الوضع المره دي كان مختلف....الحراسه زادت,خصوصاً عليا...حطوا لي اتنين حراس قدام الباب من بره .على اد ما فرصه الهروب بقت اصعب ,على اد ما المكان كان اريح المره دي.النور كان مفتوح و مكنتش مربوطه... ده بالنسبالي كان كفايه. الحراس كانوا واقفين بره بس صوتهم كان عالي و مسموع.مكانش في ورايا اي حاجه اعملها غير اني اتأمل السقف و اسمع حوارتهم الممله.زهقت من القعده فقررت احرك رجلي و اتمشي في الأوضه.وأنا بتمشي لقيت باب متداري ورا عمود.رحت عنده و حطيت ودني علشان اشوف لو في حراس من بره ولا لأ بس اتأكدت ان مفيش حد .و أنا بحط ايدي على الأوكره علشان افتحه كنت متخيله انه هيكون مقفول بمفتاح بس اتفاجأت لما اتفتح معايا بكل سهوله.لقيت قدامي حمام و كان صغير جداً. قعدت ابص حواليا يمكن الاقي اي حاجه تساعدني على الخروج و فجأه سمعت باب الأوضه بيتفتح.قفلت باب الحمام عليا بسرعه.دخل الحارس و لما ملقانيش اتخض و قال بصوت عالي "البنت راحت فين".قربت بؤي من الباب و قولت له "بتسأل عليا؟".مردش عليا , خرج تاني و قفل الباب وراه.كملت تفتيش ......و فجأه عيني جت على شامعه مرميه جوه التواليت.حسيت اني دايخه,حطيت ايدي على راسي,قعدت على الأرض و غمضت عيني .
الناس كلها واقفين حواليا انا و اختي و بيغنوا"هبي بيرث داي تو يو......".انا و هي كنا ماسكين ايد بعض ,شعرها الطويل الاصفر كان جاي على كتفي و كانت كل شويه تبص لي بعينها العسلي الجميله و تبتسم.طفينا الشمع , العيد ميلاد خلص و الناس بدأت تسلم و تمشي.أول شخص جيه يسلم كانت عمتي "كل سنه و انتوا طيبين يا حبايبي و عقبال ما اشوفكم عرايس"
ردينا "و حضرتك طيبه يا عمتو"
تاني حد جيه يسلم كان خالو .خالو ظابط شرطه و ده كان واضح من لبسه و طريقه كلامه "كل سنه وانتوا طيبين يا آنسات قولوا لي بقى بقيتوا كام سنه؟"
رديت عليه "احنا الاتنين بقينا 16"
ضحك لنا ,سلم علينا و مشي .
كل المعازيم سلموا و مشيوا متبقاش غيري انا و بابا و اختي و ماما.قعدنا كلنا على نفس الكنبه و بابا فرد ايده على كتفي انا و هي ."كل سنه و انتوا طيبين يا حبايبي" "عجبتكم الهدايه؟"
رفعت ايديا الاتنين و قولت له "أنا عن نفسي لسه مفتحتهاش"
"و أنا كمان لسه"
قمنا نجيب الهدايه و رجعنا قعدنا مكاننا.كل واحد فتح هديته,هديتي كانت سلسه,السلسله كانت فضي و مرسوم عليها بحر.اختي كمان هديتها كانت نفس السلسله بس لونها ذهبي. بص لنا و قال" ها عجبتكم؟".هزيت راسي "حلوه يا بابا"
"ايوه يا بابا حلوه اوي"
"عارفين يا حبايبي؟......السلاسل دي مش سلاسل مجرد تلبسوها.السلاسل دي هتعلمكوا حجات كتير أوي.ممكن تقولولي ايه اللي مرسوم عليها ؟"
اختي ردت "بحر"
سقفلها و قال"عارفين البحر ده شايل جواه ايه؟.....البحر شايل جواه معاني الحياه.البحر هو الخير,النقاء,التسامح و العطاء و امواجه قوه .ممكن توعدوني انكوا مهما حصل عمركوا ما تشيلوا السلاسل دي من معاكوا؟"
لبستها و قولتله"اوعدك يا بابا اني عمري ما هقلعها مهما كبر سني".
ردت اختي "وأنا كمان عمري ما هشيلها من معايا".
ماما كانت قاعده تتفرج علينا و مبتسمه و فجأه صوت ترزيع .قمت مخضوضه على صوت الحارس قاعد يرزع على باب الحمام " افتحي حالاً!!!"
قولت له بصوت مرتبك "ايوه اهو خارجه دلوقتي"
فتحت الباب لقيتوا في وشي "انتي بتعملي ايه كل ده ؟؟؟؟"
"هو الحمام ممنوع؟"
نفخ و قاللي"لأ"
"طيب لوسمحت تخرج و تسبني لوحدي دلوقتي.....حالاً "
بص لي باحتقار,خرج و قفل الباب وراه.قعدت على الكرسي,كنت بفكر في العيد ميلاد,بابا,ماما,اختي و السل..... السلسه!! .حطيت ايدي بسرعه على رقبتي و زي ما وعدت بابا كنت لبساها. فكيتها من رقبتي , حطيتها في ايدي , قعدت اتأملها و افتكر كلام بابا "عارفين البحر ده شايل جواه ايه؟.....البحر شايل جواه معاني الحياه.البحر هو الخير,النقاء,التسامح و العطاء و امواجه قوه"
ابتسمت , لبستها تاني و قولت في سري "حبيبي يا بابا ....حبيبتي يا ماما انتوا بجد وحشتوني " و فجأه قطع كلامي صوت الحارسين و هما بيتكلموا
"متعرفش البوس عأمل ايه دلوقتي؟"
"سمعت انه في غيبوبه "
"انا مش عارف لما يفوق ممكن يعمل ايه"
"ايوه...كل حاجه عنه خلاص اتعرفت"
"تفتكر نخلص عليهم؟"
حطيت ايدي على بؤي من الخضه
"مينفعش نعمل اي تصرف دلوقتي"
شيلت ايدي و اخدت نفس
" متستعجلش .....استنى بس البوس يقوم و هنمسحهم بالأستيكه"
فجأه و انا بفكر في مصيرنا الأنوار كلها طفيت و الدنيا ضلمت . سمعت صوت الحراس بره بيسألوا في ايه,صوت جري في المكان و دوشه .حطيت ايدي على السلسله و في دماغي سؤال واحد كان بيدور "يا تري ايه اللي مستنيني المره دي؟"
**********************************************************************
أنت تقرأ
الكوستال
Acciónفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.
