بارت 20
يتبع...البارت العشرون
صراحة فاجئتني و خلت بية الروح تشوووغ ... كلامها بسمار و اندك بكلبي ... مع ذلك اثوليت و فضلت ابقى اثول حتى تبزع ما اريدها تتعلق بيه ... اني منتهي ... ليش اخليها بامل و بحلم سراااب ... كتلهة نور ... اني مصر على قراري و بعدين انتِ بعدج زغيرة و حلوة ... والطريق كدامچ ... كامت وكفت چان دكولي و بعبرة مخنوكة ... قيصر انت تدري اني احبك ... قيصر انت تعرف اني اعشقك .. انت بمثابة الهوا ...انت اسمك كلبي يصرخ بي .. ليش تعذبني ... ادري بيك ما حبيتني بس اني هويتك و حبيتك و عشكتك .. من يوم المهر اني ما اغفى الا و حاضنة سترتك ... اشم عطرك و يلوليلي .. نسيج السترة يداعبني و احسهه انت و بحلمي تجيني ... و على حصان ابيض تاخذني ... كلبي كام يدك و يريد يطلع من صدري كل هالكلام خافيته عني ...
لو بس اني مو اني ... اني مو قيصر النذل.. جان چلبت بالحياة و طلبت عمر ثاني حتى اكمله وياها ...
كتلها نور .. لا تصعبيها اكثر ... اني ما فيدج ... اني مو بهالجمال الي دتشوفيني ... القبح و التشوه بداخلي مليان ... انت قطعة من البراءة و العفة تستحقين احسن مني ... جان تتهستر واول مرة اشوفها هيج ... و بعلو حسهة جان دكول ... ومنو انت تحكم عليه بالموت ... و منو انت حتى تنهي حياتي ... قررت تموت و تاخذ مني روحي ... قيصر ما راح اسمحلك تخطو هالخطوة ... حتى لو غصب عنك...
صرت عصبي و كمت اعيط كتلها شلون حبيتي مجرم ... شلون حبيتي نذل مثلي ... شلون حبيتي واحد قتل اخوه ...
نور ... من سمعته كال جملته الاخيرة و اعترف على نفسه انه هو قاتل اني انهاريت ...هذا شلون قتل اخوووه ؟؟
وكعت بالكاع وحنيت ظهري ونزلت راسي وصرت انود و ابچي لا يا ربي ليييش ... كلبي حب واحد مجرم ...؟
كلي من يوم كتلت اخوية واني اعذب نفسي ... ما اريد اعيش حاولت الانتحار ... و ما فاد ... جنت ادخل بغرفتي و ابجكارتي اچوي جسمي ... و ما فاد و منمسح الذنب ... لعنة اخوي و نومته جوة التراب لحكتني حتى بالاحلام ...
هو يحجي و اني مغمضة عيني و ايدي على صدري كلبي دكاته خنكتني ... حسيت هسة قيصر قتلني مو من قرر ميسوي العملية و يعيش ... كلي نور اني اخنكت فرحة اخوية بايدية هذني ... اني دفنت سعادته جوة التراب وتريديني اني افرح و اعيش و اتهنة ...
كمت وكفت باوعتله اخر مرة حفظت ملامحه على غيبي اكثر و سطرتها بكلبي و بسرعة جريت جنطتي و ركض طلعت بعد ما اريد اسمع شي ... خلي قيصر الاولي بكلبي و خلي صورته ورونقه محافظة عليه ...
قيصر.. عريت نفسي كدامها ... كشفت كل اوراقي ...
الماضي الاسود والملوث الي جنت عايشه و ما زلت اعاني منه حجيته ...و ما خليت بكلبي شي ... حتى افتح عيونها الي انغشت بيه ... و حبتني على جهل ... صحيح اني كلبي ممرود و احجي وياها و صراخ روحي الي تهواه بداخلي مزقني ... روحي عكس عقلي روحي جانت تريد تكمز مني و تروح تحضنها و تلوليلها... بس عقلي حاصرها بجدران الاثم و كبت رغبتها ... غصباً عني قسيت و عيطت عليها... وره مكملت حجي و اني بداخلي نار تستعر و زادت الالام الي بية و زادت لهفتي لحضنها بس ما اكدر اتراجع اني الي سويته بمصلحتها ...
وكفت باوعتلي و بنظرة هزت جبال قوتي ... و يمكن وكعتهن و دموعهي مزقت روحي و مردت كلبي ... و جان يطول صمتها و اخذت جنطتها و بركض طلعت ...
من طلعت اخذت رووحي وياها ... خلتني فارغ من جوة بلا روح و خلت دموعي تجري و بلا استأذان ادورها بعيني بلكي ترجع .. بلكي ترجعلي الروح ... ماكو مرجعت ... ها هي قيصر كلت بكلبي انت ردت هالشي انت اختاريت الفراق عنك و عنها و هي سوت الي انت ردته ... امسح دموعك و لا تضعف قرارك احسمه و نفذ البقية...
ورة يومين ... طلعت من المستشفى بس انسان مختلف عن قبل ... انسان بس جسد بلا روح ... الالم بكليتي وصل
ذروته و اني ما مهتم بي ...بس اكو الم بكلبي ديموتني الف موتة بالساعة و يهدني اضعف و اهزل من قبل ... هاليومين كبرني مية سنة و مواجهتي وية الانسانة الي كلبي حبها بانظف طريقة و الي مسحت ببلسم ايدها على جروحي هدت حيلي ... و خلتني عجوز ... قائمة الخسائر زادت سليم جان مو اول شخص اخسره بس اهم شخص بحياتي و نور هسة صارت ضمن خسارتي المهمة ...
هذا جزائي ... بس ثمن غالي هذا و كسر ظهري ... نور مثل الشمس جتي بظلام حياتي و هسة غابت ...
يتبع......
تصويت وتعليق حبايب اعتذر عن التأخير ماكان عندي انترنت
