" မိုးစက်ပုံပြင် "

အပိုင်း(၄)

" မိုးစက်ပုံပြင် " .. အပိုင်း(၄) ...

••••••••••••••••••••°••••••••••••••••••••°



ကာတွန်းရုပ်လေးတွေနဲ့ underwear အတိုလေးကို ကြည့်ရင်း စည်သူ နည်းနည်းတော့ရှက်သလို ခံစားမိသွားသည်။ ယောက်ျားလေးချင်းဆိုပေမယ့်လည်း စည်သူရှက်တတ်ပါသည်။ အေးလေ.. ဘောင်းဘီကိုပါ အန်ဖတ်တွေပေကုန်လို့နေမှာပေါ့၊
သူလဲ မတတ်သာလို့လဲပေးတာနေမှာပါ။
စည်သူ.. အိပ်ယာပေါ်ကထ၍ အခန်းပတ်လည်ထဲ ရေဘူးကို ရှာလိုက်သည်။
ညက သောက်ထား၍ ရင်ထဲပူကာ ရေဆာနေသည်။ မီးဖိုဆောင်တွင် ရေဘူးရှိမည်ထင်၍ အခန်းထဲက အပြင်ထွက်လိုက်လေသည်။
အခန်းအပြင်ထွက်ထွက်ချင်း မြင်ရသော ဧည့်ခန်းက သူထင်ထားသလို ရှုပ်ပွမနေပဲ အတော်ပင်သန့်ရှင်းနေတာကို တွေ့ရသည်။ ဒီကောင် ယောက်ျားလေးတစ်ယောက်ထဲ နေပြီး ဒီလောက် အိမ်ကို သန့်ရှင်းထားနိုင်တာ ဘယ်ဆိုးလို့လည်း။ သူမီးဖိုဆောင်ထဲဝင်၍ ရေခဲသေတ္တာထဲမှ ရေအေးတစ်ဘူးကို မော့ချလိုက်သည်။ ရင်ထဲအေးသွားကာ အတော်ပင်နေလို့ကောင်းသွားသည်။

ထို့နောက် မျက်နှာသစ်၊ ရေချိုးပြီး ဝတ်လက်စ အဝတ်အစားတွေကိုပဲလဲကာ ထမင်းစားပွဲမှာ မိုးစက်အလာကို ထိုင်စောင့်နေလိုက်သည်။
အဝတ်မလျှော်တတ်၍ အဝတ်ဟောင်းတွေကို သူမလျှော်တော့၊ အိမ်ရောက်မှ ကြည့်ရှင်းတာပေါ့ လို့တွေးပြီး ခေါင်းထဲက ထိုကိစ္စကို ခဏထုတ်ထားလိုက်သည်။

ခဏကြာတော့ မိုးစက်ပြန်ရောက်လာပါသည်။ လက်ထဲမှာလည်း အထုတ်တွေ တနင့်တပိုးနှင့်။ စည်သူ့ကို မြင်တော့ မိုးစက်က သူ့ထုံးစံအတိုင်း ကလေးဆန်စွာပြုံးလိုက်ပါသည်။

"ဗိုက်ဆာနေပြီလား ခဏနော်"

"ရပါတယ်ဗျာ.. ကိုမိုးစက်.. လုပ်စရာရှိတာသာလုပ်ပါ။ ငါ.. ဟို ကျွန်တော်ကသာ အားနာရမှာ။ "

"အားမနာပါနဲ့ကွာ။ ရပါတယ်။ ပြီးတော့ ငါ့ကို မိုးစက်လို့ပဲခေါ်ပါ။ တကယ်တမ်းငါက မင်းထက်တောင် ငယ်မယ်ထင်တယ်။ မင်း မွေးသက္ကရာဇ်က?"

"ခြောက်ရက် ကိုးလ 89 ပါ၊ မင်းကရော..."

"ဟာ သိပ်မကွာဘူးပဲ ငါကမင်းထက် တစ်ပါတ်ငယ်တယ် ဆယ့်သုံးရက်နေ့မွေးတာလေ"