طريقه رجوعي للأوضه كانت جزء من التعذيب.الحراس كلهم كانوا بيتفرجوا عليا و أنا بتسحل على الأرض لحد ما اخيراً رجعوني للأوضه اللي كنت فيها,رموني هناك كالعاده.أول ما خرجوا و قفلوا الباب وراهم اترميت على الأرض و انهرت من العياط,مكانش في اي تفكير بيدور في دماغي و لا اي خطه للنجاه.أنا يأست خلاص و مبقاش يفرق معايا اي حاجه,يقتلوني,يشنقوني,يعذبوني او حتى يرموني في البحر.سرحت في السقف لحد ما رحت في النوم....نوم عميق.
الساعه كانت 12:00 باليل ,البيت كله كان نايم,بابا كان بيجهز علشان يروح الشغل اللي احنا منعرفش عنه حاجه,كنت بحاول أنام بس تفكيري اللي مبيخلصش كان مانعني.باب الشقه اتفتح و بابا خرج.أول ما خرج سمعت صوت حركه في البيت,قمت علشان اشوف في ايه. شوفت رينا و هي بتتسحب,لابسه لبس الخروج و رايحه ناحيه باب الشقه.
"رينا!.....انتي رايحه فين دلوقتي؟"
"ريم!خليني الحق بابا قبل ما يمشي"
"استني يا رينا!!"
للأسف ملحقتهاش نزلت على أمل انها تعرف بابا بيروح فين كل يوم باليل,و ازاي فجأه جات له الثروه الهايله دي.
الساعه بقت 5:00 الفجر و رينا لسه مرجعتش البيت.قعدت اتصل بيها بس موبايلها كان مغلق.سمعت باب الشقه بيتفتح,طلعت اجري علشان اشوف مين.
"ريم...انتي ايه اللي مصحيكي لحد دلوقتي؟"
"بابا؟اممم...أنا أنا كنت بس مستنياك علشان اسلم عليك"
"ازيك يا حبيبتي أنا كويس"
سابني واقفه ,دخل اوضته و قفل وراه.قعدت على الكنبه و حاولت تاني اتصل برينا بس برضو موبايلها كان مغلق.مكنتش عارفه اتصرف ازاي و ندمت اني سبتها تنزل في وقت زي ده.قعدت اتمشى في الشقه زي المجنونه مش عارفه اتصرف ازاي.و فجأه باب الشقه بيتفتح,طلعت اجري ناحيه الباب "رينا!"
شكلها كان مخضوض,وشها كان اصفر و عينها كانت حمرا.
طلعت اجري عليها و حضنتها,بصيت لها بقلق و قولت لها "رينا انتي كويسه؟"
صوتها كان بيقطع"اه يا بنتي أنا كويسه.....تعالي بس ندخل جوه "
"ادخلي اسبقيني أنا هجيب لك كوبايه مايه و هاجي"
"لأ لأ مش عاوزه حاجه أنا عاوزه أنام"
دخلت اوضتها و سابتني واقفه و اسئله كتير بتدور في دماغي.دخلت وراها و قولت لها "رينا ممكن اعرف عرفتي ايه؟؟؟"
"ريم صدقيني معرفتش حاجه"
اتعصبت و عليت صوتي "لأ يا رينا !!مش مصدقاكي و مش هصدقك!"
"ريم و طي صوتك هتصحيهم"
"مش هوطي صوتي غير لما اعرف بابا كل ده كان فين!!...و انتي كنتي فين كل ده!"
"استني بس حاضر هحكي لك"
"اتفضلي يا رينا!احكي"
"مش عارفه انتي هتصدقيني ولا لأ...بس أنا بجد مشيت ورا بابا في طريق غريب بس مقدرتش اكمل! تاه مني"
رفعت حواجبي و مكانش عندي اي شك انها بتضحك عليا"يا سلام....و كل ده بقى حضرتك كنت فين؟"
ارتبكت و قالت لي "الطريق كان زاحمه اوي..."
"بجد يا رينا ؟؟؟يا شيخه ده لو حد اهبل مش هيصدقك!ازاي الدنيا زاحمه الفجر؟؟!"
"أنا قولت اللي أنا شوفته يا ريم!صدقيني او لأ انتي حره! و ياريت تسيبيني و تروحي اوضتك علشان أنا فعلاً عاوزه أنام"
"اقول لك حاجه؟؟؟أنا مش عاوزه اعرف!او بمعني اصح أنا هعرف بنفسي اللي انتي عرفتيه يا رينا و مش عاوزه تقوليهولي"
فتحت عيني و سألت نفسي سؤال "ليه ليه يا ريم مأصرتيش تعرفي السر اللي رينا كانت شيلاه!....ياتري ايه السر و هي عرفت ايه؟أكيد عرفت حاجه خطيره.."
غمضت عيني على أمل اني ارجع افتكر حاجه تانيه بس للأسف كانت محاوله فاشله.
باب الأوضه اتفتح و دخل عليا واحد من الحراس.ضحك ضحكه فيها شر و قال لي "عندي ليكي مفاجأه هتبسطك اوي"
بصيت له بطرف عيني و قولتله "فعلاً؟..." ابتسمت ابتسامه مصتنعه و عيني مكشره و قولتله "يا تري ايه المفاجأه؟"
"لأ أنا عاوزك تعرفيها بنفسك....تفتكري ايه هيا؟"
"ايه مثلاً ؟؟...هتقتلوني ؟"
"قربتي ..."
"هترموني في البحر؟"
ضحك بصوت عالي و قال لي "بصي هسهلهالك...هو انتي هتتقتلي اه بس مش احنا اللي هنقتلك...اللي هيقتلك حد مغلول منك جامد و حالف ما تخرجي من هنا سليمه"
ارتبكت و قولت له "ايه الألغاز دي بقى!!! اخلص يا ريت مين اللي هيتنيل يقتلني!"
ضحك ضحكته السخيفه و قال لي "فضولك هيقتلك! بس عارفه؟ برضو مش هقول لك.....هخليكي تعرفي لوحدك"
بصيت له نظره احتكار و مردتش عليه.اتعصب عليا و قال لي "قومي قدامي ياله"
"مش هقوم قبل ما اعرف هتاخدني على فين!!"
"انتي فاكره انك ليكي رأي او قرار؟؟؟"
قرب مني,شدني من ايدي و قال لي "قومي ياله قدامي"
صرخت و قولت له "سيبنيييي!!! "
جريناحيتي حارس تاني و مسكني من الايد التانيه مكانش عندي فرصه اتحرك......مكانش عنديفرصه نجاه.
أنت تقرأ
الكوستال
Actionفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.
