#احمد

الجزء 12

قصه احمد الجزء 12
للكاتبه فردوس عبد اللطيف
الى عاصرو مرحله مابعد حرب الخليج يتذكرون كيفيه انهيار الجيش العراقى والمرحله كانت صعبه جدا انهيار الكهرباء والماء انقطاع التلفونات وحصار اقتصادى ونحن فى طريقنا الى بغداد شاهدنا الجنود العراقيين يمشون على اقدامهم جاءؤ مشيا من الكويت بعظهم مشى 3 يوم واخرين مشو 5 يوم شاعدتهم بعينى ذرفت دموعى لانى خدمت بالعسكريه مابين الخدمه الالزاميه ومابين خدمه الاحتياط تدربنا على القتال والصبر كيف الانهيار بهذه البساطه بكيت ولكن ما الفاءدة وماذا يخبىء لنا القدر مستقبلا
مرت على الناس ظروف قاسيه بالنسبه لى ازدهرت تجارتى وفتحت اربع محلات للجمله ومحل للمفرد كبير ونموذجى فى المنصور ورزقت بولد اسميته طارق
كنت فى محلى بالكرادة خارج دخل شخص له هيبه
السلام عليكم
عليكم السلام تفضل استاذ
لمن هذه السيارة المركونه خرجا رقمها كويت
انا صاحب السيارة اشبيهه
انا النقيب مدحت من المخابرات العامه وهذة سيارات الكويت وصلتنا اخباريه ان تكثرها مفخخه ويودون تفجيرها ببغداد
والمطلوب استاذ
لازم ناخذها للداءرة بالمنصور ونفحصها ونعطيك تصريح للخروج بها بكرة تعال.... او يالا تعال معى انا فارغ الان وراح اساعدك اخلص الموضوع بسرعه
انا بصراحه انعصر كلبي بس مجبور انفذ
طلعنا بالسيارة دخلنا فرع خلف المخابرات بالمنصور قرب البرج كان حرس ببوابه سلم عليهم كانه يعرفهم
كلى اخى بعد انت هذا حدك انزل انتظرنى هنا على الرصيف وانا راح ادخلها لانك ممنوع تدخل
نزلت وهو شخط بالسيارة وطلع بالشارع كلى راح ادخل من البوابه ذيج
بقيت واكف انتظر بالشمس 3 ساعات وماكو رحت تمشيت على الحرس الى سلم عليهم سالتهم النقيب اخذ سيارتى يفحصها هنا يمكم بالداءرة وما طلع
ضحكو يانقيب ياسيارة ياداءرة
هذا بيت مسؤول واحنا حرس بوابه دايرة المخابرات امامنا احنا الفرع الى خلفها طيب هو راح كبل
اى كبل يعنى نهايه الفرع ويطلع للشارع العام
عمى سيارتك راحت روح بلغ لحك لا تختفى
زين هو سلم عليكم
هههه اى واحد يسلم نرد عليه
بس كلى انه نقيب وراوانى الباج
عمى يبين انت متعرف شجاى يصير بالبلد حصار وحراميه كثرو وتزوير وفوضى
انسطرت كل فلوسي اشتريت بيهه السيارة وتاليتهه تروح ياربي شسوى
رحت مركز الشرطه همزين عديلي نبهنى فد يوم وكلى كل مستمسكات السيارة استنسخها وخليهه بالبيت تفيد لان الاخ اخذها مع المستمسكات وحتى جنسيتى الاصليه
كل سيارة بيهه عللمه مميزة
تميزهه عن غيرهه كان اكو فطر بالامام همزين هاى علامتها .. تعرفون الشرطه والضابط المسوؤل عن التحقيق كل يوم يطلب منى شي
ماظل مكان ولا حدود ولا شارع مادورت بحثت فى كل مكان فد يوم اجه صديقى كلى سيارتك انباعت امس ليلا ويمكن راح يصدروهه لعمان للمنطقه الحرة وبعدين يغيرون لونها ويدخلوها يبيعوها هنا
رحت على الفندق الى كلى عليه ماشفتهه كلت بلكى اروح لطريبيل بالحدود واشوف مدة شهر طبعا فترة سرقتها
سافرت الى طريبيل دخلت على مدير الحدود حجيتله القصه كال والله عدنه كم سيارة حجزتهم شكيت باوراقهم كانهه مزورة مركونه بالكراج روح شوفهم وهم من حجزناهم اشو محد اجه سال عليهم
رحت للكراج والله ما اخفى عليكم قلبي ينبض لان هذا كان اخر امل لى واذا سيارتى مركونه من دوختى عبرت السياج الحديدى بدون ما اروح على المشاى فقدت طلعت السويج من جيبي وفتحتهه وصعدت بيهه فرحتى ما تنوصف بتلك اللحظه ضحك مدير الكمرك كتله اى هاى سيارتى كلى ميخالف ما نكدر نسلمهه الك
لازم نسلمهه الى مركز الشرطه الى انت مسجل البلاغ بي
رجعت واخذت لجنه من مركز الشرطه بعد كم يوم واستلموهه وبقت يمهم لحد ما تكمل الاوراق وقرار القاضي استلمتهه وسطت فرحه الاهل يمكن طولت عليكم بهذا الحدث وهدفى ان لا تثقو باحد وخلى املكم بالله
بعد فترة اجانى ضابط من مكافحه الاجرام وكال منو احمد كتله تفضل انا احمد
كان عندك سيارة مارسيدس حديثه وانسرقت
نعم بس لكينهه
احنا قبضنا على المجرم سرق سيارة احد ضباطنا وسويناله كمين وقبضنه عليه وضمن اعترافاته سيارتك بس نريدك تجى تتعرف عليه علمود الدعوة القضاءيه
او ياربي شيودينى
رحت يوم الثانى وجابو 10 اشخاص كالو منو منهم تعرفه
مشيت شفته بس متغير مبهذل ولابس بجامه وكفت مقابيله نقيب مدحت ضحك وكلى عمى لانقيب ولا شي ابريلى الذمه
تنازلت عن حقى لانى لكيت السيارة والاخ كان مفوض بالمخابرات ومطرود صار يمارس السرقه مهنه
الحمد لله ربي فرجهه وبعت السيارة وربحت بيهه
هذا الدرس كان قاسي بس الحمد لله كدرت اعبر المرحله ورب العالمين رزقنى بهالفترة شغل وفير سكنت بالمنصور ايجار شكد لزمت فلوس ما يهون على اشترى بيت لازم مو باسمى لان القانون الا تعداد 1977 فى بغداد
بس جنان تشترى ذهب دكول للايام السودة