الكوستال

نور

قدامي لما لفيت شوفت راجل قصير,تخين,لابس بدله سوده,شعره اسود و ملامحه حاده.أول ما شوفته عرفت ان ده البوس و رينا اكدت لي ده بالأشارات

ارتبكنا جداً ... في الحقيقه كان لازم نرتبك تخيل نفسك واقف قدام السفاح اللي خطفك و كمان مش عارف ايه السبب اللي يخليه يخطفك و اسئله كتير جداً بتدور في دماغك.

بص لنا بعنف و قال لنا "انتوا بتعملوا ايه هنا؟!" بص لرينا و قال لها "و انتي خصوصاً" رديت عليه بتردد "اااااااا....احنا بس كنااااا.......كنااا"

مره واحده رينا قاطعتني "انت اصلاً مين علشان تسألنا بنعمل ايه؟؟!"

طبعاً استغربت جداً من شجاعتها و ازاي قدرت ترد عليه بالقوه و الشجاعه ديه. البوس اتعصب جداً من ردها , مسكنا احنا الاتنين و شدنا على اوضه بابها كان مكتوب عليه رقم تلاته.غرفه رقم تلاته كانت مختلفه عن كل الغرف, كانت مليانه شبابيك عاليه و صغيره و صناديق خشب كبيره مرميه في كل مكان فيها .أول ما دخلنا أنا و رينا انبهرنا من نورها,الأوضه كانت منوره جداً و كان فيها صوت مكنتش قادره اميزه لأن صوت البوس كان أعلى منه .

البوس قال لنا "ياله يا حلوين اقعدوا هنا زي الشاطرين و اوعوا الشيطان يلعب في دماغكوا و تفكروا تهربوا تاني!" بص لرينا و قال لها "فاهمه؟".

موبايله رن و رد"ألو " "اتأخرت ليه ؟" "أنا لسه في الكوستال". فجأه و هو بيتكلم عيني جت على إطار مرايه مكسوره و مره واحده حسيت نفسي اتنقلت لعالم تاني وشوفت طفله صغيره في المرايه قاعده تسرح في شعرها الاصفر الجميل اللي طوله واصل لكتفها .الطفله كانت جميله جداً,عينها كانت عسلي و اهتمامها بنفسها كان ملحوظ و فجأه صوت بيناديها "يا ريم تعالي عيزاكي".

صوت رينا بتنادي "يااااااااا ..ياللي ملكيش اسم ...يا اموره!"

صوت رينا دخل دماغي و فوقني .قمت مخضوضه "ريم"

"ريم مين يا بنتي فوقي ايه اللي جرالك"

"ريم......انا ريم"

" مبروك..قومي معايا بقى قبل ما نتقفش تاني" شدتني ناحيه الباب

"استني يا رينا ! هو البوس فين؟!"

"أهو يا حبيبتي مرمي هناك" .

ببص هناك لقيته مرمي على الأرض و فاقد وعيه.

قولت لها بدهشه "ايه اللي حصل يا رينا؟"

" ولا حاجه و هو بيتكلم رميت فيه الكرسي اللي كان محطوط هنا"

فجأه سكتنا احنا الاتنين و قالت لي "مش هنمشي بقى؟"

"ايه ده !....استني يا رينا لحظه اسكتي كده" "سامعه الصوت ده؟؟؟"

ضحكت و قالت لي "اطلعي بصي من الشباك اللي فوق و انتي هتعرفي ايه الصوت ده"

ساعدنا بعض علشان نشيل صندوق من الصناديق,الصندوق كان تقيل جداً...في الحقيقه كان صعب يتشال.قعدنا نزق فيه لحد ما حطناه تحت الشباك.الموضوع أخد وقت. رينا ساعدتني علشان أطلع فوقه.طلعت و بكل تشوق بصيت من الشباك.

أول ماشوفت المنظر فتحت بؤي من الدهشه "ايه ده" "ايه الجمال ده كله" "ازاي مكان مرعب زي ده يكون في الجمال ده كله؟" "ايه الراحه النفسيه ديه" .

**********************************************************************