سبأ

19

.
.

تجاهلت القشعريرة اللي سرت بجسمي بسبب قربها ..
دايم كنت أرتبك من وجود اي شخص قريب مني ، حتى لو ما أعرفه..

كنت أحاول اركز بالكلام اللي قاعدة تهمسه في أذني
قالت : لازم أقابلك اليوم الساعه ٤ في ... ، تعالي لحالك .. ولحد يدري!

ظليت أناظرها وهي تبتعد بعد ما أشعلت الخوف في نفسي ، لين اختفت ..
ماتركت لي مجال اسأل ، وهالشي أقلقني ..

قالت خلود : من هذي؟
: سكرتيرة نورة ..
أرتفعت حواجبها بتعجب : ايش تبي؟
تذكرت انها قالت "لحد يدري" .. لكن هذي خلود ، مو أحد
قلت : تبيني أقابلها اليوم
: عشان؟
: مدري .. ماقالت

رجعت سندت رأسي على الكتب ، لكن بعقل مختطف..
أحس ان القادم عظيم ، غمضت عيوني بحزن .. ما املك مع هذا الشعور الا الشفقه على نفسي..

أحياناً أحس اني عمرّت كثير ، عشت حياة طويله من الفراغ و الضجر اللانهائي ..

من فتره وقفت محاولاتي الفاشله بالتعايش مع حياتي
ماصرت أنتظر شي ، كل شي يمر بدون أي تفاعل مني .. مجرد احساس بالاسى على كل شي..
وشعور بالفخر اني ومع كل هذا الخراب ، مافقدت القدرة على الكلام حتى الان..

لازم ترجع نورة قبل أنسى كيف ملمس شعرها .. قبل ما تتغير ملامح وجهي ، كبرت كثير .. ماراح تعرفني..

هي فعلياً ٦٤ يوم من راحت ، لكنها كثير.. أحس و كأني عاصرت أربعة أجيال من راحت!

ماقدر أرجع للوراء ، و ما أقدر أكمل لوحدي ، بدونها..
تركتني عالقه في الفراغ .. تاركه الحياة تضحك علي ..

أدفع الباقي من حياتي مقابل استبدال عقلي المشوش بعقل صافي ، ليوم واحد..
جسدي راح يتسمم من تكرار نفسي ، ومن تخبط الافكار بعقلي .. أفكاري كثير ، وكلماتي كثيره .. كل هذا لاني ما أقدر المسها..
فقدت روحي الكامنة في راحة يد نورة ..

..

كنت راح أحمد ربي اني ماقابلت خالتي ، لما وصلت الباب ..
لكن سمعت صوتها جاي من وراي ..
قالت : على وين؟
كذبت : لخلود..
قالت و رفعت حاجبها : بيتهم مايحتاج لبس عبايه ..
ناظرت الساعه اللي وراها بتوتر "٣:٣٠" هذي راح تأخرني..
قلت : بطلع معها لمكان ..
: وين؟
تنرفزت : يالله! ، وش دخلك؟
فتحت الباب ، طلعت وتجاهلتها...

نصف ساعه مرت من وصلت المكان، كوفي عام ومزدحم! .. هي تأخرت ، للحين ما جت ..

كانت عيني عالباب ، انتظر المح وجهها في كل مره يفتحه غريب..
لكن المفاجأه هي اني شفت وجه غير منتظر ، وغير مرحب فيه .. كانت أمي ..
اتجهت لي بدون تردد ، وكأنها تعرف مكاني مسبقاً..

وقفت عند الطاولة اللي انا جالسة عليها
قالت : يلا قومي ، بنمشي ..
تجاهلتها ، واستمريت اراقب الباب..
مسكت يدي بطريقة آلمتني ، وقالت بعد ماضغطت على اسنانها
: سبأ قلتلك قومي!

غمضت عيوني ، أحاول اكتم الوجع اللي أحسه يضرب ذراعي من أضافرها اللي انغرست فيه..
لكن دايم كان صمتي يستفزها ، لذلك التزمته..

خمنت انها عرفت من مكاني من السواق الكلب .. لان ماحد يعرفه غيره..

شفت السكرتيرة تدخل ، دارت عيونها بالمكان قبل تطيح علي..
منعها تواجد امي انها تتقدم لي .. لكنه ما منعني
أشرت لها تجي ، وهالحركه خلت امي ترفع عيونها للشخص اللي آشر له..
تقدمت السكرتيره لنا ، وقفت أنا ، و وقفت امي قدامي ..
بدأت امي الحرب : مو قلتلك لا تقربين لبنتي!

احتجت ٤ ثواني عشان استوعب ان المقصود ب "بنتي" هنا أنا! ، ابتسمت بسخريه ..
قالت السكرتيره بهدوء : معليه ، اذا تبين تعرفين وش ابغى منها ماعندي مانع..
قالت امي : لا هي و لا انا نبغى نعرف!
قلت : لا تتكلمين بلساني
التفتت علي امي : انطمي شوي
قربت السكرتيره منها ، وقالت بنبرة تحدي
: اللي ابغى اوصله لها راح يوصل يعني راح يوصل! برضاك او غصب عنك مايفرق..
بدا صوت امي يرتفع : التزمي حدودك ياقليلة الادب!
قالت السكرتيرة بدون اي اهتمام للناس اللي بدات تنزعج من اصواتهم
: افضل اكون قليلة ادب على اني اكون عديمة شرف!

عرفت انه شي كبير ، وجداً .. السكرتيرة مهما كان اللي تعرفه .. الا ان امي راح تقاتل عشان ماينفضح!

بعدت امي و تقدمت للسكرتيره
قلت : قولي ايش تبغين؟ ماعليك منها ..
: ماينفع كذا .. لازم اجلس معك..
قالت امي ودفتها : تجلسين مع مين؟ بعدي عن بنتي لا يجيك شي ما ترضينه!
قالت السكرتيره عبارة مبطنه ما فهمتها ، لكن الخوف في عيون امي بعد ماسمعتها اكد لي انها هي فهمتها
: محد يرضى بالموت..
اندفعت امي عليها ، قبل ما يفرقونهم العاملين بالمكان.. ويطلبون من السكرتيره تطلع

ناظرتني السكرتيره قبل تطلع ، كنت اعرف انها تفكر نفس اللي افكر فيه ، كيف نوصل لبعض؟
قلت بسرعه و ما ادري كيف تذكرت هذا الشي
: روحي للعيادة..
ابتسمت ، ثم ناظرت امي بشرز .. وطلعت برى المكان..

أخذت امي نفس عميق ، جلست على الكرسي ودلكت جبينها ..
قلت : أتمنى اللي تخبينه مايكون اكبر من اللي قبله..
وقفت فجأه وقالت بحزم : راح ترجعين لبيتي..
عقدت حواجبي : لجحيمك قصدك؟ ماراح ارجع..
: اذا صار بكيفك قولي ماراح أرجع

ناظرتها بحقد ، تمنيت تقرأ كرهي لها بعيوني ، بدون ما أتكلم..
قالت : لاتناظريني كذا ، بكرا راح أخليهم ينقلون أغراضك..
: ليه تبيني أرجع؟
: ابيك قدام عيني..
: ماراح أرجع ، مستحيل أرجع!

عطتني نظرة و مشت ، وكأنها تقول الامر محسوم وراح ترجعين لمقبرتك..
بمجرد جابت هالسيره رجعت كل ذكرياتي السيئه بذاك البيت.. اسوأ سنين حياتي قضيتها فيه ..
كان عبارة عن جحيم من جدران بيضاء!

إنتهى