أســرَار الـزمان .. طارق اللبيب
جدول المحتويات

    أنت تقرأ

    أســرَار الـزمان .. طارق اللبيب

    Random

    ﺍﻟﻘﺼﺔ ﺩﻱ ﺣﺼﻠﺖ ﺑﺪﺭﻱ ﺷﺪﻳﺪ .. ﻳﻌﻨﻲ ﻗﺒﻞ ﺍﻟﻌﻬﺪ ﺍﻟﺘﺮﻛﻲ ﺫﺍﺗﻮ .. ﻓﻲ ﺯﻣﻦ ﺍﻟﺴﻠﻄﻨﺔ ﺍﻟﺰﺭﻗﺎﺀ ﻳﺎﺯﻭﻝ ﺍﻟﺰﻣﻦ ﺩﺍﻙ ﻣﺎﻛﺎﻥ ﻓﻲ ﺣﺎﺟﺔ ﺍﺳﻤﻬﺎ ﺭﺋﻴﺲ ﺍﻟﺠﻤﻬﻮﺭﻳﺔ ﻭﺍﻟﺤﻜﻮﻣﺔ .. ﻭﺍﻟﻤﺤﺎﻓﻆ ﻭﺍﻟﻤﻌﺘﻤﺪ ﻭﻛﺪﺍ .. ﻛﺎﻥ ﻓﻲ ﻣﻠﻮﻙ ﻭﺍﻣﺮﺍﺀ ﻭﺳﻼﻃﻴﻦ ﻭﺣﺎﺟﺎﺕ ﺯﻱ ﺩﻱ .. ﻭﻧﺴﺒﺔ ﻻﻧﻬﺎ ﺍﻟﻘﺼﺔ ﻓﻲ ﻋﻬﺪ ﻣﻤﻠﻜﺔ ﺳﻨﺎﺭ . ﺍ...

    #اسرار #الزمان #اللبيب #سوداني #طارق

    ( 8 )

    1.1K 22 0 
                                        
    
                                              
    ﺍﻟﻨﺴﻴﻢ ﻣﺸﺖ ﺍﻟﺒﻴﺖ .. ﻭﻛﺎﻧﺖ ﺧﺎﻳﻔﺔ ﺧﻮﻑ ﺷﺪﻳﺪ .. ﻭﺑﺘﺮﺟﻒ ﻣﻦ ﺭﺍﺳﻬﺎ
    ﻻﻛﺮﻋﻴﻬﺎ .. ﻭﻣﺘﻮﺗﺮﺓ .. ﻭﻣﺎﻋﺎﺭﻓﺔ ﺗﻌﻤﻞ ﺷﻨﻮ؟
    ﻭﺗﻘﻮﻝ ﺍﻧﺎ ﻛﺎﻥ ﺳﻜﺖ .. ﻳﺎﻫﻮ ﺍﻟﺰﻭﻝ ﺍﻟﻤﻠﻌﻮﻥ ﺟﺎﻱ ﺩﻭﺭ ﺍﻟﻠﻴﻠﺔ .. ﻭﺍﻛﺎﻥ ﻛﻠﻤﺖ
    ﺳﻴﺪ ﺑﻴﺘﻲ .. ﻣﺎﺑﺴﻜﺖ .. ﻳﺎﻫﻮ ﺍﻟﺸﺎﻝ ﺳﻴﻔﻮ ﻭﻣﺸﻰ ﻋﻠﻰ ﺍﻟﻘﺼﺮ .. ﻭﻳﻤﻮﺕ
    ﻋﻠﻰ ﺍﻣﻮ ﻭﺍﺑﻮﻫﻮ .. ﻭﺍﻧﺎ ﺍﺗﻬﻤﻞ .. ﻭﺍﻟﺮﺳﺎﻟﺔ ﺗﺘﻬﻤﻞ .. ﻭﺑﻌﺪﻳﻦ ﺍﻟﻤﻠﻌﻮﻥ ﺩﻩ ﻳﺠﻲ
    ﻳﺴﻮﻗﻨﻲ ﻭﻳﻤﻜﻦ ﻳﻘﺘﻞ ﺍﺑﻮﻱ . ﻭﺍﻛﻮﻥ ﻣﺎﺳﻮﻳﺖ ﺍﻱ ﺷﻲ .. ﻏﻴﺮ ﻛﺘﻠﺖ ﺍﻟﻐﺎﻟﻲ
    ﻭﺣﺮﻣﺖ ﻣﻨﻮ ﺍﻫﻠﻮ ﺍﻟﻤﺤﺘﺎﺟﻴﻦ ﻟﻪ . ﻭﻓﻘﺪﺕ ﺍﺑﻮﻱ ..
    ﻭﺑﻘﺖ ﺗﺪﺧﻞ ﻣﻦ ﻫﻨﺎ ﻭﺗﻤﺮﻕ ﻣﻦ ﻫﻨﺎ .. ﻭﺣﺎﻳﻤﺔ ﺑﺎﻟﺴﻬﻠﺔ ﺣﻔﻴﺎﻧﺔ ﺯﻱ ﺍﻟﺰﻭﻝ
    ﺍﻟﺮﺍﻳﺤﺎﻟﻮ ﺣﺎﺟﺔ .. ﻧﺴﻴﺒﺘﻬﺎ ﺍﻡ ﺍﺏ ﺧﻮﺳﺔ ﻻﺣﻈﺖ ﻝ .. ﻳﻬﺎ ﻗﺎﻟﺖ ﻟﻴﻬﺎ ﺍﻧﺘﻲ ﻳﺎ
    ﺍﻟﻨﺴﻴﻢ .. ﻣﻦ ﺟﻴﺘﻲ ﻣﻦ ﺍﻟﺒﻴﺮ ﻣﺎﻙ ﻋﺪﻳﻠﺔ .. ﻣﺎﻟﻚ ﻳﺎﺑﺘﻲ؟ ..
    ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎﺧﺎﻟﺘﻲ ﻣﺎﻧﻲ ﻋﺎﺭﻓﺔ .. ﺍﻧﺎ ﻃﻴﺒﺔ . ﻭﻻﻣﺎﻧﻲ ﻃﻴﺒﺔ . ﻣﺨﻲ ﺩﻩ
    ﻣﺰﻭﺯﻭ .. ﺍﻻ ﻳﻜﻮﻥ ﺿﺮﺑﻨﻲ ﺷﻴﻄﺎﻥ .. ﻣﻦ ﺷﻮﺍﻃﻴﻦ ﺍﻟﺨﻼ ﺩﻳﻞ ..
    ﺍﻧﺎ ﻣﺎﺷﺔ ﺍﻫﻠﻲ ﻳﺎﺧﺎﻟﺘﻲ ﺍﻧﺎ ﻣﺎﺷﺔ ﺍﻫﻠﻲ ..
    ﻗﺎﻟﺖ ﻟﻴﻬﺎ ﻗﻮﻟﻲ ﺑﺴﻢ ﺍﻟﻠﻪ ﻳﺎﺑﺘﻲ .. ﻭﺧﺘﻲ ﺍﻟﻴﻘﺎﻥ ﻓﻲ ﻗﻠﺒﻚ .. ﺍﻟﻴﺠﻲ ﻋﻤﺮ
    ﻭﻟﺪﻱ .. ﻗﺎﻟﺖ ﻟﻴﻬﺎ ﻭﻟﺪﻙ ﻣﺎﺑﺪﻭﺭﻭ .. ﺗﺎﻧﻲ ﻣﺎﺑﺪﻭﺭﻭ ..
    ﺍﻡ ﺍﺑﺨﻮﺳﺔ ﻗﺎﻟﺖ ﻟﻴﻬﺎ .. ﻳﺎﺭﺑﻲ ﻻﺗﻤﺤﻨﺎ ﻭﻻﺗﺒﻠﻴﻨﺎ .. ﻛﻴﻔﻦ ﺍﻟﻜﻼﻡ ﺩﻩ ﻳﺎ ﺍﻟﻨﺴﻴﻢ ﺑﺖ
    ﺍﻟﺘﺎﻳﺔ ؟؟
    ﻗﺎﻟﺖ ﻟﻴﻬﺎ ﻳﺎﻫﻮ ﺍﻟﻜﻼﻡ ﺍﻟﻌﺪﻳﻞ .. ﺍﻧﺎ ﺗﺎﻧﻲ ﻣﺎﻋﻨﺪﻱ ﻗﻌﺎﺩ ﻣﻌﺎﻛﻦ ﻫﻨﺎ ..
    ﺍﻟﻨﺴﻴﻢ ﻗﻌﺪﺕ ﻓﻲ ﺍﻟﻀﻞ .. ﻭﺍﺗﻤﺪﺩﺕ ﻓﻲ ﺍﻟﻮﺍﻃﺔ .. ﻭﺑﻘﺖ ﺗﺒﻜﻲ ﺗﺴﻜﻞ ..
    ﻭﺩﻣﻮﻋﻬﺎ ﺩﻳﻞ ﻳﺸﺘﺘﻦ ﺍﺭﺑﻌﺔ ﺍﺭﺑﻌﺔ .. ﺗﻘﻮﻝ ..
    ﺍﻟﻠﻴﻠﺔ ﻭﺍﻓﻠﻴﻠﻚ ﻳﺎ ﺍﻟﻨﺴﻴﻢ .. ﺍﻟﻠﻴﻠﺔ ﻭﺍ ﺭﺣﻴﻠﻚ ﻳﺎ ﺍﻟﻨﺴﻴﻢ .. ﺍﻟﻠﻴﻠﺔ ﻳﺎﺣﻠﻴﻠﻚ ﻳﺎ
    ﺍﻟﻨﺴﻴﻢ .. ﻳﺎﻫﺎ ﻗﺴﻴﻤﺘﻚ ﻳﺎ ﺍﻟﻨﺴﻴﻢ .. ﻳﺎ ﺍﻟﻘﻠﻴﻠﺔ ﺑﺴﻴﻤﺘﻚ . ﻳﺎ ﺍﻟﻨﺴﻴﻢ ..
    ﺍﻫﺎ ﺍﻟﻤﺮﺍﺓ ﺩﻳﻚ ﺟﺎﺕ ﻭﻗﻔﺖ ﺗﻌﺎﻳﻦ ﻟﻴﻬﺎ .. ﻭﻏﺰﺕ ﻛﻴﻌﺎﻧﻬﺎ .. ﻗﺎﻟﺖ ﻟﻴﻬﺎ .. ﺍﻟﻨﺴﻴﻢ
    ﻳﺎﺑﺘﻲ ﺍﻧﺘﻲ ﺑﺼﺢ ﻭﺍﻟﻠﻪ ﻣﺎﻙ ﻃﻴﺒﺔ .. ﺍﻟﻴﺠﻲ ﻋﻤﺮ ﻭﻟﺪﻱ ﻧﻮﺩﻳﻚ ﻟﻠﻔﻘﻴﺮ ﻳﻌﺰﻣﻠﻚ
    ..
    ﻗﺎﻟﺖ ﻟﻴﻬﺎ ﻣﺮﺿﻲ ﻣﻮ ﻣﺮﺽ ﻋﺰﻳﻤﺔ .. ﺣﻴﺎﺓ ﺍﻟﺪﻧﻴﺎ ﻋﻠﻰ ﻓﻘﺪﺕ ﻃﻌﻴﻤﺎ .. .. ﺍﺭﻳﺘﻮ
    ﻛﺎﻥ ﺷﺎﻝ ﺭﻭﺣﻲ .. ﺍﺭﻭﻳﺘﻮ ﻛﺎﻥ ﻛﺘﻠﻨﻲ ..
    ﻗﺎﻟﺖ ﻟﻴﻬﺎ ﻫﻮ ﻣﻨﻮ ﻳﺎ ﺍﻟﻨﺴﻴﻢ؟ .. ﻗﺎﻟﺖ ﻟﻴﻬﺎ ﻣﺎﺑﻌﺮﻓﻮ ﻳﺎﺧﺎﻟﺘﻲ ﻭﺷﻦ ﺧﺒﺮﻧﻲ
    ﺑﻴﻬﻮ؟ ..
    ﻗﺎﻟﺖ ﺭﺑﻲ ﻳﺸﻔﻴﻚ ﻳﺎﺑﺘﻲ .. ﻳﺎﺭﺑﻲ ﺗﺨﻔﻒ ﺍﻟﻤﺤﻦ ﻭﺗﺰﻳﻞ ﺍﻟﺒﻼ ..
    ﻭﺍﻟﻨﺴﻴﻢ ﻗﺎﻋﺪﺓ ﻓﻲ ﻣﺤﻠﻬﺎ ﺩﺍﻙ .. ﺗﺒﻜﻲ ﻭﺗﻮﺻﻒ .. ﻻﻣﻦ ﺟﺎ ﺍﺏ ﺧﻮﺳﺔ .. ﻣﻦ
    ﺑﻌﻴﺪ ﻋﺎﻳﻦ ﻟﻠﻨﺴﻴﻢ ﻣﺘﻤﺪﺩﺓ ﻓﻲ ﺍﻟﻮﺍﻃﺔ ﻭﺗﺒﻜﻲ .. ﻗﺎﻝ ﺧﻼﺹ ﺍﺑﻮﻱ ﻭﻻ ﺍﻣﻲ
    ﻭﺍﺣﺪ ﻓﻴﻬﻢ ﻣﺎﺕ .. ﻭﺑﻘﻰ ﻳﺼﺒﺮ ﻓﻲ ﺭﻭﺣﻮ ﻳﺎﺭﺑﻲ ﺗﺼﺒﺮﻧﻲ ﻋﻠﻰ ﺍﻟﻤﺼﺎﻳﺐ
    ﻳﺎﺭﺏ ..
    ﻭﺟﺎﻫﺎ ﻧﺎ ﻧﺰﻝ ﻭﺟﺎﺭﻱ .. ﺧﻼ ﺍﻟﺤﻤﺎﺭﺓ ﻣﺎﺷﺔ ﺑﺮﺍﻫﺎ ﺑﻲ ﻭﺭﺍﻫﻮ ..
    ﺟﺎ ﻗﻌﺪ ﺟﻨﺐ ﺍﻟﻨﺴﻴﻢ ﻗﺎﻝ ﻟﻴﻬﺎ .. ﺍﻟﻨﺴﻴﻢ ﺍﻟﻤﺎﺕ ﻣﻨﻮ ؟ ﻫﻮﻱ ﺍﻟﻨﺴﻴﻢ ..
    ﻗﺎﻟﺖ ﻟﻴﻬﻮ ﻣﺎﻓﻲ ﺯﻭﻝ ﻣﺎﺕ ﺍﻟﻤﺖ ﺍﻧﺎ .. ﺍﻧﺎ ﺍﻟﻤﻴﺘﺔ ﻳﺎ ﺳﻴﺪ ﺍﻟﺒﻴﺖ ..
    ﻗﺎﻟﺖ ﻟﻴﻬﺎ ﺍﻟﻨﺴﻴﻢ ﻗﻮﻟﻲ ﺑﺴﻢ ﺍﻟﺮﺣﻤﻦ ﺍﻟﺮﺣﻴﻢ .. ﺍﺑﻮﻱ ﻛﻮﻳﺲ؟ ﻗﺎﻟﺖ ﻟﻴﻬﻮ ﺍﺑﻮﻙ
    ﻧﺎﻳﻢ ﺟﻮﺓ .. ﻭﺍﻣﻚ ﺗﺮﺍﻫﺎﺩﻳﻚ .. ﺗﺠﺎﻭﺏ ﻓﻴﻬﻮ ﻭﺷﻐﺎﻟﺔ ﻓﻲ ﺑﻜﺎﻫﺎ ..
    ﻗﺎﻡ ﺟﺎﺭﻱ ﺷﺎﻑ ﺍﺑﻮﻫﻮ .. ﻭﻋﺎﻳﻦ ﻟﻲ ﺍﻣﻮ .. ﻗﺎﻝ ﻟﻴﻬﺎ ﺍﻟﺮﺳﺎﻟﺔ ﻣﺎﺟﺎﺕ؟ ﻗﺎﻟﺖ
    ﻟﻴﻬﻮ ﻻﻫﺴﻊ ﻳﺎﻭﻟﺪﻱ .. ﻟﻜﻦ ﺍﻟﻨﺴﻴﻢ ﺩﻱ ﻣﺎﻋﺮﻓﺘﻬﺎ ﻣﺎﻻ .. ﻣﺴﻮﻳﺎﻻ ﻣﻨﺎﺣﺔ ﻗﺪﺭ
    ﺩﻱ ؟
    ﻗﺎﻝ ﻟﻴﻬﺎ ﺍﻱ ﺍﻧﺎ ﻫﺴﻊ ﺑﻤﺸﻲ ﺍﺳﺄﻟﻬﺎ ..
    ﺍﻭﻝ ﻣﻦ ﺟﺎ ﻗﻌﺪ ﺟﻨﺒﻬﺎ ﺩﺍﻳﺮ ﻳﺴﺄﻟﻬﺎ ﻗﺎﻟﺖ ﻟﻴﻬﻮ .. ﻭﺩﻧﻲ ﻟﻲ ﺍﻫﻠﻲ ﻳﺎ ﻧﻮﺭ ﻋﻴﻨﻲ
    .. ﻭﺩﻧﻲ ﻟﻲ ﺍﻫﻠﻲ ﻳﺎ ﺿﻮ ﺍﻟﻘﺒﺎﻳﻞ ..
    ﻗﺎﻝ ﻟﻴﻬﺎ ﺣﺎﺿﺮ ﺣﺎﺿﺮ ﻳﺎ ﺍﻟﻨﺴﻴﻢ .. ﺟﺎ ﻗﺎﻝ ﻟﻲ ﺍﻣﻮ ﺍﻧﺎ ﻣﺎﻧﻲ ﺩﺍﻳﺮ ﺍﻛﻞ .. ﺍﻟﻨﺴﻴﻢ
    ﺑﺘﻜﻮﻥ ﺩﺍﻳﺮﺓ ﺍﻣﻬﺎ ﻣﺸﺘﻬﻴﺎﻫﺎ .. ﺍﻟﻨﻮﺩﻳﻬﺎ ﻟﻴﻬﺎ ﻭﺑﺎﻛﻞ ﻋﻨﺪﻫﻢ ﻫﻨﺎﻙ ..
    ﻧﺰﻝ ﺍﻟﺤﻄﺐ ﻣﻦ ﺍﻟﺤﻤﺎﺭﺓ ﻭﺳﻘﺎﻫﺎ ﻣﻮﻳﺔ .. ﻭﺷﺮﺏ ﻟﻴﻬﻮ ﻗﺮﻋﺔ ﻣﻮﻳﺔ ﻣﻦ ﺍﻟﻘﺮﺑﺔ
    ﺍﻟﻤﻌﻠﻘﺔ ﻓﻲ ﺍﻟﺮﺍﻛﻮﺑﺔ ..
    ﺍﻟﻨﺴﻴﻢ ﺳﻜﺘﺖ ﻣﻦ ﺍﻟﺒﻜﺎﺀ .. ﻭﻗﺎﻣﺖ ﺗﺘﻨﻬﺪ ﺯﻱ ﺍﻟﺸﺎﻓﻊ .. ﻗﺎﻟﺖ ﻟﻴﻬﻮ ﻭﺍﻟﻠﻪ
    ﻣﺎﺑﺘﻤﺸﻲ ﺑﻲ ﺭﻳﻘﻚ .. ﺍﻥ ﺷﺎﺀ ﺍﻟﻠﻪ ﺗﺸﺮﺏ ﻟﻚ ﻟﺒﻦ ﺭﺍﻳﺐ .. ﺍﻧﺎ ﻣﺎﻗﺪﺭﺕ ﺳﻮﻳﺖ
    ﻟﻲ ﺍﻛﻞ .. ﻋﻼ ﺍﻟﻠﺒﻦ ﺍﻟﺮﺍﻳﺐ ﻗﺎﻋﺪ ..
    ﻓﻲ ﺑﺎﻗﻲ ﻋﺼﻴﺪﺓ ﺍﻟﻨﺠﻴﺒﻮ ﻟﻲ ﻋﻤﻲ . ﻭﺍﻣﻠﺤﻬﺎ ﻟﻴﻬﻮ .. ﺍﺏ ﺧﻮﺳﺔ ﻗﻌﺪ ﻣﺤﺘﺎﺭ ..
    ﻗﺎﻝ ﻟﻴﻬﺎ ﺍﻧﺘﻲ ﻳﺎ ﺍﻟﻨﺴﻴﻢ ﻣﺸﺘﻬﻴﺔ ﺍﻣﻚ؟؟ .. ﻗﺎﻟﺖ ﻟﻴﻬﻮ ﻻﻻ ﻳﺎ ﺍﻟﻐﺎﻟﻲ .. ﺍﻧﺎ
    ﺍﻣﻲ ﻛﺎﻧﺖ ﻣﻌﺎﻱ ﺍﻟﺨﻤﻴﺲ ﺍﻟﻔﺎﺕ ﺩﻩ ..
    ﺍﻟﺰﻭﻝ ﻃﺒﻌﺎ" ﺣﻴﺮﺗﻮ ﺯﺍﺩﺕ .. ﻭﻣﺎﻋﺎﺭﻑ ﺍﻟﺒﻘﻮﻟﻮ .. ﻗﺎﻝ ﻛﺪﻱ ﺍﻟﻨﻤﺸﻲ ﺍﻭﺩﻳﻬﺎ
    ﺍﻫﻠﻬﺎ .. ﺍﺷﻮﻑ ﺍﻟﺒﺤﺼﻞ ﺷﻨﻮ .. ﺷﺮﺏ ﻟﻴﻬﻮ ﻛﻮﺭﺓ ﻟﺒﻦ ﺭﺍﻳﺐ
    ﻭﻗﺎﻡ ﺷﺪﺍ ﻟﻴﻬﺎ ﺍﻟﺤﻤﺎﺭﺓ .. ﻭﻗﺎﻝ ﻟﻴﻬﺎ ﺍﺭﻛﺒﻲ ﻭﺗﻌﺎﻟﻲ ﻭﺭﺍﻱ .. ﻏﺸﻰ ﻟﻴﻬﻮ
    ﺟﻤﺎﻋﺔ ﻛﺪﻱ ﻣﻦ ﻧﻔﺲ ﺍﻟﺤﻠﺔ .. ﻭﺭﻛﺐ ﺣﻤﺎﺭ ﻣﻨﻬﻢ .. ﻭﻣﺸﻮ ﺍﻻﺗﻨﻴﻦ ﻣﻊ ﺑﻌﺾ ..
    ﻛﻞ ﻭﺍﺣﺪ ﻓﻮﻕ ﺣﻤﺎﺭﺓ .. ﻭﻓﻲ ﺍﻟﺸﺎﺭﻉ ﻳﺴﺄﻝ ﻓﻴﻬﺎ ﻭﻫﻲ ﺑﺘﻘﻮﻟﻮ ﺑﺲ ﻻﻣﻦ
    ﻧﺼﻞ ﺍﻫﻠﻲ .. ﻭﺑﻘﺖ ﺳﺎﻛﺘﺔ . ﻻﻣﻦ ﻭﺻﻠﻮ ﺍﻟﺒﻴﻮﺕ ﺑﺘﺎﻋﺔ ﻧﺎﺱ ﻭﺩ ﺩﺍﺭ ﺍﻟﺰﻳﻦ ..
    ﻭﻛﺖ ﻭﺻﻠﺖ ﺍﻟﺒﻴﺖ ﺯﺍﺩﺕ ﺯﻳﺎﺩﺓ ﻓﻲ ﺍﻟﺒﻜﺎ .. ﻭﻛﻠﻮ ﻛﻠﻮ ﻣﺎﻗﺪﺭﺕ ﺗﻤﺴﻚ ﺭﻭﺣﻬﺎ
    ﻣﻦ ﺍﻟﺒﻜﺎﺀ .. ﺍﻟﺘﺎﻳﺔ ﻗﺎﻟﺖ ﻟﻴﻬﻮ ﺍﻧﺖ ﻳﺎﺑﺨﻮﺳﺔ؟؟ ﺍﻟﻨﺴﻴﻢ ﺷﻦ ﺳﻮﻳﺘﻠﻬﺎ؟
    ﻗﺎﻝ ﻟﻴﻬﺎ ﻭﺍﻟﻠﻪ ﺗﺮﺍﻫﺎ ﻗﺪﺍﻣﻚ .. ﺃﺳﺎﻟﻴﻬﺎ .. ﺍﻟﻨﺴﻴﻢ ﻗﺎﻟﺖ ﻟﻲ ﺍﻣﻬﺎ .. ﻭﺣﺎﺕ
    ﺍﻟﺨﻠﻘﻨﻲ ﻳﻤﻪ .. ﻫﺎ ﺍﻟﺮﺍﺟﻞ ﺍﻟﻘﺪﺍﻣﻚ .. ﺳﻮﺍ ﻟﻲ ﺷﻴﺘﺎ" ﺍﻟﺮﺟﺎﻝ ﻣﺎﺑﻘﺪﺭﻭ
    ﻳﺴﻮﻭﻫﻮ ﻟﻲ ﺣﺮﻳﻤﻬﻦ .. ﺍﺣﺘﺮﻣﻨﻲ .. ﻭﻋﺰﺍﻧﻲ .. ﻭﺭﺍﺩﻧﻲ .. ﻭﺧﺘﺎﻧﻲ ﻓﻮﻕ
    ﺭﺍﺳﻮ .. ﻭﻻﺑﻜﺴﺮ ﻟﻲ ﻛﻠﻤﺔ .. ﻭﻻ ﺑﻔﻀﻞ ﺭﻭﺣﻮ ﻋﻠﻲ .. ﻭﺩﻋﺘﻮ ﻟﻲ ﺍﻟﻠﻪ .. ﻣﺤﻞ
    ﻣﺎﻳﻘﺒﻞ ..
    ﻋﻼ ﻳﻤﺔ .. ﺍﻧﺎ ﺑﺪﻭﺭﻭ ﻳﻄﻠﻘﻨﻲ ﺍﻟﻠﻴﻠﺔ ﻗﺒﺎﻝ ﺑﻜﺮﺓ ..
    ﻗﺎﻟﺖ ﻟﻴﻬﺎ ﻳﺎﺑﺖ ﻳﺎﺑﺖ ﺍﺳﻜﺘﻲ ﺧﺸﻤﻚ ﺑﺎﻟﺘﺤﺸﺎ ﻟﻴﻚ ﻭﺍﻃﺎ .. ﺍﺑﺨﻮﺳﺔ ﻭﻛﺖ ﺳﻤﻊ
    ﻛﻠﻤﺔ ‏( ﻋﻼ ﺑﺪﻭﺭﻭ ﻳﻄﻠﻘﻨﻲ ‏) ﺗﺮﺗﺢ ﻛﺪﻱ ﻻﻭﺭﺍ .. ﻭﻗﺎﻝ ﻻﻻ ﻳﺎ ﺍﻟﻨﺴﻴﻢ .. ﻗﻮﻟﻲ
    ﻛﻼﻡ ﻏﻴﺮ ﺍﻟﺒﺘﻘﻮﻟﻲ ﻓﻴﻬﻮ ﻳﺎ ﺍﻟﻨﺴﻴﻢ .. ﺍﻧﺎ ﻛﺎﻥ ﻓﺎﺭﻗﺘﻚ ﺗﺎﻧﻲ ﻣﺎﺑﻌﻴﺶ ..
    ﻗﺎﻟﺖ ﻟﻴﻬﻮ ﻻ ﻻ ﺑﺘﻌﻴﺶ .. ﻭﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺪﻳﻚ ﺑﺖ ﺍﻟﺤﻼﻝ .. ﻭﻳﺪﻳﻚ ﻃﻮﻟﺔ
    ﺍﻟﻌﻤﺮ ﻭﺗﻘﻌﺪ ﻟﻲ ﺍﻣﻚ ﻭﺍﺑﻮﻙ ﺍﺧﻴﺘﻚ ﺍﻟﺮﺳﺎﻟﺔ .. ﻃﻮﺍﻟﻲ ﻣﺮﻕ ﻣﻦ ﺑﺎﺏ ﺍﻟﺤﻮﺵ
    ﺍﻟﻜﺒﻴﺮ .. ﻭﺍﻟﺘﺎﻳﺔ ﺗﻨﺎﺩﻱ ﻓﻴﻬﻮ .. ﻫﻮﻱ ﻳﺎ ﺍﺑﺨﻮﺳﺔ .. ﺗﻌﺎﻝ ﻣﺎﺗﺴﻤﻊ ﻛﻼﻡ
    ﺍﻟﻤﻄﺮﻃﺸﺔ ﺩﻱ .. ﻭﻫﻮ ﻣﺎﺭﻕ ﻛﺪﻱ .. ﻻﻗﺎﻫﻮ ﻭﺩﺍﺭ ﺍﻟﺰﻳﻦ ﺩﺍﺧﻞ ﻻﺟﻮﺓ ..
    ﻗﺎﻝ ﻟﻴﻬﻮ ﺍﺑﺨﻮﺳﺔ؟؟؟ ﺣﺒﺎﺑﻚ ﺣﺮﻡ .. ﺍﺍﺯﻭﻝ ﻧﻌﻞ ﻣﺎﻓﻲ ﻋﻮﺟﺔ؟؟ ﺟﻴﺘﻚ ﻧﺼﺖ
    ﻧﻬﺎﺭ ﺩﻱ .. ﻭﻣﺎﻟﻚ ﻣﻄﻴﺮ ﻋﻴﻮﻧﻚ ﻛﺪﻱ ﻭﻣﺨﻠﻮﻉ؟؟ ..
    ﺍﺑﺨﻮﺳﺔ ﻗﺎﻟﻴﻪ . ﺍﺩﺧﻞ ﻻﺟﻮﺓ ﺷﻮﻑ ﺑﺘﻚ ﺑﺘﻘﻮﻝ ﻓﻲ ﺷﻨﻮ ؟
    ﻗﺎﻝ ﻟﻴﻬﻮ ﺑﺘﻲ ﻣﺎﻻ ﻛﻤﺎﻥ؟؟ ..
    ﺍﺩﺧﻞ ﺍﻧﺖ ﻻﺟﻮﺓ ﻳﺎﺑﺨﻮﺳﺔ ﺍﺗﻔﻀﻞ ﺍﺗﻔﻀﻞ ﺑﺘﻲ ﺧﻠﻬﺎ ﻋﻠﻲ .. ﺩﻱ ﻣﺒﻮﺟﻨﺎﻫﺎ
    ﺍﻣﻬﺎ .. ‏( ﻣﺪﻟﻌﺎﻫﺎ ‏) ..
    ﺍﻭﻝ ﻣﺎﺩﺧﻞ ﻭﺳﻠﻢ ﻋﻠﻴﻬﺎ ﺍﻟﻨﺴﻴﻢ ﻗﺎﻟﺖ ﻟﻴﻬﻮ ﻳﺎﺑﺎ .. ﺍﻟﺮﺍﺟﻞ ﺩﻩ ﻣﺎﻫﻮ ﻓﺎﻃﺮ ..
    ﺍﻟﻨﺴﻮﻳﻠﻮ ﻓﻄﻮﺭ ﻭﺍﻧﻀﻢ ﻣﻌﺎﻙ .. ﺍﻣﻬﺎ ﻗﺎﻟﺖ ﻟﻴﻬﺎ ﺑﺴﻮﻳﻬﻮ ﻟﻴﻬﻮ ﺍﻧﺎ ﺍﻗﻌﺪﻱ
    ﺍﻧﻀﻤﻲ ﻣﻊ ﺍﺑﻮﻙ .. ﻗﺎﻣﺖ ﺍﻟﺘﺎﻳﺔ ﺗﺴﻮﻱ ﺍﻟﻔﻄﻮﺭ .. ﻭﺍﻟﻨﺴﻴﻢ ﻗﺎﻟﺖ ﻟﻲ ﺍﺑﻮﻫﺎ
    ﻳﺎﺑﺎ .. ﺍﻧﺎ ﺑﺪﻭﺭ ﺍﻃﻠﻖ ..
    ﻗﺎﻝ ﻟﻴﻬﺎ ﻳﺎﺑﺖ ﺍﻧﺘﻲ ﻣﻬﻮﺳﺔ؟؟ ﻭﻻﻋﻨﺪﻙ ﺷﻴﻄﺎﻥ ﻓﻲ ﺭﺍﺳﻚ ﺩﻩ؟؟ .. ﺍﻟﺘﺎﻳﺔ
    ﻣﻦ ﺟﻮﺓ ﻗﺎﻟﺖ ﻟﻴﻬﻮ ﺑﺲ ﻳﺎﻫﻮ ﻛﻼﻣﻚ ﻳﺎ ﺍﻟﺤﺎﺝ .. ﺳﻮﻗﻬﺎ ﻭﺩﻳﻬﺎ ﻟﻠﺸﻴﺦ ﺩﻩ ﻳﺎﻫﻮ
    ﺍﻟﻌﻤﻞ ﺍﻟﻨﺠﺲ .. ﻣﺴﻮﻳﻦ ﻟﻬﺎ ﻋﻤﻞ .. ﻳﺎﻫﻮ ﺫﺍﺗﻮ ﺍﻟﻜﺎﻥ ﻋﻨﺪ ﻧﻌﻤﺔ ﺍﻟﻠﻪ ﺑﺖ
    ﻣﺤﻤﺪﻳﻦ .. ﺩﺍﻛﻲ ﺍﻟﻠﻴﻠﺔ ﻛﺎﻧﺖ ﻣﺎﺑﻴﻪ ﺍﻟﻌﺒﻴﺪ ..ﻭﺍﺗﻌﺎﻟﺠﺖ ﻭﺍﻟﺠﻦ ﺍﻟﻔﻲ ﺭﺍﺳﻬﺎ ﻛﻠﻮ
    ﻣﺮﻕ .. ﻭﺭﺟﻌﺖ ﻣﺘﻞ ﺍﻟﻤﺎﻓﻲ ﺷﻲ ..
    ﻭﺩ ﺩﺍﺭ ﺍﻟﺰﻳﻦ ﻗﺎﻝ ﻟﻴﻬﺎ ﻋﻠﻴﻚ ﺍﻟﻠﻪ ﻳﺎ ﺍﻟﺘﺎﻳﺔ ﺍﺳﻜﺘﻲ .. ﺧﻠﻴﻨﻲ ﺍﻟﻨﻔﻬﻢ ﻣﻦ ﺍﻟﺒﺖ ..
    ﻭﻗﺒﻞ ﻋﻠﻰ ﺍﻟﻨﺴﻴﻢ .. ﻗﺎﻝ ﻟﻴﻬﺎ ﺍﻧﺘﻲ ﻳﺎ ﺍﻟﻨﺴﻴﻢ .. ﺍﻟﺮﺍﺟﻞ ﺩﻩ ﻗﻌﺪﺗﻲ ﻣﻌﺎﻫﻮ
    ﻛﻢ ؟؟؟
    ﻗﺎﻟﺖ ﻟﻴﻬﻮ ﺗﻤﺎﻧﻴﺔ ﺷﻬﻮﺭ ﻭﺍﻟﺒﻬﻞ ﺩﻩ ﺍﻟﺘﺎﺳﻊ ..
    ﻗﺎﻝ ﻟﻬﺎ ﺍﻫﺎ ﺷﻔﺘﻲ ﻣﻨﻮ ﺷﻴﻦ؟؟ .. ﻗﺎﻟﺖ ﻟﻴﻬﻮ ﺣﺎﺷﺎﻫﻮ .. ﻭﺍﻟﻠﻪ ﻣﺎﺷﻔﺖ ﻣﻨﻮ
    ﻏﻴﺮ ﺍﻟﺨﻴﺮ ﺍﻟﻄﻴﺒﻪ ..
    ﻗﺎﻝ ﻟﻴﻬﺎ ﻃﻴﺐ ﻣﺎﻟﻚ ﻳﺎﺑﺘﻲ؟ .. ﻗﺎﻟﺖ ﻟﻴﻬﻮ ﺑﺲ ﺍﺧﺘﺎﺭ ﻭﺍﺣﺪ ﻓﻲ ﺍﻻﺗﻨﻴﻦ .. ﻳﺎ ﺍﻣﺎ
    ﻳﻄﻠﻘﻨﻲ ﻫﺴﻊ .. ﻭﻻ ﺑﻘﻮﻡ ﺍﻃﺶ ﻣﻦ ﺍﻟﺒﻠﺪ ﻟﻴﻼ" ﺩﺍﻣﺲ ..
    ﻗﺎﻟﻬﺎ ﻭﺍﻟﻠﻪ ﻋﺎﺩ .. ﻛﻤﺎﻥ ﺩﺍﻳﺮﺓ ﺗﺴﻮﻳﻠﻚ ﻓﻀﻴﺤﺔ ﻟﻲ ﻭﺩ ﺩﺍﺭ ﺍﻟﺰﻳﻦ .. ﺑﻌﺪ ﺍﻟﺤﺎﻝ ..
    ﻗﺎﻟﺖ ﻟﻴﻬﻮ ﺧﻼﺹ .. ﺑﻐﺰ ﺍﻟﺴﻜﻴﻦ ﺩﻱ ﻓﻲ ﻗﻠﺒﻲ .. ﻭﺣﺎﺕ ﺍﻟﻠﻪ ﺍﻧﺎ ﻣﺎﺑﻜﻀﺐ ..
    ﻭﺩ ﺩﺍﺭ ﺍﻟﺰﻳﻦ ﺳﻼ ﻟﻴﻬﺎ ﺍﻟﺴﻜﻴﻦ ﻣﻦ ﺿﺮﺍﻋﻮ .. ﻗﺎﻝ ﻟﻴﻬﺎ ﻫﺎﻙ ﻏﺰﻳﻬﺎ ﻓﻲ ﻗﻠﺒﻚ
    ﺍﻟﻨﺸﻮﻑ .. ﻣﺴﻜﺖ ﻣﻨﻮ ﺍﻟﺴﻜﻴﻦ .. ﻣﻦ ﻫﻨﺎ ﺍﺑﺨﻮﺳﺔ ﺟﺎ ﺟﺎﺭﻱ .. ﻭﺧﻄﻒ
    ﺍﻟﺴﻜﻴﻦ ﻣﻦ ﻳﺪ ﺍﻟﻨﺴﻴﻢ ﻻﻣﻦ ﺍﻧﺠﺮﺡ .. ﻭﻗﺎﻝ ﻟﻴﻬﻮ ﻳﺎﻭﺩ ﺩﺍﺭ ﺍﻟﺰﻳﻦ .. ﻣﺎﺗﺴﻮﻱ
    ﻟﻚ ﻧﺪﺍﻣﺔ ﻟﻲ ﻋﻤﺮﻙ .. ﺍﻟﻨﺴﻴﻢ ﻣﺎﺑﺘﻜﻀﺐ ﻭﺑﺘﻐﺰ ﺍﻟﺴﻜﻴﻦ ﺑﺼﺢ ﺑﺼﺢ .. ﺍﻧﺖ ﻛﺎﻥ
    ﺷﻔﺖ ﺑﻜﺎﻫﺎ ﺍﻟﺼﺒﺎﺡ ﺑﺘﻌﺮﻑ ..
    ﻭﺍﺑﺨﻮﺳﺔ ﻋﺎﻳﻦ ﻟﻠﻨﺴﻴﻢ ﻛﺪﻱ ﻭﻗﺎﻝ ﻟﻴﻬﺎ ﺍﺳﻤﻌﻲ ﻳﺎ ﺍﻟﻨﺴﻴﻢ ﺍﻧﺘﻲ ﻃﻠﻘﺎﻧﺔ ..
    ﺍﺷﻬﺪ ﻳﺎ ﻭﺩ ﺩﺍﺭ ﺍﻟﺰﻳﻦ ﺍﻧﺎ ﺍﻟﻨﺴﻴﻢ ﻃﻠﻘﺘﻬﺎ .. ﻭﻋﻔﻴﺖ ﻣﻨﻬﺎ ﻟﻮﺟﻪ ﺍﻟﻠﻪ ..
    ﻭﺣﺮﻣﺎﻧﺎﺕ ﻋﻠﻲ ﺍﻟﺤﺮﻳﻢ ﺑﻌﺪ ﻳﺎ ﺍﻟﻨﺴﻴﻢ .. ﻭﺩﻋﺘﻜﻢ ﺍﻟﻠﻪ ..
    ﺍﺑﻮﻫﺎ ﻗﺎﻝ ﻟﻴﻬﻮ ﺧﻴﺮ ﻳﺎ ﺍﺑﺨﻮﺳﺔ .. ﻟﻜﻦ ﺍﻧﺖ ﺍﺗﻌﺠﻠﺖ ﻗﺒﺎﻝ ﺍﻧﺎ ﺍﻓﻬﻢ ﺷﻲ .. ﻗﺎﻝ
    ﻟﻴﻬﻮ ﻣﺎﺑﺘﻔﻬﻢ ﻣﻨﻬﺎ ﺷﻲ .. ﺷﻴﺘﺎ" ﻣﺎﻗﺎﻟﺘﻮ ﻟﻲ ﺍﻧﺎ ﻣﺎ ﺑﺘﻘﻮﻟﻮ ﻟﻴﻚ ﺍﻧﺖ ..
    ﺍﻧﺎ ﺑﺤﻨﺲ ﻓﻴﻬﺎ ﻃﻮﻝ ﺍﻟﺸﺎﺭﻉ .. ﺗﻮﺭﻳﻨﻲ ﺍﻟﺤﺼﻞ ﻋﻠﻴﻬﺎ ﺷﻨﻮ؟
    ﺍﻟﻨﺴﻴﻢ ﻗﺎﻟﺖ ﻟﻲ ﺍﺏ ﺧﻮﺳﺔ ﻭﺍﻟﻠﻪ ﻳﺎ ﺍﻟﻐﺎﻟﻲ .. ﺍﻧﺖ ﺣﺮﻳﻢ ﺍﻟﺪﻧﻴﺎ ﺩﻳﻞ ﻗﺎﺳﻲ
    ﻋﻠﻴﻬﻦ ﻳﺠﻴﺒﻦ ﻣﺘﻠﻚ .. ﻭﺍﻧﺎ ﻛﺎﻥ ﻣﺎﻫﺎ ﻗﺴﻤﺘﻲ .. ﺍﻋﻴﺶ ﻋﻤﺮﻱ ﻛﻠﻮ ﺧﺪﺍﻣﺔ ﺗﺤﺖ
    ﻛﺮﻋﻴﻚ ..
    ﻭﺩ ﺩﺍﺭ ﺍﻟﺰﻳﻦ ﺧﺎﺗﻲ ﺍﻳﺪﻳﻬﻮ ﻓﻮﻕ ﺭﺍﺳﻮ .. ﻣﻦ ﺍﻟﺸﻲ ﺍﻟﺸﺎﻳﻔﻮ ﻗﺪﺍﻣﻮ .. ﻭﻣﺎﻫﻮ
    ﻗﺎﺩﺭ ﻳﻔﻬﻢ ﺍﻟﺤﺎﺻﻞ ﺷﻨﻮ ﺍﺻﻼ ..
    ﻭﻟﻮ ﻓﻲ ﺯﻭﻝ ﺣﻜﻰ ﻟﻴﻬﻢ ﺍﻧﻮ ﺍﻟﻨﺴﻴﻢ ﻋﻤﻠﺖ ﻛﺪﻱ ﻋﺸﺎﻥ ﻛﻴﺖ ﻛﻴﺖ
    ﻣﺎﺑﺼﺪﻗﻮﻫﻮ .. ﻟﻴﻪ؟ ﻻﻧﻮ ﺍﺻﻼ ﺍﻻﻣﻴﺮ ﻣﺎﺑﺠﻲ ﻓﻲ ﺍﻟﻤﻨﺎﻃﻖ ﺩﻱ ..
    ﻟﻜﻦ ﺑﺲ ﺍﻟﻠﻴﻠﺔ ﺟﺎ ﻗﺎﺻﺪ ﺍﻟﺼﻴﺪ ..
    ﺍﺑﺨﻮﺳﺔ ﻃﻮﺍﻟﻲ ﻃﻠﻊ ﻭﻃﻠﻖ ﺍﻟﺤﻤﺎﺭﺓ .. ﻭﺭﺑﻄﻬﺎ ﻓﻲ ﺍﻟﺴﺮﺝ ﺑﺘﺎﻉ ﺍﻟﺤﻤﺎﺭ ﺣﻘﺔ
    ﺍﻟﺠﻤﺎﻋﺔ .. ﻭﺭﻛﺐ ﻓﺎﺕ ﻭﻭﺩﺍﺭ ﺍﻟﺰﻳﻦ ﻳﺤﻨﺲ ﻓﻴﻬﻮ .. ﻳﺎﺯﻭﻝ ﻣﺎﺗﻔﻮﺕ ﺍﻟﺰﺍﺩ ﺟﻬﺰ ..
    ﻭﻫﻮ ﻣﺎﻗﺎﺩﺭ ﻳﺘﻜﻠﻢ ﻭﻻﻗﺪﺭ ﻳﺘﻠﻔﺖ ﻋﻠﻲ ﻭﺩ ﺩﺍﺭ ﺍﻟﺰﻳﻦ .. ﻭﻭﺩ ﺩﺍﺭ ﺍﻟﺰﻳﻦ ﻋﺮﻓﻮ
    ﻣﺘﺄﺛﺮ ﻭﻣﺘﺎﻟﻢ ... ﺍﺑﺨﻮﺳﺔ ﻣﺸﻰ ﺑﻲ ﺟﻮﻋﻮ .. ﻭﻻﻋﻨﺪﻭ ﻧﻔﺲ ﻳﺪﻟﻲ ﻟﻴﻬﻮ ﻟﻘﻤﺔ ..
    ﺍﻭﻝ ﻣﻦ ﻣﺮﻕ ﻣﻦ ﺣﻠﺔ ﻧﺎﺱ ﺍﻟﻨﺴﻴﻢ .. ﻗﺎﻝ
    ﺍﻟﻠﻴﻠﺔ ﺍﻟﺒﻠﺪ ﻣﺴﺨﺎﻧﺔ ﻗﺎﻟﺒﻪ ﻋﻴﻮﻧﺎ .
    ﻛﺎﺗﻤﺎﻫﻮ ﺍﻟﻮﺟﻊ ﺟﺎﺑﺖ ﺳﻤﻮﻡ ﻗﻬﺒﻮﻧﺔ .
    ﺳﻜﻴﻦ ﺻﺎﻟﺘﺔ ﻫﺮﺩﺕ ﻛﺒﺪﻱ ﺳﺎﻭﻳﻪ ﻓﻨﻮﻧﺎ .
    ﻣﻦ ﻓﺮﻕ ﺍﻟﺤﺸﻴﻤﺔ ﺍﻟﻔﻲ ﻗﻔﺎﻱ ﻣﻀﻤﻮﻧﺔ .
    .
    .. ﺍﻧﺎ ﻳﺎﺭﺑﻲ ﻣﺎﺑﺎﺭﻳﺖ ﺧﻤﺎﻟﺔ ﺍﻟﺨﻤﻠﻪ ..
    ﻭﻻ ﻫﻤﺒﺘﻪ ﻳﻮﻡ ﺣﻖ ﺍﻟﺮﺟﺎﻝ ﺑﻲ ﺣﻤﻠﻪ ..
    ﻣﺎﺷﺎﻝ ﻗﻠﺒﻲ ﻣﻦ ﺷﺮ ﻛﺎﻥ ﻗﺪﻳﺮ ﺍﻟﻨﻤﻠﻪ .
    ﻏﻄﻴﻬﺎ ﺍﻟﻨﺴﻴﻢ ﺑﻲ ﺗﻮﺏ ﺿﺮﺍﻙ ﻣﻮﺷﻤﻠﻪ ..
    ..
    ﻭﺻﻞ ﺍﻟﺒﻴﺖ ﻭﻫﻮ ﻓﻲ ﺍﺳﻮﺀ ﺣﺎﻝ .. ﺩﻩ ﺍﻟﻴﻮﻡ ﺍﻻﻭﻝ .. ﺍﻧﺘﻬﻰ ﻋﻠﻰ ﺣﺴﺐ ﻋﺪﺍﺩ
    ﺍﻳﺎﻡ ﺍﻻﻣﻴﺮ ﺍﻟﺠﺎﻱ ﺑﻌﺪ ﺳﺒﻌﺔ ﻳﻮﻡ .. ﻭﻣﺎﻓﻲ ﺯﻭﻝ ﻋﺎﺭﻑ ﺍﻟﺴﺮ ﺩﻩ .. ﻏﻴﺮ ﺍﻻﻣﻴﺮ
    ﻭﺣﺮﺍﺳﻮ ﻭﺍﻟﻨﺴﻴﻢ ﺑﺮﺍﻫﺎ .. ﻭﺍﺑﺨﻮﺳﺔ ﻣﺤﺘﺎﺭ ﻓﻲ ﺍﻟﺴﺒﺐ ﺍﻟﺨﻼ ﺍﻟﻨﺴﻴﻢ ﺗﺎﺧﺪ
    ﺍﻟﻤﻮﻗﻒ ﺩﻩ ﺷﻨﻮ؟ .. ﺑﺲ ﺷﻐﺎﻝ ﻳﺪﻭﺑﻲ ﻭﻳﻨﻮﻧﻲ ..
    ﺍﻫﺎ ﻭﻛﺖ ﻭﺻﻞ ﺍﻟﺒﻴﺖ ﺍﻣﻮ ﻗﺎﻟﺖ ﻟﻴﻬﻮ .. ﻭﻳﻦ ﺍﻟﻨﺴﻴﻢ ﻳﺎﻋﻤﺮ؟ .. ﻗﺎﻝ ﻟﻴﻬﺎ
    .. ﺍﻟﻨﺴﻴﻢ ﺧﻼﺹ ﻳﻤﻪ .. ﻋﻴﺸﺎ ﻣﻌﺎﻱ ﺍﻇﻦ ﺗﻤﻪ .. ﺧﻠﺘﻨﻲ ﻭﻣﺠﺎﻓﻴﻪ ﻭﻣﺎﺑﻴﻪ ﻟﻲ
    ﺿﻤﻪ . .. ﺍﻟﻨﺴﻴﻢ ﻃﻠﺒﺖ ﺍﻟﻄﻼﻕ ﻭﺍﺩﻳﺘﺎ ﻳﺎﻫﻮ ..
    ﻗﺎﻟﺖ ﻟﻴﻬﻮ .. ﺍﻇﻦ ﺍﻟﺒﺖ ﺗﻜﻮﻥ ﻣﺴﺤﻮﺭﻩ .. ﺑﻠﺤﻴﻞ ﺍﻟﻨﺴﻴﻢ ﻣﻨﻈﻮﺭﻩ .. ﻋﻴﻦ
    ﺍﻟﺤﺎﺳﺪﻳﻦ ﺑﺘﺰﻭﺭﺍ .. ﻣﺎﻟﻚ ﻣﺎﺻﺒﺮﺕ ﻭﺟﻴﺖ .. ﻭﺧﻠﻴﺖ ﺍﻻﻣﻮﺭ ﻣﺴﺘﻮﺭﻩ ..
    ﻗﺎﻝ ﻟﻴﻬﺎ ﻻﻻ ﻳﻤﺔ ﺍﻟﻨﺴﻴﻢ ﻗﺎﻟﺖ ﻭﻻ ﺍﻟﻄﻼﻕ ﻭﻻ ﺍﻟﻤﻮﺕ .. ﻭﺍﻧﺎ ﺧﻠﻴﺘﺎ ﻭﻣﺎﺳﻚ
    ﻓﻲ ﺍﻟﻠﻪ .. ﻳﺼﺒﺮﻧﻲ ﻭﻳﺠﺒﺮﻧﻲ .. ﻳﻌﻈﻢ ﺍﺟﺮﻱ ﻭﻳﺠﺒﺮ ﻛﺴﺮﻱ ..
    ﺍﻟﺮﺳﺎﻟﺔ ﺳﻤﻌﺖ ﺍﻟﻜﻼﻡ ﻣﻦ ﺟﻮﺓ ﺟﺎﺕ ﻣﺎﺭﻗﺔ .. ﻭﻗﻌﺪﺕ ﺗﺒﻜﻲ .. ﻗﺎﻟﺖ ﻟﻴﻬﻮ ﻭﻻ
    ﺗﺠﻴﺐ ﻟﻲ ﺍﻟﻨﺴﻴﻢ ﺯﻱ ﻣﺎﺳﻘﺘﻬﺎ .. ﻭﻻ ﺗﻮﺩﻳﻨﻲ ﻟﻴﻬﺎ ﺍﻗﻌﺪ ﻣﻌﺎﻫﺎ ..
    ﺍﻧﺎ ﺑﻌﺪ ﺍﻟﻠﻪ ﺍﺩﺍﻧﻲ ﺍﺧﺖ .. ﺷﻠﺘﻮﻫﺎ ﻣﻨﻲ؟؟ ..
    ﺍﺑﺨﻮﺳﺔ ﻣﺴﻚ ﺍﻟﺮﺳﺎﻟﺔ .. ﻭﻗﻌﺪﻫﺎ ﺟﻤﺒﻮ .. ﻭﻗﺎﻝ ﻟﻴﻬﺎ ﻳﺎﻭﻻﺩﺓ ﺍﻟﻜﺒﺮ .. ﻳﺎ
    ﺍﻟﻤﻔﻄﻮﻣﺔ ﻋﻠﻰ ﺍﻟﺼﺒﺮ .. ﺍﻧﺎ ﺟﺮﺣﻲ ﺍﻭﺟﻊ ﻣﻦ ﺟﺮﺣﻚ .. ﻭﻣﺎﻋﻨﺪﻧﺎ ﻏﻴﺮ ﺍﻟﺮﺿﺎ
    ﺑﺎﻟﻤﻘﺴﻮﻡ ..
    .. ﻭﻛﻠﻢ ﺍﺑﻮﻫﻮ ﺑﺎﻟﺤﺎﺻﻞ .. ﻭﺍﺑﻮﻫﻮ ﻗﺎﻝ ﻟﻴﻬﻮ ﺍﻟﺒﺴﻮﻳﻬﺎ ﺍﻟﻠﻪ ﻋﻠﻴﻨﺎ ﻛﻠﻬﺎ ﻣﺮﺿﻴﺔ
    .. ﺑﺎﻻﺧﺘﺼﺎﺭ ﺍﺑﺨﻮﺳﺔ ﻛﺎﻥ ﻣﺤﻄﻢ ﺑﻲ ﻃﺮﻳﻘﺔ ﺍﺻﻠﻮ ﻣﺎﻣﻌﻘﻮﻟﺔ ..
    ﻭﻣﺮﺕ ﺍﻟﺴﺒﻊ ﻳﻮﻡ ﺩﻱ ﺯﻱ ﺍﻟﺴﺒﻌﺔ ﺳﻨﻴﻦ .. ﻭﺍﺑﺨﻮﺳﺔ ﻻﺑﻨﻮﻡ ﻟﻴﻞ ﻭﻻﻧﻬﺎﺭ ..
    ﻭﺍﻟﻨﺴﻴﻢ ﺑﻲ ﻏﺎﺩﻱ ﻗﺎﻟﺒﺔ ﺍﻟﺒﻴﺖ ﻣﻨﺎﺣﺔ .. ﻭﺑﻜﺖ ﻓﻮﻕ ﺍﺑﺨﻮﺳﺔ ﺟﻨﺲ ﺑﻜﺎ .. ﻣﻦ
    ﻋﺠﺎﻳﺐ ﻣﺎﺑﻜﺖ ﺍﻟﻨﺴﺎﺀ ﺍﺯﻭﺍﺟﻬﺎ ..
    ﻭﻧﻀﻤﺖ ﺟﻨﺲ ﻛﻼﻡ .. ﻭﻋﻨﺖ ﺟﻨﺲ ﻏﻨﺎ .. ﺍﻟﻨﺎﺱ ﻻﻗﺮﻳﺐ ﺩﻩ ﺣﺎﻓﻈﻨﻮ .. ﻗﺎﻟﺖ ..
    ﻭﺍﻭﺟﻌﻲ ﺍﻟﺪﻓﻴﻦ ﻳﺎ ﺩﻭﺩ ﻣﺮﺍﻗﺪ ﺍﻟﻘﻴﻒ ...
    ﻳﺎﺍﺑﻌﺎﺝ ﺍﻻﺻﻢ ﻫﻴﺒﻪ ﻭﺍﻣﺎﻥ ﻟﻠﻀﻴﻒ ..
    ﺍﻛﺎﻥ ﻣﻮ ﺣﻈﻲ ﻳﻤﺸﻲ ﻭﺗﺎﻧﻲ ﻋﺎﺩﺗﻮ ﻳﻘﻴﻒ ..
    ﺩﺣﻴﻦ ﺑﺨﺘﺮ ﻭﺍﻓﻮﺕ ﺩﺍﺭ ‏( ﺍﺏ ﺟﻼﺟﻞ ‏) ﻛﻴﻒ؟؟ .
    ﺍﺏ ﺟﻼﺟﻞ ﺩﻩ ﺍﻟﺜﻌﺒﺎﻥ ﺍﺑﻮﺟﺮﺱ ..
    ﻭﻗﺎﻟﺖ .. ﻳﺎﻭﺟﻌﺎﺗﻲ ﺍﻟﻤﺎﺑﺘﺤﻮّﻝ .. ﺍﻧﺎ ﺷﺎﻳﻼﻙ ﺑﺎﻟﺴﻴﺢ ﻭﺍﺗﺠﻮّﻝ .. ﻭﻳﻨﻮ ﺍﺏ ﻛﻢ
    ﺍﻟﻤﺎﺑﺘﻘﻮّﻝ؟ .. ﺣﺘﻰ ﺍﻟﻤﻮﺕ ﺟﺎﻓﺎﻧﻲ ﻭﻃﻮّﻝ .. ..
    ﻣﺮﺕ ﺍﻻﻳﺎﻡ .. ﻳﺎ ﺍﻟﻠﻪ .. ﺣﺴﺒﻨﺎ ﺍﻟﻠﻪ ﻭﻧﻌﻢ ﺍﻟﻮﻛﻴﻞ .. ﻓﻌﻼ ﻃﻌﻢ ﺍﻟﻈﻠﻢ ﻣﺮ .. ﺑﻌﺪ
    ﺍﺳﺒﻮﻉ ﺗﻤﺎﻡ .. ﻣﻦ ﺍﻟﺼﺒﺎﺡ ﺍﻻﻣﻴﺮ ﻭﺻﻞ ﻟﻲ ﺑﻴﺖ ﺍﺑﺨﻮﺳﺔ ﻋﻠﻰ ﺣﺴﺐ
    ﻣﻮﺍﻋﻴﺪﻩ ﺑﺎﻟﺪﻗﺔ ﻭﺍﻟﻘﻴﺔ .. ﻭﺳﺎﻳﻖ ﻣﻌﺎﻫﻮ ﺟﻤﺎﻋﺘﻮ ﺍﻟﺘﻼﺗﺔ ﻭﺭﺍﻛﺒﻴﻦ ﺣﺼﻴﻨﻬﻢ ..
    ﻣﺎﻟﻘﻰ ﺍﻱ ﺯﻭﻝ ﻏﻴﺮ ﺍﻟﺤﺠﺎﺝ ﺍﻻﺗﻨﻴﻦ .. ﺍﻟﻤﺮﺍﺓ ﻭﻗﻔﺖ ﻟﻴﻬﻮ ﻋﻠﻲ ﺣﻴﻼ ..ﻭﻋﺮﻓﺘﻮ
    ﺩﻩ ﻣﻦ ﺍﻻﺳﺮﺓ ﺍﻟﻤﺎﻟﻜﺔ ..
    ﻗﺎﻟﺖ ﻟﻴﻬﻮ ﺣﺒﺎﺑﻚ ﺣﺒﺎﺏ ﺍﻟﻤﻠﻮﻙ ﺍﻫﻞ ﺍﻟﺪﺍﺭ ﻭﺍﺳﻴﺎﺩﻧﺎ .. ﻗﺎﻝ ﻟﻴﻬﺎ ﺩﻱ ﺩﺍﺭ ﻣﻨﻮ ﻳﺎ
    ﻭﻟﻴﻪ ؟ ﻗﺎﻟﺖ ﻟﻴﻬﻮ ﺩﻱ ‏( ﻭﺷﺎﺵ ﺍﻟﺤﺪﺍﺩ ﺍﺑﻮﻋﻤﺮ ‏) .. ﻗﺎﻝ ﻟﻴﻬﺎ ﻭﻳﻨﻮ ﻭﺷﺎﺵ
    ﺩﻩ ؟ ﻗﺎﻟﺖ ﻟﻴﻬﻮ ﻳﺎﻫﻮ ﺍﻟﺮﺍﺟﻞ ﺍﻟﻜﺒﻴﺮ ﺍﻟﺮﺍﻗﺪ ﻗﺪﺍﻣﻚ ﺩﻩ ..
    ﺍﻻﻣﻴﺮ ﻧﺰﻝ ﻣﻦ ﺣﺼﺎﻧﻮ .. ﻭﻭﺍﺣﺪ ﻣﻦ ﺍﻟﺤﺮﺍﺱ ﻧﺰﻝ ﻣﺴﻚ ﻣﻨﻮ ﻃﺮﻑ ﺍﻟﻠﺠﺎﻡ ..
    ﻭﻫﻮ ﻣﺸﻰ ﻋﻠﻰ ﺍﻟﺤﺎﺝ ﻟﻜﺰﻭ ﺑﻲ ﻛﺮﺍﻋﻮ ﻛﺪﺍ .. ﻗﺎﻝ ﻟﻴﻬﻮ ﻗﻮﻡ ﻳﺎ ﻋﺠﻮﺯ ؟ ﻭﻳﻦ
    ﻋﻤﺮ ﻭﻟﺪﻙ؟؟ .. ﺍﻟﺮﺍﺟﻞ ﻓﺘﺢ ﻋﻮﻳﻨﺎﺗﻮ .. ﺍﻇﻨﻮ ﻛﺎﻥ ﻣﺪﻭﻣﺲ .. ﻗﺎﻝ ﻟﻴﻬﻮ ﻋﻤﺮ
    ﻭﻟﺪﻱ ﻣﺮﻕ ﻋﻠﻰ ﺍﻟﺨﻼ؟
    ﻗﺎﻝ ﻟﻴﻬﻮ ﻭﻳﻨﺎ ﺍﻟﻨﺴﻴﻢ ؟ ﻗﺎﻝ ﻟﻴﻬﻮ ﺍﻟﻨﺴﻴﻢ؟؟ ﺍﻟﻨﺴﻴﻢ ﺷﻦ ﺑﺪﻭﺭ ﺑﻬﺎ .. ﻭﺍﻧﺖ
    ﻣﻨﻮ ﻭﺑﺘﻌﺮﻓﻬﺎ ﻣﻦ ﻭﻳﻦ ﺍﻧﺖ .. ؟ ﻗﺎﻝ ﺟﺎﻭﺏ ﻗﺒﺎﻝ ﺍﻛﻤﻞ ﻟﻚ ﺭﻭﻳﺤﺘﻚ ﺩﻱ ..
    ﺍﻟﻤﺮﺍﺓ ﻗﺎﻟﺖ ﻟﻴﻬﻮ ﺟﺎﻭﺑﻮ ﻳﺎﺏ ﻋﻤﺮ ﺩﻩ ﻣﻦ ﺍﻟﺴﻼﻃﻴﻦ .. ﻗﺎﻝ ﻟﻴﻬﺎ ﺍﻱ ﺷﺎﻳﻔﻮ
    ﻭﻣﻨﻮ ﺍﻟﺒﻈﻠﻢ ﺍﻟﻨﺎﺱ ﻭﻳﻘﻞ ﺍﺩﺑﻮ ﻋﻠﻰ ﺍﻟﻜﺒﺎﺭ ﻏﻴﺮ ﺍﻟﺴﻼﻃﻴﻦ .. ﺍﻻﻣﻴﺮ ﻗﺎﻝ ﻟﻴﻬﻮ
    .. ﻳﺎ ﺟﻨﺎﺯﺓ ﻣﺎﺗﺠﺎﻭﺏ ..
    ﻗﺎﻝ ﺍﻟﻨﺴﻴﻢ ﻋﻨﺪ ﺍﻫﻠﻬﺎ ﻭﻟﺪﻱ ﻃﻠﻘﻬﺎ .. ﻭﺧﻼﺹ ﺑﻘﺖ ﻣﺎﻫﺎ ﻣﺮﺗﻮ .. ﺍﻥ ﺑﻘﻰ
    ﻋﻨﺪﻙ ﻣﻌﺎﻫﺎ ﺍﺗﻔﺎﻕ .. ﺍﻣﺶ ﻟﻬﺎ ﻋﻨﺪ ﺍﻫﻠﻬﺎ ..
    ﻃﺒﻌﺎ" ﻫﻨﺎ ﺍﻻﻡ ﻭﺍﻻﺏ .. ﻓﻬﻤﻮ ﺍﻧﻮ ﺍﻻﻣﻴﺮ ﻻﻗﻰ ﺍﻟﻨﺴﻴﻢ ﻓﻲ ﺣﺘﺔ .. ﻭﺍﺗﻔﻖ ﻣﻌﺎﻫﺎ
    ﺗﻠﻖ ﺭﺍﺟﻼ .. ﻟﻜﻦ ﻭﻳﻦ ﻳﺎﺭﺑﻲ ؟؟؟
    ﻭﺍﻻﻣﻴﺮ ﺭﻛﺐ ﻭﻣﺸﻰ ﻋﻠﻰ ﺑﻴﺖ ﻧﺎﺱ ﻭﺩ ﺩﺍﺭ ﺍﻟﺰﻳﻦ ..
    ﺑﻌﺪ ﻣﺎﻓﺎﺕ ﺑﻲ ﺍﻗﻞ ﻣﻦ ﻧﺺ ﺳﺎﻋﺔ ﺗﻘﺮﻳﺒﺎ .. ﺍﺑﺨﻮﺳﺔ ﺟﺎ ﻣﻦ ﺍﻟﺨﻼ ﻭﺟﺎﺏ
    ﺣﻄﺒﻮ .. ﺍﻣﻮ ﻭﺍﺑﻮﻫﻮ ﺣﻜﻮ ﻟﻴﻬﻮ ﺍﻟﺤﺼﻞ .. ﻗﺎﻟﻬﺎ ﺧﻼﺹ ﻳﻤﺔ ﻣﻌﻨﺎﻫﺎ ﺍﻟﻨﺴﻴﻢ
    ﻻﻗﺎﻫﺎ ﺍﻟﺮﻣﺔ ﺩﻩ .. ﻭﻣﺎﺑﺨﻠﻴﻬﺎ ﺗﺎﻧﻲ ﺍﻻ ﺑﺎﻟﺪﻡ .. ﺍﻧﺎ ﺑﻌﺮﻓﻮ ﻣﻦ ﺯﻣﺎﻥ .. ﺩﻩ ﻟﻌﻨﺔ
    ﺍﻟﻘﺼﺮ .. ﻟﻜﻦ ﺍﻧﺎ ﻭﺣﺎﺕ ﺍﻟﻠﻪ ﺍﻟﺨﻠﻘﻨﻲ ﺍﻛﺎﻥ ﻣﺎﻃﻠﻘﺘﻬﺎ .. ﺍﻻ ﺍﻣﻮﺕ ﺣﺘﻰ ﻳﺴﻮﻗﻬﺎ
    ﻣﻨﻲ .. ﻟﻜﻦ ﻫﺴﻊ ﺧﻼﺹ ﺗﺎﻧﻲ ﻣﺎﻋﻨﺪﻱ ﺧﺸﻢ ﺍﻧﻀﻢ .. ﺑﻌﺪ ﺍﺩﻳﺘﻬﺎ ﺣﺒﻠﻬﺎ ..
    ﺍﻣﻮ ﻗﺎﻟﺖ ﻟﻴﻬﻮ ﺩﺍﻳﺮ ﺑﻴﻬﺎ ﺷﻨﻮ؟؟ .. ﻃﻠﻘﺘﻚ ﻋﺸﺎﻥ ﺗﻌﺮﺳﻮ ﻫﻮ ﻭﺗﺒﻘﻰ ﺍﻣﻴﺮﺓ ..
    ﺍﻧﺖ ﻋﻨﺪﻙ ﺷﻨﻮ ﻳﺎ ﺍﻟﺤﻄﺎﺑﻲ ﺍﻟﻤﻘﻄﻊ .. ﻗﺎﻝ ﻟﻴﻬﺎ ﻻﻻ ﻳﻤﺔ ﺍﻟﻨﺴﻴﻢ ﻣﺎﺑﺘﺴﻮﻱ
    ﻛﺪﻱ .. ﺍﻟﻤﻠﻌﻮﻥ ﺩﻩ ﺑﻜﻮﻥ ﺟﺒﺮﻫﺎ ﺟﺒﺮ .. ﻟﻜﻦ ﺍﻟﻠﻪ ﻓﻲ .. ﻭﺍﻧﺎ ﻭﺍﻟﻠﻪ ﺍﻥ ﺑﻘﻴﺖ ﺣﻲ
    ﻓﻲ ﺍﻟﺪﻧﻴﺎ .. ﺍﻟﻜﻠﺐ ﺩﻩ ﻣﺎﺑﺨﻠﻴﻬﻮ .. ﺑﻜﺘﻠﻮ ﻭﺑﺮﻳﺢ ﺍﻟﻨﺎﺱ ﻣﻦ ﺷﺮﻭ .. ﻭﺑﻌﺪﻳﻦ
    ﺍﻟﺒﺤﺼﻞ ﻳﺤﺼﻞ ..
    ﻭﻫﺴﻊ ﻣﺸﻰ ﻟﻲ ﻭﺩ ﺩﺍﺭ ﺍﻟﺰﻳﻦ؟؟ .. ﺍﻣﻮ ﻗﺎﻟﺖ ﻟﻴﻬﻮ ﺍﻱ ﻇﻨﻴﺘﻮ .. ﻟﻜﻦ ﻣﺎﻧﻲ
    ﻋﺎﻓﻴﺔ ﻣﻨﻚ ﻛﺎﻥ ﻟﺤﻘﺘﻮ .. ﻗﺎﻝ ﻟﻴﻬﺎ ﺍﺑﺪﺍ ﻳﻤﺔ ﺍﻟﺤﻘﻮ ﻟﻲ ﺷﻨﻮ؟ ﻭﺑﻴﺎﺗﻮ ﺣﻖ ؟؟
    ﻭﺩ ﺩﺍﺭ ﺍﻟﺰﻳﻦ ﺭﺍﺟﻞ ﻭﺑﺘﻮ ﻋﻨﺪﻭ .. ﺗﺎﻧﻲ ﺍﻧﺎ ﻣﺎﻓﻲ ﻳﺪﻱ ﺣﺎﺟﺔ .. ﻭﻻﻋﻨﺪﻱ ﺣﻖ
    ﺍﻟﺤﻘﻮ ﺑﻴﻬﻮ ..
    ﺑﺲ ﻗﻮﻟﻲ ﺍﻥ ﺷﺎﺀ ﺍﻟﻠﻪ ﺍﻟﻨﺴﻴﻢ ﺭﺑﻨﺎ ﻳﺤﻔﻈﻬﺎ .. ﺑﻤﺎﺣﻔﻆ ﺑﻪ ﻳﻮﻧﺲ ﻓﻲ ﺑﻦ
    ﺍﻟﺤﻮﺗﻪ ..
    ﻫﻨﺎﻙ ﺍﻻﻣﻴﺮ ﻭﺻﻞ ﺍﻟﺤﻠﺔ .. ﻭﺿﺮﺏ ﺍﻟﺒﺎﺏ ﺑﺘﺎﻉ ﻭﺩ ﺩﺍﺭ ﺍﻟﺰﻳﻦ .. ﺿﺮﺏ ﺑﺘﺎﻉ
    ﺳﻔﺎﻫﺔ ﻭﻗﻠﺔ ﺍﺩﺏ .. ﻭﺗﻌﺎﻝ ﺷﻮﻑ ..
    ﺍﻟﻰ ﺍﻟﻠﻘﺎﺀ ..
    أســرَار الـزمان .. طارق اللبيبحيث تعيش القصص. اكتشف الآن