#أحببتك_حتى27
فتحته الباب بسرعه ،الاء كانت الا بالجلباب،وجاريه وجارة رجلها قولته ليها الاء مالك في شنو؟بقت تبكي،فجأة جا راجلها طالع ومعاهو امو ،وهو شايل ليهو عود ولا عصايه م عارفه بس المهم كان حجمو ضخم شديد ،طبعا وهم جاين علينا انا للحظه رجفته والخوف اتملكني،وامو شغاله تقول ليهو اضربها ضربها الهم قليله الأدب،بقى يقول ليها تعالي راجعه البيت سرعه م سامعه انتي تعالي هنا ،والاء دي تبكي بحسها الطويل وبغادي ناس توسل ورغدة ومها جو واقفات مع عيالهم،قال ليها م اعيد ليك الكلام دة مرتين تعالي هنا دة،عايز يجي داخل مشيت لزيت باب النص وهو لزاهو ولزاني معاهو،قولته ليهو هي هي انت داخل وين انت زريبه هي في شنو مالك؟قال لي زحي كدة انتي كمان لزاني بي يدو ودخل ومسك الاء وجراها من يدها،لحقتو وجريتها منو بي كل قوتي وقولته ليهو قسما بالله كان انت وكان امك وكان الباقي المعاك م تطلعو من البيت دة اقسم بالله باقي اليوم دة اقفلكم في السجن،قال لي ي زوله قفلي انتي كمان بتهددي منو؟قولته ليهو انا م بهدد كلامي واضح دة بيتي وبيت راجلي بتهمه التهجم المنزلي حأقفلك انت وناس بيتكم كلكم ولا بعرف زول فيكم وم تنسى الليله الخميس يعني جمعه وسبت حتكونو مقفولين،قال لي ي زوله انا داير مرتي ،قولته ليهو مرتك بتجيك براها وبعدين انت بتضربها على اي اساس كدة تعال فهمني؟الاء قالت ليهو انت وقت عرسته داير تشوه سمعتي مالك؟م لاقي ليك حجه تبرر بيها موقفك انت وامك قولته خلاص اشوه سمعتها صح؟انا سنه وحاجه منتظراك علشان تجي ،بساهر الليل كلو منتظره مكالمه واحدة منك،وفي النهايه جاي مطلعني ...تييييت ولافه وبتاعه رجال،الراجل القبضوني معاه دة خلي يجيبوهو ليك هنا بي دليلو م كلام سااي،انت على اي اساس بتتكلم عني كدة؟على اساس ؟زي م انا حلفته وختيت يدي في المصحف انت ابقى راجل وخلي امك تخت يدها في المصحف وتقول الكلام القالتو عني دة صح وبعدين نتحاسب امام ربنا،ليه لما قولته ليها احلفي مصحف زعلت وضربتني؟وانت كمان شايل عودك وعايز تضربني معاها وين الغلط في كلامي؟انا عمري م عملته شي غلط ولا اتصرفته تصرف غلط والحله دي كلها تشهد علي وكلهم بعرفوني بيت بيت اسألهم ،وبعد عمري القضيتو معاك دة تطلع معرس ي سيف معرس، حتى م ختيت احترام للعشرة البيناتنا ولا اي شي وعرسته وانا هنا قاعدة زي الهبله منتظراك ،الأكعب من دة كلووو جاي تطلعني انا كعبه وم نافعه،ياخي كان تعمل حساب للسنوات الأنا استحملتك فيهااا،فجأة يوسف جا داخل لقى الناس ملموين ،قال السلام عليكم خير ان شاءالله في شنووو؟الاء كملت كلامها وقالت ليهو "اي نعم انا ربنا م قسم لي معاك جنى بس دة م معناها انو انا حأمشي أفتش برة،انت بتمشي السعوديه دي بتتم 3_4سنوات م حصل رمشي دة رمش لي راجل غيرك ياخي انا الرجال الغربه مصافحه م بصافحهم عشان م اجيب لنفسي الشبه كيف حأمشي أعمل الانتو بتقولو عنو دة؟انا م عندي مشكله في عرسك بس م بالطريقه دي كان تجي تحكي لي ي الاء انا عايز اتزوج وحاة الخلقني ازينها ليك من فوق لتحت ،ولو م لقيت بت الحلال انا شخصيا بفتشها وبجيبها ليك في محلك في النهايه الشرع حلل ليك اربعه بس م تمشي تعرس وتتم سنه وتجي تقول لي بسبب عمايلك الانا بسمعها عنك انا عرسته،انت ي سيف سمعته عني م شوفته بعينك وامك دي هي م ملاك ولا نبي علشان تقول م بتكذب واذا هي صادقه بجد خلي تتوضى وتخت يدها في المصحف وتحلف تقول انا صادقه اقسم بالله بعد كدة ي سيف الدين انا كان سألتها ابقى بت حرام،جبته التوب لبستو ليها،قالت ليهو ابدا م كان العشم ي سيف انا كأني م عشته معاك وكأنو م بتعرفني قبل كدة،امو قالت ليهو سمح اسمع كلامي هنا دة ي سيف الدين المرة دي كان م طلقتها في اللحظه دي انا لا معافيه منك في الدنيا ولا في الأخرة!!!قولته ليها دقيقه شوف ي أخ سيف انا والله م بعرفك تمام بس اتأكد تماما انو مرتك الكلام البتقال عنها دة كلو م فيها وانت المفروض لما تسمع عنها كلام كعب تحت اضانك لأنو الثقه بينكم مفروض تكون متوفرة اكتر من كلام الناس،مره بالرغم من انو م قدرت تجيب منك عيال واستمرت معاك غرابة ال15سنه دي اقسم بالله لو مرة تانيه م حتستمر وحتشوف حياتها، باقي عمرها الفضل دة تجيب ليها طفل طفلين بنفعوها بس هي اختارتك انت بالرغم من غربتك وبعادك عنها اختارتك وصبرت عليك ،يوسف قال ليهو سيف اهدأ وروق ي اخوي وفكر بحكمه انا م عارف المشكله شنوو بس الاء دي كان فيها غلط صحي انا كان رفعته سماعه التلفون وقولته ليك تعال لم مرتك في النهايه عرضك عرضي انا كمان،قال ليهو انت اسكت م تتكلم هسسس اصلا الوساخه والخساسه حقتك انت،يوسف قال ليهو دقيقه قصدك شنووو؟قولته ليهو يوسف خلاص،سيف الدين قال ليهو كلامي واضح وانت م تدخل عشان م اقلب عليك انت كمان ي عفن ي وسخان م بتعاين الا لنسوان بيتك عرض شنو انت بتعرف العرض كمان ،يوسف قال ليهو انا م عارف انت مشكلتك شنو بالظبط لكن نصيحه اديك ليها مرتك دي لو خسرتها ربنا م حيعوضك بالأحسن منها،سيف الدين قال ليهو والله انا زاتي غلطان من زمااان لما امي بتقول لي باب النص دة ابنيهو كنت مستهتر م كنت عارف الأمور واصله للدرجه دي انا الغلطان والله والله صحي المويه كانت جاريه بي تحت رجلي وانا م حاسي بيهاا،،يوسف بعد الكلام دة م قدر يتمالك اعصابو ومسكو كشطو ليك بنيه وعدلو بالتانيه وقال ليهو الكلام دة قولو لنفسك ولعقلك الوسخان ي تافه ،انت اسي مسمي نفسك راجل وجاي تطعن في شرف مرتك؟ياخي تفوو عليك وعلى رجالتك ي وسخ ي معفن انت قايل كل الناس دي بتفكر زيك؟كان انت وكان الوصل ليك المعلومه دي الاإتنين مرضى ومحتاجين علاج،انت اسي مسمي نفسك قاري ومتعلم؟يااخ تفوو على دة تعليم اقسم بالله الجاهل عقلو بوزن بلد منك ي عفن ،سيف قال ليهو تضربني انا ي تافه تضربني انا؟يوسف قال ليهو بضربك عشان المسكينه دي عواليق ي عفن،سيف قال ليهو انا ارجل منك،يوسف قال ليهو ي تافه وينها رجالتك دي انا م شايفها حسبي الله فيك يااخي انت كان عفن ومخك عفن مرتك ذنبها شنو بي عفانتك دي ،مسكته يوسف قولته ليهو يوسف خلاص الله يخليك،قال لي لا م خلاص ي شهد ابدا م خلاص م سامعاهو بقول في شنو هو؟م سامعاهو انتي؟يوسف دة فاااار واتعصب وبقى م قادر يهدأ ابدا امسكو بي جاي يلزني ويمشي على سيف ،وقال الا يضربو لو م ضربو تاني م بخليهو ،سيف امو ساقتو دخلتو البيت وقفلت الباب ويوسف دة بقى يرجف من فوق وتحت والاء دي تبكي بأعلى صوتها بقيت م قادرة اهدي منو ولا منو،سوقته يوسف دخلتو الغرفه قولته ليهو يوسف خلاص ياخ،قال لي بي نهرة شهد فكيني قولته ليك م سامعاهو بقول عن مرتو شنو؟دة فاكر انا ومرتو بيناتنا في حاجه؟انتي متخيله معاي؟انا والاء ؟حسبي الله ونعم الوكيل ،ياخي انا الاء دي زي اختي الكبيرة التافه دة جاي ينظر لي بي باب النص البينا ،اقسم بالله م اخليهو انا دة م مشكله خلي يقول عني تافه صعلوق اي شي كعب خلي يقولو عني بس المسكينه دي زنبها شنو يشوهو سمعتها بالطريقه دي ؟عايز يطلع مسكتو قولته ليهو يوسف اهدأ م هو انت كدة م حتحل مشكله،قال لي لا حأحلها ي شهد ،حأكسر ليهو راسي العاجبو دة عشان تاني يتعلم يتكلم بي منطق،ماشي منفخ لي عضلاتو وجاي يقل ادبو ويتراجل في بت الناس المسكينه قال انا والاء لا وكمان فاتح نفسو وبقولها في وشي تخيلي الحيوان وبجاحتو شهد فكيني قولته ليك ياخي زحي لزاني بس مسكتو وحضنتو قولته ليهو حبيبي الله يخليك كفايه م هو انت كدة بتعقد المشكله بس م اكتر فكر في الاء البرة دي حتعمل احساسها م اصعب من احساسك يلا قول لي،قال لي م انا اسي بتكلم عشانها تسكت ليه دة موضوع بتسكت عليهو اساسا؟قولته ليهو طيب روووق الله يخليك،فضلته حاضناهو مسااافه بعد م هدأ شويه فكيتو قولته ليهو اقعد جبته ليهو مويه شرب بعدها طلعته لي الاء قولته ليها لولا خلاص بطلي بكى ،قالت لي
شهههد انا م واجعاني عملتو دي ابدا بس الواجعني كلامو انا م كدة ولا اخلاقي بالطريقه الهو حاليا بتكلم عنها دي على الأقل كان يخاف ربنا فيني قبل م يتصرف معي كدة😭💔قولته ليها فعلا معاك حق بس كل حاجه بتتحل بالمهله في سؤ تفاهم حاصل وعمتك هي سبب دة كلو في النهايه هو مافي بس هم البوصلو ليهو الكلام غلط وهو بصدقهم،قالت لي بصدقهم ي شهد بصدقهم وم بواجهني ولا بسألني اذا الكلام دة صح ولا غلط ،قولته ليها كدة انتي روقي،قالت لي اروق كيف ي شهد؟دة وصلت بيهو المرحله انو يشوف امو تضربني ويفضل ساكت وهو كمان لو م جريت كان حتى هو حيضربني ،شوفي راسي ورم كيف من الضربه؟انا م حأمشي أهلي وم وسيف حسبي الله فيهو وفي امو وحاة الله وقت م اصلي حأتحسبن عليهم لغايه م ادخل التراب،فضلته احنس فيها واتكلم معاها لغااايه م نامت ،مشيت اتكلمته مع يوسف طبعا يوسف دة من القلق والزعل م نام للصباح،لما الصباح اصبح الاء دي قالت إلا ماشه بيت اهلها،لبست من ملابسي ويوسف وصلها ،ياااخي بعد مشت بكيت بكى دعيت ربنا انو م يختني في موقف زي دة،بالجد الأكعب من خيانه الراجل انو يكون راسو خفيف ويخلي غيرو يتحكم في حياتكم ويدي الناس ثغرهه فيكم،الاء كانت ماشه وقرارها واحد انها عايزة تطلق وخلاص م عارفه اذا قرارها كان صح او لا بس انا لو مكانها م كنت عارفه ردة فعلي حتكون كيف بس اقل شي كنت حأرفع فيهم قضيه رد شرف دة أقل شي حأعملو فيهم،بعد م الاء مشت حياتي بقت ممله شديييييييد الصباح والمساء عندي وااحد بنتظر يوسف اليوم كلو علشان يجي يونسني واحيانا بجي تعبان بنوم واحيانا بساااهر معي لغااايه م انوم بعدين هو بنوم بعدي،فضلنا على الحال دة 8شهور،انا في ال8شهور دي كنت كل يوم بلقى نفسي متعلقهه بي يوسف اكتر بقى هو محور حياتي كلهاا،هو وضعو المادي مااا اتحسن ويمكن يكون بقى على أكعب بس كنا عايشين والحمدلله،يوسف عدت عليهو فترة كان بزكر لي كلمه السفر دي كتيييير،يعني مثلا نكون مع بعض يقول لي اسي كان سافرته انا حأعمل ليك كذا وحأعمل ليك كذا وانا كنت دايما بنفي الفكرة وبتضايق منها واحيانا ببكي ليهو علشان م يجيب لي سيرة الموضوع دة واحيانا بزعل فهو بقوم يسكت وبحنسني وبعد محاولااات براضيني،وفي الفترة دي زاتها يوسف تلفوناتو كانت كتيرة وملفته للنظر ،ولما يكون في البيت بعمل التلفون صااامت،واحيانا برد وبقول "في البيت برجع ليك بعدين تمام؟يلا سلام"وبقيت اصحى من النوم اللقاهو م نايم جنبي فبقول يمكن مشى الحمام وكذااا بس هو اتطور لدرجه انو بقى عادي يتصل علي تلفون ويقول لي والله ي شهد انا اليوم حأتأخر م تنتظريني نومي حاضر حبيبي،بقول ليهو لكن ي بيبي انوم كيف براي؟بقول لي اها اعمل ليك شنو انا ي شهد عندي شغل،،فالحكايه دي اتكررت كتييير يعني ولا مرة ولا مرتين وانا بقيت شايله في قلبي منو شدييييد مرات كتيرة بقول اواجهو واتكلم معاهو لأنو ابدا م ملاحظ لي ولا للأنا حاسه بيهو بس تاني برجع وبقول ي شهد ياااخي م تنكدي عليهو اساسا هو بجي من الشغل تعبان ومضغوط م تزيديها انتي عليهو كمان بس بجد بقيت حاسه بفرااغ كبييير من ناحيتو لدرجه اني بقوم بالليل برقد في حصنو وببكي وهو بكون نايم،في يوم وانا قاعدة في البيت بالنهار باب الشارع دق،انبسطته شدييد لأنو يوسف وعدني انو اليوم يرجع بدري على طول جريت الا بالجلباب مشيت فتحته الباب،اتفاجأ ليك بي واحدة واقفه في البيت سلمت علي،قولته ليها اهلين اتفضلي،قالت لي عليك الله جيت عابرة طريق ساااي لكن عطشانه ممكن تديني مويه اشرب؟قولته ليها طيب حاضر اتفضلي ادخلي م تقيفي في الباب ،قالت لي مستعجله والله لكن بدخل،دخلت،قالت لي معليش ازعجتك،قولته ليها لا عااادي ماف اي ازعاج ،كنت مفرشه المظله حقتي قولته ليها اتفضلي اجيب ليك المويه،قعدت مشيت دخلته غرفتنا علشان اجيب ليها المويه لما جيت طالعه لقيتها مادة راسها وبتعاين جوة البيت لما شافتني اتخلعت ورجعت مكانها،اديتها المويه قالت لي حلاتك ماشاءالله عليك وبقت تعاين لي من فوق لتحت،ضحكته قولته ليها تسلمي،وهي طبعا سمييينه وكتييرة كدة وعامله فل ميكب وحاجه كدة ضخمه وملامح وشها بتوحي لي انها كبيرة في العمر،بعد م شربت قالت لي عروس؟قولته ليها والله م عروس عندي تقريبا سنه متزوجه هههه،قالت لي ماشاءالله لسه ماف حاجه كدة ولا كدة يعني؟قولته ليها م فهمتك زي شنو؟قالت لي يعني م شافع جاي في الطريق؟قولته ليها لا ابدا،طبعا هي صوتها غلييظ كدة مسترجله مسترجله ههه،قالت لي وراجلك وين قاعد معاك يعني؟قولته ليها والله هو قاعد بس في الشغل برجع متأخر،قالت لي ايوااا اها ي بت الناس فتك بعافيه،قولته ليها م ترتاحي شويه ،قالت لي لا والله على مشيه شكرا ليك،قولته ليها العفو وصلتها جنب الباب اتزكرته اني عايزة لي بهارات من البقاله على طول لبسته توبي وطلعته ،لما طلعته اتفاجأ ليك بالمرة بتفتح باب عربيه لاندكروزر بيضاء وركبت فيها والعربيه تقول ي ليل ،لا وكمان هي السايقاها يعني انا استغربته في حته انو هي سايقه العربيه دي بحالها وم قادرة تشتري ليها مويه؟والغريبه انها موقفاها بعييييد من البيت،بس قولته ياخ انا مالي،المساء لما يوسف جا حكيت ليهو بالحص قال لي م تركزي ياااخ تكون مخستكهه وقعد يضحك وانا زاتي ضحكته معاهو قولته ليهو صراحه يمكن زي م قولته انت هههه،بعد اسبوعين من الكلام دة في يووم يوسف جا من الشغل متأخر وانا كنت في سااابع نومه صحيت على صوت قفلهه باب الحمام،قمته على حيلي قولته يوسف انت جيت؟قال لي في الحمام حبيبي،نزلته دخلته غرفتنا علشان اطلع ليهو جك.مويه وكدة لقيت تلفونو بضرب وهو خاتيهو في الصامت،شلته التلفون لقيت الرقم م فيهو اسم بس مكتوب عليهو رمز كدة ،م فتحته الخط فصل وتاني رجع اتصل،فتحته الخط بس اسمع ليك واحدة بتقول "حبيبي وصلته البيت ؟طبعا انا بقيت في لحظه بتاعه تجمد او عدم استيعاب للأنا بسمعو دة،بقت تقول الو ،حبيبي انت سامعني؟على طول قفلته الخط في وشها،شويه كدة رسلت رساله بتقول فيها"هههههه شكلك مع المدام وكدة مع انو انا بغيييييييير شديييد وبكره حياتي وبكره الدنيا دي كلها لما تكون معاها وتنوم جنبها وانا هنا مشتاقه ليك بس م مشكله حبيبي هاانت كلها فترة ونكون مع بعض وزي م قولته ليك م تخليها تنوم في مكاني لأنو انت حقي انا وبس بحبك تصبح على خير وخلي بالك من نفسك شديييد حبيبي اممممممممممح💋"طبعا انا بقيت واقفه وماسكه التلفون وجسمي كلو برجف جاني هبووووط عديييل ،عقلي دة كأنو اتشل م قادر يستوعب الموضوع ابداا ،يوسف طلع من الحمام بنادي حبيبي،شهد؟انتي جوة وجا داخل،لغايه م يوسف جا داخل ومسكني من كتفي انا م كنت فاهمه حاجه ولا مستوعبه اصلا،بقيت اعاين ليهو ودموعي في عيوني جاريه عشرة عشرة،قال لي شهد في شنو مالك؟عاين للتلفون في يدي شالو شاف الرساله،قال لي شهد،قولته ليهو ابعد مني،قال لي شهد اسمعيني،قولته ليهو يوسف ابعد مني وم تلمسني اوكييبه،قال لي خليني أفهمك،قولته ليهو تفهمني شنو ؟م كل شي واضح قدام عيوني م محتاجه تفاهمني ولا ااي حاجه،مسكني عايز يجرني عليهو لزيتو بكل قوتي قولته ليهو ابعد وزح مني قولته ليك انت م بتفهم؟رجع لي ورا عايز يتكلم مشيت فتحته دولابس شلته توبي ،قال لي ماشه وين؟قولته ليهو وانت ماالك؟قال لي شهد مسكني من يدي،قولته ليهو شوف تتلمسني تاني وربي اصرخ والم الخلق،قفل باب الغرفه قال لي ماف طلعه من هنا،بقيت اتصارع معاهو واضرب فيهو لغايه لزيتو وفتحته الباب وطلعته من الغرفه وصلته جنب باب الشارع جا لاحقني ومسكني وبقى يقالع فيني علشان م اطلع وكدة،وقعته ليهو في الأرض وبقيت ابكي وماسكه تلفوني في يدي قولته ليهو انا ي يوسف الليله في البيت دة م بيت فااهم م ببيت في البيت دة وكان بيته هنا بكرة الا يرفعوني جنازة فاهم ولا لأ؟قال لي بالليل دة ماشه وين ي شهد؟قولته ليهو م عارفه بس ماشه ماشه بس م تسألني وانا بطلع ان شاءالله ابيت في الشارع،قال لي شهد،قولته ليهو هسسس م تتكلم معاي قمته على حيلي وفتحته الباب تبعني،وقفته بتاع عربيه الساعه كانت 12 بالليل،ركبته يوسف جا ركب معي ،بتاع العربيه قال ليهو ي اخ،يوسف قال ليهو انا معاها اتحرك،بتاع العربيه قال لي ماشه وين ي اخت والزول دة معاك؟قولته ليهو ماشه جهنم م معي نزلني يلا،يوسف قال ليهو م تقيف امشي على طول انا بوصف ليك،قولته ليهو لا م تمشي م على كيفك انت،يوسف قال ليهو ي حبيب امشي انا بتكلم معاك،مشينا وصلني لغاااايه م وصلنا بيت اهلي من غير م اتفاهم نزلته جري ضربته جرس البيت،وبقيت اضربو بطريقه جنونيه وانا اعصابي تلفانه طبعا،الباب فتح كان جدو الفتح الباب،قال لي منو؟قولته ليهو انا ي جدي؟قال لي انتي منو ؟قولته ليهو انا شهد وانا بجاوب وببكي طبعا،قال لي خير ي بتي مالك في شنو انتي كويسه؟يوسف جا قال ليهو السلام عليكم ي عم احمد كيفك تمام؟جدو قال ليهو اهلا ي ولدي كيفك ان شاءالله طيب؟يوسف قال ليهو الحمدلله،جدو قال ليهو خير مالكم نص الليل دة ان شاءالله عافيه؟يوسف سكت،انا عايزة امشي جدو قال لي تعالي هنا متشاكله مع راجلك؟سكتته وبقيت ابكي،قال لي ارجعي طوالي بي دربك دة مع راجلك وحلو مشكلتكم ،قولته ليهو م راجعه ي جدي م برجع وجريت دخلته البيت ،لاقيت حبوبه جايه طالعه من الهول قالت لي شهد؟بقيت ابكي ،قالت لي بسم الله بسم الله مالك في شنو؟كدة تعالي ي بتي قعدتني وبقت تهدي فيني وتسألني مالي،بس ابدا م جاوبته كل الكنت بعملو ببكي،ساقتني دخلتني غرفتي قالت لي اسي نومي م تبكي والصباح بحلها الله ان شاءالله،بعدها جدو جا بنادي فيني شهد ،ي بت ي شهد،سكتته سااي،حبوبه قالت ليهو احمد خليها اسي بكرة الصباح نشوف الحاصل شنو اسي بحالتها دي م بتتكلم،انا والله من الوجعه للصباح م نمته وكل م اتزكر رسالتها المقرفه ببكي ،يعني يوسف انا اخر واحد اتوقعته منو حاجه زي دي معقوله هو يطلع كدة؟الصباح حوالي الساعه 10 كدة جات حبوبه قالت لي صباح الخير لقت وشي دة مورم بطريقه خياليه،قالت لي شههههدد ي بتي كدة قومي غسلي وشك واقعدي بي رواق واحكي لينا الحاصل شنو كويس؟جات ماما داخله،قالت لي شههد في شنو ي بتي مالك ؟ضربك الراجل دة ولا عمل ليك حاجه؟سكته سااي م جاوبته،جا جدو اتكلم معاي وبحنسوني نحنيس علشان احكي بس م كنت بعمل شي غير البكى وكل م يجي زول يتكلم في الموضوع انا ببكي،رامي جا قال لي انتي قولي في شنو بالظبط عمل ليك شنو وخلي الباقي علينا م تخافي قولي لينا مالو بس ،برضو م اتكلمته،وانا قاعدة براي وقافله على روحي فجأة جاتني مكالمه من رقم غريب م رديت قولته يمكن دة يوسف،بعدها جاتني رساله بتقول "افتحي الواتس وكملي فهمك "على طول فتحته الشبكه لقيت رسايل من نفس الرقم ،فتحته الرسايل لقيت جزؤ منها اسكرينات لمحادثات وصوور ،كانت صوور ليوسف ومعاهو واحدة،الصدمه كانت في انو هي نفس المرة الجاتني في البيت حاولته اكذب عيوني بس م قدرته ابدا،والمحادثات كانت كلها كلام حب ،وكاتب لي شوفي ي بت الناس انا ويوسف بنحب بعض وشديد وكمان وانا م شلبتو انا عجبتو وماف شي بفرقنا واصلا متفقين نتزوج بس بعد فترة قريبه فلو سمحتي م تنكدي على حبيبي عيشتو وانا م عندي مشكله انو ادخل حياتو وانتي موجودة فيها انتي كمان مفروض م يكون عندك مشكله ويوسف دة بحبني شدييييد وياما كزب عليك عشان يقعد وياخد راحتو معاي بطلي امور الشفع دي لو سمحتي واسمعي هنا م تحاولي تتشاطري وهو حقي م بخليهو ليك كام طيرتي السماء"بس مع شوفه الحجات دي انا بقيت اصرخ وابكي زي المجنونه ،لدرجه انو انا كتمته نفس عدييل،ساقوني ودوني المستشفى ادوني اوكسجين ودريبين،بعد م رجعوني اظن جدي حكى لي يوسف وعلى طول لحقنا في البيت،جا داخل لي في الغرفه على طول قمته على حيلي قولته ليهو الجابك هنا شنو انت؟قال لي شهد اهدي،ضربتو في كتفو قولته ليهو م تقول لي اهدي ابدا،عايزني اهدأ؟عايزني أتعامل مع الموضوع بكل بروود صح؟بالنسبه ليك عادي؟مقصرة منك في شنو انا؟لا والأكعب من كدة انت مدخلها لي بيتي ي يوسف مدخلها بيتي ،هي ختت رجلها في بيتي سلمت علي بي يدها وشربت من مويتي،وبقيت اضرب فيهو،لا وكمان بتتكلم معاها بنفس الاسلوب الانت بتتكلمو معاي،وبتقضي معظم وقتك معاها وانا زي الهبله بكون شايله الليل سهر ومنتظراك،يلا قول لي ي يوسف انت بتحبها بجد بتحبها صح؟طيب بتتعامل معاها زي م بتتعامل معي صح ي يوسف؟يوسف الله يقرفك ياااخي الله يقرفك تفووو عليك انا م عايزاك فاهم يعني شنو م عايزاك؟طلقني،انا عايزاك تطلقني وامشي ليها ان شاءالله تضوي ليك،قال لي شهد افهمي انا الزوله دي عندي معاها مصلحه بس هي حتجيب لي إقامه وشغل في السعوديه وانا،قاطعتو وقولته ليهو وبالمقابل انت تحبها صح؟م حاسي بالقرف وانت واقف قدامي وبتقول الكلام دة؟عاارف ي يوسف انت حاليا في نظري واحد تافه وواطي وكل كلمه كعبه فيك بالجد ماما م كانت غلطانه في نظرتها ليك ابدا،انا استحملتك كتير ي يوسف واستحملته معاك اسوأ الظروف حتى اني كنت مستعدة استحمل اكتر المهم نعيش سوا بس بعد عملتك دي ي يوسف بعد قرفك دة انا ولا ثانيه م حأعيشها معاك وطلقني ولو م طلقتني انا بالمحكمه بتطلق واتفضل اطلع بره ،طلعتو برة وقفلته الباب وبقيت ابكي،عدت اسبوعين في الاسبوعين دي كل الناس اتكلمته معي على اساس انو المشكله تتحل ويفهمو الحاصل بس نهااائي م حكيت لي زول،مجاهد جا قال لي انتي بت قليله ادب وحيوانه تعرسي بكيفك وتطلقي بي كيفك الحكايه شنو هي،قولته ليهو ي زول مش انا عرستو برضاي بطلقو برضاي وماف زول يتدخل عرستو ولقيتو م نافع معي عايزة انطلق،جاط وعايز يضربني جدو مسكو قال ليهو راسها قوي م بتسمع الكلام نحن اتكلمنا معاها ابت،وانا الزمن داك رفعته قضيه الطلاق في يوسف،في الاسبوع التالت في يوم قاعدة في الغرفه لدن جات قالت لي يوسف جااي عليك،قعدته وربعته يديني وبقيت اهز في رجلي،شويه كدة يوسف دق الباب ودخل سكت مساافه بعدها قال لي شهد،مهما حصلت بينا مشاكل م اتوقعتها تصل بينا للدرجه دي ، قدر م حاولته اتكلم معاك بكل الطرق فشلته،انا عارف نفسي كعب واي شي بس احيانا الظروف بتجبرنا نعمل اكعب من كدة ، اسي اليوم جاني اشعار من المحكمه انو انتي رافعه علي قضيه طلاق،وانا والله العظيم تلاته ابدا م عايز الأمور تصل بينا لدرجه المحاكم والمهاترات دي لا بتشبهني ولا بتشبهك ونحن علاقتنا اقوى من كدة،ياما وقفتي معي وياما استحملتيني واستحملتي وضعي حتى انا ي شهد بقيت اخجل من نفسي قدامك بقيت عايز احسن الوضع دة بأي طريقه بس م اتوقعته اني حأخسرك،فكرك بعد كل البينا دة انا حأخليك تقيفي قدام محكمه وتطلبي الطلاق؟فكرك حأعمل كدة؟ابدا ي شهد ،طلع ورقه من جيبو قال لي اشعار المحكمه الإنتي مرسلاهو دة بمسح الكان بينا كلوو وانا م عايز كدة ،وانا لسسه بحترمك شديد ي شهد ولسسه مكانتك جواي وم اتغيرت ولا حتتغير ولو بألف بت م حتتغير بس احتراما للبينا ولرغبتك وعشان م نخسر بعض وعشان انا استحاله اخليك في يوم تقيفي قدام قاضي او محكمه انتي طالق ي شهد...
#كسرهه
كتبتها من غير م اراجعها لو في اي اخطاء حاولو اتجاوزوها عندي وجع ضرس عامل لي صداع و مقلق بي لدرجه انو مؤثر على اضاني وعيني ومقرفني حياتي😭😪💔
#نتلاقى®♡
