مجنوني

( زواج مدبر )

#مجنوني
الفصل الثالث عشر
#بقلم_اسراءالجميلي

انتِ تحچين من كل عقلچ ؟
اي نمر كلش زين اني دا اعرف شنو احچي ..
يا ولووو و الله ما اگدر بلاياچ ..
اهون عليه الموت و حسرة الگبر و لا بعدچ عني ..
بقه يحچي و عيونه تتلفت بهول جنات ..
اطلگچ بعد ما ربي حققلي حلمي ..
لعد ابقه وياك و اخرب عائلة كاملة ..
ترضاها ؟
احرم بنات صغار من ابوهم ..
لو اني بعدني صغيرة حرضاها ابوية يسوي هيچ لامي ..
گعد على قنفه مال نفر ..
صرت بيساره اني ..
احچيلچ على العائلة السعيدة ..
و اني شكو و اسمع عن سعادتكم ..
مكافي چانت السبب بـ تعاستي ..
گام يفر بيده و يضحك باستهزاء و صوت عالي ..
هههههههههه و الله يا الله عائلة سعيدة ..
مدت جنات راسه من باب الهول ..
حركة شفافه : ابقى ..
اشرتله بيدي روحي ..
هو منتبه عليه ابد ..
حجيت بعصبية ..
ما اريد اسمع انتهى كلشي بينه ..
رفع صوته : احچي و تسمعيني غصباً ما عليچ ..
شنو الغصباً ..
نزلت من القنفه باتجاه الباب ..
بخطوات مليلنه خوف لباب الهول ..
جر ايدي اليمنه ..
حدري هينه ..
شنو ؟
تعاي اهنا ..
شتريد ؟ عوفني !
تگعدين و تسمعيني و اذا معجبج حچيي ..
اسويلچ الي تريديه ..
متاكد ؟
اي متاكد و كلام زلم ..
خوش اريد اشوف الزلم و كلمته !
حجيته باستهانه واضحه ..
تغاضه عنهه بكيفه ..
احنه اربع ولد ما عدنه بنية ..
اني الچبير ..
خالتي الصغيرة چانت كلش تحبني ..
قبل يوم سفره دتروح تعيش وي زوجها ..
اجتي تودعنه ..
گالت گدام الكل ..
الكاسرني بعد نمر كلكم الباقين اتحمل بعادكم الا هو ..
عمري چان ثمن سنوات ..
تاثرت كلش ابعده حتى الاكل بطلته ..
بعد فتره عرفنه صارت حامل ..
جابت بنية ..
و من اول يوم ولادته تصيح خالتي ..
نمر الـ هدى و هدى متزوج غير نمر ..
كبرت و فكرة انتظاري لكبر هدى حتى اتزوجه ..
اخذت ثلثين عقلي ..
مكدرت تجيب غيره لان صار بيه سرطان بالرحم ..
وصلت العمر ١٦ و بديت اتغير اكتشفت هدى طفله ..
شلون اتزوج طفله ؟
و خالتي بقت نفس جملته ..
داومت كليه و شفت اشكال الوان بنات ..
السمرة و الشگره و الخجولة و الصلفة ..
و الانيقه بستر و الي تتعرى ..
صادقت كومة و لمست جفوف ..
بس ما بيهن التكهربت بلزمته ..
و لا الي خلت قلبي يرجف بشوفته ..
الى ان داومتي و شفتچ ..
اويلي عليه ..
كلشي بيچ حلووو ڤين ..
ابتسم الابتسامة الي تبينه فرحان بس لان اجه ذكري ..
شفت بيچ التربيه و الجمال و الضحكة الي تفرح بصوت ناصي الاناقة ..
حركات ايدچ و انتِ تحچين ..
نظرات عيونچ و تعابير وجهچ ..
حفظتچ و انتِ بعيدة عني ..
طلبتچ و ردتچ و طعنتني صديقتچ بردچ ..
كرهت كلمتچ بس مگدرت اكرهچ ..
يومية احلم بيچ صدگي ..
بس كبريائي و كرامتي مسمحتلي اجيج ..
يجوز غباء مني مجيتج اني ..
او جبن من ردچ الي ..
الى ان صارت الاحداث و رحنا يمهم ..
الطفله كبرانه و صايره مراهقه ..
بس ابد ما گدرت اتقبلهه ابد ..
خالتي حالته تعبانه ..
انوب صارت جملته وصيه الي و لاهلي ..
ماتت خالتي بعد كم شهر ..
زوجه متزوج من زمان برضاته ..
زوجته مرادت هدى ..
وين تروح هدى ؟ يمنه اكيد ..
بدت ملحت امي و ابوية خبلوني ..
يابه طفله مترهملي كلشي متفتهم ..
همه اللبس و الطلعة و المكياج ..
تحچي و متسكت ابد تتنعوص ..
اتعلمه تربيه طفله عجينة بيدك ..
كل عمره ١٥ ..
يابه هاي شتفتهم شتربي ؟
الى ان بعد مرور سنة اجه ابوه بنتي كبرت ما اريده تبقه يمكم ..
انطيكم مهله اسبوع لو ياخذه نمر ..
لو ترجع البيتي ..
امي اهنا تخبلت ..
بچي و عياط : شتريد بعد ؟
جمال و مال و بت خالتك و وصيته ..
قلبي حن على امي مو على الابنية و الله ..
رجع ميباوعلي ..
وجه انملئ حزن و قهر ..
قررت اتزوجه و عسى و لعلى يجعل بيها الخير ..
و بــ ٢٠٠٥/٥/٢ چان اليوم الاسود بحياتي ..
چانو الكل فرحانين و طايرين ..
ابنهم الچبير من بت اخت امي ..
و قريبة ابوية ..
اخذ صغيره ..
و للعلم هدى حلوة ..
انقهرت من جملته الاخيرة ..
اكيد يمدحه زوجته و ام بناته ..
و شنو فايدة قهري ؟
الا اني مكسور ..
سني يضحك ..
و يأشر على قلبه ..
و هذا ينزف ..
بس ميفيد الحچي ..
يا ريت قلبي چان لامر عقلي مطيع ..
و ارتاح و اريح ..
المهم ..
بديت وياها على حب الله ..
بس ماكو فايدة بكلشي تختلف عني تماماً ..
من ابسط الامور الى اكبرها ..
سنة كامله مرتاحيت بيها ابد ..
و كله واگفه وياها ..
تخيلي اهلچ ضدچ ..
طفله يتيمه اخذها على گد عقلها ..
و عله صوته ..
زين و اني شنو ؟
ابنكم لحمكم و دمكم ..
و الله ما اگدر انام الليل كله ..
اروح انام بالشركة ..
كلشي متعرف تسوي ..
كلمة طيبه ماكو ..
السان طويل صلافة ماكو احترام اليه ابد ..
ماكو طاعة اليه و الكلمتي ..
حاولت وياهم بكل الطرق ..
الى ان بيوم صارت مشكله چبيرة كلش ..
و گامت تغلط عليه و على اهلي ..
اهنا بعد متحملت ..
ضربته بكل قوتي ..
الغريب چانت گاعدة و مغطية بطنه ..
اجتي امي : كافي عوفه حتموت ابنك ..
بعد ما اريده لا عاقله و لا تريد تعقل ..
صفنت على امي : شنو ؟
اديه رافعه دا اضربه وگفت ..
من شوكت ؟
صار شهر ..
و اني شنو خراعة خضره ما ادري ؟
اني گتله متگلك ..
انتو تريدون تموتوني اكيد ..
حسيتني بمنتصف الطريق عاجز انو اتقدم او ارجع ليوره ..
هذا اسوء احساس بحد ذاته ..
دا انزل من غرفتي على بداية الدرج ..
وگعت و محسيت على روحي الا و اني بالمستشفى ..
شفتهم كلهم يبچون ..
شكو شبيكم ؟
اجه ابويه على راسي ..
و ال يابه نمر طز بكل الدنيا بس كون انت بخير ..
اتقربت امي من الجهة الثانية ..
و دموعهه تارسه وجه ..
ماما بس ابقه وياها لحد متجيب لان حرام اطلگه هسه ..
بعدها سوي الي يعجبك ..
استغربت شبيهم ..
عرفت اني صايرة بيه جلطة ..
و ربي نجاني باللحظة الاخيرة ..
رفعت ايدي خليته على چتفه الايسر ..
و افركه بهدوء ..
بقه يحچي و لا انتبه لقرب ايدي منه ..
اربع ايام بالمستشفى بمنتهى السعادة ..
لان بعيد عنه و عن مشاكله و اذيته ..
رجعت للبيت و بده الازعاج ..
تتنعوص عبالك اول وحدة حامل بالدنيا ..
و اني و ربي يشهد ما قصرت بيوم ..
شتشتهي اجيب ..
موعد طبيبه اودي ..
اخر شئ طلعت حامل بتوم ..
مفرحت چان عندي عادي ..
دخلت بالتاسع عايش بانذار اني من اول يوم تگول حولد ..
و ميحلاله الالم الا من هستوني نايم ..
اوديه للمشفى و بعد وكت ..
لحد مصار موعد ولادته طلعت روحي و مليت ..
جابت اغلى اثنين بحياتي ..
همه صاروا فرحتي ..
بس هيه النزيف اخذه و اطروا يشيلون رحمه ..
انقهرت عليه ..
بس هيه ام عين الگوية ..
و لا دارت بال ..
بناته عايفتهم عليه و امي و المربية ..
رجعت امتحنت و داومت كليه ..
و طلعات و ونسات ..
و صرف و تبذير ..
قررت لازم اطلگه ..
گتلهم و هالمرة حجتهم بناتك شلون ؟
يگولون امهم مطلگه ..
شيخلصهم من الگال و الگيل ..
امنتُ بالله و مطلگته رسمي بس رميت عليه اليمين ..
گدامهم كلهم ..
عشت الـ ڤين و أڤين ..
شنو ؟ عيد مسمعت ؟
بناتي اسمهم عليچ اثنينهم ..
اندار و حچاه بوجهي ..
ردت اتذكرچ بيهم ..
حچاه بحسرة المحروم للـ لگمة ..
ابتسمت و فرحت و طرت ..
بسمتچ يا بعد رويحتي ..
كل الدفو بيه طالعة من روحچ المضحية و الي تريد السعادة الغيرها اكثر من نفسه ..
تدفع بروحي الامل و تخليني اعشگ الحياة لان انتِ بيه ..
بقيت عيوني بيه لمعت الدمع ..
و حلگي بيه فرحت عدم نسياني ..
اجالي شغل اهنا و شفتچ بالسليمانية ..
خلاچ القدر بين اديه ..
ليش مگتلي كل هذا الكلام ؟
مگتلچ لان خفت تعوفيني ..
شفتي نفسچ شنو سويتي هسه و انتِ تحبيني !
لو بعدچ محابتني شلون ؟
بس انت مو من حقك تحكم ابدالي ..
اني الي لازم تقرر تقبل تزوج واحد مزوج و عنده اطفال لو لا ؟
صح بس و الله و ما اعبُد ..
خوفي من رفضچ خلاني اكذب ..
زين !!!
منو يگول انت مفصول عنه ..
تعاي و اسئلي كل الجواريين ..
بعدين لو چنت وياها شلون يومية انام على انفاس بعض ..
فد يوم حسيتي احد يمي حواليه ..
غرفتي خط احمر اكسر رجله اذا دخلته ..
اوكي افرض اني رضيت اهلي شراح يقنعهم !
ليش منو گلهم ؟
چانت هاڤين يمي و گالتلهم ..
هاااا ..
اني اروح و احچي وياهم و انتِ بس كوني بجانبي ..
و حياتچ اهنا حتكون بعيدة عن كلشي ..
محد يدنالچ بچلمه وحدة ..
ادمرو و الله ..
جر ايدي الي على چتفه ..
بيده اليسره و حضنه باثنين ايده ..
و داعت بناتي ..
و داعتچ الي كله هسه تحلفني بيچ ..
ما اكدر استغني عنچ ابد ..
و الله اموت ..
يا ريت الموته العادية ..
اموت مثل الي بيه سرطان و يومية ياكل خليه من جسمه ..
و هو واگف ما بيده شئ يسويله ..
لو يخلي الكيمياوي بجسمه و يحرگ باوردته حرگ ..
لو يستسلم لحد ما يوصل للنهاية ..
سكتت مثل البالع الموس ..
الم و جرح بقلبي الي يريده و تعود على كلشي بيه ..
مرات احسني وردة و هو غصنه ..
عمر الوردة ما گدرت تعيش بليه الغصن ..
اذا مو هو موجود تموت بعد ساعات ..
اني هيچ اموت بلا نمر ..
نمر هو الحياة و كل حلو بيها بالنسبة الي ..
يعني هسة شنو قررتي يا حبيبة روحي ؟

فالقصة امل بالحياة لا يموت

السلام عليكم غواليي ..
اليوم سؤالي مو عن توقعاتكم و لا طلب لدعواتكم ..
اليوم اريد اعرف شنو اكثر جملة او مقطع كل واحد بيكم حسه يمثله ؟
و اكيد احب تفاعلكم و ردودكم المتالقة مثلكم