#احمد

الجزء 13

قصة احمد الجزء 13
للكاتبه فردوس عبد اللطيف
كلما دكول جنان خلى نشترى بيت اعاند واخلى كل فلوسي بالمحلات واابضاعه والعقار تصعد اسعارة رحت للبصرة ابوى كبر وصحته تعبان وعيونه مايشوف بيهم اخذته لبغداد سويتله عمليه لعيونه بمستشفى اهلى والحمد لله صار احسن وكل فترة ارسل له فلوس او حليب نيدو لان كان حصار والحليب حسرة على الناس
مرت السنوات واحنا باحسن حال ماديا نصرف بذخ وسجلنا باحسن نوادى ببغداد الصيد الفروسيه والعلويه ونقضى ايامنا كلهه سعادة فى هذة الفترة كبرت بنتى وصارت جميله وتقدملهه ابن جيرانه فى البدايه كنت رافض ازوجهه لانهه بعدهه صغيرة بس هى كانت موافقه وتريدة لانهه احبته والولد زين وعاءلته محترمين والحمد لله تمت الزواجه واشغل معى نسيبي اسمه حامد كنت اعتبرة ابنى وصار عدهم اطفال بنت وولدين
توفى ابي وصارت روحاتى للبصرة قليله لان والدى كان عزيز على قلبي بعد المن اروح وانشغلت بعملى
تقريبا فى سنه 2000 كان شخص من اربيل يجلب لنا بضاعه من الشمال بسعر اقل من استيراد بغداد وكان عندى 20 علبه من قاتل حشرات
وكان شخص عربي الجنسيه يستورد هذة المادة من المصدر وما تنباع لانهه اغلى من سعر المهربه من الشمال اتفق مع صديقه ضابط مخابرات واجو لمونه  مجموعه كل واحد عندة واخذونى انا وعمالى 3 بدون ما نعرف السبب واخذونه بشهر تموز الى المخابرات صعدونه بكوستر وكالو غطو راسكم بالقميص والى يحاول يباوع ينكفخ اول شي اخذونه بقاعه ونزعونه كل ملابسنه ما عدا اللباس وكالو دورو وجهكم على الحايط فى هذة اللحظه تذكرت التجار الى انعدمو بدون ذنب تشاهدت وكلت راح ننعدم اشو بقينه فترة ايدينه على الحايط بعدين صاحو بالاسماء وكل واحد خلو بغرفه يعنى وزعونه على العنابر وكل عنبر او غرفه بيه عشرة او 15 كانو قبلنه الغرفه ظلمه وبيهه حمام واحد للكل وصابون ماكو وبشهر تموز وماء حار نشرب من ننام ما يكفى المكان لان المساحه متر فى متر 
لما دخلت الغرفه كنت ساكت بس دموعى تصب صار عندى صداع فضيع طلبت مهدى اجه دكتور كال منو يريد مهدى كتله انا عندى صداع
غلط على وانطانى وكلى بعد ماكو لاتعيدة ترى تنهان
بديت اتعرف على الاشخاص الى بالغرفه عرفت انه احنا بالحاكميه بالمخابرات زين  هذوله شغلهم سياسه واحنا شعلينه بالسياسه كل واحد عندة قصه بعدين نالف الكم بمجال اخر
اليوم الثانى بدا التحقيق طبعا من كثر ظلمه الغرفه مانعرف احنا بنهار لو ليل ارسلو على عيونى مغطاه بوصله مشدوده جلست على كرسي بدا التحقيق منين عندك قاتل الحشرات اى قاتل عندك بالمحل اشتريته والكل عدهم
واشتغلت الاهانه والضرب بالكيبل ويكلى احنا محترمين عمرك  انا ما متوقف يوم بمركز شرطه تالى عمرى ادخل بهيج مكان وظلم شعلاقه المخابرات بالبضاعه بس صوته يرن بذانى لحد اليوم ما ناسي وحتى احد عمالى ذب الصوج على وتهرب وانا هم كتلهم العمال ما الهم علاقه انا المسوؤل ما الهم ذنب مر اسبوع ويوميه تحقيق نفس القوانه زوجتى من مر اسبوع ارسلت رواتب العمال الى عؤاءلهم كالت ناس عايشين على الراتب
مر اسبوع ثانى توقعنا يكبر الموضوع ونروح بالرجلين
عاءلتى حاولو يوصلون لكن دون جدوى وكلما يوصون علينا يزيدون بالاهانه والضابط يكلى عندك اربع محلات شدعوة الاخ حاسدنى
بعد ما عرضونه على قاضي المخابرات افرج عن العمال وبعض التجار بقينا كم واحد حولونه على الامن العامه
اما الى طلعو دز عليهم ضابط المخابرا بالليل
كلهم شوف باجر نطلعك اجيلك بعد بكرة اخذ حصتى
العفو شتقصد
اريد 5000 خمسه الاف دولار ثمن خروجك وحريتك
طبعا يوافقون وهما طلعو واحنا خلونه بسيارة ودونه للامن العامه استلمونه من الباب ودونه الى العنابر بس كلنه سويه شفت جماعتى من دخلنه سالونه المساجين شنو قضيتكم كتلهم انا قاتل اخترعو عبالهم مجرم ضحكنه كلنالهم لا قاتل حشرات وصارت نكته من يجى الشرطى يصيحنه ماكو اسم كله ارقام او يكول وين جماعه القاتل
شويه بالامن كان اكو هوا ومساحه اكبر والتعامل افضل
للحكايه بقيه