بارت 16
البارت السادس عشر
بوكتها مداومت ولا قبلت اطلع من غرفتي امي ضاجت منهم بس شنو بايدها امه و اعتذرت هوااية ... و هو ماكو لا خابر لا اعتذر لا وضح لي ليش طلع ع غفلة ... ابد ...
واني هم قررت ما اشيله اذا خابر ...
مرت ٣ ايام واني كووولش مقهورة بعدني لا فرحت مثل البنات لا مهري ساواهن مخالفة ... لا طلعت ويا بعد المهر لا اجة و اتلهفلي ...
جنت بوكتها كاعدة بالحديقة ... حديقتنه كوولش زغيرة حاطة كرسي و كاعدة صافنه ع السما جانت صافية و بدت تغورب اللون بيها روووعة ...
دك تليفوني .. وشلته شفت رقم قيصر ... عفته مجاوبت .. 😏 مرة ثانية دك .. و هم مشلته ... اخر شي سويته صامت و شمرته ع الميز ...
و ظليت كاعدة سارحة بمنظر السما .. جنت لابسة بنطرون و تي شيرت وردي طوخ بس لابسة شال و كاعدة ...
وما حاطة مكياج و وجهي يلعب النفس لان صارلي ٣ ايام ما ماكلة شي على كد المي ...
تذكرت الاغنية الي سمعته بسيارة قيصر مال عمرو ذياب ...( ومالو لو ليلة تهنا بعيد و سبنا كل الناس ...انا يا حبيبي حاسس بحب جديد ملينا هالاحساس .. انا هنا جنبي احلى الناس .. انا هنا جنبي اغلى الناس)
دندنت بيها و حان تنزل دمعتي اشو على غفلة و جان يچفت واحد علية و جان اصرخ الدنيا اظلمت كووولشي مبين ...😱😱😱😱
قيصر ......اني من طلعت من المهر عيوني ما شوف بيهن ... روحي لايبة ما اعرف شأريد ... خواصري يموتني ... راسي يريد ينفجر هاي ما عدا احساس الذنب الي راد يذبحني ... كل ما اتذكر اني رح اعرس و اخوية مات و ما شاف هالشي اموت الف موتة ....
هذا حصاد الزرع الي زرعته ... زرعت بذور الفساد و دا اجني ثمارها... ثمار فاسدة ... حياتي صارت عبارة عن عقاب و كوابيس ماالهة نهاية ...
حتى نور رح تاكل من نفس الطبق ... طبق الاثم و عقابه صح هي ما الهة ذنب ... بس يبقة ذنبهة بركبتي ... و هاي بداية العذاب ... البنية حاسبتني رجل طبيعي ... و حياتي طبيعية .. تريد تحس بروحها مخطوبة لشخص رح يتزوجها لجمالها او لشخصها بس ما راح تلكي هالشي ..
اني مراهن على هذا المبدأ نور رح يجي يوم و تبزع و تمل و تعوفني ... بس اريدها هي الي تمل و تكتشفني على حقيقتي ... وتشوف اي وحش اني ... اريدها تحس اني من جوة مو بالجمال الي دتشوفني بي روحي مو بالاناقة الي دتلمسها بهندامي و ريحة جريمتي لاخوية مو نفس عطري الغالي الي تشمه بهندامي.... اكيد رح يجي اليوم وتكتشف قيصر شنوووو ...
بعد المهر ... ب ٣ ايام كعدت وية نفسي و كلت خلي اخابر نور و اشوف شنو ردة فعلها ... ادك عليها متشيله .. مرة ... الثانية ... الثالثة ... و ظليت حد ما صارن عشرة
وما ردت ... هذا استفزاز علني ... الليدي نور ما عاجبها ترد و دتحاربني بهالاسلوب ... خلي توكفلي😤 ...
كمت ركبت سيارتي و ع السريع توجهت لبيتها ....
وصلت و جان بعصبيتي الي جانت عامية عيوني و منسيتني حالي .. طبيت چفت لبيتهم .. و هي اخترعت لان الدني مظلمة ... جان تصرخ و كالت منوووووو ...
كتلها منووو ..؟ اني الطرطور الي ديدك صارله ساعة ...
جان دكولي قيصررر 😰 كتلهة اي الحيوان الي لابسته حضرتج ... وين تليفونج ...؟
هي صارت حجارة و دموعها تكت ...😭مجاوبتني ...
اتقربت منها اكثر و شفت وضعيتها تعبانة وجههة اصفر و عيونها بهالات جوزي ..اني من شفت دموعها و وضعيتها هيج راحت كل الاعصاب و ردت بس احضنها و اطيب خاطرها ... كولشي ولا تبجي ... من تبجي تطلع عبالك طفلة عمرها ٣ سنوات اخذوا لعابتها منها ....
كسرت كلبي و هنوب كامت تشهنك و دموعها تجري ...
كلت ... احم ... باوعتلها بطرف عيني انتظرتها تخلص ... مدتخلص اني سكتت و هي بقت تبجي ... مرت ثواني ثكيلة علية كلبي مدينطيني اعوفها تبجي و اتفرج عليها ..
كتلها فيضتينا ... مكافي .. تقربت اكثر وصرنا واحد كبال اللاخ كولش وهي مدنكة متقبل تشيل راسها ...
كمشتها من حنچخا ورفعت راسها ... باوعتلي بنظرة كطعت روحي و عينها الصافية مليانة حزن ودموعهاتلمع
يتبع....
