ضمادة للروح

الجزء 05

_محجوب راشد الحاج

_ ايوا مين معاي؟

_انت صاحب العربيه بوكسي ملاكي رقم 33042

_ اي معاي منو

_ معاك ملازم اول أحمد حمد.... العربيه دي عملت حادث في الطريق والشخصين الفيها اتوفوا لازم تجي فورا لمستشفى(....) ومعاك أهل المرحومين

محجوب .... مستشفى شنو.... حادث كيف ...... المات منو ..... شهاب الدين وعبدالله ماتو ..... سعاد بقت تكورك ... في شنو اخوي مالو يامحجوب ....ووووووب علي .....ناديه قالت ليو انت لسا واقف امشي سريع ... سمعو صوت حاجه وقعت جنبهم إلتفتو لقو تالين واقعه على الارض مغمى عليها ..... إلهام ورجاء جو جارين رفعوها وبقو يرشوها بالمويه ..... سعاد لسا بتصرخ لمت ناس الحله كلهم ...ناديه ماسكاها وبقول ليها وحدي الله ياسعاد ..... محجوب جمع الرجال ومشى ..... بعد شويه تالين فاقت وكانت بتبكي وبتصرخ جيبو لي بابا ..... عايزه بابا ..... هو مستحيل يمشي يخليني ..... نادو لي بابا .......... دخلوها غرفتها وحالتها كانت صعبه شديد .

البيت جايط والناس داخله وطالعه... لحد الساعه12 مافي زول فاهم حاجه... كانت قاعده في غرفتها بتبكي وتدعي ربها انو الكلام دا يطلع كذب.....فجاه سمعت جوطه برا ...صوت رجال وعربات والنسوان صوتهم علا اكتر ....جات طالعه بسرعه ...رجاء بتقول ليها ارجعي ...تالين .دقيقه ...وهي ماسامعه بس جاريه على برا .....شافت محجوب وكم راجل بنزلو في جنازة من بوكس ....وهي لسا جاريه عليو .....قعد يكورك امسكو البت دي يابنات ....إلهام مسكتها ...قولي انالله وانا اليه راجعون ...ربنا يرحمو ويغفر له .... جرت يدها منها وصرخت في وشها ...انتي بتقولي شنو بابا ما مات ..انتو غلطانين هسي بابا برجع وماقاعدين هنا حنرجع لندن طوالي .....وبقت تصرخ بطريقه هستيريه بصعوبه حتى مسكوها النسوان ...زحوها من الطريق عشان يدخلو الجنازة يغسلوها ....مع الانفعال الشديد والبكى أغمى عليها تاني ...وقدر مارشو فيها مويه ماصحت ....جابو ليها دكتور الحله ...قال ليهم عندها هبوط حاد في الدوره الدمويه بأثر الصدمه اديتها دوا مهدئ بعد شويه بتبقى كويسه .....في المسافه دي كان خلاص غسلوه وكفنوه ....طلع راجل وقال بعد دا اختو وبتو واهلو يجو يشيلو العفو من المرحوم .....دخلت سعاد وناديه ...اما رجاء وإلهام كانو ماسكين تالين مسندنها .

.....أصعب حاجه في الدنيا انك تودع شخص عزيز لمثواه الاخير..... أصعب حاجه انك تشوف زولك الهو قطعه من روحك ممد قدامك لا حول له ولا قوه ....جسده معاك لكن روحو مع ربه ....تناديه على امل انو يرد عليك ....تعاين ليه على امل انو يفتح ويعاين ليك .....تحاول تقنع نفسك انو الحاصل دا كذب أو يمكن حلم .......لكن في النهايه................الموت علينا حق .

سعاد كانت بتبكي .....يااااود امي وابوي ....ياااسيد الرجال ...الليله ماشي وين .....وااااي انا من حرقه حشاي عليك ياشهاب ......راجل في الغرفه قال ليهم ماصح الكلام دا ياجماعه ادعو ليو هو محتاج دعواتكم هسي ...ياحجه سعاد انتي مره واعيه ..

سكتت وسلمت عليو و وقفت جنبو ....جات ناديه عاينت ليو وبتبكي بحرقه ...عافيه منك ياود عمي اعفي لي....وطلعت بسرعه .....تالين رجلينا ماشايلنها وبتبكي بأعلى صوتها ....واحد قال ليها اتصبري يابتي وامشي سلمي على ابوك ......جات وقعدت جنب راسو بقت تحضنو تبكي مساااااافه ترفع راسها تعاين ليو تبوسو في جبينو وتاني تحضنو تبكي وتبوس راسو .......الراجل قال ليها كفايه كده يابتي .....في واحد تاني قال ليو خليها شويه ...... محجوب قال ليها تالين خلاص بعد دا زاتو حرام ........رفعت راسها عاينت ليهم وهي بتمسح بيدها في دقن ابوها .... مستعجلين ليه ..لسا ماشبعت منو ..كلها 19 سنه العشتها معاو ....خلوني اشم ريحتو ....خلوني احفظ ملامحو ...تاني عمري ما حشوفو ....وحضنتو وقعدت تبكي وتقول ليو خلاص مشيت لحبيبتك وخليتوني براي ....قبيل قلت ليك ماشه معاك رفضت ليه ...ياريتك اخدتني معاك ...كان هسي نكون سوا ...ما انا برضو مشتاقه ليها .....خليتوني براي ليه ...اعمل شنو في الدنيا دي بدونكم ......وقعدت تبكي........... الراجل قال ليها يابتي اكرام الميت دفنو ...ادعي ليو احسن من الكلام البتقولي فيو دا وقولي إنالله وإنا إليه راجعون .....رفعوها منو وشالوه للدفن ...

علت اصوات البكى والنواح ..... اما تالين وسعاد حالتهم مايعلم بيها الا ربنا .

مرت اسبوعين والبيت مليان ناس .....و هي حابسه نفسها في غرفتها من يوم البكا قاعده في السرير متكيه على الحيطه بتعاين في السقف ....بتبكي اليوم كلو ...لا بتتكلم مع زول لا بتاكل لا بتشرب ......حتى لو جا زول يعزيها كانت شارده طول الوقت وبالها في مكان تاني حالتها كانت صعبه شديد لما خافوا عليها تجن ولا تموت .

(الموت ليس توقف القلب عن النبض ...........

بل هو توقف الحياة عن النبض في قلوب لازالت على قيدها)

يتبع....