الكوستال

حقاً لا افهم

"بس كده يا دكتوره هي دي كل حكايتي "

"يعني انتي آخر حاجه فكراها انك خرجتي من باب الكوستال ؟"

"ايوه بعد كده فوقت لقيت نفسي في المستشفى" بصيت بحزن علي الأرض و كملت "و محدش من أهلي جيه يشوفني...او حتى يسأل عليا"

"متخفيش...هما أكيد مش عارفين انك في المستشفى.تلاقيهم دلوقتي قلقانين عليكي جداً"

"صراحه يا دكتوره بابا لين حسسني انه بابايا بالظبط ...هو و لين ديماً كانوا بيزوروني و هو اللي جابني هنا بعد ما خرجت من المستشفى...هو اللي قال لي ان بعد كل اللي شوفته ده لازم اروح مستشفى الامراض النفسيه"

"صراحه يا ريم انتي لازم تشكري لي بابا لين جداً لأنه كان لازم يجيبك هنا ..انتي فعلاً حالتك أول ما جيتي كانت صعبه جداً"

"أنا مريت بأصعب ايام حياتي في الكوستال يا دكتوره...اللي شوفته هناك بجد مكانش قليل,يعني كل اللي وصفتهولك ده ميجيش حاجه في اللي أنا شوفته بعيني "

"صدقيني يا ريم أنا متخيله الوضع كان عامل ازاي...قصتك دي ولا الافلام"

"عندك حق والله..." بصيت بحزن على الأرض و كملت "ده أنا حتى مش قادره لحد دلوقتي الاقي مبرر يخلي رينا...اختي تعمل فيا كده "

"معلش يا ريم....زي ما قالت لك أكيد كان في سبب يستاهل"

"مهما كان السبب....تبيع اختها؟"

قلعت النظاره , حطيتها في الجراب و كملت كلامها"ريم...زي ما قولت لك مش عاوزاكي تحكمي على الموضوع غير لما الصوره تكتمل قدامك.عرفتي منين ان هي عملت كده بمزاجها؟؟يمكن هددوها مثلاً فقررت انها تعمل كده علشان تحميكوا"

"بس الكلام اللي حضرتك بتقوليه ده مش منطقي"

"يا حبيبتي....اديكي شوفتي قدامك رينا اتقتلت!ضحت بحياتها كلها أكيد لسبب يستاهل"

كان باين عليا الاقتناع بصيت لها و قولت لها "عندك حق...مش لازم اظلمها, رينا كانت اخت كويسه و جادعه" بصيت في الأرض و بدأت افتكر المواقف اللي شاركت رينا فيها "لما كنت بحتاجها كنت ديماً بلاقيها جنبي...وقت الشده كانت ديماً بتخفف عليا...لما كنت ببقى خايفه كانت بتقويني..مش قادره انسا شكلها و هي راجعه و معاها جواب اعتذار من المدير اللي طردني,مش قادره انسى شكلها و هي مبسوطه,شكلها و هي زعلانه,و هي متعصبه,و هي مرتاحه!"

قاطعتني الدكتوره "ريم كفايه"

مقدرتش امسك دموعي وقت طويل....افتكرت شكل رينا وراسها مرميه علي الكرسي و الدم حواليها,مسحت دموعي و قولت لها "أنا بجد مش قادره انسا"

"بصي يا ريم أنا هقول لك على حاجه مهمه....يمكن اللي حصلك ده هيكون صعب يتنسي...او يمكن هتقدري فيوم تنسيه...بس الأكيد انك حتى لو مقدرتيش تنسيه هيبقى موضوع عادي بالنسبالك في يوم من الأيام و هتفتكريه كأنه ذكرى من ذكريات حياتك"