الكوستال

أول نفس

النور اتفتح و شوفت قدامي واحد طول بعرض,شعره اسود و طويل ,لابس بدله سوده و ملامحه حاده جداً. ببص في ايده لقيت طبق مليان أكل. في الحقيقه مكنتش متأكده هو ايه بالظبط بس الحاجه اللي كنت متأكده منها اني مستحيل احط بؤي فيه.منظر الراجل و معاة طبق الأكل خضني لدرجه اني بصوت عالي صرخت . الراجل عمل كأنه مسمعش حاجه,بص لي نظره احتقار و حط الطبق قدامي على الأرض كأنه مثلاً بيحط أكل لكلب.في اللحظه دي جاني تفكير مخيف . فكرت في مصيري لو الحارس جيه يفك ايدي علشان أكل فلقاها اصلاً مفكوكه.الحمدلله اهتمامه كان أقل من انه يفكر يفكني علشان أعرف آكل.بص لي و قاللي"أكلك أهو أنبسطي يا حلوه " مشي شويه و رجع "بس أوعي تتقلي جامد هههههههههههه". بصيت له منغير اي تعبير على وشي,كان نفسي أقوله إنه مش ظريف بس الظروف و الوقت مكانوش يسمحوا. خرج الراجل و رزع الباب وراه. تقريباً سابلي النور مفتوح علشان أعرف آكل او يمكن نسيه مفتوح. استنيت لحد ماتأكدت انه بعد عن الأوضه خالص و بعد كده قمت من مكاني ادور على مكان اخرج منه.أول حاجه رحت عليها كانت الباب,للأسف الباب طلع مقفول بالمفتاح.بصيت على الحيطه من فوق لقيت شباك بس للأسف متقفل عليه بحديد.رميت نفسي على الأرض و كنت في غايه اليأس.قعدت اتقلب على الأرض و اعيط بصوت عالي, في اللحظه دي فعلاً مكانش فارق معايا حد.قمت بإندفاع ناحيه الباب,قعدت ارزع فيه بكل قوتي و اقول "افتحولييييييييي !!! انا عملت ايههههههه علشان كل ده !!!! حرام عليكواااااااا" .بعدت عن الباب خالص , طلعت اجري ناحيته و اخبط فيه جامد و الغريب ان الباب اتفتح من أول خبطه .تقريباً الشخص اللي حبسني هنا متخيلش اني عندي الشجاعه او القوه اللي تخليني أكسر باب فحطني في اوضه بابها ضعيف.أول ما الباب فتح اخدت نفس عميق .....حسيت إن ده أول نفس ليا من أول ما فتحت عيني في المكان ده. خرجت جري و قفلت الباب ورايا .قعدت ابص حواليا و اتأمل المكان في دهشه.قدامي كان ممر طويل مليان أبواب في الناحيتين,الأبواب كانت بعيده عن بعض , في نص الممر كان في عواميد كتير و آخر الممر مكنتش شيفاه.مكانش عندي اختيارات كتير. كان قدامي أمشي لآخر الطريق و اشوف في ايه أو أجرب أدخل الأوض و استكشفها بنفسي. الأختيارين كانوا أخطر من بعض بس انا فضلت التاني علشان خفت إني ألاقي الطريق مسدود بعد ما اوصل لآخر الممر .فجأه و انا في عز التفكير ايد مسكتني من كتفي و لسه جيه اصرخ لقيت ايد اتحطيت على بؤي .حسيت اني بتسحب على الأوضه اللي كانت على شمالي و صوت بيقولي "اوعي تعملي صوت"