الـكـاتــبــة : نــــازك الــبــور✎
مرحبا .. اسمي (علي حسين محمد) من البصرة طالب مرحلة رابعه هندسة حاسبات بجامعة بغداد
( علي 24 سنة حنطاوي عيونه بنية كبار طولـه 178 ... يحتل المركز الثالث كـ ملك اناقة الجامعه .. يعني فد شي جاذبية و شخصية) ..
ابوية متوفي من الحرب الايرانيه العراقيه .. عمي مسؤول عنا و هو بمثابة ابونا. . ولو صارم و متشدد ..
امي ربت بيت .. عندي اخت وحده " زهراء " طالبة رابع اعدادي ..
امي و زهراء روحي بالدنيا .. حياتي عباره عن شغل و دوام و طبعا مانسى الجيم.. و التمارين .. احب احافظ ع رشاقة جسمي و طبعا الحديد و حمل الاثقال و التمارين مبينات ع جسمي و عضلاتي بس بشكل متناسق ماحب يبرزن بشكل واضح و اوفر .. مجرد احافظ ع جسمي ..
علي : يمة رايح للجيم محتاجه شي اجيبه الج بدربي
ام علي : سلامتك گلبي .. محروس
علي : رحت ع صاحبي ليث .. هذا الضلع صديق الطفولة ابد مفتركنا من الابتدائية للكليه احنا سوا ..
ليث : لك هلاا بالضلع علاوي .. تعال طب طب لما اجهز جنطتي و نطلع ..
علي : اوكي شريك... يا الله .. طبيت كعدت جابلي مي ..
رحنا للجيم .. كملنا تدريب و طلعنا بالليل نتمشى بشوارع البصرة
ليث : اويلااه باجر سبت يعني نروح لبغداد .. يعني قسم داخلي ..يعني شغل يعني كليه و دراسه .. شوكت نتخرج و نخلص
علي : الله كريم مبقى شي .. كله 3 اشهر و نتخرج ..
ليث : اي هيج و نتعين .. الله
علي : الله يسمع منك
ابو بنين :(عم علي ) ام علي .. ام علي
ام علي : سمعت ابو بنين يصيح طلعت .. هاا ابو بنين.
ابو بنين : ساعتين اصيح وينج .. وين ابنج ..؟
ام علي : طلع ويا صاحبه ..
ابو بنين : ميبطل طلعاته هاي .. جيم و هالسوالف التعبانه .. اني مو مانعه
ام علي : يا ابو بنين هو الولد ممقصر ديشتغل .. شكو بيها اذا شاف حياته اشوي و بعدين ما وراه مشاكل اوليدي ..
ابو بنين : شيشتغل بربج ام علي هو كله محل مبايلات ابغداد مطكطك .. كضبي ابنج احسن. ..
علي : طبيت للبيت لكيت عمي كالعاده مسوي حفلة صياح .. يا ستار ..
السلام عليكم ..
ابو بنين : هلاا ياهلااا جان بقيت للفجر.. الله اعلم وين تروح ويا صاحبك هذا و شتسوون ..؟؟
علي : عمي مالها داعي هالصياح و الحجي .. تعرفون اني بالجيم ..
ابو بنين : هي هاي الجامعات و الدراسه اتفسد اخلاقكم .. الف مرة كتلج ام علي بطلي ... للسادس و كعدي .. عاندتي و فسد ابنج
علي : انا بطبعي عصبي اذا رديتله متخلص للصبح... عفته و طبيت للغرفه ذبيت جنطتي و اخذت هدوم و طبيت للحمام ..
