مجنوني

( قرار الاهل )

#مجنوني
الفصل الرابع عشر
#قصص_اسراءالجميلي

قررت انطينه فرصه ..
يعني حترجعيلي ..
لا انطينه فرصه انفكر سوة ..
سؤال ؟
جواب :
اهلك مجوي لان مراضين ؟
لا مجوي لان مرادوا يقهروه و هيه يتيمه ..
زين هيه تدري ؟
هي تدري اريد اتزوج بس متدري منو !
باوعت عليهه بنص عينه ..
تعرف بينه نحب بعض ؟
و هذا شراح يقدم او يأخر ؟
لان يجوز من تعرف بيك تحبني ..
تتأثر و تحاول ترجع علاقتكم ..
و اذا تاثرت و اذا حاولت ترجعه ؟
اني شنو ؟
للعلم انتِ سألتي اسئلة مو سؤال ..
ابتسمت ..
اتقرب على وجهي اكثر ..
اني رجال و تزوجت مره مجبور ما احبه ..
و لا اگدر احبه ..
و لا يمكن على اخلاقه احبه ..
اتقرب اكثر ..
گمت اشتم نفسه ..
اه يا قلبي ..
كأنوا خانگيني بمخده ..
و رفعوها من وجهي بسرعة ..
رجعت اتنفس من جديد ..
بانفاس نمر ..
بالگوة مسيطره على نفسي گدامه ..
اطريت علمود اهلي و العرف و التقاليد ..
غلطت لان بنات الناس مو لعبه ..
و اني اُعتَبر كسرته ..
بس و الله و داعت بناتي بديت وياها على حب الله ..
بس هيه مرادتني ..
اسوء شعور لمن تتعب و تنطي كل طاقتك و اهتمامك حتى ينجح زواجك ..
و بالمقابل تلاگي الشخص ممقدر لا تعبك و لا اهتمامك والاتعس تحصل كلام منه بكل لحظة يسم بدنك ..
مختصر مفيد ..
ام بناتي لا خِلَق و لا اخلاق ممكن تملي عيني بيوم ..
اتشجعت و سئلته السؤال الي يرفع معنوياتي ..
اني ليش حبيتني ؟
و أأشر على نفسي بيدي بحرگه و الم ..
حبيتچ لان .... لان .....
شفت بيچ الخجل و الترافه و طيب الوجه و الخُلُق التضحية الثقة العالية بنفسچ ..
و الاهم :
النخوة الي بكومة رجال ماكو ..
بنفس الوقت الرقة الي بكومة نسوان متلگي ..
و رغم بُعد المسافة البينه ..
بس انتِ چنتي تارسة عيني ..
اتذكر لمست چفوفچ الي تطيرني ..
خيالي الوحيد من اشتاگ يسعفني ..
چنت اتحدى البعد و نجحت ما گدر ينسينياچ لحظة ..
يا ولووو انتِ شاعلة ابو الخلفني ..
كلامه ينسيني كل قيمي و مبادئي و تربيتي ..
ضحكت و ابتعدت عنه ..
خفت من جسمي لا يتماده وياه ..
و ينسه الالم و الكذب الي سواه ..
عدل نفسه على القنفه ..
حچه بصوت عالي ..
جنات خيتي ..
ها عيني نمر ..
ضحكنه من شفنه ظهوره السريع ..
اكيد چانت واگفه ورى الباب ..
تعاي حضرينه ..
و انطينه رئيچ ..
دخلت و گعدت گبالنه ..
حچاله كلشي و هيه عود متأثره و اول مرة تسمع ..
هسه شتگولين ؟
و الله خوية اني قنعت ڤين ترضى بالعقد ..
و من عرفت متزوج اتندمت ..
فهسه ما اگدر اقنعه بشيئ ..
بس اذا چنت انت مثل متگول مطلگ مرتك ..
فاعتقد عادي تزوج مره ثانية ..
اذا چانت ڤين او غيره ..
خو تگعد بدون زواج طول عمرك ..
حسيته دا اتگلي ..
ترى اذا مو انتِ اكو كومة يرضون بيه ..
باوعتلي ..
بقه القرار يم ست الحسن و الجمال و الكمال ..
هههه حبيبتي تسلميلي ..
باوعلي ..
رفع اليسره و لزم حنچي ..
عيوني من خجلي ما عرفت وين اوديها ..
دحگي عليه ..
باوعتله لگيت عيونه مدمعه ..
فدوة اروح للي خلقچ و خلاچ بهالحلى ..
لا تكسرين قلب طول عمره ملچوم ..
هستوه التئم ..
هسه يلى بدء ينبض صح و بأسمچ بس ..
اذا قررتي تعوفيني ..
معناها قضيتي على رجال اسمه نمر ..
و حصير خيال مئاته ..
عايش حتى غيره يعيش بس ..
اريد اعيش حتى اعيشلچ و بس ..
لان بس انتِ الي تستاهلين نمر يعيشله ..
حچيت بالگوة و صوتي يرجف ..
قنع اهلي اذا رضوا يتم كلشي ..
ميرضون ينتهي كلشي ..
گام وگف و جرني من ايدي ..
يلا انروحلهم ..
ضحكت اني و جنات ..
شبيكم ؟
امشينه نروح عليهم و اقنعهم ..
حتى يرد لعيوني النظر ..
دا اصبروا اخيي ..
صار الوقت متاخر شلون تسوق بالليل ..
ماكو شئ خيتي ..
اذا ما اروح اليوم ..
حيزيد بعدي عن رويحتي يوم ..
و يباوعلي و يحچي ..
اني نزلت راسي ..
لعد هاهيه وافقت ڤين ..
رفعت راسي و فاتحة عيني و حلگي عليه ..
رفع حنچي بيده اليسره ..
سدي لا تدخل بيه ذبانه ..
ضحكنه كلنه ..
ودعت جنات و بسته ..
بعدين عتابي وياچ شلون قشمرتيني و جبتيني لهنا ..
عاتبيني منا لحد الموت ..
المهم اشوفچ سعيدة و مرتاحة ..
امين يا رب ..
عفناها و رحنه ..
صعدنا بالسيارة ..
اني اسوق طبعاً لان هو مو كلش يندل الشمال و طرقه ..
اسوق و اباوع عليه بطرف عيني ..
هو مندار عليه كله صاير بأتجاهي ..
ظهره على الجامه ..
بس مبتسم ..
يا ناس فرحته بيه و وحبه الواضح بعيونه ..
ميخليني ازعل منه ..
ما اگدر اعوفه ..
نمر يقراني ..
من الحرف الي اكتبه يعرف الي بيه ..
و من احروفه اعرف اخباره و الضامه ..
اريد تحچيلي على بناتك ..
يعني شتريدين احچيلچ عنهم ؟
كلشي يخصهم شكلهم تصرفاتهم كلماتهم ..
اممم بناتي ..
يشبهوني هواية ..
بس شگرات و عيونهم خضر ..
اي ..
عمرهم اربع سنوات اله ..
كلش يحبوني ..
عندي ڤين كلش شخصيته قوية ..
تدرين تشبهچ مثل اسمه ..
ههههه شجابه عليه ..
عم وليد خال بنية ..
هههههه صاير الحلووو من عشيرتي و طوايفي ..
هههههه خوش دكمل ..
من اجي بس ادگ هورن يركضون الباب الڤيلا ..
مره اجه عمر علينه ..
گلهم ليش متجون ويايه ..
امكم بالدوام ..
ابوكم باچر مسافر ..
ليش متجون وياية و تصيرون بناتنه ؟
ڤين : انت اب هذوله الاثنين ..
و تأشر على ولده ..
أڤين : احنه عدنه ابونه نمل منليد ابد غيله ..
ههههههه حياتي شلون جواب ..
عندك صور الهم ..
بتلفوني هذا لا ..
ليش ؟
سكت و اخذ نفس قوي ..
لان اخاف من تفتحيه تشوفيهم ..
هاااا عود غير مره ..
سكتنه بقينه بس واحد يباوع على الثاني بين فتره و اللخ ..
تدرين اني منايم ..
من اول البارحة ..
باوعتله صفح بعتب ..
الله يعينك و يعيني ..
وره شوية نفسه صار هادئ و منتظم ..
باوعتله لگيته نايم ..
بقيت افكر عايشة بصراع ..
اقنع اهلي وياه و اتغاضه عن كذبه ..
لو اقنع عقلي ينساه كون اگدر بلياه ..
وگفت السياره على اليمين على كيفي ..
انداريت عليه اتقربت اكثر ..
مديت ايدي احركه على وجهه اليسره ..
اتلمس بيه ..
شنو نعومة خدوده ..
لحيته طولانه اكثر من الطبيعي المتعودة عليه ..
گمت احچي بهمس ..
منو يباوع بوجهك وما يضعف ؟
منو يحس برجولتك وما يذوب ؟
منو؟!!
شنو مو آدمية ام بناتك ؟
شنو ما عدها احساس ؟
يا ربي معقولة مدا تشوف جماله ..
هيچ هيه متحجرت مشاعر ..
انكمشت ايدي بيمنته قوي ..
يممممممه ..
شهگت قوي ..
و النبي چان قلبي وگف ..
جرني عليه اكثر ..
شچنتي تسوين ها ؟
هيچ دا اشوفك نايم لو گاعد ؟
امممم صدك ..
اي ..
قربني اكثر عليه بيده اليسره من جتفي ..
و باسني ..
اول بوسة بحياتي من اغلى انسان بحياتي ..
شعور نساني كلشي ..
الكذب الزعل القهر ..
بقه بس حبي اله ..
احساسي بيه ..
دا اشرب مي بس مدا ارتوي ..
حسيت على نفسي اني وين ؟
شدا اسوي بروحي ؟
رجعت جسمي ليوره و دفعته ..
بالقوة رجعت شغلت السيارة و ايدي ترجف ..
يباوع عليه بنظرة لوتية ..
تريدين اسوق ابدالچ ؟
خطية ايدچ ترجف ..
عصبت ضربت الستيرن ..
معليك انت ؟
ههههههههه مخبلة مخبلة بس اموت على ربچ ..
انت مخبل ..
اي صح مخبل بيچ ..
ههههههه اي بيه صحيح ..
الله وكيلچ ثنينه مخابيل ..
بقينه نتذكر سوالفنه الحلوة ..
وصلنه الاهلي ..
ابقه بالباب اگلهم انت جيت يلا ..
لا ادخل وياچ ..
بداعت بناتك ادخل قبلك ..
خوش يلا ..
فتت گتلهم كالعادة ماما عصبت و انهارت و بابا يهدي بيه ..
دخلي بابا هذا ضيف ميصير يبقه بره ..
دخلته ..
اول مفات راح باس ايد بابا و ماما ..
گعدنه اني و ماما على قنفه ..
هو وبابا على اللخ مقابيلنه ..
عمي اني ما الف و ادور ..
اريد احجي راساً حتى لا تبقون گاعديين وياية و ضايجين ..
و اذا معجبكم حچي و ما رضيتو ..
اعوفكم ترتاحون و اجيكم غير وكت ..
احچي ابني ..
عمي احنه عشاير و انت اعرف بنظامهم ..
اتزوجت بت خالتي وفق هاي الانظمة ..
و رجع حچالهم كلشي مثل ما حچالي ..
بابا صدگه ..
ماما بقت مو كلش مقتنعه ..
اشوفه يدور بعيونه بصالتنه ..
تريد شئ نمر ؟
راح على بوفية صايرة زاوية بالصالة ..
بقينه صافنين هذا شديسوي ..
فتحه طلع القران ..
خله ايده عليه ..
و حق القران اني مطلگه ..
ماما : يمه يمه استغفرلله ..
بابا : لا ابني حرام القرآن مو لعبة ..
بحركته هاي صدكوا اهلي و صدكته مثلهم ..
اهلي يخافون كلش من الله ..
اتعشينه يمهم ..
نمر بقه نفسه فرد من عائلتنه ..
بابا اني لازم اروح لان صار كم يوم ممداومه ..
ماما : شلون تطلعون بالليل بنتي ؟
ماما نمر وياية مو وحدي مثل كل مرة ..
بابا : اي صح ..
الله وياكم بابا ..
بوستهم كلهم و رجعنه ..
وصلني للمجمع و خابر مكتب التكسي ..
رجعت لكيتهم منظفين كل هوستي الي سويته ..
حچينه بالليل ..
و بالاخير ..
احبچ .. احبك ..
ثاني يوم داومت عادي ..
و هو يسافر بعد يومين ..
اجاني من خلصت دوام ..
رحنه اشترينه طخم للهول ..
اتفقنه على دزايين المطبخ ..
حيبدون بيه بعد خمس ايام ..
شعور حلوو من تشتغل بالبيت الي حيجمعك ..
و ي تؤامك ..
تصير نومتك و كعدتك و اكلك و راحتك وياه ..
و اطفالنه بيه ..
اتفقنه انسوي غرفة لولد و غرفة لبنت ..
و لازم انسوي غرفة للبنات ..
شنو يا بنات ؟
بناتك غير لعد من يجون يشوفون اخوتهم وين يروحون ..
بقه فاتح حلگه عليه ..
بعدها رحنه تعشينه ..
و تونست كلش ..
رجعنا الايامنه الحلوة ..
كملنه طلعنه وگفنه يم القلعه يم النافورة ..
نسولف و نضحك ..
على غفلة ..
شوكت تتحجبين ڤين ؟
صفنت عليه تفاجاءة ..
من اقنتع من قلبي اسويه ..
و اذا اني اريد ؟
اذا ما اسويه علمود الله ما اسويه علمود اي بشر ..
اني اعتقد الأكراد متفتحين اكثر من العرب ..
و ماعدهم اعتراض على هذا الشي ..
بس العرب اكثر محافظين ..
شنو الي دتريد توصلياه بقصدك من كل هذا الموضوع؟!!
انو إحنه ما نستحي وانتو ولد العشاير المؤدبين؟!!
اني مو هيچ دا اگول ..
اني دا اشوف هذا الشئ بعيني ..
علگت بيناتنا ..
اريد اروح للبيت ..
بكيفچ يلا ..
اسوق و اني نار كبره ..
عصبت وزعلت منه ..
وابتعدت لحد ثاني يوم بالليل بقه يدگ عليه ..
ما جاوبته ..
دزلي كلمات عالواتس ديصالحني ..
ڤونتي
حبيبي
عمري
مالتي
عشگي
جاوبيني الله يخليچ ؟

فالقصة اختفاء مفاجاء لاحدهم

السلام عليكم ..
شلونكم يا بعد طوايفي ؟
حتجاوبه ڤونة لو تبقى زعلانه ؟
و منو الي راح يختفي ؟
و تفاااااااعلوووووو يرحمكم الله ..