فات من عمري تلات شهور و حالي ثابت متغيرش.فرصه الهروب مجاتليش و اليأس سيطر عليا.حتى الذكريات اللي كانت بتساعدني اعرف أنا مين وقفت.طول المده دي مكنتش بعمل حاجه غير اني اتنقل من السرير للكرسي و من الكرسي للسرير.شكلي اتغير,التعب و الضعف بانوا عليا.تحت عيني كان اسود,وشي كان اصفر و جسمي خس.كنت نايمه على السرير و فجأه حسيت دماغي تقيله,نفسي سريع و دقات قلبي عاليا.قمت من على السرير مخضوضه و جريت ناحيه الباب استنجد بحد بس مقدرتش اكمل .قعدت على الأرض,حسيت جسمي اتشل.مش جسمي بس .....تفكيري كمان.
كنت قاعده في اوضتي على السرير , ماسكه في ايدي فلوس و بعدها.رينا فتحت الباب و دخلت.كانت لابسه بدله,قميص ابيض و جيبه سوده و ماسكه في ايدها ظرف.ادت لي الظرف و قالت لي "خدي يا ريم....اهو مرتبي كله".فتحت الظرف ,طلعت الفلوس , بصيت عليها و ابتسمت "الحمدلله....انشاءالله يعيشونا كويس".حطيت فلوسي عليهم , مسكتاها من ايدها و رحنا على اوضه بابا و ماما.ماما كانت في السوق و بابا كان لوحده في الأوضه,كان قاعد على السرير و باصص في الأرض.أول ما دخلنا ابتسم كأن مفيش حاجه "ايه ده انتوا لسه صاحيين؟"
رينا ردت " ايه يا بابا أنا لسه راجعه من الشغل " قعدت جنبه و قالت له "و بعدين قول لي...ازاي يجيلنا نوم و بابانا زعلان كده؟؟"
"أنا زعلان؟هزعل ليه؟"
قعدت جنبه من الناحيه التانيه"بابا بصراحه كده ..أنا سمعت حضرتك و ماما و انتوا بتتكلموا....وفهمت كل حاجه"
بص لي بخضه"فهمتي ...فهمتي ايه؟"
رينا ردت عليه "بابا انت سبت الشغل؟"
"قصدك اترفدت؟....اوفر عليكي السؤال اترفدت من غير سبب ..تقريباً في واحد اعلى مني كان يستاهل شغلي اكتر".
قولت له "بص يا بابا...أنا و رينا جمعنا مرتباتنا على بعض"فردت ايدي بالفلوس.بابا فضل ساكت مش عاوز ياخدهم.
رينا قالتله "بابا خدهم ياله....متضايقناش,ده واجبنا يا بابا,انت اللي ربيتنا"
كملت على كلامها"ايوه يا بابا رينا صح... يوم ما حضرتك تكون محتاجلنا لازم نقف جنبك,الفلوس دي فلوسك قبل ماتكون فلوسنا.....ايه هتسبني فرده ايدي كده كتير؟ "
بص لي و عينه مليانه حزن,خادهم بتردد و قال لي"والله يا ريم لوله اني فعلاً محتاجهم كان عمري ما هاخدهم"
حطيت ايدي على ايده "بابا من غير ما تقول ...أنا عارفه".
فتحت عيني على صوت نفسي العالي,صوت نفسي علي اكتر لما شوفت رينا داخله عليا و بتقول لي "ريم...أنا سبت الشغل"
بصيت لها مخضوضه و وقفت مكاني "ايه؟؟؟؟سبتي الشغل؟؟"
"المدير .." قاطعتها و قولت لها "مدير ايه و زفت ايه؟؟؟؟انتي مش عارفه ان المرتب ده دلوقتي بابا بيعتمد عليه؟؟؟"
"ريم افهم.."
"افهم ايه؟؟! امتي هتعقلي و تفكري فينا ؟؟؟كفايه أنانيه بقى!"
وشها احمر,والدموع مليت عينها"ريم....انتي عارفه اني لما بتعصب تفكيري بيقف"
"ايوه يا رينا!بس مينفعش يقف في حاجه زي كده....غلطتك دي بابا اللي هيدفع تمنها!"
اديت لها ظهري و رحت ناحيه الباب,لفيت و الحزن كان باين عليا و قولت لها "شكراً...".خرجت و رزعت الباب ورايا.
شوفت قدامي اسود و محستش بأي حاجه لمده تزيد عن ساعتين. فجأه صوت بيزعق"أكلك اهو!".قمت مخضوضه ,فضلت ساكته شويه و لما استوعبت بصيت له باستحكار و قولت له "مين قال لك اني عاوزه منكوا أكل اصلاً ...امشي من قدامي علشان لما بشوف حد منكم بتقرف".رفع حواجبه و قاللي "حقيقي؟"
"اه طبعاً حقيقي..."
ابتسم ابتسامه سخيفه و نادى "يا عزيز.....تعالي يا عزيز"
فتح الباب حارس و دخل"نعم يا باشا عاوزني في حاجه؟"
"السنيورا بتقول لي انها لما بتشوف حد مننا بتتقرف....ايه رأيك نوريها القرف"
بصوا لبعض و قعدوا يضحكوا .
فجأه حسيت بألم شديد في دراعاتي الاتنين.بصيت يميني و شمالي لقيت اتنين ماسكني و بيشدوني في الممر.حاولت اقاوم بس هما كانوا اقوي.نظراتهم ليا كانت حاده,مكانش ليهم صوت او اي تعبيرات علي وشوشهم.وقفوا قدام اوضه.باب الأوضه كان اسود و كان مكتوب عليه بالأحمر "غرفه التعذيب".
********************************************************************
-
أنت تقرأ
الكوستال
Actionفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.
