#فَتٰاةً_آرهَقتٰهَا_الحَيٖاةً
الحلقة 👈 التامِنةً عشًر ( 18 )
صورو نيروز ومحمد اكتر من صوورة مجنونات وقامها ودارو لقطات حلوة
محمد : اه حبيبي نتمنى في اليوم هدا ان ربي يجمعني بيك وتكومي ليا ونا نكون ليك ونعيشو مع بعض ونبقا نشوفك كل يوم وايدي فأيدك ومعاش في من يبعدنا
نيروز : ولا حنسمح لاي بني ادم يبعدني عنك انت 💙ياحبيبي
ومشت ليلتهم حلوة وناضت تاني يوم
نيروز : حبيبي نوض هيا الجو حلو برا
محمد : عنوني صبااح الفل شوية بس وبنوض ، انت مطلعتيش برا الحجرة
نيروز : لالا مطلعتش اصلا الهدايا تبع امس بسيف دخلتهم غير ماما كانت راقدة محستش بيا هيا توا باي حبيبي بعدين نتكالمو
نيروز خدت الباكو الكبير تبع الشكلاطة من الدولاب يلي تدستهم فيه باش ميشوفهم حد .. وناوية انها تفرقه ع المستشفى والحجر يلي جنبهم كلهم
نيروز : ماما خودي شكلاطة او حلوة حلي بيها
ام نيروز : بسم الله عليك وهدا امتا خديتهم
نيروز : لا ماما هدا امس بما طلعت شريتهم قلت بنعطي منهم للمرضى هني على نية الفرج وربي يشفي كل مرضنا.
ام نيروز : سلمها بنتي ربي يحفظها ديما تحبي الخير 😘😘
نيروز : اخخخ لو تعرفي مني راك دبحتيني 😂 .. هيا ماما توا بنمشي زي مات
نيروز وهيا طالعة متلفتة لي امها طلعت وسكرت البابا ودور تلقا فم الغرفة كله بلونات و ورد من محمد اول ستكر مكتوب عليه ( صباح الخير ياعمري ) والتاني ( اني معاك في كل تانية في كل لحظة ) والتالت والرابعة والخامس على كل بوكي ورد ستكر مكتوب فيه كلام حلو نيروز من كتر الصدمة والفرحة والسعادة لان شعور لا يوصف الحقيقة ..
نيروز : اااه يامحمد قدااش نحبك ونحب حركاتك هدم وحطت باكو الشكلاطة وفكرة كيف بدير بـ الورد والبالونات لان مش حتقدري ادخلهم كلهم
~~~~~~~~~~~~
ام نسرين : فرحة نةضي لي مدرستك بنيتي يالا لان بنمشي معاك بناخدلك ادن
فرح : علاش خالتي
ام نسرين : لان بنمشو لي امك
فرح : ناضت من سريرها نقزت وحظنت خالتها هاااااي واخيرا بنشوف ماما ستاحستها هلباا
ام نسرين : هههه باستها وتمسد فوق راسها ربي يحفظك ياعسسولة
يالا نوضي بلا دللع 😘خلي نمشي نشوف نسرين فاقت ولا لالا
ام نسرين : نسرين نسرين
نسرين : ماما مزال بكري لكن بنوض عندي قراية
ام نسرين : اي غزالتي . حقا بوك حجزلنا تداكر الاربعاء الجاية
نسرين : وكيف الصغار بيمشو معانا وباابا
ام نسرين : لالا بوك حجزلي اني وانتي وكلمني خالد ولد خالتك قال يبو يمشو قالتله خالتك بنجوهم فـ بنمشو مع بعض وخلاص
نسرين : اها باهي حلو يعني خوتي بيقعدو مع بابا
ام نسرين : ايه هكي بيصير 👍
~~~~~~~~~~~~~~~~~
نيروز : طقطق ابلة نجاح هدم هدابوكي الورد لي اجمل انساانة يسعد صبااحك وتفضلو شكلاطة هدي
نجاح : باستها ونزلو دميعاتها واللهِ انتي مفيش منك 😘
نيروز : عمتي مش لازم منه الكلام هدا لانه درت هكي باش نشووف البسمة في جوهكم مش اكترر
حاتم : صحيتي نيروز 👌فظيعة انتي
نيروز : ولو ولو من غير شكر نستأدن منكم توا
وكملت الممر كله وعطتهم ورد وشكلاطة ومشت قسم السرطانات وعطتهم وردة وردة وكلهم شكروها وحبو تصرفها 😍😍
بو نيروز : االه محلاها اليوم المستشفى كلها ورد حي الممر لقطته حلوة
وخشت لغرفة مرته
وشوية تخش نيروز وفي ايدها باكو الشكلاطة
بو نيروز : هدا شني
نيروز : اه الباكو هدا متع شكلاطة تفضل بابا
بو نيروز : صحيتي بس شن المناسبة
نيروز : هدا امس خديته قلت بنعطيه للمرضى كلهم واليوم نضت لقيت واحد من الناس حطت قدام كل غرفة ورد وبالون عجبتني فكرته 💟
بو نيروز : اي واللهِ بنتي مزال في ناس ادير في الخيرر حتى اني قلت محلاها المستشفى اليوم ربي يخليك ليا رافعة راسي
نيروز : هههههه لا مش هكي بابا عادي مجرد حاجة بسيطة هدي 😂 ( لولاك يامحمد مكنت بندير هكي اخخخخ بس نحبك )
~~~~~~~~~~~~~
بعد مرور اسبوع 🚗
نيروز : اسمعي نسرين خلينا نطلعو نديرو رياضة برا الجو حلو صبح نبيك في حاجة
نسرين : فكيني تعرفيني مش من الناس يلي تحب الرياضة ندهش
نيروز : فنصتلها 😳 قتلك بنطلعو افهمي انتي قعمزي في الكرسي بس
نسرين : اها به
نسرين خالتي بننزلو اني نيروز نتريضو باهي ماما
ام نسرين : باه برو
~~~~~~~~~~ ومشو البناات
نسرين : توا شن فيه هي قولي
نيروز : محمد هني وكل يوم يجيني ويجيبلي في حاجات حلوة وقدااش المرة خاطره نمشو رحلة بالقارب بس اني موافقتش لانه كنت بروحي وقتها
نسرين : اي اي وبعدين متقوليش توا تبيني نمشي معاك
نيروز : وانا ليا غيرك ياحبي
نسرين : لالا فكينا من المشاكل اني منديرش هكي مستحيل ولا على جثدي
نيروز : اني كلمت محمد وهوا جاي وتفاهمي معاه
...
محمد : نسرين خززي توا انتي خايفة مني يعني بنخطفكم متلاً نبي نديرلكم دورة نغيرلكم جو مش اكتر
نسرين : لا مش قصدي هكي بس خايفة يشوفنا حد ولا يصيرلنا شي لقدر الله نخاف اني
محمد : اني معاك بوجودي مش حيصيرلكم شي اطمني
نسرين : امممم باهي خلاص قنعتوني بس سؤال
محمد : هاهاها شن هوا
نسرين : امتا بنرجعو اهم شي
محمد : توا مزال صبح يعني العشية تكونو في المستشفى
نسرين ؛ باهي نيروز كيف بنكدبو توا علي العويلة
محمد : عندي ليكم خطة مدبرة
نيروز : ههههه شن هيا
محمد : بعدين شوية تتصلي بـ امك نسرين وتقوليلها وحني مروحين لقينة كورس لغات حلو و اول حصة بالبلاش قلنا نجربوه وممكن نتأخرو
نسرين : اوووو واللهِ تفكيرك شيطاني 😂😂 ياولد
محمد : تحشمي هدا كله باش ما اطيحوش في ورطة
نيروز : شدت في يد محمد وين توا بنمشو
محمد : اكيد مش فاطرين
نيروز : ايه
محمد : اوكي توا نفطرو في مطعم بعدين نمشو للقارب يلي حجزته
ومشو البنااات للقارب وكانو مستمتعات بالمناظر الاكتر من رائعة وبدت الدنيا اظلم
نسرين : خلاص نيروز ياحليلنا تأخرنا
نيروز : اي محمد ركب فوق عنده مكالمة توا نمشيله نشوفه
نيروز : حمودة وينك
محمد : اوكي خلاص يمكن الاسبوع الجاي مروح اني ونتفاهمو عليها هدي ويأشرلها بيده شوية بس
نيروز قعدت تستنا فيه
محمد : كمل مكالمته .. شن فيه حبيبي
نيروز : تااخرنا خلاص روح بينا
محمد : قرب منها خدتنا الهدرزة ونسينا الوقت
.
.
.
.
.
.
.
.
.
.
.
.
يتبع في الحلقة القادمة
الكاتبة ~~ هدير محمد 🌸
أنت تقرأ
#فَتٰاةً_آرهَقتٰهَا_الحَيٖاةً
Lãng mạnقصـة ليبية من الواقع الليبي ? ... تلف او تدور على قصة حـب بين شاب وفتاة واجهتهم الكتير من المتاعب والمشاكل والصعوبات ولـكن كان حبهم اكبر بكثيررر من كـل هده الظروف ،، اتمنى ان تتابِعونهاا بـجد جميلة ✋ قراءة ممتعة #Hadeer ,?
