أول حاجه شوفتها لما فتحت عينيا كانت اسود......كل حاجه كانت سوده قدامي, الدنيا كانت ضلمه جداً لدرجه اني مكنتش عارفه افرق انا مفتحه عيني ولا مقفلاها.
بدأت ارجع لوعيي و افوق بالتدريج,ولما بدأت استوعب المصيبه اللي انا فيها نبضات قلبي بدأت تسرع و صوت نفسي علي ,و بدأت اكلم نفسي بصوت واطي
"انا فين ؟"
"انا اكيد بحلم"
قعدت اقرص في نفسي على امل اني افوق بس للاسف اللي انا فيه مكانش حلم....اللي انا فيه كان حقيقه.المكان كان حر جداً و كتمه و حسيت اني بتخنق فبدأ كلام يدور في دماغي و قولت لنفسي"مش وقت تفكير,انا لازم اخرج من هنا بسرعه.....في اسرع وقت"
جيت اقوم بكل قوتي بس في حاجه شدتني و قعدتني مكاني تاني .حسيت بوجع جامد في ايدي .جيت احط ايدي مكان الوجع فلقيت حبل رابطني.حبل رابط ايدي الاتنين ببعض و حبل تاني متوصل من ايدي للكرسي .
حاولت اهدي نفسي علشان موقف زي ده محتاج تفكير و تركيز جامد و قولت لنفسي لازم اهدى و افكر بالراحه.قعدت ساكته شويه و بدأت الافكار تدور في دماغي .اول فكره كانت اني اقوم بقوه فالحبل يتفك بس للاسف الفكره دي منفعتش لأني لما جيت اقوم وقعت تاني, ده غير ان مكان الحبل وجعني اكتر قعدت افكر تاني و فجأه خطرت على بالي فكره و كنت واثقه المره دي ان ربنا هيقف جنبي و هيخلي الموضوع سهل عليا.الفكره كانت اني استخدم أسناني في فك الحبل.الموضوع اصلاً كان غريب. ازاي اللي ربطني مفكرش يربط بؤي؟.... يمكن مخطرش على بالوا ان ممكن حد يفك حبل بأسنانه؟.........يمكن.
المهم..بدأت افك الحبل اللي كان رابط ايدي بأسناني لمده ساعه او اكتر لحد ما اخيراَ قدرت افكه .الخطوه التانيه كانت اسهل بكتير. فكيت الحبل اللي كان رابطني في الكرسي بأيدي و الموضوع ده مخدش مني وقت كتير . الخوف قل جداً و الامل بدأ يرجع لى و بعزم ما فيا قمت اجري في الضالمه مش عارفه الباب فين لحد ما وصلت لحيطه.
قعدت احسس على الحيطه لحد ما مسكت باب قولت بس انا افتحه و اخرج. ومره وحده و انا حاطه ايدي على الباب سمعت صوت حد جاي من بعيد,صوت خطوات رجل بتقرب من الاوضه .
من غير تفكير جريت للمكان اللي كنت مربوطه فيه ,قعدت على الكرسي و حطيت ايدي ورايا كأني مربوطه.مهما حاولت اوصف خوفي كان اد ايه عمري ما هعرف.الدموع كانت بتنزل من عيني زي المطر ,نبضات قلبي قاعده بتزيد في كل خطوه بسمعها,توتر غير طبيعي,قلق وخوف,و فجأه صوت الباب بيتفتح ببطء .نفسي بيعلا, الباب اتقفل و صوت رجل بتقرب مني و مره واحده الصوت وقف ....صوت هدوء غير طبيعي في وسط قلق و رعب و دموع. غمضت عيني, قفلت ايدي جامد و مليون تفكير بيدور في دماغي.
يا تري هيعمل فيا ايه؟
يا تري ده مين و عايز مني ايه ؟
يا تري هيسبني عايشه ؟
********************************************************************
T
أنت تقرأ
الكوستال
Açãoفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.
