يا تري الرقم ده بيرمز لأيه؟ اكيد مع الوقت هعرف.قعدت اكرر في الرقم لحد ما حفظته....اكيد الرقم ده مهم و مش بعيد احتاجله.بصيت علي الولد نظره اخيره,خدت نفس عميق و رجعت تاني للممر.الممر كان هادئ اوي قعدت ابص حواليا علشان اشوف لو في حد.بس زي ما قولت المكان كان مفيش فيه حد.كملت الطريق لقدام لحد ما لقيت نفسي واقفه قدام غرفه رقم 5.مسكت المفتاح و زي المره اللي فاتت جهزت المسدس.و انا بفتح الباب كنت واخده حظري علي الآخر.لما اتأكدت ان الاوضه مفيهاش حد دخلت و طبعاً منستش اقفل الباب ورايا.الاوضه كانت خاليه تماماً...مكانش فيها غير شباك و بس .جريت علي الشباك و بدأت اتفرج علي المشهد.المشهد قدامي كان شارع طويل,الشارع كان متحاوط بصحراء من الناحيتين .فجأه لقيت عربيه نقل مليانه صناديق وصلت و شفت الحراس متجهين ناحيه العربيه و ماسكين اسلحتهم .و بدأوا ينزلوا الصناديق من العربيه و دخلوا بيها الكوستال.اللي كان واضح من ارتفاع الشباك عن الارض اننا كنا في دور عالي.سمعت صوت حركه في الممر,روحت عند الباب و حطيت ودني عليه لحد ما صوت الحركه وقف .فتحت الباب وخرجت .بصيت يمين,لقيت حارس واقف بعيد.من حسن الحظ انه كان باصص الناحيه التانيه.بلعت ريقي ,خدت نفس عميق و طلعت اجري في الممر و فجأه صوت الحارس بيزعق "تعالي هنا.....الحقوا يا جماعه البنت هنا".كملت جري و الرعب كان مالي قلبي. فجأه ببص ناحيه الراجل لقيت خمس حراس متجهين ناحيتي .خدت الممر جري لحد ما بعدت عنهم شويه .لقيت فتحه علي يميني فدخلتها من غير تفكير و كملت جري .الممر الي دخلته مكانش فيه غير بابين .اول باب لقيته قدامي دخلته بسرعه و قفلت الباب ورايا بالمفتاح.اديت ظهري للباب و نفسي قاعد يعلي و يوطي.سمعت صوت الحراس في الممر .فجأه حد مسك اوكره الباب من بره.في اللحظه دي حطيت ايدي علي بؤي و سديت نفسي.لما لقي الباب مقفول بالمفتاح متخيلش اني اكون جوه و مشي....محدش كان عارف ان المفتاح معايا.
سمعت صوتهم بيبعد
"البنت هربت تاني!!!!"
"اكيد هتكون في مكان قريب متخافش.البنت دي نهايتها هتكون هنا......في الكوستال"
"تعالوا ورايا "
صوتهم بعد خالص لحد ماتأكدت انهم سابوا الممر و مشيوا.خدت نفس عميق و بدأت اركز في شكل الاوضه.
الاوضه كان مفيش فيها اي حاجه غير صور ماليه الحيطان.بصيت علي الحيطه اللي في وشي و قربت منها.قعدت اتأمل الصور يمكن الاقي حد اعرفه .و فجأه لمحت صوره رينا و جنبها صورتي .اول ما شفت صورنا من غير تفكير شدتهم من علي الحيطه,قطعتهم و حطيتهم في جيبي.لفيت علشان اخرج فلمحت صوره الولد الي كان مكتوب علي ايده رقم.
قدرت افهم ان الصور دي هي صور الناس المستهدفه.لفيت ظهري للصور و رحت ناحيه الباب و في دماغي مليون تفكير "احنا ليه مستهدفين؟؟" "عملنا ايه و ايه الي ممكن يربطنا بالناس دي؟" قبل ما افتح الباب لمحت بعيني مكان لصوره متشاله من عالحيطه .كان في حته صغيره من الصوره لازق وكان مشطوب عليه بالاحمر.الحته الي كانت باقيه من الصوره مكانتش كفايه علشان توضح الشخصيه الي فيها.بس من الواضح ان الشخصيه دي مصيرها كان زي الولد.سألت نفسي يا تري مين الشخص ده؟ و في سري اتمنيت اني اكون مش عرفاه.
أنت تقرأ
الكوستال
Acciónفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.
