رديت عليها ألو السلام عليكم وانا بغلي غليان زاتي قالت لي انتي دايره منو قلته ليها صاحب التلفون قالت لي انا مرتو 😲😲 أسمو منو قالت لي قلته ليها انا زاتي مرتو وانتي بتسالي في واحده ماعارفه اسم راجله بقت تقول لي هو اسي راقد جمبي قلته ليها صحي طيب بقت تعلق في مكالمتي وترجع المكالمه أستفزتني هو زول جمبك بتتصلي لمنو .. سكتت قالت لي كدي انتي وريني اسمو منو امكن تكوني متصله غلط رديت عليها وعليت صوتي .. وبقيت اقول ليها انا قلته ليك صحي سكتت ساي بقيت اقول ليها صحي .. قامت قفلت الخط رجعته ليها بجيني الخط مشغول قعدته بكيت بكي شديد طيب هو مدام متزوج كيف يدس حاجه زي دي ولا يارب دي واحده من البنات ديلك معا وحتي لو هي كده برضو مابلزمني وافكاري بقت تودي وتجي والساعه بقت داخله على تلاته صباحآ تاني نمته بعد كملته بكيتي .. اتصل على أحمد الساعه ٧ص رديت أسمع ليك صوت الضحك يضحك 🙄🙄 سكته ساي بعد خليتو كمل ضحك وكالعاده جمبو صوت الضباط المعا في المعسكر ..قلته ليهو ان شاء الله خير بتضحك ليه ..ماردا على سؤالي وبكل برود قال لي اتوقعتك تكوركي تزعلي فاجئتيني .. قلته ليهو اسمع ياأحمد قام قاطعني قال لي أول شي انا بضحك لانو اسي جمبي صحبي عاصم ووشو مابتفسر ياستي انا قبيل طلعته الخلا من المغرب ودي دخلتي .. واصلآ ماف شبكه هناك وخليت تلفوني لصاحبي عاصم قال داير يتكلم مع زوجتو واولادو مكالمه ايمو وتلفونو نوكيا عادي .. وحتي كان بتراسل بالواتس معاهم ودايمآ بتراسل مع زوجتو بتلفوني وقال نعس وهو جاياهو مكالمه مهمه وعمل تحويل مكالمات لزوجتو ونام وشكلك انتي اتصلتي ومشت ليها المكالمه وحصلت العكه ويضحك 😏 كدي انتي احكي لي قلتي ليها شنو لانو جايطه شديد معا وقالت ليهو انت بتخوني .. وريتو الحصل وقلته ليهو هي استفزتني بتقول لي انك نايم جمبها 🙄🙄 قال لي هاك صحبي عاصم دايرك .. ألو السلام عليكم رديت عليهو السلام قال لي انا بعتزر كتير على الموقف الحصل واصلا مرتي دي جينها مشاكل يعني لو كانت قالت ليك انا جاياني المكالمه محوله ماكان هي فهمت غلط وماشاء الله عليك انتي زوله عاقله .. قمته قلت ليهو انا زاتي لوكنته وريته اسم أحمد امكن ماكان جاطت كده .. ورجع التلفون ل أحمد قال لي خلاص انا برسل ليك رقمه اتصلي على زوجتو ووريها لانو هي مامصدقا .. قلته ليهو اديني الرقم قفلته منو اتصلت عليها ردت لي سلمته عليها وقلته ليها حصل سوء فهم 😧بيني وبينك انا نور وحكيت ليها قرابتي بأحمد وانو في مأموريه وهو شبه خطيبي انا مامرتو ووريته الكلام كلو القالو لي أحمد وعاصم زوجها..قالت لي صح انا زوجي في مأموريه وطوالي بعمل لي تحويل مكالمات لما يكون عندو مكالمه مهمه قمته قلته ليها انتي استعجلتي لو كنتي وريتيني حركت التحويل دي كان كل شي وضح من أمس بقت تحكي لي قالت لي انا والله ماقدرته أنوم لصباح وأبكي بكي شديد وماعايزه زول يحس بي لاني قاعده مع أهلي وطبعا عاصم من مأموريه لتانيه ومابجينا كتير 😟ونحنا متزوجين لينا خمسه سنه وماحصل لقيت في تلفونو حاجه ولارقم بت نهائي لكن لما سمعته صوتك جنيت عديل.. قلته ليها أنتي غلطانه انتي بنفسك قلتي ماحصل طيب ليه تشكي فيه طوالي وأسي حصل شنو قالت لي هيجنه مع بعض وكورك فيني وأنا زاتي كوركته في طبعآ انا بجاي بقيت صغيره لأني سبب العكه دي كلها لو قلته أسمو كان أتحلت😂😂 قلته خلاص يانور صلحي الخربتي واسي أحمد يقول عليك شنو خرابه بيوت .. بقيت أعمل للمراه غسيل مخ أسمعي حبيبتي ده راجلك وفي مأموريه يعني تلتله يعني شغل وعدم نوم وانتي بجاي نكد عليه .. أقول ليك شي أتصلي عليه وأعتزري منو وكلمتين حلوين .. أنا بجاي بتصل على أحمد أخلي أتكلم ليك مع عاصم .. أتفقنا على كده وقفلته منها رجعته ل أحمد وريتو ومشي اتكلم مع عاصم ورجع لي تاني قال لي تاني ماندخل لحدي هنا ونحنا فهمنا زوجتو الحصل
صح .. قلته ليهو أيوه صح . ماعلينا أنتي كيف طوالي انا ركبته الوش التاني 😑 أنت ياأحمد تطلع الخلا وتخلى تلفونك وراك من غير متوريني ليه؟؟ قال لي أنا زعلان منك نحنا واحد أنا بعد كم شهر حكون راجلك وترفضي ترسلي لي صوره ليك يلا هنا طلعته من طوري 😞 أسمع ياأحمد انا مابقدر ارسل ليك صور لي بلبس البيت ااي صح انت كلمته أهلي لكن مامعنا تبقي فوضه سكت ساي.. وتاني شي ياأحمد تاني انت لو فتحته معاي موضوع صور وقصص دي انا الحزعل منك وأنت ماعارف زعلي كيف 😏😏 أعتزر لي وبقي يغير في الموضوع .. وقاطعتو وتالت شي ياأحمد انت ناوي تجي بتين ماادوك إذن لسه ؟ قال لي لا لكن انا بتصرف قال لي أنتي اسي مضايقه 😤 ارتاحي وأهدي وانا ماشي أخد لي دش واكل لي شي جعان شديد وأنتي زاتك امشي أكلي .. وقفلته منو .. في نفس اليوم اتصل على ورجعنا نتكلم عادي .. وأكتر شي بقينا نتكلم في الواتس برسل لي صور ليهو وانا زاتي رسلته ليهو صور .. وفي صور كنته في عرس مالابسه طرحه .. الكلام ده العصر مع المغرب أتصل على قال لي أنا عندي ليك خبر جميل شديد 😍 أنا جاي بعد تلاته يوم وأول شي حعملو بعد أصل البيت وأغير اني جاي أشوفك وشرطي في بيتكم بعد أكلم أبوك😍 الله ياأحمد أخيرآ أنت حتجي وحنتلاقه طبعآ أحمد وجيه شديد وملامحو بريئه وحواجبو غزيره بقيت أفكر الليل كلو يوم حيجي ألبس شنو أسرح كيف ولا نقدم ليهو شنو مع شاي كيك وباسطه وفطاير ولا الفواكه أول والبارد 🤔 والبيت أنضفو براي مااخلي حته وأجيب جرايد للمرايات أنضفه بيها ولا الجداعات أجيب الهوفر .. وأي انا طيب بتين اليوم ده اجي أنا حبيتو شديد وحابه فكره العرس معا شديد 💜 لحدي نمته وأنا بفكر .. صحيت الصباح بمكالمه من أحمد 😍 ياالله انا أول مافتحته الخط أسمع ليك حبيبي انا صباحك حب صباحك أنا وصباحك عافيه ياقلبي ..واي انا كتيره على ياخ ..قمته مشيت استحميت وصليت وجريت لماما أول ماشافتني قالت لي ماشاء الله ماشاء الله ربنا يديمه أها أحمد 😍 قلته ليها أيوه جاي .. وقعدت أتونسته وشربته الشاي مشيت جبته تلفوني لقيت ٦مكالمه من رقم ومعا رساله دايرك ضروري فاعل خير .. أتخلعته شديد 😲😲 أتصلته على الرقم أسمع ليك نفس الجوطه البسمعه وانا بتكلم مع أحمد والراجل ده موطى صوتو قال لي أنجدي نفسك أنتي واقعه وقعه شديده واقعه ليك مع ناس مابترحم ...
يتبع....
