مجنوني

( فراق من اجل العيشه )

#مجنوني
الفصل الثالث
#قصص_اسراءالجميلي

نده نوزاد ..
اي ماما هسة اگله ..
اووف هسه هذا شيريد منچ ؟
اذا تحبين لا تجاوبيه حبيبتي ..
مجاوبته و ضحكت ..
گمت العب باصابعه ..
هسة مگتلي ليش راح تجيني احسن من ذيج الوظيفه ؟
لان انتِ دا تسوين كلشي علمودنه ..
انتي خليتي لاڤين تكمل تربيه ..
و بمعارفچ عينتيه ..
و دخلتي هاڤين صيدلة ..
صح مو طبيه مثل ما رادت ..
بس المجموعة الطبيه نفسه ..
هههه صح حبيبي ..
و اني و شيراز ملابسنه و مصرفنه عليچ ..
قايمه بهوايه من مصرف البيت ..
فالله مراح يخازيج ابد ..
حتى لو احنه مرات منحس بيچ ..
بس الله مينساچ ابد ..
گمت گعدت على چربايتي ..
جريته و حضنته ..
كلامه نزل مي بارد على قلبي ..
نوزاد حچه رساله من الله اليه ..
اجتي على شكل كلام بسيط من مراهق ..
حبيبي انت ..
اني مسويت شئ ..
هذا واجبي ..
رفع راسه ..
لا مو واجبج ڤيون ..
هذا كرم منچ ..
و احنه ولد اصل عمرنه مراح ننساه ..
لزمت حنچه ..
و هزيت راسه ..
فدوة اروح للاصيل اني ..
يلا اني انزل جوة ..
بسته من راسه ..
تريدين شئ ؟
لا حبيبي سلامتك ..
وصل للباب ديسده ..
ڤين حتشيلين التلفون على محمد ..
لا حبيبي خابره من ماما ..
گله نايمه من تگعد ادك عليك ..
اي بعد احسن ..
سد الباب ..
گمت اضحك اخوية يغار عليه ..
بس صدگ محمد مو وكته ..
حچي زايد بس يريد يحچي ويايه ..
صح هو ابن عمي و حباب ..
بس مو الانسان الي اگدر املكه روحي ..
باوعت على مرايتي ..
لزمت شعري ..
فتحت القراصة منه ..
نزل على صفاح وجهي ..
شعري اسود طويل مغطي ظهري ..
سرح نوعاً ما ..
بقيت انزل بيه بأصابعي ..
عيوني چبيرة مجرورة ..
حلگي صغير ..
بس شفايفي ممتلئ ..
وجهي بيضوي ..
اتذكرة كلمة الولد ..
هههه شعل عشيرته ..
صفنت على المراية ..
ليش من سالني على كليتي مگتله اي ..
ليش دا انهزم من الماضي مالتي ..
يمكن لان مدا اتذكره منو ؟
بس اني دا احسني اعرفه من زمان ..
رجعت راسي على المخده ..
ليش شايله هموم الدنيا على راسي ..
ليش مدا اگدر احب و انحب ..
ليش عايشة الغيري و عايفه نفسي ..
لشوكت هيچ اظل ؟
غفيت و اني افكر ..
شفت نفسي بالكلية گاعدة اني و مجموعتي ..
اضحك وياهم ..
گبالي مجموعة ولد واگفين ..
واحد بيهم يباوع عليه ..
مبين نص وجه ..
اضحك وياهم و اسولف ..
و هو يراقبني ..
يحچي وي صديقة الگباله ..
و يبصبص عليه ..
اريد بس الولد يوخر ..
اريد اشوفه ..
انداريت دا احچي وي صديقتي ..
رجعت باوعت لگيته گبالي واگف ..
فزيت من حلمي ..
و گلت بصوت ..
نمررررررر ؟
اشو گام الولد يجيني باحلامي ..
شنو القصة ؟
باوعت على الشباك غايبه الشمس ..
جريت تلفوني ..
شفت الساعة بثمانية ..
لگيت محمد داگ عليه كومة ..
ياااابه شگد نمت ..
گمت وگفت جريت برنصي و رحت للحمام ..
دخلت جوة الدوش ..
اتذكرت نمر الولد الي چان يباوع عليه و يراقبني دوم ..
چان تحچي ويايه صديقتي جنات ..
الي ما ادري وين راح بيه الدهر ..
ڤونه اگلچ منتبهه على هذا الولد ؟
يا ولد ؟
الي واگف وي مجموعة خالد ..
سويتي روحي ما اعرف عليمن تحچي ..
شبيه ؟
حياكلچ بعيونه عيني ..
چانت دومه تنبهني عليه ..
و هيه راحت جابتلي معلومات كاملة عنه ..
نمر ..
ولد من الغربيه ..
قسم هندسة الحاسبات ..
صف رابع ..
عائلة زناگين ..
و اصحاب املاك و شركات ..
من الغربيه ..
چنت استهزء بيه ..
و شنو هذا من المحافظات الي عينه عليه ..
بس بعدها گمت اتعود على شوفته ..
و من يغيب لو ما الگاه اگبالي بالنادي اضوج ..
ارتاح بنظراته اليه ..
احسه بوحشة اذا اشوفه ضايچ ..
من يضحك احس الدنيا تضحكلي ..
بس اني واعده نفسي ما احب بالكلية ..
زين هو ليش ميتقرب اكثر عليه ..
ليش ميحچي ويايه ..
كم شهر ..
و اختفى ..
الظاهر اتخرج ..
بقيت انتظر السنة البعده و البعده ..
گلت هذا اكيد چان يريد يوگعني ..
ما گدر عليه ..
عافني و مشه ..
كملت لبست برنصي و طلعت ..
بدلت هدومي و لفيت شعري بالخاولي ..
لزمت التلفون دگيت على محمد ..
محمد : هلا هلا بالاميره ڤين ..
ههه الله يخليك ..
شلونك محمد ..
الحمدلله ..
انتِ شلونچ ؟
ماشي حالي بت عمي الغالية ..
لگيتك داگ عليه ..
محتاج شئ ..
و الله هالمرة انتِ المحتاجه ..
ههههه اني ..
لا ربي ميعوزني الاحد ..
مو قصدي و الله ..
بس لگيتلچ شغله ذهب ..
اي شنو هيه ؟
نفس شغلچ ابغداد ..
يا شغل ؟
قصدك استيراد و تصدير ..
ايييي ..
بس على شركة اكبر ..
و شنو شغلي بيه ..
متاجين مدير ادارة ..
اي ..
يعرف على الحاسبة و لغات ..
و عنده خدمه اقل شئ خمس سنوات ..
و انتِ ما شاء الله ..
عندچ سبع سنوات ..
اي صح حاسبهم محمد ..
ليش شعندي غيرچ احسب ايامه و ليالي ..
محمد احنه مو متفقين هذا الموضوع منحجي بيه ؟
اي صح اسف ..
بس ممكن اتحكم بعقلي ..
بس الساني ما أگدر اتحكم بيه ..
ليش ؟
لان قلبي الي يوجهه ..
هااا ..
يا ريت لو تتحكم بيه همين ..
شوكت تحنين عليه ..
محمد اسده لو تكمل حچيك على الشغل ..
حاضر حاضر لا تسديه الله يخليچ ..
اوكي محمد كمل ..الراتب ٢٠ ورقة ..
زين خوش راتب ..
يعني تقريباً ضعف راتبچ ..
اي صح ..
و وقت الشغل شگد ؟
من التسعه للاربعة ..
اوكي كلش زين ..
و السكن شلون ؟
السكن بانيه يم الشركة ..
ليش الشركة شگد عماله ..
حتكونين مسؤولة عن ١٠٠ موظف ..
ياااابه صدك تحچي ..
لعد ليش راتبه عالي ..
اي همين صح ..
شوكت اگدر اروح اقابل ؟
بكيفچ تريدين باچر ..
حضري نفسچ بعد صلاة الفجر امر عليچ ..
ليش شكو شدعوة ؟
شنو هواية اكو مقابلات ؟
ليش مگتلچ ؟
الشغل ب اربيل ؟
شنووو ؟
يمعود شدا تحچي اهلي عافوها علمودي ..
و الله ڤونه ..
هذا الشغل الي لگيته گدامي الچ ..
خليني افكر و الفجر اردلك خبر ..
خوش اتفقنه ..
يلا اروح ماما دتصيحني ..
الله وياچ عُم......
شنو محمد ؟
الله وياچ بت عمي ..
الله وياك ..
اوووف ربي ..
انوب محمد ..
خوش ولد و رجال ..
بس ابد قلبي ميرف عليه ..
شلون اتزوج واحد قلبي ميحس بيه ..
رحت وگفت يم الشباك ..
يا ربي ساعدني ..
اني متاكدة انت تحبني ..
اهدي اهلي بدون ما اتعب و اظل اتناهد وياهم ..
نزلت جوة ..
گاعدين كلهم على ميز طعام ..
يلا بابا تعاي تعشي ..
اي بابا جيت ..
گعدت يمهم ..
اخذت خاشوگتي ..
بابا اني بطلت من شغلي ..
وگف اكله ..
اندار عليه بهدوء ..
ليش باباتي ؟
بابا صارت ظروف محبيته ..
و چان لازم اطلع ..
رجع ميباوعلي و ياكل ..
ها هيه بابا الي يريحچ ..
امي گامت متاكل ..
كله دلغمت وجهه ..
بس نوزاد و فاتيما يباوعولي و يبتسمون بوجهي ..
بابا بس محمد لگالي شغل ..
رجع التفت عليه ..
اي ..
بس الشغل ب اربيل ..
رفع صوته ..
ويييين ؟
و يمن راح تگعدين ؟
بابا بانيين سكن كامل للكل ..
حچيتله كله التفاصيل ..
ماما : و شلون تكونين بعيدة عنه ..
ماما اجيكم بالعطل ..
هيه ساعتين ..
بابا : انطينه فرصه نفكر ..
بابا ماكو وقت تفكير ..
الوظيفه ممكن تروح و اخسره ..
و احنه عدنه كومة التزامات تخص البيت و اخوتي ..
گام ابوية بهدوء ..
وين ابو ڤين ..
شبعت الحمدلله ..
نظرة كسرة بعيون ابوية ..
كسرتني قبله ..
صعبه ابو البيت ميگدر يقوم بالتزاماته ..
مشه خطوتين ..
رجع مره لخ عليه لزم جتفي ..
الي تشوفي صح سويه بابا ..
رفعت عيني عليه ..
اي بابا ..
عاطت امي ..
يعني شنو الي تشوفه ..
هيه مره شتفتهم ..
غير انت اب و رجال و تحكم البيت ..
شحكم متفهميني ..
بنتچ دا تدفع مصاريف نص البيت ..
معيشتنه و معيشه اخوته ..
گمت وگفت ..
لا بابا لا تگول هيچ ..
ما اگول الصح ..
ضرب حلگه ..
حسكت ..
بس انتِ الي تريديه سويه ..
و محد يگدر يدخل ..
راح ابوية ..
امي گامت تبچي ..
و يسكتون بيه فاتيما و البنات ..
گمت صعدت اتصلت بمحمد ..
و اتفقنه باچر بالسته ..
حضرت جنطة صغيرة ..
نزلت من فوگ الفجر ..
لگيتهم كلهم گاعدين ..
ودعتهم و رحت ..
الطريق كله محاولات من محمد ..
بحيث لعب نفسي ..
بس اريد نوصل ..
وصلنه ال اربيل ..
رحت للمقابله ..
چنه بس اني وولدين مقدمين ..
قبلوني الي بوظيفة المديره ..
و الولد بوظائف اقل مني ..
طلعت على باچر الاربعاء ابدي بدوامي ..
ودوني السكني ..
الي هو عبارة عن شقق صغار كل تلث طوابق سوة ..
اختاريت الارضي ..
اول ما ادخل للشقه ..
مطبخ مفتوح على الصالة ..
تكمل حدود المطبخ ..
باب على اليمين ..
فسحة صغيرة ..
عليه بابين ..
وحدة لغرفة نوم و اللخ حمام ..
و كل الشقق نفس التصميم ..
توسل بيه محمد ابات يمهم رفضت ..
ماكو داعي انطوني شقتي بعد شنو ابات يمكم ..
على راحتچ ..
بس لا تنسين انتِ مو وحدچ اهنا ..
اكيد اني مو وحدي بأي مكان ..
الله ويايه ..
حسيته انقهر ..
بس لازم اگله هيچ ..
اريده يفك ياخه مني ..
بقه ساكت ثواني و يباوعلي ..
على كُلاً اني رايح ..
اني رايح اي شئ تحتاجين دگي عليه ..
ان شاء الله ..
راح ذبيت نفسي على الديوان ..
لون چويتي ..
و الحيطان بيجية ..
ضوة الصالة اصفر ..
ارتاحيت شوية ..
اتصلت باهلي طمنتهم ..
رحت للمطبخ ..
كامل من كلشي ..
بقه بس المسواگ ..
رحت المجدي مول ..
تمشيت بيه ..
تسوگت الاحتياجات الغذائية مالتي ..
طلعت دا امشي ..
انتظر تكسي ..
چان احد يلزمني من جتفي ..
انداريت بقوة ..
حضنتني وحدة ..
حبيبتي ڤين يا احن حضن فارگته ..
وخرت الابنية ..
اباوع عليهه ممصدگه عيوني ..

فالقصه لقاء كانت تتمناه ڤين