مجنوني

( القرار الصحيح )

#مجنوني
الفصل الثاني و العشرين و الاخييييير
#بقلمي_اسراءالجميلي

سالني بهدوء و لواگة الي يعرف روحه مسوي غلط ..
انتِ شنو دا تحچين ڤيونتي ؟
دا احچي الي چان لازم اسوي من زمان ..
بس قلبي مسعفني ..
دومة يمشي ضد عقلي و جسمي ..
رايح بأتجاهك و بطريقك و عايفني ..
بس هسة گدرت ارده اليه و اخلي يصير بصفي ..
عفية انتِ شنو تحچين احنه قبل كم يوم تقريباً متفقين نرجع البعض ..
اي بس هسه خلص ..
يا ولو اني نمر الي بلاياه متگدرين تتنفسين ..
ضحكت بخبال ..
هههههه چان ..
حچيت بكل ذرة الم شعرت بيه و نزعت كل شعور بالحب لنمر ..
رديتله : نمر الي اني حبيته و عشقته و چنت اتنفس بصوته ..
ماااااات ..
اما انت ما أگدر اسمع صوتك بعد ..
و لا يمكن اگدر ارجع احبك ..
اني الي چنت انطي الحياة للناس ..
لا اصلاً اني چنت حياة ..
انت چنت محور هالحياة ..
بس هسة خلص انتهى نمر من حياة ڤين ..
سديته ..
سويت تلفوني صامت ..
گعدت على الكرسي مال مكتبي ..
اباوع عليه و هو يلمض من كلماته و كتاباته ..
دموعي تنزل بهدوء ..
اني مردت ابچي ..
بس هيه زاغلتني و نزلت ..
گمت سديت باب غرفتي ..
دگيت على فاتيما احچي وياها و ابچي ..
گتله كلشي ..
و هيه تحاول تهدي بيه بس مگدرت ..
يمكن نص ساعة احچي وياها فرغت كل الي عندي ..
سالتنه سؤال واحد : انتِ عفتي لان كذب لو لان عرفتي رجعله و مگلچ ..
سكتت ..
ها جاوبيني ..
اني عفته لان ما اگدر يشاركني احد بحبي ..
حتى لو كان احق مني بيه ..
و ما اگدر اگله يعوفه ..
لان حظلمه و حظلم بنته ..
و عمري مچنت اريد اصير في صفوف الظالمين ..
ها هي حبيبتي ارتاحي لعد ..
صدگيني سويتي صح الصح ..
و الايام حتثبتلچ ..
انتِ چنتِ دومت اتأملين بالي يربطكم خير ..
بس الخير الي تمنيتيه ..
غير الخير الي الله رايدلچياه ..
و الله يحبنه دومه يختارالنه الاحسن ..
صح كلامچ ..
احبچ فاتيما ..
احبچ اكثر بنوتي ..
سديته و اني مرتاحه نوعاً ما ..
رجعت للبيت و تغديت و هو بعده يدز ..
و نمت و گعدت و رحت تسوگت و رجعت تعشيت ..
بس هو بقه يلح جنني و اني ما افتح المسجات ..
بس اقراها من فوگ من يدزها ..
عيب هيچ ..
يعني شنو دا ترديلي بالمثل ..
لازم تجاوبيني ..
و لازم اقنعچ بالزواج ..
نمر ميگدر يعيش بلا ڤين ..
و ڤين متگدر تعيش بلا نمر ..
جاوبيني ..
لا تشلعين قلبي ..
حرام عليچ و الله ..
تحرمين شئ الله محللَّ ..
اهنا متحملت ..
فتحت الرسائل و بدون ما اقره بيهم تكملة لو بس الي قريتهم ..
دير بالك تكتبلي حلال ومدري شنو وتصير العريفي براسي ..
مامعقوله ترى الي دتسويه ..
دا اگلك ما اتحمل ..
الله يخليچ ارضي و الله ما احسسچ متزوج ثانية ..
شوف هو صح حلال ..
بس ربنا كال ولن تعدلوا ..
وبما انو اني مراح ارضى الا بالعدل ..
فراح ادوس ع قلبي ..
وراح يوجعني ..
حجيب وجع لنفسي اني في غنى عنه ..
يخص مشاعري اتجاه هالموضوع الي هو مشاعر اي مره تتمسك بزوجها المفروض ..
ول يابه بس اقتنعي ..
و شيلي هالمحرمانية الي مسويته براسچ ..
يابة شلون ترضى يوم الي مو وياها !!
سالفة صعبة ..
اترضاها لامك ..
اترضاها لاختك ..
طبعا لازم احسب كل الجوانب بالعقل ..
اعرف قلبي شنو يتحمل ..
بعد ما عيشتني بحلم وردي و چنت بيه كلك اليه ..
مثل ما چنت بيه كلي الك ..
جاي هسه تريدني ابقه وياك و تشاركني مشاعرك وي وحدة ثانيه ..
گلي شلون اتخيل حياتي و اني منطيته كامله لشخص منطيني نص حياة ..
شلون اتحمل من تغلط باسمي و تگول اسمه ..
شلون اتخيل اني وياك و باچر حتكون بحضن ثانية و عود بالحلال شلووووون ؟
شلون اتصور كل الي حتسوي ويايه تسوي وياه ..
شلون احس اني في سباق على رجل واحد ..
لان ابقه اريد اكسبك هاي معاناة مو حياة ..
ترى غيرچ كومة راضين بهالوضع و عايشين عادي ..
غيري مو اني ..
اني اقدر الحاله ..
يجوز غيري مجبره ..
يجوز غيري ما عده احد ..
يجوز غيري متحب بگدي ..
يجوز غيري تريد تخلص منه ..
اني ما عندي هيچ شئ يجبرني اخذ جزء ..
النقطة الاهم الي يجوز غيري يرضى بيه ..
ما ارضى بيه ..
اني مستحيل ابني تعاستي على تعاسة وحدة ثانية ..
هيه احق بيك لان عدها اطفال منك ..
بالاخير انت متحبني ..
لان لو تحبني چان متمنيتلي الا الخير ..
رجع كتب و احسه بكل حرف متألم ..
يتوسل بيه على اساس حلم يريد يحققه ..
لا انتي ولا هدى ولا اهلي ولا اي شخص ممكن ياثر عليه ..
تحاسبوني اذا ارتكبت حرام لا سامح الله ..
اقره اني لا شئ عندك ولا عند غيرك ..
اني حلم وردي راح بوقته وانتهى ..
لا اني فين الي حلمت بيها وردتها ولا شي ..
الي راح ميرجع ..
هم رجع قلبي يحن ماكفه جرح البي ..
مراح تقنعني باي شي ما اكدر ..
هذا مو حب جلاليق ..
تمنيته و مصار ..
هذا تاثير السهر عليك بدى يظهر ..
يابة يا حب بهل الزلك ..
حسيته مستنزف ..
حسيته ديجاهد ..
حتى ما يخسرني ..
بحروفه يريدني ابقه ..
بصوته يتمنى ابعده و امنعه ..
و يكون القرار الي حتى يرتاح هو و ميشعر بالذنب تجاهي ..
و مع هذا آني كنت مستعدة اخسره ..
و اكسبني ..
يعني احبچ ..
لاتحرميني ..
تره القلب دمرتيه و الله ..
انت الي دمرت كل جزء بيه و مدا تفهمني ..
تدري من عفتني شنو حسيت ؟
حسيتني صورة متعلگه بالحايط و بس تراب حبك عليها ..
كلش صعبة بعد ما حسيتك الي و بين اديه ..
تروح برمشة عين ..
تمنيت كل الالم الي شفته يصير بيك ..
و هسه ديصير بيه و الله ..
بعدين منو گلچ اني ما چنت احن و اشتاگ الچ و اموت لان ما احجي وياچ يومية ..
هيه صح يمي و ابيتي ..
بس انتِ وي دمي تمشين ..
شلون تگولين ما احبچ و اني سميت بناتي باسمچ ..
احس روحي ورقه بالخريف متعرف وين توگع حتى ترتاح ..
نمر الي عندي گلته ..
اني اريد اشيل همچ ڤونه ..
اي و الله يا ريت ..
اذا تريد هيچ شيل روحك من حياتي و خلصني ..
سديت النت و كانت هاي المره الاخيره الي كتبت وي نمر ..
او جاوبته ..
٢٠١٥/١/٧ آخر مرة خابرني و كتبت وياه وتركته بيومها ..
عفته و قلبي ينزف لان الي احبه جبان بحبه اليه من البداية ..
و آني مو جاهزة لهيچ تجربة ..
ما اگدر أتحمل أعيش بجزء منه ..
او مع بقاياه ..
و أكثر من هذا كله بعد ما گدرت احس انو اريد استمر ..
گمت اربط اسمه دائماً بالكذب ..
مرت ايام و ليالي و بديت اتعود البعد و هو مستمر بمحاولاته ..
كل مرة يكتبلي من رقم و يدگ عليه من غيره ..
بس اني قفلت خلص و المفتاح بيد الله ..
عشت حياتي لڤين و احبابه و بس ..
و گدرت اخلص شوية شوية من ادماني على كلشي يخص نمر ..
بيوم دگ عليه رقم غريب على الواتس ..
طبعاً بعده گمت من اشيل الرقم الي ما اعرفه ..
انتظر المقابل يحچي اذا هو اسده و احضره ..
و اذا غيره احچي وياه ..
شلته صوت بنية ..
يا ساقطة عوفي زوجيييي ..
كافي عاد حرام عليج ..
راح يموت من وراچ ..
اني انصدمت بقيت اسمعه و ساكته ..
تحچي بصوت عالي و قوي ..
و الله اذا مات ابو بنتي دمچ ميكفيني و الله ..
و كومة افشار و كلام عمري محد گايليها ..
حسبي الله عليچ من بنية الله ياخذ حوبتي منچ ..
كملتي ام ڤين ؟
سكتت شوية ..
شنو ؟
اذا كملتي بس اگلچ ..
اني عايفه زوجج من زمان و عايشة حياتي ..
و لو تعرفين ليش عفته چان مفتحتي عليه السانچ الوسخ ..
و وسختي اذاني بكلماتچ الجايفه ..
بس اگلچ يا ريت تبعديه هو عني و تريحيني ..
و سديته و بچيت على نفسي الي دومه نمر يصدمه و يقهره ..
بعدها گام ياخذني الفضول اروح اشوفها شنو مخليه صورة ..
لو شنو حالتها ..
و كله چان حب و غزل ..
و من خلال صديقاتي و معارفي ب لبنان ..
عرفت انو همه راجعين البعض من زمان ..
مو مثل ما فهمني منتظرني اقبل ارجعله حتى يرجعله ..
راجعين البعض بالفترة الي چنت بيه دا اموت ..
بين المستشفيات و اهلي ..
و مرضي و عذاب فراگه الي بدون سبب ..
حالياً صار الي خمس شهور من عفت نمر ..
اجاني مرتين و سبحان الله اكون بالمجمع صدفه و ما اطلع ..
يسالوني يدخل ..
اگلهم گولوله مسافره ..
كتبلي مره ..
يمكن شوفتچ راح تصير حسرة بقلبي !!!
بس اني بديت استرد وضعي و حياتي ..
اقره كتب ..
ابدع بشغلي ..
اطلع و اتونس وي صديقاتي ..
و بيوم خابروني الامن ..
ست اكو شخص جاي يريد يشوفچ ..
منو هو ؟
گمت من فراشي بفزه ..
اسمه محمد اندخله ؟
يا محمد ؟
ست يگول ابن عمچ ..
استغربت محمد ليش جايني لهنا هاي اول مرة يسويها ..
هااا خلي يدخل ..
تفاجاءت صار فترة ممتصل بيه و لا شايفته ..
رحت بدلت لان لابسه شورت و اسقيات ..
عدلت شعري و غسلت وجهي ..
اندگت باب سكني ..
رحت فتحت الباب ..
وجه محمد مليان غبطة و فرح بشوفتي ..
شلونچ ڤيونه ؟
هلا بمحمد تفضل ..
و الله مستعجل بس جيت انطيچ هاي ..
مدلي ايده بيه ظرف ..
اخذته منه ..
دفوت هاي شبيك ؟
اشرب وياية چاي و روح ..
جر النفس بقوة عبالك يريد ياخذ من الهوة الي حايطني ..
هيچ حسيت و الله ..
و الله ما اگدر يلا الحگ اوزع البقية ..
صدك هاي شنو ؟
و احرك بيدي الي بيه الظرف ..
هاي دعوة عرس ..
هاااااا و منو تعيس الحظ ؟
فتح عيونه و حلگه عليه ..
هههههه اتشاقه وياك ..
صدك منو ؟
اني تعيس الحظ ..
من گال هيچ اتخربطت احاولي ..
عزززه هاي شحچيت ..
اسفه و الله حمودي ..
بس مو تدري اني فشلت بهذا الموضوع ..
فاتخيل الي يتزوجون حينتعسون ..
لا عادي ..
بس ترى اذا اختارينه الشريك المناسب النه ..
السعادة راح تحيطنه من كل صوب ..
صفنت بجملته عبالك ديصجمني ..
سويت روحي مفهمت قصده ..
اي صح كلامك ..
و منو هيه سعيدة الحظ ..
بت خالي اخت فرهاد ..
هااا سيروان قصدك ؟
اي ..
الف مبروك ربي يسعدكم ..
حچيته و غصه بقلبي ..
تستاهلون كل خير اثنينكم ..
زين وين حيكون العرس ..
بالسليمانية يم اهلها ..
هااا اي صح ..
يلا اترخص اني ..
مشه و رجع اندار عليه ..
حضورچ مهم و اتمناه من كل قلبي ..
ابتسمتله بالگوه ..
اكيد بأذن الله ..
سديت الباب و مشيت حطيت الدعوة على الرازونه ..
سبحان الله كلشي بالحياة ارزاق ..
رغم حسيت بغصة بداخلي ..
بس تبقه مشاعري هيه هيه لمحمد ..
اخوية و لا يمكن يصير غير شئ ..
و بعد اسبوع جهزت نفسي و اشتريت زي كردي وردي و جداً انيق ..
رحت البيت اهلي ..
چانت هاڤين موجودة و خطية حامل بشهرها و بالگوة تتحرك حبيبتي ..
اجيت ابوس فاتيما ..
جرتني و حضنتني قوي ..
همست بأذني ..
اكيد عفتيه للاخير ؟
دفعته و بقيت اباوع عليه باستغراب ..
شلون عرفتي ؟
لان اعرفچ لا يمكن تبنين سعادتچ على تعاسة غيرچ ..
اعرفچ كلش زين ..
هههه صح ..
رحت بدلت و نزلت لگيتهم ديحضرون بالعشه ..
روحي ماما انتِ و هاڤي ارتاحوا ..
اني باقية وي فاتيما اساعده ..
مو خاف انتِ تعبانه من الطريق ..
لا ماما هيه شمرت عصا بين اربيل و اهنا ..
ههه شمدريني اني ..
براحتچ ماماتي ..
ها ڤيونه ليش خليتيهم يروحون ؟
شتريدين مني ؟
ههههه هيچ بس نسولف سوه ..
خوش حصدگچ ..
بقيت اسولف وياها لحد ما وصلت لموضوع نمر ..
ابتسمت من ذكرة اسمه ..
حلو اسمه ؟
چان ..
تشتاقيله ؟
نوعاً ما ..
بس الي سويتي هو الصح ..
و لازم تبدين تبحثين عن الاخر ..
ههههه لا مو هسه بعد وكت ..
لا تخلين الوقت يفوت ..
و تبقين متعلقه بالحب المات ..
لان احنه نحتاج الشريك بحياتنه ..
و وجود شخص يساندنه دائماً شئ جميل ..
و آمان و اطمئنان و حنان ..
و النتيجة تستحق المجازفه ..
لان محد مات من الفشل ..
بس يموت اذا يعرف الي يحبه عاش و ارتاح ..
و هو بقه  بس عايش على اطلاله ..
حچته بألم ..
فات بابا : السلام عليكم ..
عليكم السلام بابا ..
باوعت عليها عيونها غوركت بالدموع ..
من فات بابا ..
و بعدت بعينه عنه ..
و رجعت تثرم السلطة ..
صفنت و فتحت عيوني ..
معقوله الي فهمته بنظرة فاتيما ..
انطيني مي باباتي ..
هاا اي حاضر بابا ..
گمت انطيته البابا و عيني عليها ..
راح بابا ..
رحت عليها لزمته و درته عليه ..
تحبيني بابا ؟
بقت مدنگة تستحي تباوعلي ..
چنت ..
و هو ؟
لا ..
لعد ليش بقيتي ؟
لان غلطت چان ياهو يتقدملي انطي بيه عله ..
اتحجج عليهم ..
و ما اريدچ تغلطين مثلي ..
يعني انتِ هسه مرتاحه ؟
بالبداية چنت ممرتاحة و كلما اشوفه هو و ماما انذبح ..
بس بعدين صارت امچ اختي ..
رفعت وجهها عليه ..
شگد عانيتي انتِ ؟
ابتسمت بحزن ..
اووووو كومة بس ميفيد ..
متندمة على كل لحظة عانيت بيه و ضيعت عمري ..
لزمت خدي اليسره بديه اليمنه ..
لا تضيعين عمرچ مثلي ..
حضنته و حسيت بقلبه الينزف ..
اجوي الكل و تعشينه ..
حضرنه عرس محمد و العيون چانت عليه اكثر من العرسان ..
تونسنه كلنه و صدگ غيرت جو ..
بالليل رجعنه صار عندي فضول افتح الواتس مال هدى ..
لگيته حاطة صورة نمر على الساحل ..
لابس شورت للركبه و شايل أڤين بيده ..
و ضاحك ضحكة المجبور ..
لاني اعرفه و اعرف كل تفاصيله ..
و مديور شوية و امبين چتفه ..
باين شوية وشم اسمي ..
يا هالترى شلون قنع زوجته يبقيه و هيه كلش زين تعرف هذا الاسم الي ..
لان عمره مدلع بنته المرحومه بيه ..
الله اعلم ..
حسيت بانتصار بسيط ..
وبمرور الأيام بديت اقتنع انو مو بس هو المظلوم ..
بل أثنينهم مظلومين ..
راحوا ضحية الاعراف والتقاليد ..
فهو مو مظلوم اكثر منها ..
وبقائي بهاي العائلة رح يزيد عدد الظالمين والمظلومين ..
احبه ؟
نعم احبه وحبيته اكثر من روحي ..
وحبني حب ودلعني دلع وعيشني لحظات ما رح أنساها بحياتي ..
بس هذا كان كل دوره بحياتي ..
يبينلي انو ڤين تستحق الحب ..
تستحق الدلال والاهتمام مو بس هي تقدمه للناس ..
ولهذا عندي تجاهه حاليا تعاطف وحنين فقط ..
بس مو  حب و لا شغف ولا عشق و لا جنون و لا حتى رغبه ..
كومة يخطبوني ..
بس بعد نمر ما عندي ثقه باي احد ..
ما اكدر اسلم قلبي لاحد و ميكون گد الامانه ..
سامحته اي ..
بس مو مستعدة احچي وياه ..
ما احسني شفيت ..
بعد اكثر من سنتين كله مشاعر و حب ..
تصالحت وي نفسي ..
و بديت اشعر بالسلام داخل روحي ..
و عشت بالحياة ..
گمت انطي نصائح الغيري بحب الحياة و التغني بنعم الله علينه ..
الحياة لازم بيه شريك ..
بس اذا الشريك ميحس بيك و يجرحك و يأذيك ..
و يكذب عليك بلا داعي ..
حجته خوفه من زعلك ..
و يخليك يومية تذبل شوية ..
الى ان توصل للموت ..
و لو عشته وي ضره چان هيچ صار بيه و اكثر بعد ..
فالافضل تعيشه وحدك ..
لا !!!!
اني مو وحدي  ..
اني عندي كل الناس الي يحبوني و احبهم و مراح ينسوني ابد ..
و ثقتي بالله و رحمته ..
دتبعثلي كلشي زين ..
صار الي عايفه نمر ٣ سنوات و شهر و ٨ ايام ..
حاسبتهم لان يومية اتخيل لو علاقتنه نجحت چان شنو ممكن يصير ؟
چان عدنه اطفال ؟
و اذا عدنه شگد عددهم و شنو جنسهم ؟
و يا هالترى سعيدين مثل الي شفتهم بالبارك ..
لو تعيسين و عايشين بس للاطفال مثل هواية ناس اعرفهم ..
مو ضعف لا ..
بس الانسان يطمح دومة انو يكون ناجح بكل حياته ..
و بفترة ما نمر چان كل حياتي الي طمحت اكون بيه سعيده ..
اي اتذكره ..
و ياليتني ما اذكره ..

خلصت قصتنه بخروج ڤين من حياة نمر ..
و راحته بهذا القرار ..
رغم قلبه المكسور من الي شافته ..
يمكن يصير جزء ثاني اذا گدرت تحب مره لخ و اكتبه الك ..
بس بالوقت الحالي لا ..

اتمنى اكون وفقت بسرد احداث احلى قصة كتبته ..
بالنسبة الي كلهم حلوات ..
بس هاي چانت بيه مشاعر حقيقية كلش حسيته كلش و اني اكتب بيه ..

هالمرة اريدكم تكتبون العبره انتو من هاي القصة ..
و اريد احلى حوار عجبكم ..
و اكثر جملة اثرت بيكم ..
و اكثر تشبيه هز مشاعركم ..
امتحاني صعب مو ؟
ههههه لا تخافون كلكم انطيكم عشرة من عشرة ..
لان غاليين عليه ..

ارجوا ميكون بتعليقاتكم اي جرح لڤين ..
لان فعلاً الضره محد يكدر يتحمله ..
و طيبة ڤين خلته تبدي سعادة غيرها على سعادة نفسه و اكيد ربي حيعوضه بشئ احسن من توقعاته ..

احبكم كلشششششش و انتظروني بقصة جديدة بعد ما ارتاح من مجنوني ..
في آمان الله و حفظه و رعايته دوم