البارت السادس 6
وهو صاير شرار من الاعصاب و الدنية تباوع علي واني ركض عزلت المحل و وراه شفته صعد سيارته و شخطها و ع السريع واني هم صعدت سيارتي و وراه مردت اخوية يزعل مني لازم اظل اوضحله حتى لو اجيبها للساقطة و اشهدها ... ظل يمشي سريع و بين السيارات ... جتي بالي ادك عليه واكوله اوكف احجي وياك باي مكان وجيب البنية نتواجه ... دكيت علي اول مرة ما شاله .. واني بعدني امشي وراه بسيارتي بيناتنه سيارتين ... دكيت مرة ثانية وجان يشيلة ... كتله سليم ... اسمعني دقيقة انت اذا ما مصدكني.... جان يقاطعني كلي باوع قيصر ... لا اسمعك ولا بعد اريد اشوفك ... انت من اليوم احسب ما عندك اخ وانسى بعد سليم اخوك ...وجان يطبكه ... شمرت التليفون ع الكرسي اليمي و كمت افشر على روحي و اسبها و العن نفسي هاي النسوان تخرب بيناتنه ... اني وسليم روح وحدة تالي هيج ... ظليت اضرب الستيرن و اشتم .. وادك هورن للسيارات الي كبالي ... حتى الحك باخوية ولو ما اعرف وين رايح بس خفت ليسوي حادث و بهذاك الوقت ما راح اسامح نفسي ابد رح اظل وراه يتيم اخ .. يتيم روح ... يتيم نبض ... سليم روحي و نبض كلبي عضيدي... وهناك وكف السير و اني ردتها من الله ... نزلت ع السريع ورحت لسيارته ... لكيته ساد الجامة و قافل البيبان ... دكيت ع الجام و ااشرله ميفيد ميباوعلي اصلاً ... ظليت واكف ادك حييل حييل ... جان ينزل كلي قيصر ارجع لسيارتك و روح لا والله هسة احرك الدنيا ...
كتله انت بس اسمعني ... تريد دليل على كللامي ؟
كلي انت ليش غبي لساك تجرجر بالموضوع اني زينب اثق بيها مثل ما اثق بعيني الي دا اباوعك هسة بيها انت شيطان مو انسان ...
كتله اوكي اهدأ وهذا موبايلي كولشي بي حتى تصدكني ... ادور على موبايلي بجيوبي ماكو ... ياااا نسيته بالسيارة ... كلي ياله وين دليلك ... كتله موبايلي بالسيارة تعال وياي اراويك ... ظل يباوعلي و النار تجدح بعينه و وجهه احمر من الاعصاب كلي باوع اني واكف هنا روح جيبه و تعال اواذا صدك طلع حجيك او كذبت انت بكلا الحالتين بعد مو اخوية ... لان اهتزت صورتك بعيني و ما جنت متخايل اخوية يلعب باعراض العالم ...
ما درت بال لكلامه بس ردت ابرهن اله بين سيارتي و سيارته سيارتين رحت ركضت لسيارتي وهذا الحجي السير قافل واكفين و اصلاً سدوا الطريق لان شكوا اكو مفخخة ...طبيت للسيارة دا ادور التليفون ماكو ع الكرسي اني شمرته هناك ... نزلت جوة الكشن ادور و روحي تلوب اشو كلبي معصور ما اعرف شبية ...
وعلى غفلة واني جوة الكشن يدوي صوت قووووي خلة اذني تطرش و جام سيارتي كل وكع على راسي و اكو شي بظهري ينزل حار ما سمعت شي وراها ابد بس اباوع ايدي مليان شظايا كزاز و مدماية والناس ما اسمعها بس اشوفها تتراكض ... للحظات نسيت اني ليش هنا واكف و شنو جان صاير قبلها ... اني وين شنو هالعالم المدماية و تركض ... و بعدين خطر ببالي سليم ... كمت اعيط سليييييم طلعت من السيارة و الكه المنظر يبجي السيارات القبلي كولها نار و تحترك ... لا لا سيارة اخوية هم ... ركضت ع السيارة واني كلبي يدك بسرعة جنونية ... شلون خاف ما الكة اخوية ...
اتقربت لكيتها السيارة تشتعل نار اثاري المفخخة جانت لزك باخوية و لو ما انصي رجعت اجيب الموبايل جان اني هسة ميت ... اخوية ويين كمت اعيط و ابجي و اباوع بوجوه العالم المفزوعة ... اجاني عسكري كلي تعال انت مصاب امشي دنقلك للمستشفى ... كتله طز بيه اريد اخوية واني ابجي مثل النسوان ... ما مر علية موقف مثل هالموقف ...
كلي كل هالسيارت ماتت اصحابها انت شدتحجي ... كتله يمعود ماكو اخوية ما موجود بالسيارة ... كلي لعد يجوز نقلوه وية المجاريح ... امشي للمستشفى هم تدوره و هم تتعالج اخوية انت مصاب وظاهر اكو شظية بظهرك ...
وصلني لسيارة حمل ديكرفتون بيها المصابين و المياتة ...
يتبع....
تصويت وتعليق حبايب
