#احمد

الجزء 23

قصة احمد جزء 23
للكاتبه فردوس عبد اللطيف
بالبصرة لازم نصدق وثايق الولد ببغداد بالتربيه ولازم واحد يروح كالت جنان انا اروح بذاك الوكت كان الرجل او الولد مهدد لو قتل على الهويه لو خطف لو يلزمو مشتبه يعنى صعبه نروح ماكو غيرهه هى تروح تدبرهه
وصلتهه للكراج وصعدتهه بالسيارة وكلبي وياها ياربي احفظهه امانه عندك وصلت عندى سايق صديقى اجرته يوديهه مشاوير التربيه والتصديقات كانت بغداد بعد الساعه 2 ظهر تعزل كلمن يروح يدخل بالبيت وخايف حتى ببيته خايف خلصت المعامله وصدهه بسيارة ووصلت الحمد لله عدت على خير حجتلنه شنو وضع بغداد والناس خايفه حتى من اقرب الناس الهم واشلون يجيبون الشخص معصوب العين ويقتلو على الرصيف بمنطقه اليرموك وطلقه براسه ويمشى القاتل بكل برود اعصاب كانه قتل ذبانه ما اعرف ليش هذا القتل ومنو هؤلاء وشوكت صارو مجرمين
والمحلات صارت بداخل المناطق وكل وا حد يمشي بالشارع يتلفتت خايف من الغدر
بالبصرة كان بس قليل مو مثل بغداد داومو الولد
ابنى الكبير دخل معهد طيران بعمان ولازم ادزله مصرف شهرى بدت بغداد تتشكل بيهه صحوات وصارت سيطرة الصحوة يم بيتنه بدو جنان والولد خلى نرجع لبغداد بيتنه محلاتنه شنسوى بالبصرة
صحيح جان بالبصرة ماعدنه اثاث بس شي بسيط مال تمشيه حال دواشك على الارض وثلاجه من سفوان وطباخ صغير وجلسه عربيه بالارض ..على هالبساطه كان الى يجي عدنه يكول بيتكم حلو ومرتب ..اهم شي الراحه والانسان يكدر يخلق السعادة حتى لو كانت حياته بسيطه كلنه خلى نروح لبغداد بعطله نصف السنه
قبل مانسافر سوينا جناسينه ام الفسفورة اول شي انا وجنان ورة فترة سويت للولد صار رقم السجل مختلف بجناسي الولد
وصلنه سيطرة العمارة كان شرطى واكف طلب الجناسي شاف جناسي الولد وظل يصيح هاى مزورة نزلهم
شنو هاى احنا وين ياستار
الولد لاشايفين بهذله ولا شرطه ولا حرس لان طلعنه قبل لا تتشكل هاى المجموعات
صاحتنى جنان انا متوتر كلتلى الجوازات وشهادات الجناسي بفايل بالجنطه الحمرة اول ما تفتحهه
رحت طلعتهم وايدى ترجف طبعا الاخ وظة الولد يم الضابط جوة
طلعتله كل المستمسكات تفاجىء هااا اى هذنى مظبوطات
زين شتحجى وياه المظبوطات مال النظام السابق وجناسي الفسفورة مالت الحكومه الجديدة شتفهم والمن تشكى رجفنه وخرع الولد واحدهم صار وجهه اصفر
مشينا وكملنه طريقنا لبغداد كلهه سيطرات بس محد سوة بينه مثل سوايه الاخ
شويه كان الوضع متحسن
بدينا نفكر نجى لبغداد ونفتح محلاتنه وعبالنه نرجع مثل قبل بس هى تلوثت بدم ابرياء اشلون ترجع بغداد السلام
كملنه العطله ورجعنا للبصرة
كلمت شريكى كتله اريد ارجع لبغداد انت تدبرهه وحدك
كال لا وبعدين صاحب العمارة زيد الايجار بعد ميسوى الشغل
كتله اوكى نبدى نصفى ولو هو كان امين وطيب بعد شسوى حنينه لبغداد كملو الولد امتحانات وبهالفترة
استلم الجيش من الصحوات وصارت سيطرة بمنطقتنه متكونه من الجيش
الحمد لله بدت بغداد تزهو
رجعنا لبيتنا فرحانين بعد غربه 4 سنوات شفنا بيهه بهذله وعذاب بس نكول الحمد لله على كل حال
جنان استلمت البيت وانا رحت على محلى بالمنصور ويه الولد
اول يوم جاى ينظفونه ومن عزلو ساعه 9 ليلا كان وياهم ولد اخت جنان يعنى 4 شباب واكفين بباب المحل وانفجرت سيارة مفخخه بعد عنهم 100 م انبطحو بس الشظايا مرت عليهم اجونه يركظون متربين وشعرهم معكش وكله تراب وجوهم سودة
للحكايه بقيه