#احمد

الجزء 15

قصة احمد الجزء 15
للكاتبه فردوس عبد اللطيف
طريق الفلوجه السريع يطول ساعه بس رحنه على البساتين وطريق ترابي طولنا 3 ساعات لان الطريق السريع انقطع قبل يوم طلعو عواءل وصارو بين نيران الجيش العراقي وبين الامريكان واحترقت السيارات وماتو عواءل كثيرة وصلنا الفلوجه اجرنا بيت صغير مابي غير فراشات دفعنا ايجار 2 شهر وساعدونه بعض المعارف جابولنا طباخ صغير وقتينه غاز بقت شغلات رحنا للسوق اشتريناهم مستلزمات الطبخ بعد 15 نفر شتوكلهم زوج بنتى رجع لبغداد وبقى بيتنا اجوله سواق سيارات الشرطه اخذو السيارات وقفل المحل والبيت وانقطع عليه حتى الطريق الترابي عود يجيبلنه ملابس وشغلات محظرتهم جنان دخلو الامريكان لبغداد بس الفلوجه ماكو شي هدوء خلال 5 يوم انتهت الحكومه وسقط الجيش وانفتح الطريق كتلهم لازم نرجع لبغداد اشتغل السلب والنهب وبيتى ومحلى كالو كلنا نروح مانبقى نعيش سوا ونموت سوا حظرنا فانيله بيضا كالو خليهه على السيارة حتى لايرمونه الامريكان رجعنا على طريق ابو غريب نسمع رمى ومنعرف شنو وصلنا لمخازن الحكومه فى ابي غريب ونشوف الناس مثل الذبان المتجمع على القذارة والمخازن تحترق ونسوان ورياجيل كل واحد شايل شغله وسيارات حديثه مابيهه ارقام شفنه واحد مقطوعه ايدة وبايد وحدة يجر سيارة بيضا كله نسيبي بعد الله شيريد يسوى بيك ياحرامى ضحك كانه يمدحه
بعد 3 ساعات وصلنه لبغداد هم شفنه ناس جايه من القصور ومن الاسواق المركزيه وبيكبات مليانه كراتين استغفر الله كلهم فرحانين بالنهب الله يسامحهم وصلنا للبيت كانت الكهرباء مقطوعه وكنت مخلى بمجمدة خزين للمحل 2طن دجاج كله مايع وريحه جيفه نظفنه وهوينه البيت وفتحنا المحل وبدت الحياه ترجع الناس ابو الصمون فتح واهل المنطقه بدو يرجعون والسلب مستمر تمر علينه سيارات محمله بعضهم يعرض علينه نشترى سكر او رز لكن رفضت اشترى اى شي مسروق مرت شهور وصلنه شهر 7 البلد بدون حكومه كان اخى ضابط امن وهرب لبغداد كان بايت عدنه اجه ابن اختى جابر افتهم انو اخى بكرة يطلع ب 7 الصبح للبصرة
صبح الصبح اخى طلع ب6 بقى ابنى الوسطانى كاعد على التلفزيون يتفرج طلع جاب خبز وقشطه من المحل وترك الباب مفتوح من رجع شاف سيارة ماليبو بيهه 5 اشخاص فاتحين البنيد على اساس عاطله بس هما يراقبون البيت دخل واغلق الباب داخل الهول يعنى الباب الرءيسي مفتوح كنا مطمنين شاف اشخاص مرو من الشباك بدون صوت على اطراف اصابعهم وحاولو يفتحون يدة الباب مافتح لانه كان مقفول يكول لو طارقين الباب كنت فتحته تصورت عمال المحل اجانى وانا نايم بالغرفه
بابا اكعد اكو حراميه دخلو بالمدخل كان عمرة 12 سنه
طفرت وكنت متوقع يحصل هيجى شي وكنت مشترى رشاشتين ومسدس سحبت اقسام الرشاشه وفتحت القفل على كيفى واذا شخصين موجهين اسلحتهم على وماخذين وضعيه جلوس على النص صار وجهى بوجهم لحد الان ما انسى شكلهم صاح على
ادخل ولك بصوت عالى
اقفلت الباب وفتحت الشباك الجانبي ورصرخت اطلع من بيتى منو انتو ورميت بالرشاشه وغيرت مكانى ردو بالمسدس 3 طلقات زرفو الباب واستقرت بالقنفات رحت على شباك تحت الدرج ورميت هما طلعو وظلو يرمون على منين تطلع الطلق يرمون بس انا متدرب بالجيش واعرف طريقه المواجهه والله كلت ميدخلون لبيتى الا على جثتى ولا اخليهم يدخلون طفر ابنى الكبير واخذ الرشاشه الثانيه وصعدنه بالسطح الاول نرمى ونتجى على الحايط زوجتى ظلت تصرخ من الشباك بلكى الجيران يطلعون كانت متوقعه انى انكتلت وقفلت باب الغرفه عليهه هى والاطفال واحد منهم انحصر يم باب المطبخ وظل يدك بالباب ابنى الصغير طارق شافه اصله ويحمل رشاشه وتوثيه بس الحمد لله كان الباب مقفل ايس وصاحو عليه طفر من السيج وانهزم
هربو وصعدو بسيارتهم التمو الجيران نزلت انا وابنى حلكى يابس وارجف واباوع على وعلى ابنى اخاف متصوبين الحمد لله خلصنه منهم وفرو بس اخى ماصدك ان ابن اختى هو الى جايبهم وبعدين سلمه الهم بايدة ورة فترة ولحد الان مانعرف عايش لو ميت دفعنا فديه 5 دفاتر غير الفلوس الى كانت عنده اعتقد 2 دفتر بس مانعرف وين انباع
للحكايه بقيه