حسناء البادية

الجزء 26

(دخلنا لدار و تعشينا مجموعين مع العائلة، ) السي عمر: علي بغيت نقوليك شي حاجة واخا تعطلنا شوية ولكن باقي الحال علي:(علامة الاستفهام على وجهو ) السي عمر : حنا بغينا نزوجو حنان بادم علي: انا معندي منقول ،نتوما عائلتها، خاسنا نشوفوها هيا واش موافقة ، السي عمر:اه هيا وافقات علي : (تيشوف فيا ) اوى مبرووك السي عمر:قررنا ندير العرس الاسبوع جاي العقد داروه علي:(تعصب)اوى يعني نتوما درتو كلشي كو مجيتيش مكنتش غنعرف انا: (مقدرتش نشوف فيه حيت حشمت منو و داكشي كامل ماشي بيدي)السي عمر:تنعتدر أولدي ولكن كلشي جا بالزربة علي:يلاه انا غنخليكم انا:كيفاااااش مغتبقاش معانا علي:لا غنمشي ولكن متخافيش انا مبقيتش غنبعك علييك انا غنستقر فالدار البيضاء قريب منك انا:بصاااح علي:اه انا غنولي قريب ليك انا: شحال هادي مسمعت شي خبار تيفرح الحمدلله آدم :(تيخنزر ) علي:أنا كريت شقة أنا :وأخيرا غنبقا نشوفك ديما علي:يلا تهلاي فراسك انا:بات معانا غير اليوم علي :منقدرش غدا الصباح غيجي عندي واحد الصديق انا:رجع عندنا غدا السي عمر: بلاتي انا عندي واحد الاقتراح تيبان ليا بلي علي معجبوش الحال من زواج حنان وآدم حيت كلشي جا بالزربة ومخديناش رأيو من الأول، غدا غنديرو ليهم الخطوبة حيت مداروهاش وهاكا غنعاودو نخطبوها منك من جديد وندير خطوبة رسمية، (ماما وصفية كالعادة فرحو خاسهم غير السبة )صفية :اه علاش لا مفكرناش فيها ،هدا اقتراح زوين السي عمر:شنو قلتي اولدي علي:لي عجبكم انا أهم حاجة عندي هو راحة أختي ماما:حتا هيا معندهاش مشكل انا:(تنشوف فيهم وهما غير تيخططو ،وآدم مبتسم و ضارب الطم بحال إيلا فيه لحلاقم) السي عمر:ادن غدا رجع اولدي فالعشية نديرو حفلة بسيطة غير بيناتنا علي:انشاءالله، (مشا علي وطلعت لبيتي، تنفكر فهادشي لي تيوقع معاية كل مرة خارج ليا بلان فشكل، وهاد الحمل لي حرت ومعرفتش كيفاش غندير حتا ندير الإجهاض كلشي تخلط علية وعيت من التفكير، ونعست وخليت الأمور بيد الله وحده يتصرف فيها كيف يشاء
(أصبح الصباح على غير العادة فقت على صوت خالتي صفية وماما مجموعيين عندي فالبيت )صفية :نوضي النعاسة حنا بغينا نمشيو لصالون وغنديوك معانا انا:وعلاش هما :هههههههههه صفية :اليوم خطوبتك وبغينا حتا حنا نقادو راسنا انا:ياك غير حفلة عادية مكاين لاش ماما:لا ابنتي واخا حفلة عادية بغيناك تكوني متألقة (جروني من لفراش زربو علية ،فطرت بالزربة ومشينا للصالون مخلاو مدارو تقولو هما لي غيتزوجو واصرو علية حتا أنا ندير كلشي ،الصالون حجزاتو خالتي صفية غير على ودنا، كملنا من لي سوان دارو ليا مكياج خفيف وطلقو ليا شعري ردوه لي بوكلي فجنب وحتا هما قادو ودار مكياج دوزنا تقريبا نهار فصالون ميالينا حتا لمور العصر وخرجنا لقينا آدم تيتسنانا، غير شافني خرجو عينيه، فرشاتو ماماه بحال العادة ، محملتش راسي نشوف فيه، خصوصا انا مزوقة لي شافني يقول هادي ميتة عليه ،اتجهنا لدار طلعت لبيتي نيشان جابت ليا خالتي صفية قفطان واعر باللون الأبيض عامر بالأحجار ولعقيق فالصراحة حمقني تمنيت كو كانت هادي خطوبة ديال بصح ولكن للأسف، جات عندي ماما حتا هيا لابسة قفطان جات زوينة،قالت ليا بلي تيتسناوني فالصالون وجا حتا علي وجاب معاه صاحبو ، لبست القفطان وقاديت راسي خرجنا من الغرفة وتلاقيت مع آدم بكامل اناقتو حسيت به انبهر بجمالي فالصراحة حتا انا قلبي مبغاش يحبس من النبض ولكن ملي تنفكر فيوم الاغتصاب تنكرهو كره شديد، )آدم :ممكن نهدر معاك قبل منزلو انا :وعلاش ماما:نور سمعي اش بغا يقوليك انا غنمشي وهدرو على خاطركم (مشات ماما وخلاتني واقفة معاه )أدم :حنان انا عارف هادشي لي غنطلب منك مغيعجبكش ولكن منقدرش نسكت، خاسكي ديري شي فولار على راسك حيت قالت ليا ماماك جا خوك علي وجاب معاه صاحبو منبغيش يشوف فيك شي حد هاما من غ انا:(مخليتوش يكمل ) واش تيقتي راسك، هادي غير كدبة وغدوز وحيد من طريقي (بغيت ننزل طلع لعندي علي)علي :هايهاي على البعلوكة كبرات وغتزوج أنا : انا بعلوكة علي:راه مزال تابعني معاك واحد لحساب حتا وجدتي راسك وناوية تعرسي عاد قلتيها ليا انا:لا ماشي هكاك غير (شفت فادم لي تيخنزر فيا )علي:غير شنو انا:يلاه نهبطو علي:مزروبة ههه انا:(ضربتو لكتفو، نزلنا ودخلنا للصالون كلشي مجموع تما، جلست حدا ماما علي وآدم جلسو حدا عمي وشي حد محققتش مزيان ،مقدرتش نهز فيهم لعين غيكون صاحب علي ،)السي عمر: ولدي علي اول حاجة تنعتدر منك مرة أخرى حيت معلمناكش من قبل ولكن تنظن باقي الحال المهم انا تنطلب منك يد اختك حنان لولدنا آدم على سنة الله ورسوله علي :(تيشوف فيا وتيضحك ) اوى نتوما عارفين الجواب ديالي خاسنا غير نسمعوها هيا السي عمر:اوى حنان شنو قلتي ابنتي انا:(هزيت راسي باش نجاوبهم وانا نتصدم من الشخص لي جالس حدا علي ،اش تيدير هدا هنا )=====>>>من تتوقعون 😛