مجنوني

( اعز من الشرف ماكو )

السلام عليكم سيداتي آنساتي ورداتي ..
اليوم قصتنه تتحدث عن فتاة عراقية من القومية الكردية ..
عاشت معاناة مع اهلها بعد احداث ٢٠٠٦/٢٠٠٥ ..
عانت فيها ما عانت ..
و عثرت بعدها على عشقها ..
الفتى العربي الاصل ..
ابن العشاير من محافظة...

هل سوف تستمر معاناتها ؟
هل سوف يكلل بالنجاح عشقها ؟
هل سوف يأتي يوم يرتاح فيهِ قلبها و عقلها ؟
هذا ما سوف تعرفونهُ بعد قرائتكم لقصتها ..
عن لسان الفتاة مع خيالي الممتع.

#مجنوني
الفصل الاول
#بقلمي_اسراءالجميلي

اوووف شوكت اخلص ..
انوب خله اكثر اثنين اضوج منهم يمي ..
جيلان : وين صافنة عيني ڤونة ؟
جيلان اني كم مرة گايلة اني اهنا مديرتچ ..
الدلع ما احبه ..
احترام اهلاً و سهلاً ..
حچي زايد لا تحچين وياية ..
نزلت راسي على اوراق الحسابات دا اشتغل بيهم ..
حسيته گامت من ميزه ..
بتجاهي جايه ..
بقيت منزلة راسي ..
اتقربت عليه ..
بجهتي اليمين ..
چان تلزم شعري خلته وره اذاني و هيه تحچي بنعوصه ..
عفييييييه انتِ ليش هيچي نحسههه ؟
اهنا فاض بيه ..
گمت على حيلي ..
حسيت بألم برجلي بس مدرتله بال ..
عليت صوتي و اني واگفه بوجهه ..
مو كافي عاد لعبان نفس ؟
شوكت حتجوزون من هاي الحركات المايصه ؟
طلع المدير ..
مديرنه غوستاف فرنسي ..
مدا يگدر يتعلم على عاداتنه الشرقية بالتعامل مع المراءة ..
ماخذ على فرنسا و تصرفات اهله ..
يجي الصبح يبوس بالموظفات ..
يطلع الظهر ياخذهم بالحضن يلا يروح ..
اني صح المديرة الي بعده ..
بس هيچ علاقات ابد متصرفلي ..
هو علساس چبير بالعمر و راسه شيب ..
عود ذني مثل بناته ..
بس اني اموت من هيچ تصرفات ..
اريد حضني يكون للانسان الي حكمل وياه حياتي ..
صح شايله هذا الموضوع من بالي حالياً ..
و يمكن لان لحد الان ملگيت الي يستاهل حبي ..
بس ابقه احب احافظ على نفسي علموده ..
على صوتي اجه ركض ..
طبعاً غوستاف يحچي فرنسي ..
يدكش انگليزي شوية ..
لهذا بس اني احچي وياه و اتفاهم لان اعرف فرنسي ..
الباقين سلام و كلمات بسيطة بس ..
شكو شبيكم ؟
انداريت عليه ..
من البداية گتلگ استاذ اني المديرة ..
و ما احب يكون غير احد وياية بغرفتي ..
غوستاف : على كيف ست ڤين ..
هدي نفسچ ..
اني ما اهدئ الى ان يطلعون منا ..
زين هو شنو صار ممكن افهم ؟
حچيتله الي صار ..
غوستاف : ههههه انتِ كلش ماخذه الامور بجدية ..
اتقرب على جيلان لزم ايده اليمنه ..
غوستاف : شدعوة تره هيه حركة بسيطة ..
تعبر عن الالفة الي بينه ..
سوالها نفس الحركه الي سوته هيه ويايه ..
هي تباوع عليه بنظرات حزن ..
باوعت عليه ..
استاذ اني ما احب الي ديصير ..
جيلان : حبيبتي ڤونه ..
ترى هو ابو الخبزة ..
يعني شيصير اذا صارت حركات بسيطة بينه ..
باوعت عليها بعصبيه ..
بالنسبة الي ابو الخبز الله ..
غيره ماكو !
و الادب و الاخلاق معليه بالخبز ..
بس الظاهر اهلكم منطيكم خبز و ما ممنطيكم تربيه ..
رفعت ايده اليمين رادت تضربني ..
لزمت ايده بيسرتي قوي ..
لان اني يسراويه ..
اكسر ايدچ و ايد كل عشيرتچ و اهلچ ..
انداريت عليه و اني بعدني لازمه ايدها ..
اجه هو اتقرب عليه ..
يريدله حجه حتى يلزمني ..
عرفت نيته ..
ديربالك تتقرب اكثر ..
عافني و رجع ال جيلان و اخذه ..
أشر بيده اثنينهم ..
على كيف ڤونه ..
مو هيچ يصغرون اسمچ البنات ؟
هههههه ..
اني خنزرت عليه ..
هذا الحچي الابنية اللخ وگفت ..
صافنه بس تباوع علينه ..
المدير : تعاي وياية عوفيه ..
يجوز احد مضوجه من الصبح ..
طبعاً هيه خلت راسه على چتفه و تمشي وياه ..
و تسوي نفسه تبچي ..
و هو علساس اجنبي ..
خطيه ميتحمل دموع النساء ..
هههه مو اني قشمر ..
هو الساقط يبقه ساقط بكل مكان بالعالم ..
گعدت على ميزي ..
و اني دا افور ..
نار بداخلي ..
أصعب شعور لمن أتريد تبجي بس متكدر ؟
لمن أتريد تشرح الي بداخلك بس متعرف ألمن ؟
تريد اتصيح بصوت عالي تحس صوتك مخنوگ ..
كااافي اذيه تعبت ..
حسيت الالم برجلي زاد ..
باوعتلهه ..
چان يطلع اصبعي الچبير مال رجلي اليسره ..
مضروب اب چرخ الكرسي ..
عيوني غورگت ..
من الالم الي حسيت بيه ..
طاح حظ العازة الي تخلي هيچ واحد ..
يريد يسوي الي يعجبه ويايه علمودهه ..
گمت رحت للمكتبه گبالي ..
جريت منها خمس اوراق من بند الورق الابيض ..
رجعت كتبت استقالتي ..
بالعربي و الكردي و الفرنسي و الانگليزي و الايطالي ..
تمنيت اعرف كل لغات العالم ..
و اكتبله الاستقاله بيه ..
اخذت غراضي المهمه ..
صورة خواتي و اخوتي ..
و صورة بت اختي ..
كوبي مال النسكافي الي سوالياه مديري السابق ..
بعد خروجي من الشركة ..
بعد فركشته ..
چانت شركة كردية عربية ..
و تخاربوا ..
بعد متحملت المشاكل و طلعت ..
انطيت الاوراق للبنت الي بصفي ..
شنو هاي ست ؟
هاي استقالتي بكل اللغات الي اعرفه ..
انطيه المديركم التحفه ..
وين رايحة ست ؟
فدوة منو بعد يترجمله و يتفاهم وياه ..
حچيت باستهزاء ..
خلي جيلان تفيدكم حبيبتي ..
طلعت ..
بمشيتي مريت من يم مكتبه ..
صاير على جهتي اليسره ..چان بيه جام على ممر الشركة ..
لگيته ساد البردات ..
ضحكت بالم و فرح بنفس الوكت ..
الم لان هيچ شكول ديمثلون بلدنه ..
و فرح لان رغم الظروف بس شرفي و عزة نفسي ..
اهم من فلوس الدنيا ..
هههه ديسكته خطية ..
اول مسديت باب الشركة ..
بدت دموعي تصب ..
الى متى يا ربي ..
صار اربع سنوات ..
من مكان المكان ..
امشي و ما ادري وين رايحة ..
حرجع للبيت شنو اگلهم ؟
همين اگلهم بطلت ..
و ماما و بابا ينقهرون بس ميگدرون يحچون ..
اشوف الحزن مالي عيونهم ..
ميبنولي همه بحاجة راتبي ..
بتبطيلي اول شئ حأذيهم ..
و من يوم طبينه الشمال لسه ..
حياتي تعب بتعب ..
لشوكت تبقين هيچ ڤين ..
لشوكت تسنديين بالعالم ..
و ماكو الچ سند ..
اسوء شعور من يضحي الانسان بكل شي عنده ..
في سبيل يسعد الناس ويشوف ضحكتهم ..
يساعدهم بكلمه وبموقف ..
بالمقابل هو محد يحس بي قيد شعره ..
بقيت امشي للمجهول ما اعرف وين رايحة ..
اتذكر الي مر بينه ..
..........................................................
احنه عائلة كردية ..
قبل بابا ميتزوج ماما ..
صديقه اقترح عليه يروحون يشتغلون بغداد ..
اخذ ورثه من ابوه ..
فتحو شركة استيراد و تصدير ..
بدت صغيرة ..
و كبرت و الچبير الله ..
اجه للشمال و اتزوج امي بت خالته ..
زواج تقليدي ..
بس العشرة ولدت بينهم حب چبير ..
رغم عدم اعتقادي بهذا الشئ ..
بيتنه چان بالسيدية ٦٠٠م ..
داير مدايره حديقة ..
عائلتنه متكونه من ثلاث بنات ..
و ولدين اجوي بعد عناء من امي ..
لوما شالوا رحم ماما ..
بعد ولادة اخوية الاخير ..
چان هسه احنه عشرين ..
ڤين مواليدي ١٩٨٤ خريجة علوم حاسبات ..
بعد تخرجي بديت اشتغل بشركة بابا ..
بشارع ١٤ رمضان ..
بس ملحگت ارتاح ..
چان يعتبرني ابنه ..
علاقتنه حلوة كلش ..
متفاهمه وياه على الأخير ..
مع الاسف تغير كومة بعد الاحداث ..
اتخرجت ٢٠٠٥..
خلصت السنة الاخيرة بالگوة بسبب الوضع الزفت ..
گعدنه الصبح على فرحت اختي الصغيرة هاڤين ..
عدنه وحدة ويانه بالبيت تساعدنه ..
تصير بت خالة ابوية ..
مرية متعرف كلمه عربي و متريد تعرف ..
ممتزوجه و بابا من ماتو اهله جابه يمنه ..
كلش تحبنه و متعلمين عليه ..
اسمه فاطمة ..
من يجي احد اگلهم اسالوه شنو اسمچ ؟
احبه من تنطقه ..
فاتيمه ..
ههههه شگد طيبه و حنونه ..
گاعدين نتريگ ..
ڤين يلا حبابه حتى توصلينه اني و بابا ..
دنجيب الاستمارة من التربية ..
وچ اوكفي عبالك اول طالبة تتخرج من السادس ..
اشو لاڤين مسوت مثلچ ..
شعليه بغيري ..
و تباوع على اختي بدلع و غرور بسيط ..
عود هيه معدلهه اعلى ..
حقه رغم الظروف گدرت اطلع ٩٨..
و بچده و تعبه بدون غش ..
المهم كملنه على السريع ..
وصلتهم و رحت للشركة ..
ماكو ساعة و دگ مبايلي ..
اني مشلته و لا باوعت عليه ..
چنت دا اتفق وي عميل من الصين ..
گلبت التلفون ..
و رجعت اكتب بالحاسبه ..
بس التلفون بقه يهتز على الميز ..
قلبي زادت دگاته ..
باوعت لگيت ماما خمس مكالمات ..
خير يا رب ؟
بيدي التلفون و دگت مرة لخ ..
فتحته بسرعة ..
الحگينه ڤين ؟
بابا يگول عوفي الشركة و تعاي ..
خير ماما شكو ؟
تعاي بنتي بلا نقاش ..
بابا يگول اخذي تكسي لا تجين بالسيارة ..
لييييييش؟
اسمع عياط بابا من بعيد ..
نفذيييي الي دا تسمعييي بدون نقاش ..
و جيبي وياچ شكو فلوس بالقاصة ..
حتى لو ربع دينار ..
حطيت الفلوس الي بالقاصة ..
بجنطة الحاسبة ..
و اخذت چنطتي و طلعت ركض ..
اجرت تكسي عالسريع ..
الف حسبه و حسبه براسي ..
فرحت من سمعت صوت اغلى اثنين عندي ..
سالمين و ما بيهم شئ ..
بس الخوف بعده بداخلي ..
وصلت للبيت انطيته ٢٠ الف بدون ما اناقشه ..
سحبت الباب من الزنجيل البره ..
واگفه اباب المطبخ فاتيمه ..
من بعيد ..
عيونه دم و مورمه ..
شفت الطرمه عبالك الف متر ..
مع انو هيه ١٦م بس ..
اريد بس اوصل اله و افتهم ..
وصلت لزمت ايدي ..
سالته بعيني
گامت تبچي ..
باوعت للمطبخ ..
كلهم موجودين ..
بابا گاعد على ديوانه البنفسجي ..
خال راسه بين ايديه ..
ماما گامتلي حضنتني ..
اباوع عليهم و فاتحة عيوني ..
هاڤين گاعده بالگاع شعره مكفش ..
لاڤين واگفه يم السنگ دمعه تارس خدوده ..
شيراز و نوزاد اخوتي مثل التايهين ..
شبيكم عفية احچوا ؟
حچت امي بالكردي ..
لازم نطلع من البيت اليوم ..
ليش شكووو ؟
هاڤين : اني بعد ما عندي مستقبل ..
مراح اصير طبيبه مثل ما اريد ..
لييييش ؟
ماما : حبيبتي من اخذوا الاستماره ابوچ و اختچ ..
دياخذون تكسي ..
واگفتلهم سيارة سودة مضللّ ..
مصعدتهم ..
منطينه اوراق الابوچ ..
مال شنو الاوراق ؟
يعني فلوس ؟
بابا : لچ يا فلوس ..
وقعوني على سندات بيع و شراء ..
شنووووو باااااااابا ؟
وگعت من ايدي الجنط و مفاتيحي ..
اي بابا اي ..
البيت و الشركة و السيارة
......................................................
فزيت على عيطه بصوت عالي ..
ويييين ؟
كأنو طرت بالهوى ..
وگعت بالگاع و واحد فوگاية ايده اليسرى جوايا ..
و اليمين على الگاع ..
فتحت عيوني بوجه ..
عرفته عربي ..
ملامح رجل بكل معانيه ..
نفسه بوجهي ..
صفن عليه ..
معقوووله ڤين ؟

فالقصة صدفة خير من الف ميعاد