ﺍﻟﺘﺎﻳﺔ ﺷﺎﻟﺖ ﺍﻟﻘﻄﻌﺔ ﻭﺟﺮﺕ ﺩﺧﻠﺖ ﺭﺍﺟﻌﺔ .. ﺩﺧﻠﺖ ﻋﻠﻰ ﻭﺩ ﺩﺍﺭ ﺍﻟﺰﻳﻦ ﺭﺍﻗﺪ ﻋﻨﺪﻭ ﻭﺟﻊ ﺭﺍﺱ .. ﻭﺩ ﺩﺍﺭ ﺍﻟﺰﻳﻦ ﻭﺟﻊ ﺍﻟﺮﺍﺱ ﻣﺎﺳﻜﻮ ﻟﻴﻬﻮ ﺍﻛﺘﺮ ﻣﻦ 21 ﻳﻮﻡ ﻣﺎﻓﻜﺎﻫﻮ .. ﻣﺎﺧﻠﻮ ﻟﻴﻬﻮ ﺣﺠﺎﻣﺔ .. ﻭﺯﻳﺖ ﺳﺴﻤﺴﻢ ﻭﻟﺘﺨﻮﻫﻮ ﺑﺎﻟﺤﻨﺔ .. ﻭﻓﺼﺪﻭﻫﻮ .. ﻛﻠﻮ ﻣﺎﻧﻔﻊ ﻣﻌﺎﻫﻮ .. ﺍﻧﺎ ﻳﺘﺨﻴﻠﻲ ﺍﻟﻀﻐﻮﻃﺎﺕ ﻭﺍﻟﻬﻢ ﻣﻦ ﻃﺸﺔ ﺍﻟﻨﺴﻴﻢ ..
ﺩﺧﻠﺖ ﻋﻠﻴﻬﻮ ﺍﻟﺘﺎﻳﺔ .. ﻗﺎﻟﺖ ﻟﻴﻬﻮ ﺍﺳﻤﻊ ﻳﺎ ﺍﻟﺤﺎﺝ . ﺍﻧﺎ ﻟﻘﻴﺖ ﻃﺮﺣﺔ ﺍﻟﻨﺴﻴﻢ .. ﻭﺍﻗﻌﺔ ﺑﺮﺭﺭﺓ ﻓﻲ ﺍﻟﺴﻬﻠﺔ .. ﺑﺮﺓ ﻗﺪﺍﻡ ﺧﺸﻢ ﺍﻟﺤﻮﺵ .. ﻋﺎﻳﺖ ﺍﻫﺎ ﺍﻫﺎ .. ﻟﻘﻴﺘﺎ ﻣﺼﺮﻭﺭﺓ ﻓﻲ ﻃﺮﻓﺎ .. ﻃﻠﻘﺘﻬﺎ ﻟﻘﻴﺖ ﻓﻴﻬﺎ ﺍﻟﻨﺼﻴﺒﺔ ﺩﻱ .. ﻫﺎﻙ ﺍﻫﺎ .. ﺍﻗﺮﺍﻫﺎ ﺷﻮﻑ ﻟﻲ ﺍﻟﻔﻴﻬﺎ ﺷﻨﻮ؟
ﻣﺴﻜﻬﺎ ﻭﺩ ﺩﺍﺭ ﺍﻟﺰﻳﻦ .. ﺍﻟﺰﻭﻝ ﻗﺎﺭﻱ ﺯﻣﺎﻥ ﻓﻲ ﺍﻟﺨﻠﻮﺓ ﺍﻟﻘﺮﺍﻧﻴﺔ .. ﺯﻣﻦ ﺃﺏ ﺟﺰﻡ .. ﻭﺩﺍﺭ ﺍﻟﺰﻳﻦ ﻣﺴﻚ ﻣﻨﻬﺎ ﻗﻄﻌﺔ ﺍﻟﺠﻠﺪ ﻭﻫﻮ ﻣﺴﺘﻐﺮﺏ ﻭﻣﻨﺪﻫﺶ ﻻﻣﻦ ﻣﻄﻴﺮ ﻋﻴﻮﻧﻮ ﻭﺻﺪﺍﻋﻮ ﻓﻜﻪ .. ﻗﺎﻝ ﻟﻴﻬﺎ ﺟﻴﺒﻴﻬﺎ ﺟﺎﻱ .. ﻭﺑﻘﻰ ﻳﻘﺮﺍ ﻗﺎﻝ . ﻣﻜﺘﻮﺏ . ( ﺍﻧﺎ ﺍﻟﻨﺴﻴﻢ .. ﻃﻴﺒﺔ .. ﻭﺟﺎﻳﺎﻛﻢ ﻗﺮﻳﺐ ) .
ﻗﺎﻟﺖ ﻟﻴﻬﻮ ﻟﻜﻦ ﻳﺎ ﺍﺑﻮ ﺍﻟﻨﺴﻴﻢ ﻛﻴﻔﻦ ﻛﺪﻱ .. ﺍﻟﻨﺴﻴﻢ ﺷﻨﻮ ﺧﺒﺮﺍ ﺑﺎﻟﻜﺘﺎﺑﺔ .. ﻗﺎﻝ ﻟﻴﻬﺎ ﻳﺎ ﺍﻟﺘﺎﻳﺔ ﺧﻠﻴﻚ ﺯﻭﻟﻪ ﻓﺎﻫﻤﺔ ﺷﻮﻳﺔ ﻛﺪﻱ .. ﻭﺭﻛﺰﻱ . ﺑﻜﻮﻥ ﻓﻲ ﺯﻭﻝ ﻛﺘﺒﻠﻬﺎ .. ﻫﻲ ﻗﺎﻟﺘﻠﻮ ﺍﻛﺘﺐ .. ﻭﻛﺘﺐ .. ﺍﻟﺘﺎﻳﺔ ﻗﺎﻟﺖ ﻟﻴﻬﻮ ﺍﻳﻮﺍﺍﺍ ﻛﺎﻥ ﻛﺪﻱ ﺧﻼﺱ .
ﻟﻜﻦ ﻣﺎ ﻛﺘﺒﺖ ﻟﻚ ﻗﺎﻟﺘﻠﻚ ﻫﻲ ﻭﻳﻦ ﻫﺴﻊ؟ .. ﻗﺎﻟﻬﺎ ﻻﻻ ﺑﺲ ﻳﺎﻫﻮﺩﺍ ﺍﻟﻤﻜﺘﻮﺏ .. ﻭﻛﺖ ﻃﻴﺒﺔ ﻣﺎﻓﻲ ﻋﻮﺟﺔ ..
ﻭﻣﺮﺕ ﺍﻻﻳﺎﻡ .. ﻭﺍﻟﻐﺮﻳﺒﺔ ﻓﻲ ﺍﻻﻣﺮ .. ﺍﻭﻻﺩ ﻣﺨﺘﺎﺭ ﺑﻘﻮ ﻳﻌﺴﻜﺮﻭ ﻓﻲ ﺩﻭﺑﺎ .. ﻭﺣﺘﻰ ﺑﻌﺪ ﻋﺮﻓﻮ ﺧﺒﺮ ﺍﻟﺮﺳﺎﻟﺔ ﻣﺎﻭﻗﻔﻮ ﻣﻦ ﺍﻟﻔﺘﺎﺷﺔ .. ﻗﺎﻡ ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻬﻢ .. ﻳﺎﺟﻤﺎﻋﺔ ﺍﺭﺟﻌﻮ ﻋﻠﻰ ﺍﻟﺒﻴﻮﺕ .. ﺧﻼﺹ ﻛﻔﻰ ﻣﻦ ﺍﻟﺤﻮﺍﻣﺔ ﻭﺍﻟﻄﺸﻴﺶ ..
ﻋﻄﻴﺔ ﻗﺎﻟﻠﻮ ﻧﺤﻦ ﻭﻋﺪﻧﺎ ﺳﺖ ﺍﻟﺠﻴﻞ ﺑﺖ ﻣﺨﺘﺎﺭ .. ﻣﺎﻧﺮﺟﻊ ﺍﻻ ﻣﻌﺎﻧﺎ ﺍﻟﻨﺴﻴﻢ .. ﻭﻣﺎﺭﺟﻌﻮ ﺍﻟﺒﻴﻮﺕ ﺍﻻ ﻟﻤﻦ ﺟﺎ ﺳﺖ ﺍﻟﺠﻴﻞ ﻭﻗﺎﻟﺖ ﻟﻴﻬﻢ .. ﺧﻼﺹ .. ﻛﻔﻴﺘﻮ ﻭﻭﻓﻴﺘﻮ ﺩﺍﻋﻴﺎﻛﻢ ﻋﻠﻲ ﺍﻟﺒﻴﻮﺕ ..
ﺍﻟﺤﺎﺻﻞ ﻓﻲ ﺍﻟﻘﺼﺮ .. ﻛﻞ ﻳﻮﻡ ﺳﺒﺖ ﺍﻟﻤﻠﻚ ﺑﺴﺄﻝ ﻭﺩ ﺩﺍﺭ ﺍﻟﺰﻳﻦ ﻣﻦ ﺧﺒﺮ ﺍﻟﻨﺴﻴﻢ .. ﻭﺍﻻﻣﻴﺮ ﺭﺍﺟﻴﻬﺎ ﻭﻣﺘﻌﻠﻖ ﺑﻴﻬﺎ ﺷﺪﻳﺪ ﻻﻣﻦ ﻣﺮﺽ .. ﻭﻛﻞ ﻳﻮﻡ ﻳﺠﻲ ﻳﺒﻜﻲ ﻻﺑﻮﻫﻮ ﺍﻧﺎ ﺩﺍﻳﺮ ﺍﻟﻨﺴﻴﻢ .. ﻭﺍﻟﻤﻠﻚ ﻣﺎﻗﺎﺩﺭ ﻳﻜﻠﻒ ﺍﻱ ﻗﻮﺓ ﺑﺎﻟﺒﺤﺚ .. ﻻﻧﻮ ﻋﻨﺪﻭ ﻣﺸﺎﻛﻞ ﺑﺘﺎﻋﺔ ﻣﻌﺎﺭﺿﺔ .. ﻭﺑﻮﺍﺩﺭ ﺍﻧﻔﺼﺎﻻﺕ ﻣﻦ ﺟﻴﻬﺔ ﻣﻜﻮﻙ ﺍﻟﻌﺒﺪﻻﺏ .. ﻻﻧﻬﻢ ﻣﺎﻛﺎﻧﻮ ﺭﺍﺿﻴﻦ ﺑﺎﻟﻮﺿﻊ ﺍﻟﺤﺎﺻﻞ ﻓﻲ ﺍﻟﺒﻠﺪ . ﻭﺿﻌﻒ ﺍﻟﻤﻤﻠﻜﺔ .. ﻭﺍﻟﻈﻠﻢ ﺍﻟﺤﺎﺻﻞ ﻋﻠﻰ ﺍﻟﻌﺒﺎﺩ .. ﻭﺍﻟﻤﻠﻚ ﻣﺴﻴﺮ ﻣﻦ ﺍﻟﻔﻮﻧﺞ . ﻭﺷﺨﺼﻴﺘﻮ ﺿﻌﻴﻔﺔ .. ﻭﺍﻟﺘﺤﺎﻟﻒ ﺍﻟﻜﺎﻥ ﺑﺪﺕ ﺑﻴﻬﻮ ﺍﻟﺴﻠﻄﻨﺔ ﺑﻴﻦ ﺍﻟﻌﺒﺪﻻﺏ ﻭﺍﻟﻔﻮﻧﺞ ﺑﺪﺃ ﻳﺘﻔﻜﻚ .. ﻭﻇﻬﺮﺕ ﺍﻟﺪﺳﺎﻳﺲ .. ﻭﻓﻲ ﺍﻟﻨﻬﺎﻳﺔ ﻃﺒﻌﺎ ﺍﻟﻤﺸﺎﻛﻞ ﺍﻧﺘﻬﺖ ﺑﺎﻻﻧﻔﺼﺎﻝ .. ﻭﺍﻟﺘﻤﺮﺩ ﻓﻲ ﻣﻌﺮﻛﺔ ﻛﺮﻛﻮﺝ ﺍﻟﺘﻲ ﻗﺘﻞ ﻓﻴﻬﺎ ﺍﻟﻤﻚ ﻋﺠﻴﺐ ﺍﻟﻤﻨﺠﻠﻚ .. ﻭﺩﻱ ﻃﺒﻌﺎ " ﻣﺸﺎﻛﻞ ﺳﻴﺎﺳﻴﺔ .. ﻣﺮﺕ ﻋﻠﻰ ﺍﻟﺴﻠﻄﻨﻮ ﻭﻛﺎﻧﺖ ﻓﺘﻦ ﻭﻣﻌﺎﺭﻙ ﻭﻗﺘﺎﻝ ﺍﻧﺘﻬﺖ ﻣﻦ ﻣﻦ ﺍﻟﺴﻠﻄﻦ ﺍﻟﺰﺭﻗﺎﺀ .. ﻣﺎﺩﺍﻳﺮﻳﻦ ﻧﺘﻌﺮﺽ ﻟﻴﻬﺎ ..
ﻟﻜﻦ ﺍﻟﻘﺼﺔ ﺍﻟﻨﺤﻦ ﺑﻨﺤﻜﻲ ﻓﻴﻬﺎ .. ﺩﻱ ﻋﺒﺎﺭﺓ ﻋﻦ ﻣﻠﻤﺢ ﻣﻦ ﻣﻼﻣﺢ ﺍﻟﻈﻠﻢ ﺍﻟﺤﺎﺻﻞ ﻣﻦ ﺍﻟﺴﻠﻄﺔ ﻋﻠﻰ ﺍﻟﺮﻋﻴﺔ .. ﻭﺍﻟﻀﻌﻒ ﻭﺍﻟﺰﻋﺰﻋﺔ ﺍﻟﺤﺎﺻﻠﺔ ﻓﻲ ﺍﻟﺴﻠﻄﺔ .. ﺣﺘﻰ ﺍﻟﻤﻠﻚ ﺧﺎﻳﻒ ﻣﻦ ﻗﺼﺔ ﻭﻟﺪﻭ ﻣﻊ ﺑﺖ ﻭﺩ ﺩﺍﺭ ﺍﻟﺰﻳﻦ ﺗﻨﺘﺸﺮ ﺑﻴﻦ ﺍﻟﺸﻴﻮﺥ ﻓﻲ ﻣﺠﻠﺲ ﺍﻟﺸﻮﺭﻯ .. ﻭﺗﺴﺒﺐ ﻟﻴﻬﻮ ﻣﺸﻜﻠﺔ .. ﻻﻧﻮ ﻭﺩ ﺩﺍﺭ ﺍﻟﺰﻳﻦ ﻋﻨﺪﻭ ﺣﻈﻮﺓ ﻭﻛﻠﻤﺔ ﻓﻲ ﺍﻟﻤﺠﻠﺲ .. ﺑﺲ ﻭﺩ ﺩﺍﺭ ﺍﻟﺰﻳﻦ ﻋﺎﻣﻞ ﺣﺴﺎﺏ ﻟﻠﻤﻠﻚ .. ﻻﻧﻮ ﻋﻨﺪﻭ ﻟﻴﻬﻮ ﻭﻻﺀ ﻣﻄﻠﻖ .. ﻭﺛﻘﺔ ..
ﺍﻫﺎ ﻳﻮﻡ ﺍﻟﻤﻠﻚ ﺳﺄﻝ ﻭﺩ ﺩﺍﺭ ﺍﻟﺰﻳﻦ .. ﻋﻦ ﺧﺒﺮ ﺍﻟﻨﺴﻴﻢ .. ﻗﺎﻝ ﻟﻴﻬﻮ ﻭﺍﻟﻠﻪ ﻳﺎﻣﻮﻻﻱ ﺟﺎﺗﻨﺎ ﺭﺳﺎﻟﺔ ﻓﻴﻬﺎ ﻭﻓﻴﻬﺎ .. ﺍﻟﻤﻠﻚ ﻓﺮﺡ ﻭﺍﺳﺘﺒﺸﺮ ﺧﻴﺮ ..
ﻭﻗﺎﻝ ﻟﻴﻬﻮ ﺧﻼﺹ ﻛﺎﻥ ﻛﺪﻱ ﺍﻟﻠﻴﻠﺔ .. ﻧﻜﻠﻢ ﺍﻻﻣﻴﺮ ﻳﻔﺮﺡ .. ﻭﻳﺸﻔﻰ ﻣﻦ ﺍﻟﻤﺮﺽ ..
ﻭﻛﺎﻥ ﺍﻻﻣﻴﺮ ﻗﺒﻞ ﻓﺘﺮﺓ ﻛﻠﻢ ﺍﻟﻤﻠﻚ .. ﻗﺎﻝ ﻟﻴﻬﻮ ﺍﻭﻻﺩ ﻣﺨﺘﺎﺭ .. ﻗﺎﻟﻮ ﻟﻲ ﺗﺎﻧﻲ ﻣﺎﺑﻨﺪﻳﻚ ﺍﻟﻨﺴﻴﻢ .. ﻭﺍﻟﻤﻠﻚ ﻗﺎﻝ ﻟﻴﻬﻮ ﻛﺪﻱ ﺍﻟﺘﺘﻠﻘﻲ ﺍﻟﻨﺴﻴﻢ .. ﺗﺎﻧﻲ ﻭﻻﺩ ﻣﺨﺘﺎﺭ ﺍﻧﺎ ﺑﻌﺮﻑ ﺍﻟﺒﺴﻮﻳﻬﻮ ﻟﻴﻬﻢ ..
ﺍﻫﺎ ﻫﻨﺎ .. ﺍﻟﻤﻠﻚ ﻗﺎﻝ ﻟﻲ ﻭﺩ ﺩﺍﺭ ﺍﻟﺰﻳﻦ .. ﺍﻧﺖ ﻳﺎﻭﺩ ﺩﺍﺭ ﺍﻟﺰﻳﻦ .. ﺭﺿﻴﺎﻥ ﺍﻻﻣﻴﺮ ﻳﺎﺧﺪ ﺑﺘﻚ؟ .. ﻭﻭﺍﻋﺪﻧﺎ ﺑﻲ ﻛﺪﻱ ﺻﺢ؟
ﻗﺎﻝ ﻟﻴﻬﻮ ﺣﺼﻞ ﻳﺎﻣﻮﻻﻱ .. ﻭﺍﻟﻠﻪ ﻣﻦ ﺗﺠﻲ ﺍﻟﻨﺴﻴﻢ ﻋﻠﻰ ﻭﻋﺪﻱ ﻃﻮﺍﻟﻲ ﻟﻼﻣﻴﺮ .. ﻗﺎﻝ ﻟﻴﻬﻮ ﺍﻧﺎ ﺳﻤﻌﺖ ﻗﺎﻟﻮ ﺍﺧﻮﺍﻝ ﺍﻟﺒﺖ ﻣﺎﻫﻢ ﺭﺿﻴﺎﻧﻴﻦ ﺑﺎﻟﻜﻼﻡ ﺩﻩ ..
ﻗﺎﻝ ﻟﻴﻬﻮ ﻳﺎﻣﻮﻻﻱ ﺩﻳﻞ ﻣﻘﺪﻭﺭ ﻋﻠﻴﻬﻢ .. ﺍﻟﻤﻠﻚ ﻗﺎﻝ ﻟﻴﻬﻮ ﺍﻳﻮﺓ ﻋﻠﻴﻚ ﺍﻟﻠﻪ ﺍﻟﻨﺎﺱ ﺩﻳﻞ ﺍﺩﻫﻢ ﺭﺍﺳﻬﻢ .. ﻻﻧﻮ ﻛﺎﻥ ﻋﺎﻛﺴﻮﻧﻲ .. ﺍﻧﺎ ﺑﻘﺼﻬﻢ ﻭﺍﺣﺪ ﻭﺍﺣﺪ .. ﻭﺍﻧﺎ ﻣﺎﻋﻨﺪﻱ ﺍﻋﺰ ﻣﻦ ﻭﻟﺪﻱ .. ﻭﻧﺎﺳﻚ ﺩﻳﻞ ﻣﺎﻫﻢ ﻏﺎﻟﺒﻴﻨﻲ .. ﻟﻜﻦ ﻣﺎﻧﻲ ﺩﺍﻳﺮ ﺍﺟﻴﺐ ﻟﻲ ﻛﺘﺮﺓ ﻣﺸﺎﻛﻞ ﻭﺣﺴﺎﺳﻴﺎﺕ ﻣﻊ ﺍﻟﺒﻄﺎﺣﻴﻦ .. ﺑﻌﺪ ﻣﺸﺎﻛﻞ ﺍﻟﻘﻮﺍﺳﻤﺔ ﻭﺍﻟﻨﻮﺭﺍﺏ . ﻭﺍﻧﺖ ﻋﺎﺭﻑ ﺍﻟﺸﻴﻮﺥ ﻭﺍﻟﻤﻜﻮﻙ ﺑﻲ ﺟﺎﻱ ﻋﺎﻣﻠﻴﻦ ﺑﻠﺒﻠﺔ ﻻ ﻟﻴﻬﺎ ﺍﻭﻝ ﻭﻻ ﻟﻴﻬﺎ ﺍﺧﺮ .. ﻣﺎ ﺩﺍﻳﺮ ﺍﻻﻣﻮﺭ ﺗﻜﺘﺮ ﺑﻲ ﺳﺒﺐ ﺑﺘﻚ ..
ﻭﻣﺮﺕ ﺍﻻﻳﺎﻡ ﻭﻃﺎﻝ ﺍﻻﻧﺘﻈﺎﺭ ﻟﻠﻨﺴﻴﻢ ﺗﺠﻲ .. ﻭﻣﺎﺟﺎﺕ ..
.. ﺑﻌﺪ ﺗﻼﺕ ﺷﻬﻮﺭ ﻭﻛﻢ ﻳﻮﻡ ﻣﻦ ﻏﻴﺎﺏ ﺍﻟﻨﺴﻴﻢ .. ﺣﺼﻠﺖ ﺣﻜﺎﻳﺔ ﺍﻏﺮﺏ ﻣﻦ ﺍﻟﺨﻴﺎﻝ ..
ﻭﺩ ﺩﺍﺭ ﺍﻟﺰﻳﻦ ﻗﺎﻡ ﺍﻟﺼﺒﺎﺡ ﺑﺪﺭﻱ .. ﻟﻘﻰ ﻓﻲ ﺯﻭﻝ ﺭﺍﻗﺪ ﻭﻣﺘﻐﻄﻰ . ﻓﻮﻕ ﻋﻨﻘﺮﻳﺐ ﺍﻟﻨﺴﻴﻢ .. ﻣﺸﻰ ﻋﻠﻴﻬﻮ ﻟﻘﻰ ﺷﺒﻂ ﺍﻟﻨﺴﻴﻢ ﺍﻟﻤﺎﺑﻐﺒﺎﻫﻮ ﻣﻤﻠﺺ ﻗﺪﺍﻡ ﺍﻟﻌﻨﻘﺮﻳﺐ .. ﻳﺎﺭﺑﻲ ﺩﻱ ﺍﻟﻨﺴﻴﻢ؟؟ ﻭﺍﻟﺠﺎﺑﺎ ﻣﻨﻮ؟ ﻭﺟﺎﺕ ﻣﺘﻴﻦ؟ ..
ﺩﻧﻘﺮ ﻛﺸﻒ ﺍﻟﺘﻮﺏ ﻣﻦ ﻭﺷﻬﺎ ﻟﻘﺎﻫﺎ ﺩﻱ ﺍﻟﻨﺴﻴﻢ ﺭﺍﻗﺪﺓ .. ﻧﺎﻳﻤﺔ ﻛـﻨﻮ ﻣﺎﻛﺎﻧﺖ ﻣﺎﻓﻴﺸﺔ .. ﻭﺑﻲ ﻧﻔﺲ ﻫﺪﻭﻣﺎ ﺍﻻﺗﻔﻘﺪﺕ ﺑﻴﻬﻦ ..
ﻗﺎﻡ ﻛﻮﺭﻙ ﻟﻠﺘﺎﻳﺔ .. ﻳﺎ ﺍﻟﺘﺎﻳﺔ ﻗﻮﻣﻲ .. ﺍﻟﻨﺴﻴﻢ ﺟﺎﺕ .. ﺍﻟﺘﺎﻳﺔ ﻧﻄﺖ ﻣﻦ ﺍﻟﻨﻮﻡ ﺯﻱ ﺍﻟﻀﺮﺑﺘﻬﺎ ﻛﻬﺮﺑﺎ ..
ﺍﺻﻼ ﻫﻲ ﻟﻴﻬﺎ ﺗﻼﺗﺔ ﺷﻬﻮﺭ ﻧﻮﻣﻬﺎ ﺧﺰﺍﺭ .. ﻭﻣﺎ ﺣﺼﻞ ﻧﺎﻣﺖ ﻣﻠﺖ ﻋﻴﻨﻬﺎ ﻓﻲ ﺍﻟﺮﺍﺣﺔ .. ﺍﻟﻠﻪ ﻳﺠﺎﺯﻱ ﺍﻟﻜﺎﻥ ﺍﻟﺴﺒﺐ .. ﺍﻟﻜﻼﻡ ﺩﻩ ﻛﺎﻥ ﻗﺒﻞ ﺍﻟﺸﺮﻗﺔ ﺑﺸﻮﻳﺔ .. ﺍﻟﺘﺎﻳﺔ ﻭﻛﺖ ﻋﺎﻳﻨﺖ ﻟﻠﻨﺴﻴﻢ ﻧﺎﻳﻤﺔ ﻭﺷﻬﺎ ﻳﻀﺎﻭﻱ ﻣﻊ ﺑﺰﻭﻍ ﺍﻟﺼﺒﺎﺡ ..
ﻓﻜﺘﻬﺎ ﻟﻴﻚ ﺯﻏﺮﻭﺩﺓ ﻛﺪﺍ ﺯﻱ ﺻﻔﺎﺭﺓ ﺍﻟﻨﺠﺪﺓ .. ﺍﻟﺤﻠﺔ ﺩﻱ ﻛﻠﻬﺎ ﻭﻗﻔﺖ ﻋﻠﻰ ﺣﻴﻼ .. ﺍﻟﻨﺎﻳﻢ ﻗﺎﻡ ﻣﻦ ﻧﻮﻣﻮ .. ﻭﺍﻟﺪﺍﻳﺮ ﻳﺴﺮﺡ ﺑﻲ ﺑﻬﺎﻳﻤﻮ ﺭﺟﻊ ..
ﺍﻟﻨﺴﻴﻢ ﺻﺤﺖ ﺗﺘﻤﻐﻰ ﻭﺗﺘﻄﻠﻖ .. ﻭﺗﺘﺒﺴﻢ ﺯﻱ ﺍﻟﻤﺠﻨﻮﻧﺔ .. ﻭﺗﺘﻠﻔﺖ ﻳﻤﻴﻦ ﻭﺷﻤﺎﻝ .. ﺍﻭﻝ ﻣﻦ ﻋﻴﻨﻬﺎ ﻭﻗﻌﺖ ﻓﻮﻕ ﺍﻣﻬﺎ ﻓﻘﻌﺘﻬﺎ ﺑﻜﻴﺔ .. ﻭﺟﺎﺕ ﻋﻠﻰ ﺍﻣﻬﺎ ﻭﻗﻠﺪﺗﻬﺎ ﻭﺗﺒﻜﻲ .. ﻭﻣﺴﻜﺖ ﺍﺑﻮﻫﺎ ﺗﺴﻠﻢ ﻋﻠﻴﻬﻮ .. ﻭﺷﻬﺎ ﻣﻠﻴﺎﺕ ﺑﺎﻟﺪﻣﻮﻉ .. ﻻﻣﻦ ﻛﺘﻔﻮ ﺍﺗﺒﻠﻞ ﻣﻦ ﺩﻣﻮﻉ ﺍﻟﻨﺴﻴﻢ .. ﺑﻜﺎ ﺷﺪﻳﺪ ﺧﻼﺹ ..
ﺍﻣﻬﺎ ﻗﺎﻟﺖ ﻟﻴﻬﺎ ﻳﺎ ﺍﻟﻨﺴﻴﻢ ﺍﻧﺘﻲ ﻛﻨﺘﻲ ﻭﻳﻦ .. ؟
ﻗﺎﻟﺖ ﻟﻴﻬﺎ .. ﺍﻧﺎ ﺧﺎﺑﺮﺓ؟؟ .. ﻗﺎﻟﺖ ﻟﻴﻬﺎ ﺗﻜﻠﻲ ﻳﺎ ﺑﺘﻲ ﻋﻠﻰ ﺍﻟﻠﻪ .. ﻛﻴﻔﻦ ﻣﺎﺑﺘﻌﺮﻓﻲ ؟؟
ﻛﺪﻱ ﻗﻮﻟﻲ ﻛﻼﻣﺎ " ﺍﺧﺮ .. ﻭﺟﺎﺕ ﺍﻣﻬﺎ ﻗﻌﺪﺕ ﺟﻨﺒﻬﺎ ﻓﻮﻕ ﺍﻟﻌﻨﻘﺮﻳﺐ .. ﻭﺍﺑﻮﻫﺎ ﻗﻌﺪ ﺟﻨﺒﻬﺎ ﺑﺎﻟﺠﻨﺒﺔ ﺍﻟﺘﺎﻧﻴﺔ .. ﻭﺑﺴﺄﻟﻮ ﻓﻴﻬﺎ ﻭﻫﻲ ﻣﺎ ﺩﺍﻳﺮﺓ ﺗﺪﻱ ﺍﻗﻮﺍﻝ .. ﺍﻣﻬﺎ ﻗﺎﻟﺖ ﻟﻴﻬﺎ ﺍﻧﺘﻲ ﻣﺎﺭﺳﻠﺘﻲ ﻟﻴﻨﺎ ﻣﻜﺘﻮﺏ .. ﻭﻗﻠﺘﻲ ﺍﻧﺎ ﻃﻴﺒﺔ ﻭﺟﺎﻳﺔ ؟
ﻗﺎﻟﺖ ﻟﻴﻬﺎ ﻳﻌﻤﻴﻨﻲ ﻳﻄﺮﺷﻨﻲ .. ﺍﻧﺎ ﻛﻤﺎﻥ ﺑﻌﺮﻑ ﺍﻛﺘﺐ ؟
ﺍﺑﻮﻫﺎ ﻗﺎﻝ ﻟﻴﻬﺎ ﻳﻌﻨﻲ ﺍﻟﻤﻜﺘﻮﺏ ﺍﻧﺘﻲ ﻣﺎﻙ ﻋﺎﺭﻓﺔ ﻋﻨﻪ ﺷﻲ؟ ﻗﺎﻟﺖ ﻟﻴﻬﻮ ﺿﻤﺔ .. ﻳﻌﻨﻲ ﺍﺑﺪﺍ " .. ﺍﻻﺑﻮ ﻭﺍﻻﻡ ﺍﻻﺗﻨﻴﻦ ﺍﺗﺤﻴﺮﻭ ﻓﻲ ﻗﺼﺔ ﺍﻟﺒﺖ ﺍﻟﻜﺎﻧﺖ ﻏﺎﻳﺒﺔ .. ﻭﺟﺎﺕ ﻣﺎﻋﺎﺭﻓﺔ ﻛﺎﻧﺖ ﻭﻳﻦ .. ؟ ﻭﻻ ﻣﻲ ﺩﺍﻳﺮﺓ ﺗﺘﻜﻠﻢ ﻣﻮ ﻣﻌﺮﻭﻑ .. ﺍﺑﻮﻫﺎ ﻗﺎﻝ ﻟﻴﻬﺎ ﺍﺳﻤﻌﻲ ﻳﺎ ﺍﻟﻨﺴﻴﻢ ﺍﺣﻜﻲ ﻟﻲ ﺍﻧﺘﻲ ﻣﺮﻗﺘﻲ ﻣﻦ ﻫﻨﺎ ﻛﻴﻒ؟ ..
ﻗﺎﻟﺖ ﻟﻴﻬﻮ ﺟﺎﺗﻨﻲ ﻣﺮﺓ .. ﻭﻗﺎﻟﺖ ﻟﻲ ﺍﻟﺒﺴﻲ ﻳﺎ ﺍﻟﻨﺴﻴﻢ ﻭﺍﻗﻔﻠﻲ ﺍﻟﺒﺎﺏ .. ﻭﺗﻌﺎﻟﻲ ﺍﻣﻚ ﺗﻌﺒﺎﻧﺔ ﺭﺍﺟﻴﺎﻙ .. ﻣﺮﻗﺖ ﻣﻌﺎﻫﺎ ﺷﻔﻘﺎﻧﺔ .. ﻧﺰﻟﺖ ﺑﻲ ﺍﻟﺨﻮﺭ ﺍﻟﺒﻮﺭﺍﻧﺎ ﺩﻩ .. ﻫﻨﺎﻙ ﻟﻘﻴﺖ ﻣﺮﺗﻴﻦ ﻭﺭﺍﺟﻠﻴﻦ .. ﺭﺍﻛﺒﻴﻦ .. ﻧﺰﻟﻮ ﻛﺘﻔﻮﻧﻲ ﻭﺷﺎﻟﻮﻧﻲ .. ﻭﺭﺑﻄﻮﻟﻲ ﻋﻴﻮﻧﻲ .. ﻭﺣﺸﻜﻮ ﻟﻲ ﺍﻟﺘﻮﺏ ﻓﻲ ﺧﺸﻤﻲ .. ﻻﻣﻦ ﻏﻠﺒﻨﻲ ﺍﺷﻴﻞ ﻧﻔﺴﻲ .. ﻭﺍﺣﺪ ﻓﻴﻬﻢ ﺣﺴﻮﻭ ﻏﻠﻴﻴﻴﺪ .. ﻗﺎﻝ ﻟﻲ ﻛﺎﻥ ﻛﻮﺭﻛﺘﻲ ﺑﻨﻘﺪ ﺑﻄﻨﻚ ﺑﺎﻟﺨﻮﺳﺔ ( ﺍﻟﺴﻜﻴﻦ ) .. ﻭﻣﺸﻮ ﺑﻲ ﻣﺸﻲ ﻛﺘﻴﺮ ﺧﻼﺱ ,, ﻗﻄﻌﻮ ﺑﻲ ﻭﺩﻳﺎﻥ ﻭﺣﺠﺮ . ﻭﺳﺎﻣﻌﺔ ﺍﻟﻜﺸﺘﺔ ﻣﻊ ﻛﺮﻋﻲ ﺍﻟﺰﻭﺍﻣﻞ .. ﻻﻣﻦ ﺩﺧﻠﻮﻧﻲ ﻓﺮﻳﻖ . ﺳﺎﻣﻌﻪ ﻓﻴﻬﻮ ﺍﻟﻤﻌﺰﺓ ﻭﺍﻟﻀﺎﻥ .. ﻓﻲ ﺣﺘﺔ ﻣﺎﺑﻌﺮﻓﻬﺎ ﺷﻨﻮ ﻭﻭﻳﻦ ؟؟ .. ﻭﻃﻠﻘﻮ ﻣﻨﻲ ﺍﻟﻜﺘﺎﻑ .. ﻭﻓﻜﻮ ﻟﻲ ﻋﻴﻮﻧﻲ .. ﻟﻘﻴﺖ ﺭﻭﺣﻲ ﻓﻲ ﺑﻴﺖ ﻣﺮﺍﺓ ﻣﻌﺎﻫﺎ ﺑﺘﻴﻦ ﻓﺘﻮﺍﺕ .. ﻓﻲ ﻓﺠﺔ ﻓﻴﻬﺎ ﻣﻴﻌﺔ ﻭﺧﻼ .. ﻭﻻ ﻧﻌﺎﺭﻓﺔ ﻳﻤﻴﻦ ﻻﻧﻌﺎﺭﻓﺔ ﺷﻤﺎﻝ ..
ﻗﻠﺖ ﻟﻠﻤﺮﺍﺓ ﺍﻧﺘﻲ ﻣﻨﻮ؟ ﻭﺍﻟﺠﺎﺑﻨﻲ ﻫﻨﺎ ﻣﻨﻮ ؟ ﻗﺎﻟﺖ ﻟﻲ ﻧﺤﻦ ﻋﺒﺎﺩ ﺍﻟﻠﻪ ﺍﻟﺼﺎﻟﺤﻴﻦ .. ﺩﺍﻳﺮﻳﻦ ﻧﻤﺮﻗﻚ ﻣﻦ ﻭﺭﻃﻪ .. ﻭﻧﻤﺮﻕ ﺍﺑﻮﻙ ﻣﻦ ﻣﻮﺗﺔ . ﻣﻦ ﺍﻟﺴﻠﻄﺎﻥ ﺍﻟﻈﺎﻟﻢ ﻭﻭﻟﺪﻩ ﺍﻟﻔﺎﺳﺪ .. ﺍﺑﻮﻙ ﺩﺍﻳﺮﻳﻦ ﻳﻜﺘﻠﻮﻫﻮ ..
ﺍﻻﻣﻴﺮ ﺣﺎﻟﻒ ﻳﻌﺮﺳﻚ ﺑﻼ ﺣﺒﺲ .. ﻭﺍﺑﻮﻙ ﺣﺎﻟﻒ ﻣﺎ ﺗﻌﺮﺳﻲ ﺍﻻ ﺑﻌﺪ ﺗﻜﻤﻠﻲ ﺍﻳﺎﻣﻚ .. ﺍﻻ ﻳﻤﻮﺕ .. ﻭﺍﻟﻤﻠﻚ ﻗﺎﻟﻮ ﺑﻜﺘﻠﻚ .. ﻧﺤﻦ ﺑﻨﻘﻌﺪﻙ ﻫﻨﺎ ﺗﻼﺕ ﺷﻬﻮﺭ .. ﺑﻌﺪ ﺩﺍﻙ ﺑﻨﻮﺩﻳﻚ ﺍﻫﻠﻚ .. ﻋﺸﺎﻥ ﺍﺑﻮﻙ ﻣﺎﻳﻤﻮﺕ
. ﺍﻧﺘﻲ ﺗﻘﻌﺪﻱ ﻓﻲ ﺑﻄﻦ ﺍﻟﺒﻴﺖ ﺩﻩ .. ﻭﺍﻟﻘﻄﻴﺔ ﺩﻱ ﻣﺎﺗﻔﺎﺭﻗﻴﻬﺎ .. ﻭﺍﻟﻌﺮﺏ ﺩﻳﻞ ﻣﺎﻳﻌﺮﻓﻮﻙ ﻫﻨﺎ .. ﻭﺩﺧﻠﻮﻧﻲ ﻓﻲ ﻗﻄﻴﺔ .. ﻭﺍﻟﻮﺍﻃﺎ ﻛﺎﻧﺖ ﻟﻴﻼ " ﻗﻤﺮﻭ ﺑﻬﻮﺭﻩ ..
ﻭﺍﺻﻠﻮ ﻣﺎ ﻣﺮﻗﺘﺎ ﻣﻦ ﻗﻄﻴﺘﻲ ﺩﻳﻚ .. ﻋﻼ ﻓﻠﻴﻞ ﻓﻠﻴﻞ ﺑﻤﺮﻕ ﺑﺎﻻﺑﺮﻳﻖ .. ﻓﻲ ﺍﻟﻀﻠﻤﺔ . ﺍﻛﻠﻲ ﻭﺷﺮﺍﺑﻲ ﺑﺠﻴﺒﻮﻫﻮ ﻟﻲ ﺟﻮﺓ .. ﻭﺍﻟﺒﻨﻴﺎﺕ ﺍﻻﺗﻨﻴﻦ ﺩﻳﻞ ﻳﺘﺒﺎﺩﻟﻦ ﻓﻮﻗﻲ . ﻭﺑﺼﺢ ﻧﺎﺱ ﺻﺎﻟﺤﻴﻦ .. ﺑﺲ ﻣﺎﻧﻲ ﺧﺎﺑﺮﺍﻫﻢ ﺩﻳﻞ ﺷﻦ ﻧﻔﺮﻫﻢ .. ﻻﻣﻦ ﺟﺎﺕ ﺍﻟﻤﺮﺍﺓ ﺍﻟﺸﺎﻳﺒﻪ . ﻭﻗﺎﻟﺖ ﻟﻲ .. ﺑﺎﻛﺮ ﺑﻨﻮﺩﻳﻚ ﺍﻫﻠﻚ
ﻗﺎﻣﻮ ﺑﻲ ﻣﻦ ﻫﻨﺎﻙ ﻏﻴﺒﺔ . ﻭﺟﺎﺑﻮﻧﻲ ﻭﺭﺍﺑﻄﻴﻦ ﻋﻴﻮﻧﻲ ﺑﻲ ﺩﻟﻘﻮﻥ .
ﻻﻣﻦ ﻃﻠﻘﻮﻧﻲ .. ﻭﺍﻛﻨﺘﺎ ﺩﺍﻳﺮﻩ ﺍﺑﻴﺖ ﺑﺮﻩ .. ﻋﻼ ﻟﻘﻴﺖ ﺍﻟﺒﺎﺏ ﻣﺘﺎﻛﺎ ﺗﻜﻴﻪ ﻭﺩﺧﻠﺖ ..
ﺍﺑﻮﻫﺎ ﻗﺎﻝ ﻟﻴﻬﺎ ﻭﺍﻟﻠﻪ ﺩﻳﻞ ﺍﻻ ﻳﻜﻮﻧﻮﺍ ﺍﻟﺠﻦ .. ﺑﺼﺢ ﺯﻱ ﻣﺎﻗﺎﻟﻮ ﺍﻟﻔﻘﺮﺍ .
ﻗﺎﻟﺖ ﻟﻴﻬﻮ ﻧﺎﻥ ﻳﺎﺑﺎ ﺍﻟﺠﻦ ﺑﻴﺎﻛﻠﻮ ﺍﻟﻌﺼﻴﺪﺓ ﺑﻤﻼﺡ ﺍﻡ ﺗﻜﺸﻮ؟ ﻭﻻﻋﻨﺪﻫﻢ ﻏﻨﻤﺎ ﺑﺤﻠﺒﻮﻫﻦ .. ﻏﺎﻳﺘﻮ ﺍﻟﻨﺎﺱ ﺩﻳﻞ ﻧﺎﺱ ﻋﺪﺍﺍﺍﺍﻝ ﻭﺩﻋﺘﻬﻢ ﻟﻲ ﺍﻟﻠﻪ .. ﻣﻦ ﺟﻴﺖ ﻻﻣﻦ ﺭﺣﺖ ﻣﻨﻬﻢ ﻗﺎﻋﺪﺓ ﻋﻨﺪﻫﻢ ﺯﻱ ﺍﻟﻤﻠﻜﺔ ..
ﻭﻓﻌﻼ ﺍﻟﻨﺴﻴﻢ ﺍﻟﻀﻌﻒ ﻭﺍﻟﻬﺰﺍﻝ ﺍﻟﻜﺎﻥ ﻓﻮﻗﻬﺎ ﺯﺍﻝ .. ﻭﺟﺴﻤﻬﺎ ﺍﺗﻤﻼ . ﻭﺷﻬﺎ ﻣﻨﻮﺭ ﻣﻦ ﻗﻌﺎﺩ ﺍﻟﻀﻞ .
ﻗﺎﻟﺖ ﻟﻴﻬﻢ ﻳﻮﻡ ﺍﻧﺎ ﻗﺎﻋﺪﺓ ﻓﻲ ﺍﻟﻘﻄﻴﺔ .. ﺟﻮ ﻧﺎﺱ ﻋﻄﻴﺔ ﺧﺎﻟﻲ ﺑﺴﺄﻟﻮ ﻣﻨﻲ .. ﻭﺍﻟﻤﺮﺍﺓ ﺍﻟﻜﺒﻴﺮﺓ ﻛﺎﻧﺖ ﻣﻌﺎﻱ ﺟﻮﺓ .. ﻗﺎﻟﺖ ﻟﻲ ﺍﻧﺤﺸﺮﻱ ﺗﺤﺖ ﺍﻟﻬﺘﺶ ﺩﻩ ﻣﺎﺗﻤﺮﻗﻲ .. ﻭﻫﻲ ﻣﺮﻗﺖ ﻋﻠﻴﻬﻢ ﻗﺎﻝ ﻟﻬﻢ ﺑﺮﻱ ﻳﻌﻤﻴﻨﺎ ﻻﺷﻔﻨﺎﻫﺎ ﻭﻻ ﺳﻤﻌﻨﺎﺑﺎ .. ﻭﺍﻧﺎ ﺑﻘﻴﺖ ﺑﺘﺎﻭﻕ ﻟﻬﻢ ﻣﻦ ﻭﺭﺍ ﺍﻟﻘﺶ .. ﻭﻟﻘﻴﺖ ﻣﻌﺎﻫﻢ ﻭﺩ ﺍﻟﻮﺷﺎﺵ ..
ﺍﺑﻮﻫﺎ ﻗﺎﻝ ﻟﻴﻬﺎ ﻭﺍﻟﻠﻪ ﻣﻌﻨﺎﻫﺎ ﺍﻟﻔﺮﺍﺱ ﺩﻳﻞ .. ﻣﺎﺧﻠﻮ ﻣﻨﻄﻘﺔ ﻣﺎ ﻭﺻﻠﻮ ﻟﻴﻬﺎ .. ﺍﻫﺎ ﻳﺎ ﺍﻟﻨﺴﻴﻢ ﻗﻠﺘﻲ ﻟﻲ ﺍﻧﺘﻲ ﻣﺎﺷﻴﻦ ﻛﻢ ﺣﺘﻰ ﻭﺻﻠﺘﻮ ﻟﻲ ﻣﺤﻠﻜﻢ ﺩﻩ؟ ﻗﺎﻟﺖ ﻟﻴﻬﻮ ﻭﺍﻟﻠﻪ ﻛﺎﻥ ﻳﻮﻡ ﻛﺎﻣﻞ ﻭﻋﻘﺎﺏ ﺍﻟﻀﺤﻮﺓ ﺍﻟﺒﺎﻛﺮ .. ﻗﺎﻝ ﻟﻴﻬﺎ ﻛﺪﻱ ﻭﺻﻔﻲ ﻟﻴﻨﺎ ﺍﻟﻤﺮﺍﺓ ﺩﻱ ﻭﺍﻟﺒﻨﺘﻴﻦ ﺍﻟﻤﻌﺎﻫﺎ ..
ﻗﺎﻟﺖ ﻟﻴﻬﻮ ﻣﺮﺍﺓ ﺻﻔﺮﺍﺀ ﻭﻃﻮﻳﻠﺔ .. ﻭﻣﺸﻠﺨﺔ ﺗﻼﺕ ﻣﻄﺎﺭﻕ .. ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﺎ .. ﺩﻱ ﻭﺍﻟﻠﻪ ﺍﻻ ﻣﻦ ﺍﺧﻮﺍﻟﻲ ﺍﻟﺸﻜﺮﻳﺔ .. ﻳﺎﺭﺑﻲ ﺍﻟﻜﻼﻡ ﺩﻩ ﻭﻳﻦ؟ .. ﻭﺩﻳﻞ ﻣﻨﻮ ﺍﻟﻨﺎﺱ ﺍﻟﻌﻤﻠﻮ ﻓﻮﻗﻲ ﺳﺎﻟﻒ ﻗﺪﺭ ﺩﻩ؟ ﻳﺎﺭﺑﻲ ﺗﻬﺪﻳﻨﻲ ﻭﺍﻋﺮﻓﻬﻢ ﻋﺸﺎﻥ ﺑﺲ ﺍﻗﺪﺭ ﺍﺭﺩ ﻟﻬﻢ ﺍﻟﺠﻤﻴﻞ ..
ﻗﺎﻟﺖ ﻟﻴﻬﻮ ﺍﻱ ﻳﺎ ﺑﺎﺑﺎ .. ﻭﺍﻟﻠﻪ ﺍﻟﻤﺮﺍﺓ ﺩﻱ ﺑﺘﺪﻳﻨﻲ ﺍﻻﻛﻞ ﻗﺒﺎﻝ ﺑﻨﻴﺎﺗﻬﺎ .. ﺭﺑﻲ ﻳﺸﻬﺪ .. ﻭﺍﻗﻮﻡ ﺑﺎﻟﻠﻴﻞ ﺍﻟﻘﺎﻫﺎ ﻣﻐﻄﻴﺎﻧﻲ ﻣﻦ ﺍﻟﺼﻠﻴﻞ .. ( ﺷﺪﺓ ﺍﻟﺒﺮﺩ ) ..
ﻗﺒﺎﻝ ﻭﺩ ﺍﺭ ﺍﻟﺰﻳﻦ ﻳﻜﻤﻞ ﻛﻼﻣﻮ ﻣﻊ ﺑﺘﻮ ﻓﻲ ﻧﺴﻮﺍﻥ ﻭﺭﺟﺎﻝ ﻣﻦ ﻧﺎﺱ ﺍﻟﺤﻠﺔ ﺳﻤﻌﻮ ﺍﻟﺰﻏﺮﻳﺪﺓ ﻭﺟﻮ ﺩﺍﻳﺮﻳﻦ ﻳﺸﻮﻓﻮ ﺩﻱ ﺍﻟﻨﺴﻴﻢ ﺟﺎﺕ ﻭﻻ ﺍﻟﺤﺎﺻﻞ ﺷﻨﻮ؟ ﺍﻟﻨﺎﺱ ﺩﻳﻞ ﺑﺼﺮﺍﺣﺔ ﻓﺮﺣﻮ ﻓﺮﺡ ﻣﺒﺎﻟﻎ ﻓﻴﻬﻮ .. ﻭﺩﺍﺭ ﺍﻟﺰﻳﻦ ﻳﻤﺴﻚ ﻭﻳﻀﺒﺢ ﻓﻲ ﺍﻟﺒﻬﺎﻳﻢ .. ﺍﻇﻨﻮ ﺿﺎﺑﺤﻠﻮ 6 ﺧﺮﻓﺎﻥ .. ﻛﺮﺍﻣﺔ ﺑﻲ ﺟﻴﺔ ﺍﻟﻨﺴﻴﻢ .. ﺭﺳﻞ ﻟﻴﻬﻮ ﻧﻔﺮﻳﻦ ﻣﻦ ﺍﻟﺸﺒﺎﺏ .. ﻭﺍﺣﺪ ﻗﺎﻟﻮ ﺗﻤﺸﻲ ﺗﻜﻠﻢ ﺍﺏ ﺧﻮﺳﺔ ﺗﻘﻮﻟﻮ ﺍﻟﻨﺴﻴﻢ ﺟﻤﻌﺖ .. ﻭﻭﺍﺣﺪ ﻗﺎﻟﻮ ﺗﻤﺸﻲ ﻟﻲ ﻧﺎﺱ ﻣﺨﺘﺎﺭ .. ﺗﻜﻠﻤﻬﻢ ﺗﻘﻮﻝ ﻟﻬﻢ ﺍﻟﻨﺴﻴﻢ ﺟﻤﻌﺖ ﻭﻛﺎﻧﺖ ﺍﻟﻔﺮﺣﺔ ﻛﺒﻴﺮﺓ .. ﺑﻤﻌﻨﻲ ﺍﻟﻜﻠﻤﺔ ..
ﺍﻟﻜﻼﻡ ﻩ ﻛﻠﻮ ﻛﺎﻥ ﻣﻦ ﺍﻟﺼﺒﺎﺡ .. ﻏﺎﻳﺘﻮ ﻻ ﻧﺼﺖ ﻧﻬﺎﺭ ﻛﺪﻱ ﺣﻮﺵ ﻭﺩ ﺩﺍﺭ ﺍﻟﺰﻳﻦ ﺍﺗﻤﻼ ﺑﺎﻟﻨﺎﺱ .. ﺍﻟﺒﺠﻲ ﻳﺤﻤﺪﻭ ﺍﻟﺴﻼﻣﺔ ﻟﻲ ﺟﻴﺔ ﺍﻟﻨﺴﻴﻢ .. ﻭﺍﺧﻮﺍﻻ ﻭﺧﺎﻻﺗﻬﺎ ﻛﻠﻬﻢ ﺟﻮ .. ﻭﺍﻱ ﺯﻭﻝ ﻳﺴﺄﻝ ﺍﻟﻨﺴﻴﻢ ﻛﺎﻧﺖ ﻭﻳﻦ ﻭﺩ ﺩﺍﺭ ﺍﻟﺰﻳﻦ ﻳﺤﻜﻲ ﻟﻴﻬﻮ ﺍﻟﺤﻜﺎﻳﺔ .. ﻭﺍﻟﻨﺎﺱ ﻛﻠﻬﺎ ﻣﺘﺤﻴﺮﺓ ﻓﻲ ﺍﻟﻨﺎﺱ ﺍﻟﺴﺎﻗﻮ ﺍﻟﻨﺴﻴﻢ ﻭﺧﺘﻮﻫﺎ ﻋﻨﺪﻫﻢ ﻛﺪﻱ ﺩﻳﻞ ﻣﻨﻮ .. ﻗﺎﻡ ﻋﻄﻴﺔ .. ﻣﺸﻰ ﺩﺧﻞ ﻋﻠﻰ ﺍﻟﻨﺴﻴﻢ ﻭﻧﺎﺩﺍﻫﺎ .. ﻗﺎﻝ ﻟﻴﻬﺎ ﺍﻧﺎ ﺑﺴﺄﻟﻚ ﺳﺆﺍﻝ ﻭﺟﺎﻭﺑﻴﻨﻲ ﻋﻠﻴﻬﻮ ﺍﻭﻋﻚ ﺗﻜﻀﺒﻲ .. ﺍﻧﺘﻲ ﺍﻻﻣﻴﺮ ﺩﻩ ﻗﺎﻝ ﻟﻚ ﺗﻄﻠﻘﻲ ﻭﺩ ﺍﻟﻮﺷﺎﺵ؟ .. ﺍﻭﻭﻭﻭﻭﻋﻚ ﺗﻜﻀﺒﻲ .. ﻗﻮﻟﻲ ﺍﻟﺤﻘﻴﻘﺔ .. ﺍﻟﻨﺴﻴﻢ ﺑﻘﺖ ﺗﺮﺟﻒ ﻭﻣﺎﻋﺮﻓﺖ ﺗﺮﺩ .. ﻭﻋﺎﻳﻨﺖ ﻟﻲ ﺍﺑﻮﻫﺎ ﻛﺪﻱ ..
ﺍﻟﻰ ﺍﻟﻠﻘﺎﺀ ﺍﻥ ﺷﺎﺀ ﺍﻟﻠﻪ ..
أنت تقرأ
أســرَار الـزمان .. طارق اللبيب
Randomﺍﻟﻘﺼﺔ ﺩﻱ ﺣﺼﻠﺖ ﺑﺪﺭﻱ ﺷﺪﻳﺪ .. ﻳﻌﻨﻲ ﻗﺒﻞ ﺍﻟﻌﻬﺪ ﺍﻟﺘﺮﻛﻲ ﺫﺍﺗﻮ .. ﻓﻲ ﺯﻣﻦ ﺍﻟﺴﻠﻄﻨﺔ ﺍﻟﺰﺭﻗﺎﺀ ﻳﺎﺯﻭﻝ ﺍﻟﺰﻣﻦ ﺩﺍﻙ ﻣﺎﻛﺎﻥ ﻓﻲ ﺣﺎﺟﺔ ﺍﺳﻤﻬﺎ ﺭﺋﻴﺲ ﺍﻟﺠﻤﻬﻮﺭﻳﺔ ﻭﺍﻟﺤﻜﻮﻣﺔ .. ﻭﺍﻟﻤﺤﺎﻓﻆ ﻭﺍﻟﻤﻌﺘﻤﺪ ﻭﻛﺪﺍ .. ﻛﺎﻥ ﻓﻲ ﻣﻠﻮﻙ ﻭﺍﻣﺮﺍﺀ ﻭﺳﻼﻃﻴﻦ ﻭﺣﺎﺟﺎﺕ ﺯﻱ ﺩﻱ .. ﻭﻧﺴﺒﺔ ﻻﻧﻬﺎ ﺍﻟﻘﺼﺔ ﻓﻲ ﻋﻬﺪ ﻣﻤﻠﻜﺔ ﺳﻨﺎﺭ . ﺍ...
