رجعو بيتهم بالمسا وكانت مبسوطه خالص ومحتاره في الزول الفجاه بقى ظريف وبعرف يتونس ويهظر .......وفي اليوم التاني مشت لسوسن تتطمن على حمودي..
سوسن : امبارح وين ماظهرتي
تالين : طلعنا نغير جو
سوسن : اوووو.....حبكانات وحركات
خجلت وخدودها اتوردو.....ماكده والله
سوسن : اها شنو
تالين : ماعارفه .....المهم حمودي كيف
سوسن : مع اني ملاحظه ليك كل مانجيب سيره يوسف تغيري الموضوع لكن مامشكله على راحتك .....وحمودي كويس ....
رجعت البيت، دخلت غرفتها ...طلعت الكتب قرت شويه ....تاني زهجت طلعت الاسكتشات قعدت ترسم ...ماحست بالوقت الا لما سمعت صوت الباب فتح .... عرفتو وصل .......دخلت المطبخ وبدت تجهز في العشا ..... الوقت دا يوسف دخل الغرفه يشيل ملابس لمح الكتب والرسومات مبعثره في السرير وبقى يتفرج فيهم ....
مر كم اسبوع والحال زي ماهو ..بس يوسف اتغير شويه وبقى يتونس معاها اكتر ...هي في الحقيقه ما ونسه ...كلمه و رد غطاها بس احسن من العدم......
لكن في يوم .....كانت في المطبخ بتحضر الاكل ....سمعت صوت تلفونو ،كم رساله ورا بعض ....هو فتح التلفون شاف الرسايل عصب و شال التلفون رماه ضرب بيو الحيطه كسرو .....شات الطربيزه القدامو وطلع .....بقت خايفه ومخلوعه ...جهزت العشا خلتو برا ودخلت غرفتها ......و لما طلعت الصباح ...كان الاكل في مكانو ....وهو لسا مارجع .....ومن اليوم داك رجع زي زمان وأسوء كمان ......مابتكلم خالص وطوالي زهجان .....وبقى مابياكل في البيت نهائي وطول الوقت بشرب سجاير ..... واستمر الوضع كده لحد ماخلصت ال3 شهور ....وجا اليوم المفروض يرجعو فيه ...حتى سوسن كانت راجعه كوستي ...ودعو بعض ومشو ومن يومها متواصلين بالتلفونات ما انقطعو ابدا ......
رجعو الخرطوم ....وصلو بيتهم بالليل تعبانين نامو طوالي ولما اصبحو ريم جاتها تسلم عليها..
ريم : مشتاقين ياقلب ..عندي شمارات اسكتي بس
تالين : امجد صح
ريم : اكيد .... مش قلت ليك كلم اهلو و كلم محمد ....وحيجو يخطبوني ....هو قال نعمل خطوبه في العيد
تالين : طيب حلو ....يعني بعد شهر ونص
ريم : خااايفه والله
تالين : وتخافي ليه مش بتحبيه
ريم : الموضوع بقى رسمي ... دا المخوفني .....وما شفتي نظرات محمد لي وااااااي
تالين : ياخوافه هههههه
وقعدو يتونسو ويحكو لبعض عن الحصل معاهم في الفتره الفاتت .... بعد كم يوم هيام ولدت وجابت ولد زي القمر سموه يزن ... مشو ليها عند اهلها يباركو ...وثريه استلمت تالين ....ماعملتي حاجه لسا ليه ....ماشايفه شغلك .....عايزه اشوف اولاد ولدي بعد دا .. كانت متضايقه منها ...ساكته ومستحمله ....
أنت تقرأ
ضمادة للروح
Fanfic📝 بقلم: شيماء عثمان لا تحزن إذا جاءك سهم قاتل من أقرب الناس إلى قلبك ... فسوف تجد من ينزع السهم و يعيد إليك الحياة و الابتسامه !😍 في الدنيا كل يوم ألف فرقه .... لن تختفي الآلآم ولن تموت الحرقه ... فمن يستسلم فينا لجراحاته يمهد بيديه طريقا لغرقه...
