﻮﺣﺠﺎﺭ ﺍﺳﻤﻬﻦ ﺍﻟﻠﺪﺍﻳﺎﺕ .. ﻭﺣﻠﺔ ﻋﺼﻴﺪﺓ ﻭﺣﻠﺔ
ﻣﻼﺡ .. ﻭﻋﺪﺓ ﺍﻟﺸﺎﻱ ﻭﻋﺪﺓ ﺍﻟﺠﺒﻨﺔ .. ﺍﻟﻨﺴﻴﻢ ﺩﺧﻠﺖ ﻋﻠﻴﻬﻮ ..
ﻭﺍﻟﺮﺳﺎﻟﺔ ﻗﺎﻣﺖ ﻧﺰﻟﺖ ﺍﻟﺠﻤﺎﻝ .. ﻭﻋﻘﻠﺘﻬﻦ ..ﺍﻟﺮﺳﺎﻟﺔ ﻋﻤﺮﻫﺎ 12 ﺳﻨﺔ ﻟﻜﻦ ﺑﺖ
ﻣﻠﺤﻠﺤﺔ ﻭﻋﻮﺩﺍ ﻓﺎﺭﻉ ﻭﻣُﺮْ .. ﻭﺟﺎﺑﺮﺓ ﻭﻋﺎﻟﻴﺔ ﺗﺸﻮﻓﺎ ﺗﻘﻮﻝ ﺑﺖ ..17
ﺍﺑﺨﻮﺳﺔ ﻗﺎﻡ ﺩﺧﻞ ﻋﻠﻰ ﺍﻟﺒﻬﺎﺋﻢ .. ﻋﺰﻝ ﻟﻴﻬﻮ ﺣﻤﻞ ﺑﺞ ‏( ﻳﻌﻨﻲ ﻟﺤﻤﻮ ﻫﺶ ‏) ..
ﻭﺷﺨﺨﺨﺦ ﺿﺒﺤﻮ ..
ﻭﺩ ﺩﺍﺭ ﺍﻟﺰﻳﻦ .. ﻗﺎﻟﻬﻮ ..ﻳﺎﺯﻭﻝ ﺩﻩ ﺷﻨﻮ؟ ﻧﺤﻦ ﻗﻠﻨﺎ ﻟﻴﻚ ﻧﺎﺱ ﻗﻬﻮﺓ ﻭﻣﺎﺷﻴﻦ ..
ﻣﺎﻋﻨﺪﻧﺎ ﻣﻬﻠﺔ ﻧﺮﺟﺎﻫﺎ .. ﻗﺎﻝ ﻟﻴﻬﻮ ﻳﺎﺯﻭﻝ ﺩﻱ ﻛﺮﺍﻣﺔ .. ﺷﻜﺮ ﻟﻲ ﺍﻟﻠﻪ ﺍﻟﺠﺎﺑﻜﻢ ﻟﻲ
..
ﺍﻫﺎ ﻓﻲ ﺍﺗﻨﻴﻦ ﺍﺗﻨﻴﻦ ﻣﻦ ﻭﻻﺩ ﺍﻟﺤﻠﺔ .. ﻣﺴﻜﻮ ﺍﻟﺒﻬﻴﻤﺔ ﺷﻐﺎﻟﻨﻲ ﻓﻴﻬﺎ .. ﺳﻠﺦ
ﻭﺗﻘﻄﻴﻊ .. ﻭﺍﺏ ﺧﻮﺳﺔ ﺟﺎ ﻗﻌﺪ ﻣﻊ ﺍﻟﻀﻴﻮﻑ ..
ﻭﺩ ﺩﺍﺭ ﺍﻟﺰﻳﻦ ﻭﺑﺎﻣﺒﻲ .. ﻃﺒﻌﺎ ﻳﺎﺟﻤﺎﻋﺔ ﺑﺎﻣﺒﻲ ﻣﺴﻤﻨﻮ ﻋﻠﻰ ‏( ﺍﻟﺒﺎﻣﺒﻲ ‏)
ﺍﻟﺨﺪﺍﺭ ﺍﻟﻮﺍﺣﺪ ﺩﻩ .. ﺍﻻﺳﻤﻮ ﺍﻟﺒﻄﺎﻃﺲ ﺍﻟﺤﻠﻮﺓ .. ﻻﻧﻮ ﺯﻭﻝ ﻭﺷﻮ ﺷﻴﻦ ﻭﻣﺨﻔﺞ
ﻛﺪﺍ .. ﻟﻜﻦ ﺍﺳﻤﻮ ﺍﻟﺤﻘﻴﻘﻲ ﻋﺒﺪﺍﻟﺒﺎﻗﻲ ﻭﺩﺍﺑﺮﻕ .. ﻣﻦ ﺍﻟﻌﻤﺮﺍﺏ . ﻭﻋﻤﺮﻭ ﻓﻲ
ﺍﻟﺨﻤﺴﺔ ﻭﺧﻤﺴﻴﻦ ﺑﺎﻟﺘﻘﺮﻳﺐ ..
ﺍﻟﻤﻬﻢ ﺑﺎﻣﺒﻲ ﺩﻩ .. ﻗﺎﻝ ﻟﻲ ﺍﺑﺨﻮﺳﺔ ﺍﻫﺎ ﻳﺎ ﺍﺑﺨﻮﺳﺔ ﺍﻧﺎ ﺟﻴﺘﻚ ﻳﺎﺧﻮﻱ ﻋﻠﻰ
ﻣﻮﺍﻋﻴﺪﻱ .. ﻭﻭﻋﺪﻙ ﻟﻲ .. ﺍﻧﺎ ﻗﺖ ﻟﻚ ﺍﻟﻨﺴﻴﻢ ..ﺑﻤﺮﻗﺎ ﻟﻴﻚ ﻣﻦ ﻭﺩ ﻣﻜﺘﻮﻝ
.. ﻭﺍﺳﻠﻤﻚ ﻟﻴﻬﺎ .. ﻭﻳﻬﺪﻱ ﻣﺎﺷﺎﺀ ﺍﻟﻠﻪ ﻗﺎﻋﺪﺓ ﻓﻲ ﺑﻴﺘﻚ .. ﺍﻧﺎ ﻭﻓﻴﺖ ﻟﻚ ﺑﻮﻋﺪﻱ ..
ﻭﺩﺍﻳﺮﻙ ﺗﻮﻓﻲ ﻟﻲ ﺑﻮﻋﺪﻙ ..
ﺩﺣﻴﻦ ﺍﺧﻮﻱ ﺍﻧﺎ ﻭﺍﻟﻠﻪ ﺑﺪﻭﺭ ﺍﻟﺮﺳﺎﻟﺔ ﺍﺧﺘﻚ ﺩﻱ .. ﻭﺍﻧﺖ ﻭﻋﺪﺗﻨﻲ .. ﺍﻥ ﺑﻘﻰ
ﺍﻟﻤﻮﺿﻮﻉ ﻣﻦ ﺩﻣﻚ ﺑﺘﻤﺮﻗﻮ ﻟﻲ ﻣﻮﺻﺢ؟
ﻗﺎﻝ ﻟﻴﻬﻮ ﻭﺍﻟﻠﻪ ﺻﺪﻗﺖ .. ﻭﺍﻧﺎ ﻋﻠﻰ ﺍﻟﺠﺰﻳﻤﺔ ﺍﺣﺴﻦ ﻣﻨﻚ ﻣﺎﻧﻲ ﺩﺍﻳﺮ ﻟﻴﻬﺎ .. ﻋﻼ
ﻋﺎﺩ ﺍﻟﺸﻮﺭﺓ ﺩﻱ ﻣﺎﻫﺎ ﻋﻨﺪﻱ .. ﻣﺎﺩﺍﻡ ﺍﺑﻮﻱ ﺣﻲ .. ﺍﻧﺖ ﺑﺲ ﺍﺧﺪ ﺭﺍﺣﺘﻚ ﻭﺣﻠﻞ
ﺍﻟﺰﺍﺩ .. ﻭﺍﻧﺎ ﺑﺎﺧﺪ ﻟﻚ ﺍﻟﺸﻮﺭﺓ ﻣﻦ ﺍﺑﻮﻱ ..
ﺍﻟﻀﺒﻴﺤﺔ ﻟﺴﻊ ﻣﺎﺟﻬﺰﺕ .. ﻟﻜﻦ ﺍﻟﻨﺴﻴﻢ ﺟﺎﺑﺖ ﺍﻟﻘﻬﻮﺓ ﻭﺟﺎﺕ .. ﺧﺘﺘﻬﺎ ﻗﺪﺍﻡ ﺍﺑﻮﻫﺎ
ﻭﻋﻤﻬﺎ ﺑﺎﻣﺒﻲ .. ﻣﺘﻘﻨﻌﺔ ﺗﺐ ..
ﻭﺍﺏ ﺧﻮﺳﺔ ﺩﺧﻞ ﻋﻠﻰ ﺍﺑﻮﻫﻮ .. ﻗﺎﻝ ﻟﻴﻬﻮ ﺍﺑﻮﻱ ﻓﻲ ﺿﻴﻔﺎﻥ ﺟﻮ ﺑﺮﺓ .. ﻗﻮﻣﺎﻛﺎ
ﺍﺭﺡ ﻋﻠﻴﻬﻢ .. ﻭﻗﺒﺎﻝ ﻣﺎﺗﻤﺸﻲ .. ﻋﺒﺪﺍﻟﺒﺎﻗﻲ ﻭﺩﺍﺑﺮﻕ ﻣﻦ ﺍﻫﻠﻨﺎ ﺍﻟﻌﻤﺮﺍﺏ ﺩﻳﻞ ..
ﻛﺎﻥ ﺑﺘﻌﺮﻓﻮ .. ﻗﺎﻝ ﻟﻴﻬﻮ ﺑﻌﺮﻑ ﻭﺩﺍﺑﺮﻕ .. ﻟﻜﻦ ﻋﺒﺪﺍﻟﺒﺎﻗﻲ ﺩﻩ ﻣﺎﻋﻨﺪﻱ ﻣﻌﺎﻫﻮ
ﻣﻌﺮﻓﺔ ﻣﺎﻟﻮ؟؟
ﻗﺎﻝ ﻟﻴﻬﻮ ﺍﻟﻤﻬﻢ ﻭﻟﺪﻭ ﻳﻬﻮﺩﻩ .. ﻭﻗﺎﻝ ﺑﺪﻭﺭ ﻳﺎﺧﺪ ﺍﻟﺮﺳﺎﻟﺔ .. ﻭﻫﻮ ﻛﺎﻥ ﻣﺎﺧﺪ
ﻣﻨﻲ ﻭﻋﺪ ﻗﺒﺎﻝ ..
ﺩﺍﻳﺮ ﺗﺒﺮ ﻭﻋﺪﻱ ﻭﺗﻤﺮﺭ ﺍﻟﺮﺳﺎﻟﺔ ﻟﻴﻬﻮ .. ﻗﺎﻝ ﻟﻴﻬﻮ ﺍﺻﺒﺮ ﻟﻲ ﺍﻟﻨﻤﺸﻲ ﺍﻗﺎﺑﻠﻮ ..
ﻭﺍﺟﻲ ﺍﺩﻳﻚ ﺭﺍﻱ . ﻟﻜﻦ ﻳﺎﻋﻤﺮ ﻭﻟﺪﻱ .. ﻫﺴﻊ ﺍﺧﺘﻚ ﺩﻱ ﻻﻫﺴﻊ ﺟﺎﻫﻠﺔ ﻭﺍﻣﻬﺎ
ﻛﺒﺮﺕ .. ﻛﺎﻥ ﺳﺎﻗﺎ ﻣﻨﻨﺎ .. ﺗﺎﻧﻲ ﺑﻨﻘﺒﻞ ﻋﻠﻰ ﻭﻳﻦ ؟
ﻗﺎﻝ ﻟﻴﻬﻮ ﺩﻱ ﻣﺎﻫﺎ ﻣﺸﻜﻠﺔ ﻳﺎﺑﺎ .. ﺍﻟﻨﺴﻴﻢ ﺧﻼﺹ ﺑﻘﺖ ﺑﺘﻜﻢ .. ﻭﺍﻟﺤﻴﺎﺓ ﺍﺻﻼ ﻣﺎﺷﺔ
ﻛﺪﻱ .. ﺑﺖ ﺗﻤﺮﻕ ﻣﻦ ﺍﻟﺒﻴﺖ .. ﻭﺑﺖ ﺗﺪﺧﻞ ﺍﻟﺒﻴﺖ .. ﻭﺍﻟﺒﻴﺖ ﺑﻼ ﺑﻨﻮﺕ .. ﺍﺧﻴﺮ ﻣﻨﻮ
ﺍﻟﺘﺎﺑﻮﺕ ..
ﻗﺎﻡ ﻣﺮﻕ ﻣﻌﺎﻫﻮ ﻋﻠﻰ ﺍﻟﻀﻴﻮﻑ ﻭﺍﻟﺮﺍﺟﻞ ﺍﻟﺸﺎﻳﺐ ﺳﻠﻢ ﻋﻠﻰ ﻭﺩ ﺍﺭ ﺍﻟﺰﻳﻦ ..
ﻭﻗﻌﺪ ﻳﺸﻜﺮ ﻓﻲ ﺍﻟﻨﺴﻴﻢ .. ﻭﺣﻴﺎﻫﺎ ﻭﺍﺣﺘﺮﺍﻣﻬﺎ ﻟﻲ ﺯﻭﺟﻬﺎ ﻭﻟﻲ ﺍﻧﺎ ﻭﻟﻲ ﺍﻡ
ﺭﺍﺟﻼ ..
ﻭﻳﺤﻜﻲ ﻭﻳﻌﺎﻳﻦ ﺑﻲ ﻃﺮﻑ ﻋﻴﻨﻮ .. ﻃﺒﻌﺎ ﺍﻟﺮﺍﺟﻞ ﻛﺒﻴﺮ ﻻﻣﻦ ﺿﻬﺮﻭ ﻣﺤﻨﻲ ..
ﻟﻜﻦ ﻣﺮﺗﻮ ﺍﺻﻐﺮ ﻣﻨﻮ ﺷﻮﻳﺔ .. ﺍﺻﻠﻮ ﺍﻟﺰﻭﻝ ﻣﺎﺑﻘﻮﻝ ﺍﻟﺮﺳﺎﻟﺔ ﺑﺘﻬﻢ ..
ﺑﻌﺪ ﺷﺮﺑﻮ ﺍﻟﺠﺒﻨﺔ .. ﻭﺍﻟﺸﻴﺔ ﺭﻳﺤﺘﻬﺎ ﺿﺮﺑﺖ .. ﻭﻋﻄﺮﺍﺑﺘﻬﺎ ﻗﺎﺟﺔ .. ﺍﻟﺸﺎﻳﺐ ﻗﺎﻝ
ﻟﻲ ﻭﻟﺪﻭ ﺍﺑﺨﻮﺳﺔ ﺗﻌﺎﻝ ﻳﺎﻋﻤﺮ ﺩﺍﻳﺮﻙ ..
ﺍﺑﺨﻮﺳﻪ ﻗﺎﻡ ﺟﺎﻫﻮ .. ﻗﺎﻝ ﻟﻴﻬﻮ ﻳﺎﻋﻤﺮ ﻳﺎﻭﻟﺪﻱ ﺍﻟﺮﺍﺟﻞ ﺩﻩ ﻛﺒﻴﺮ ﺗﺐ ﻋﻠﻰ ﺍﺧﺘﻚ ..
ﻭﺍﻧﺎ ﺧﺎﻳﻔﻬﺎ ﺗﺎﺑﺎﻫﻮ .. ﻭﺑﻌﺪﻳﻦ ﺯﻭﻻ" ﺷﻴﻦ ﻣﺎﺑﺘﻘﺎﺑﻞ .. ﻭﺷﻴﻬﻮ .. ﺍﺳﺘﻐﻔﺮ ﺍﻟﻠﻪ
ﺍﻟﻌﻈﻴﻢ ..
ﺍﺏ ﺧﻮﺳﺔ ﻗﺎﻝ ﻟﻴﻪ ﻳﺎﺑﺎ ﺍﻟﻜﺒﺮ ﻣﻮ ﻣﺸﻜﻠﺔ .. ﺍﻧﺖ ﻋﺮﺳﺖ ﺍﻣﻲ ﻭﺍﻧﺖ ﻛﻨﺖ ﺍﻛﺒﺮ
ﻣﻨﻬﺎ ﺑﻲ ﻋﺸﺮﻳﻦ ﺣﻮﻝ .. ﻭﺍﻟﺮﺍﺟﻞ ﻣﺎﺑﻌﻴﺒﻮﻫﻮ ﺑﻲ ﺷﻨﺎﺗﻮ ..
ﺍﻟﺮﺍﺟﻞ ﺑﻌﻴﺒﻮﻫﻮ ﺑﻲ ﺟﺒﺎﻧﺘﻮ ﻭﺑﺨﻠﻮ ﻭﻗﻠﺔ ﺍﺩﺑﻮ .. ﻭﺩﻳﻞ ﻛﻠﻬﻦ ﻓﻲ ﺑﺎﻣﺒﻲ ﻣﺎﻓﻲ
..
ﻗﺎﻝ ﻟﻴﻬﻮ ﺍﻫﺎ ﻛﺎﻥ ﺍﺧﺘﻚ ﻗﺎﻟﺖ ﻣﺎﻫﺎ ﺩﺍﻳﺮﺍﻫﻮ .. ﺑﺘﻘﺪﺭ ﻋﻠﻴﻬﺎ ﺗﺠﺒﺮﻫﺎ؟؟ ﺍﻟﺮﺳﺎﻟﺔ
ﻗﺎﻫﺮﺓ ﻭﻗﺎﺭﺣﺔ .. ﻗﺎﻝ ﻟﻴﻬﻮ ﻭﺍﻟﻠﻪ ﺍﻧﺎ ﺑﻘﺪﺭ ﺍﺟﺒﺮﻫﺎ ..
ﻟﻜﻦ ﺍﻟﻌﺎﻟﻢ ﻗﺎﻝ .. ﺍﻟﺒﺖ ﻛﺎﻥ ﺟﺒﺮﻭﻫﺎ ﻋﻠﻰ ﺍﻟﻌﺮﺱ .. ﺑﻜﻮﻥ ﺍﻟﻌﻘﺪ ﺑﺎﻃﻞ .. ﻭﺑﻜﻮﻥ
ﺣﺮﺍﻡ ﺫﺍﺗﻮ ..
‏( ﺑﺎﻟﻠﻪ ﻳﺎﺟﻤﺎﻋﺔ ﺍﺑﺨﻮﺳﺔ ﺩﻩ ﻣﻮﺟﻮﺩ ﻓﻲ ﺍﻟﺰﻣﻦ ﺩﺍﻙ؟؟ .. ﻳﺎ ﺳﺒﺤﺎﻥ ﺍﻟﻠﻪ ..
ﻏﺎﻳﺘﻮ ﺯﻱ ﻣﺎﻗﺎﻝ ﺍﻟﺮﺳﻮﻝ .. ﻋﻠﻴﻪ ﺍﻟﺼﻼﺓ ﻭﺍﻟﺴﻼﻡ .. ﻻﺗﺨﻠﻮ ﺍﻻﺭﺽ ﻣﻦ ﻗﺎﺋﻢ
ﻟﻠﻪ ﺑﺤﺠﺔ .. ﺍﻣﺎ ﻇﺎﻫﺮﺍ" ﺟﻠﻴﺎ" ﻭﺍﻣﺎ ﺑﺎﻃﻨﺎ" ﺧﻔﻴﺎ" .. ﻛﺪﻱ ﺍﻟﻨﺸﻮﻑ ﺍﻟﺮﺳﺎﻟﺔ
ﺍﻟﺸﺎﻓﻌﺔ ﺍﻟﻘﺎﺭﺣﺔ ﺩﻱ ﺑﺘﻘﻮﻝ ﺷﻨﻮ؟ ..
ﺍﻟﻰ ﺍﻟﻠﻘﺎﺀ