بقيت ..بهل حال ...لا اعرف اكل ..ولا اعرف اسولف ...ولا اعرف اسوي شي ...وعيني عليها ...جانت جايه ..وي رجال ومرة ...كبار...واطفال 2.......واهلي ياكلون ويشاقون ...
كامت ...اني عيني عليها وع اناقتها ....لابسه حذاء احمر عالي ...وصوت الكعب ..رغم ..الهوسه..عبالك موسيقى باذني .....تك تك ....راحت ..طبت للحمام . ...
دقايق ورجعت ...شافتتي بس نضرة.ومشت ...كلت لا مشافتتي ...اكيد....منتبهت.
يمه عمار شبيك ....
ها يمه شبيه ....
ماعرف سارح وعيونك مثل الطير
ماكو شي يوم ...بين ماسولفت وي امي ...
ارفع راسي ماكو ....
طلعو .....
لا لا شبسرعه ...وين راحت ..دورت عليها بعيوني ماكو ...
اوف ...هسة شبيك انت انثولت اصحى ابو ادهم شسمك ...ابو ادهم ....
يعني اطفال وزوجه ...
لا اني اكلت ..بيومها..... ولا اني عرفتها وشفتها زين ...
ضلت امي تحجي عليه ...
اكلت ..واباوع استبرق توكل بمهند بديها ...
ادري ربي هلجيه شو بس قهر ....
واني دماغي مشتت مدري شبي ...
كتلهم نرووح تعبت ..
هاي شلك بيها بعد حلويات وجاي ..
ضليت كاعد واني دايخ ..ماعرف ..الي ديصير بيه شنو شكد مرت علية نسوان ..او قبل الزواج علاقات مصار هيج ...ولازم اخلي حد ...شنو جاهل اني......
كملنه كمنه ....
صعدنه بسيارة ....
كتله سوق انت مالي واهس ...
شجاك ..مو جنت متحمس زايد لا حبي تعبان مال سفر ...
لا هاي مشتاق لام ادهم ...
ييييي !!!!!!!
بكلبي كلت هيه حايره بيه ام ادهم حايرهه بروحها واهلها ...الله يهديها ...
الطريق ..كله مشغل اغاني بس دوخني ..بيهن مال طربك ..
صح اصغر مني ...بس يحب هلهوسه ..كتله بربك طلعته شي هادئ وحلو ...
كال تدلل اسمع. ...راح اسمعك شي حلو ...ولو اعرفك لو كاظم لو هيثم ..جورج وسوف
كتله دسمعني ...ابو الهوسة ..
حلو كلحن حلو
اسمع اسمع
امي و واستبرق سوالف ...
كتله اللحن حلو لحد هسة ..
هذا منو ..
كال ربعك اسمع ....
تبدي ...تغمض عيوني ..شوكت وارتاح منك ...
هذا منو الشاعر ..
ضياء الميالي. ..
هاااا حلو
غمضت عيني ..سمعتها كلش حلوة جميله ..وحزينه ..وكلماتها روعه ...
تخلص واكوله عيدها ...
هههههه عاشك .
.لا عمي ...حلوة ....
يامه كتلك انه احبك .
...وادندن
سرحت بغير عالم ...ماعرف منو بي ...بس الحمرة الحمرة صارت كل تفكيري ..رجعت ابن ال 17 من يسرح بوحدة ...
وصلنه للبيت كتله اريد ..اسم المطرب ...بوست امي وصعدت بلغرفه بدلت ....
ونمت ....خليت سماعات ..وكعدت اسمعها ..حتى احفظ اللحن ........هناك وفكري يرؤح بشعرها الليل ...والشفايف ....واحس بهوى بارد مجرد مافكر بيها .....نمت واني الاغنية ..مشتغله ....
كعدت الصبح ..مصدع ...شفت مكالمات ...من مرتي ...نزلت غسلت ...وخابرت زينة..ام ادهم ...
سلمت عليها ...وسالتها ع الجهال .....وسوالف...وراحت ...
رحت يم امي ...وتريكت ..وسالت ع مهند..كالت نايم ....
يمه هذا يضل هيج اكل ونوم ...لعد المن فاتح الكهوهه..وخبصني بيها خوش مشروع ... متكوليلي ..يايمه
..بس بليل يروح الها ...اووف منه ..راح يجلطني ....
كعد مهند ....هلا قلبي صباح الخير ياعمري كامت استبرق بوسته ...اشوفهم بلمطبخ وهوة ضايج ...يوخر بيها ...
نداريت ع امي كتلها راح اطلع ..كالت وين يمه ..
بشغلة ...صعدت بدلت ...
نزلت كتلها رايح ..
مودع بالله يمه
طبيت للمطبخ كاعدة توكلة ....اني ضجت ...ماعرف ليش ..
كتلهم طالع....
مهند وين ..
بشغلة ....
يمعود حارة تعال..طلعاتك سويها بليل . .
.لا لا ماتاخر يلا رايح
طلعت بلكراج ... اخذ السيارة لا لا ازدحام احسن تكسي ...ضليت واكف اني وين رايح لامجد ...
اوصل للباب وارجع شعدي رايح ..بابا اعقل ..
رديت رحت ورجعت ..3-مرات ..
امي صاحت
يمه عمار شجرالك اسم الله اباوع عليك بلجامه رايح وجااي ...
ها امي ماكو شي بس متردد اروح لو لا ..
اسم الله وهسة وين تروح ..
هاا يم اصدقائي ...
شعدك وياهم شي مهم
هااا
يلا رايح ...
طلعت واحجي ع روحي ..شبيك انت شصار بيك ...صعدت تكسي ...ماصدك اوصل بسرعه بس زين ابو التكسي ساكت ماسطرني ..وصلت ...متردد بله شيكول عليه هسة يوميه جااي ...
ارجع لو شسوي ...
رجلي.... ودتني للقسم ...دورت عليها ماكو برة ..دكيت ع امجد سلمت عليه ..
كتلة..انت وين كال اني بلبيت ليش
هاا ليش ماعندك دوام
لا اليوم ماكو ....ليش اكو شي ..
لا حبي عبالنه نشاوف ..
تعال للبيت ..
لا لا باجر اجيك ....
يلا اخذ راحتك ..
سديته ماعرف شداسوي بروحي مخبل عاقل ...
ضليت انتظر يم القسم اريد اشوفها ...
طلعو بس ماكو هيه ....
رحت للسنتر ماكو ...
مليت ..من روحي ..وكلت ارجع ....مشيت ...واسمع واحد يصيح استاذ استاذ ....
اندراشوفها هيه ....وكفت بمكاني ...
هلو استاذ شلونك ..
الحمدلله ...
استاذ عزفك كلش حلو وبي روح ...
شسمك..استاذ .....
اني عمار ...
الله شنو هلاسم الحلو ...
تسلمين ....
تعال ...للسنتر ...نسولف ...مشيت وياها مثل الطفل وامه كدامه ......وقلبي يرجف ويدك سريع ....عمار اتعذر منها وارجع ..شبيك ....بس رجلي ...اخذتني وياها
وصلنه ....كعدنه ...
استاذ ...اني اضيفك شتشرب...
لا لا ...شنو انتي ششربين ...
معرفت اسمج ...اني سهر..
سهر..
ي سهر ..
حلو ...وغريب ...
عيونك الحلوات ...
كمت ..جبت شي بارد...
وكعدنه نسولف ع الموسيقى ..وهلتفاصيل ...
وجانت حركاتها ...وتصرفاتها طفله ....يييي طفله محبوبه ووكلها ..روح ..وحياه ..
اكوحركه عند البنات تخفف الحمرة سوتها بلكلينس ...
وخلتها ع الميز ...
كالت استاذ عمار اني عندي محاضرهه ..ولازم اروح بس اريد شي منك ..
كولي ...ممكن اتواصل وياك ..
ي طبعا ...
انطيتها رقمي ووصفحتي ع الفيس ...
وراحت ...
اني هم كمت ..وقبل لا اكوم شفت منا منا ماكواحد منتبهه اخذت الكلينسه ..وخليتها بجيبي ..وطلعت ركض عبالك بايك ..بوكه ...رجعت للبيت فرحان ..وضايج ..ماعرف شبيه ....شنو هذا وشيسمو ...سلمت ..وصعدت ..طلعت الكلينكس ضليت صافن عليه .....واشم بيها ..
وارجع وانتبهه ع روحي كمت داذبها ...بس ترددت .
ضميتها بجنطتي وقفلت الجنطه .....ونزلت...
....بين اهلي. ...واكيد اتصلت بزوجتي ..وحسيت احساس محلو . ابد اول مرة احسه ...
وراها نمت ...
دك الموبايل ....رقم غريب ..كمت فاز هيه ...
جاوبت ...الو.
الو ..شونك استاذ ..اني سهر ..
كمت عدلت روحي ..
اهلا سهر شونج ..
تمام ..وانت ..
بخير...
بقت تحجيلي عن حياتها وتفاصيلها ..و اهلها ودراستها ...وتشاقه ..وتضحك ..وتكررت روحتي للكلية اكثر من مرة ...بس الكل انتبهه عليه ..تغيرت وصار ..عندي ..شي شاغلني ..الموبايل بيدي ...ولا يفاركني ..بس جنت الوم بنفسي ..ليش هيج اسوي ...وارجع واكول ممسوي شي..اني مجرد اعجاب ..
بقيت ع هلحال ...لحد مصار موعد سفري ولازم ارجع ..لزوجتي وعائلتي ...
هنااا حسيت ..عبالك صدك ..راح ارجع للغربه ..وماريد اروح اريد ابقى هنا ...بس لازم اروح اطفالي ووزجتي مالهم ذنب بشي ...اي احسن ابتعد. .واكطع كل اتصال بيها ...وحتى ماجاوبها ...ي عمار مو طفل انت .وانت تعيب ..ع اخوك ..وام ادهم تحبك وحقها ملتهيه بلاطفال لا تبرر باهمال وهلسوالف ...ارجع لنفسك ..وهاي ..بعدها طفله ...وشي جديد ..ممتعلم عليه ...ضليت بهل دوامه ...
حجزت ..ع ثاني يوم اسافر ....بقيت يم اهلي ..وغلقت تليفةني قررت ارجع لحياتي ..وكافي ..هل تصرفات ...
صار الليل ..صعدت فوك..كلت هسة ام ادهم شنو ذنبها ...واني غالق فوني ..فتحتة ...واشوف سهر..20-مرة.داكه ...ورسائل ....دكيت ع ام ادهم ..وحجيت وياها ..وكلت الها ...العصر طير الطيارة ...يعني بليل يمكم ....وسديته مجرد ماسديته دكت سهر ..تحيرت اجاوب لو لا .....جاوبت ...
وينك عمار ..عفيه
موجود بس
شنو تخبلت عليك ..
شحني خلص ..
وهسة لازم اروح اشحنه ..
وانام عندي سفر باجر ارجع ..
راح ترجع ...
ي ..زوجتي واطفالي ..ينتظرون ...
عمار ...
نعم سهر ..
عمار ...
نعم...
عمارر ..
هههه نعم والله ..
اني
احبك ..
وسدت الخط ....
