بارت 22
البارت الثاني و العشرون
وصلنا للمستشفى و الدكاترة استلموها ... ظليت واكف بالممر انتظر و اني بدا بية الم كل مرة بس مدرت بال لنفسي ... طوبها طوووب ... اذا نور صارلها شي اني صدك هالمرة اسويها و اقتل نفسي اريد اخلص العالم الحوالية من الوحش الي جواية ...
ظليت احوم مثل النسر الخايب ... طلع الدكتور و جان اركض اله كتله ها دكتور بشر .... كال معانده تكعد هي متعرضة لصدمة او ضغط ..؟ امها جتي وجان تبجي كلتله و الله يومة جان خطيبها مريض و نايم مستشفى وهي جانت متخبلة عليه و بوكتها رجعت من يمه و صارت هيج ... كلي الدكتور انت خطيبها ...؟ هزيت راسي باسف كتله اي ... وزفرت تنهيدها بحرارة ... كلي ممكن احجي وياك على انفراد ... كتله... اي طبينا لغرفته و كعد و كلي تفضل ... كلي شوف ابني نور حالتها صعبة اتعرضت لصدمة قوية لا تقنعني لان انت جنت مريض وهي صارت هيج ... لازم اكو احد صادمها بخبر او عرفت شي جانت متوقعته زين و خاب ظنها ...
هنا ... اني بعد مكدرت اسكت و اداري شعور الوحش الي جواية ... كتله اي دكتور ... اني السبب ... اني صدمتها .. و سمعتها كلام جانت متدري بي ...
كلي .. ابني انت اذا مو كد الزواج ليش تتزوج و تأذي بنت العالم ..ليييش هيجي ... ؟ شوف اني ما اضمن الك رح تكعد مبكر ... بس هي رح تكعد ... بس رح ينتج عن صدمتها شي ... اما تفقد الذاكرة او تفقد احد حواسها
اني تخبلت ... لزمت راسي بايديناتي و غمضت عيني ردت يرجع الوكت بيه ٣ ايام جان ما سويت السويته ... يارب لا تخليني اضوك مرار الفقدان مرة ثانية ... يا الهي لا تخليني اعيش الهجر ... يا ربي عافيها ...
كتله دكتور شنو الحل ... كلي بحالتها ماكو اي علاج او دوة هي عايشة بس ميتة سريرياً يعني بس النفس ... بحالتها هاي اذا تتكرر الغيبوبة اكثر من مرتين و تعدي بالثالثة نسبة نجاتها و صحوتها من الغيبوبة ضئيلة جداً ... فبقت يم الله ... الله يرأف بحالها ...
هو يحجي واني نار جواية كتله واني نار كبرة صاير .. لازم اكو حل يعني كولي اخذوها و دفنوها ...
ابني انت ليش تتجاوز .. كلي احجي وياك علمياً و من موقعي كطبيب شتريد لعد ... والله يا الله يقتل القتيل و يمشي بجنازته ... و هز بايده و جان يكولي اتفضل اطلع خلصت حجي وياك ...
باوعتله و ايدي حضرتها دا انطي بوكس لهالفاشل ... يريدني اعوفها بهالحال ...
كتله رح اطلع بس ترة ماكو طبيب بموقعك يا طبيب يكول هالحجي... ماكو حالة و ما الها حل ... لو معلموكم ...
جان يعيط و يكلي اطلع بررررة ... ترة والله حتى مريضتكم اشمرها برة ... كتله خوش طبيب مال تنك 😤
عفته و طلعت مردت اطولها اني لو عليه ادفنه بالكاع و افضها ... بس نور مردته يطلعها من المستشفى لان اعرف هيچ شكول جبناء يلزمون من نقاط الضعف..
رحت كعدت بالممر وساند ايدي على ركبي و حابس راسي بايدي افكر شسوي ... شلوووون .. الالم كام يدك بيه و كليتي كل دقيقة تمغصني بس اني تاركها ...
جتني فكرة ابحث عن مرضها بالنت و اشوف شنو حلوله .. اصبحنا ببلد نجيب مرضانا للمستشفى واحنه نداويهم ...😏 طلعت تليفون و كتبت المرض ... و نزلت اشكال المواضيع طبيت على واحد و جان كاتب مقال طويل و بالاخير كاتبين كيف يفيق مريض غيبوبة الصدمة ...؟ دست عليه و لكيت الجواب انه لازم نتواصل وياه و حتى لو هو غايب عن الوعي فهو يسمعنا اكييد لازم نخبره اشياء سارة و نسولفله احداث حلوة و نبعد عنه الافكار الي خلته ينصدم ...
اني هم مكذبت خبر .. طبيت و شفتها نايمة بالسرير لا حول ولا قوة ... بس نفسها يصعد و ينزل و وجهها شاااحب ...جريت الكرسي و كعدت يمها حضنت ايدخا بچفوفي و بسته بحرارة ... و كمت اسولفلها و اضحك وياها و حتى اتغزل بيها ... و كانما مو غايبة عن الوعي ...
ظليت ع هالوضع اسبوع يومية اكعد اسولف يمها بس بساعات الوجبات اروح اكل و اغسل و ارجع ... و احط عطر نفسه الي جنت حاطه بالمهر لان هي مرة كلتلي جنت احضن سترتك و انام ... فاكيد العطر اتعلمت عليه ... فكمت اتعطر و اطب ( الي يشوفني معطر و كاشخ يكول هذا بلا هم نياله ..ميدرون اني اموت يومية الف موتة )
الحل الي لكيته ع النت هو مو حل واقعي بس شسوي مكصكصة جناحيني هذا اضعف الايمان ...
احضنها كل شوية و احسسها بوجودي بلكي شوقها ياخذها و الحنين لاحضاني يخليها تستعيد وعيها ....
المهم ... خلال هالاسبوع تعبت هواية اهلها ما اقبل يجون هواية ... لان تعابة همه هم ... بس امها متقبل الا تجي حتى نغسللها ... و نبدل هدومها اني وياها ...
اخر يوم من الاسبوع جنت تعبان كولش و دواية هامله بحيث جيت للمستشفى اعرج ... صفحتي توجعني كووولش و الدوخة زادت ... جيت طبيت الغرفة كعدت و بديت اسولفلها ... بس اني تعبان كووولش و حتى حچايتي مقطعة احجي و اسكت يعصرني الالم يروح و اكمل ... نصيت عليها و بستها من شفايفها و طولت ببوستي كتلها هاي ثاني مرة اضوك كرز شفايفچ ... اني اتالم و هامل الالم .. حبيبتي نورة منتظر كومتج على احر من الجم.. ر كلت اخر كلمة و جان اعلن الاستسلام و كعت بالكاع و الالم زااااد انطويت على نفسي و كاتم صرختي ما اريد يوصلها شي مو حلو مني اختنكت و زاد نبضي و قل تنفسي اريد هوا ماكووووو ....انذكرت واني دا اخوض معركتي الي تيقنت الاخيرة وية الالم انه امها كاعدة برة بالممر...جريت الكرسي بحركة متت ياله وصلتله و وكعته ... و بعدها انحبس نفسي و رجف جسمي و ............... .....
يتبع تصويت بنات ومتابعة للقصه
