قدامي شوفت بحر.البحر كان نقي نقاء غير طبيعي,و فوق البحر سما مليانه نجوم كتير .لون البحر الصافي اداني أمل, و صوت امواجه اداني قوه و صمود . في عز إندماجي في جمال المنظر صوت رينا مخضوضه "ريم..أنا حاسه إن حد جي! انزلي بسرعه".
بصيت نظره أخيره علي البحر , ابتسمت ابتسامه خفيفه وقولت في سري"ليك الرجوع".و أنا بلف علشان أنزل حسيت الصندوق بيتلخلخ,حسيت اني هقع فصرخت "رينا الحقيني". في نفس اللحظه اللي صرخت فيها الصندوق اتكسر و وقع بيا ......و محستش بأي حاجه.
نور خفيف قدامي و صوت بيقول لي
"ياله يا حبيبتي علشان تروحي المدرسه"
"بابا سبني انام شويه "
"ريم مينفعش تنامي شويه.....حبيبتي انهارده أول يوم في المدرسه لازم تروحي بدري"
قمت من السرير و حضنته
"ايوه كده هي دي بنتي حبيبتي".
فتحت عيني لقيت رينا وشها في وشي , بتحرك بؤها و بتحاول تقول لي حاجه بس مكنتش قادره استوعب هي بتقول ايه. عيني قفلت تاني و شوفت طفله بتلعب معايا و في عز إندماجنا في اللعب خطفت مني اللعبه اللي كنت بلعب بيها .قعدت اعيط و انادي على بابا و ماما .بابا سمع صوتنا و جيه جري "تعالي يا ريم ".مسكني من ايدي و خادني على اوضتي ,قعدنا على السرير , بدأ بابا يكلمني "ريم....احنا مش اتفقنا مش اي حاجه نعيط؟"
"اه يا بابا بس هي أخدت مني اللعبه"
"طيب ليه موقفتيش بشجاعه قدامها و قولتي لها تديهالك علشان دي بتاعتك؟"
مسك ايدي و بكل طيبه قال لي"حبيبتي.....الخوف و التردد هما السببين الأساسيين للفشل .عمرك ما تخافي تطالبي بحقك حتى لو من أقرب الناس ليكي.طالبي بحقك بأدب و ذوق .....بطريقه تخلي اللي قدامك يتحرج و يديكي حقك كله و يعتذرلك كمان"
بصيت له و عيني بتلمع من الدموع ,اترميت في حضنه و فجأه حسيت بتخبيط في وشي.بدأت ارجع لوعيي بالتدريج لحد ما فتحت عيني على صوت زعيق رينا "ريمممممم قومي بسرعه في مصيبه". ببص حواليا لقيت الصندوق متكسر .
بس المشكله ماكانتش في الصندوق.المشكله كانت في اللي جوه الصندوق.
**********************************************************************
أنت تقرأ
الكوستال
Actionفي عز العتمه و الخوف صوت نقي بيطمني و ضوء خافت بينور و ينطفي مش عارفه ليه ضوءه مش بيدوم بس اكيد .....اكيد في يوم هيدوم.