وهي تبجي وصوتها يرجف..كالت:مراح يوصل طرف ثوبج هذا النذل.. ابوج راح لعمج وتعارك ويا وكله حتى اذا هي قبلت بعد اني ماانطيهه.. يابعد روحي. شعندي غيرجن اني.. لاتبجين خلي راسج مرفوع..
كلامهه قواني.. انطاني جرعه امل واحساس بالحياه.. حضنتها اقوى.. لحد مصاحت عليه ولج كسرتي ضلوعي! صوتها وهي تكول هاي الجمله ليهسه باذني.. ضحكت .. ابتعدت عنها شويه.. اسمع صوت زينه تكول هاا؟ انحلت ع خير ع خير واخيرا راح نرجع ناس عاديين..
-لج لعد شنو احنه مو ناس؟
زينه:لا ياناس! اصلا جنتو مثل الغوريلات.. كلش شوي واحد يطنكر بيكم.. ديله كومي سبحي مو الغرفه عفنت من وراج!
-ههههههه وجع يلثوله!
امي:ريحتها ورد قداح حتى لو مسبحت شهر..
زينه:اي مامه.. يكولون القرد بعين امه غزال..
كمت من مكاني واني امشي جريت كصيبتها:لج جوزي مني.. راح اسبح وجيبيلي ملابس وخاولي..
زينه:يله عيني خانم..هسه اجيبلج وصله المسح نشفي بيها واجيبلج بجامة بابا البسيها...
عطت من بعيد:كبر! مخبله تسويها!
احس الفرحة دخلت بكلبي بذيج الليله.. كلام ماما طلعني من ظلمه وقلق وتفكير.. سبحت بواهس.. اغسل جسمي بسرعه وحيل.. اريد اكمل بسرعه واروح اكعد يم ماما اكثر.. اشوف بابا شنو يحجي شنو يكول.. ارجع لنفسي وعائلتي.. وصدك كملت وطلعت.. لكيتهم ماكو بالبيت.. عرفت همه بالحديقه.. مشطت ع السريع وشربت شربت ووياه كعكايه ولحكتهم.. لكيت ماما امدده وزينه مخليه راسها ع رجليها.. وبابا مً يمهن اكيد راح يم الجوارين..اجيت ركض فتت بحضن امي.. اوف ياحضنج يايمه.. بي كلهن ..دفو..امان..محبة..
-دفيني ماما بردانه..
ضربت ع كتفي خفيف:عياره لوما انسمطنا من الحر!
-هههههه لاماما.. مو هستوني سابحه وبردت.. يله دفيني بس شويه..
ظليت حاشره نفسي كوه يمها.. هي اخر شي ملت مني لان ماوخرت عنها.. بقت تمشي اصابعهه ع كذلتي.. ع حرارة ايدها نص شعري نشف.. كل التعب البيه احسه يطلع ويه لمسة ايدها.. مادري شلون غفيت.. بس كافي كان حضن امي عليه ..خاصه اخر فترة صار جفا بينه وابتعدت عن امي هوايه..قبل كنت كل ميعجبني اخلي راسي يم صدرها وهي متعوده ع الوضع.. مهما كبرت احس هذا بيتي صدك.. ممصدكه بذيج الليله امي رجعت تحبني وتتقبلني مثل قبل.. ممصدكه امي وكفت ويايه.. كل الي صار كابوس وانتهى.. بس ماكنت اعرف الكاوبيس يمكن نرتاح منها شوي وترجع النا بخوف ورعب اكثر واكثر...
بعد ماغفيت بحضن امي.. ع فرشه قديمه.. وجوه النبكايه بالضبط.. احس واحد يكعد بيه.. امي واكفه يم راسي وتكول.. اكعدي يله اجت الكهرباء.. تعالي نامي جوه.. كمت بتعب عجيب غريب.. احس رجليه صارت خيوط.. يمكن بوقتها لو مقطوعه رجلي مكان حسيت بيها..صرت اخلي ايدي حياطين وامشي كوه.. حتى عيني احسها تغمض وحدها..
مادري شلون وصلت للغرفه... ذبيت نفسي ع فراش وماحسيت ع شي بعدهه... بس اتذكر اجتني كوابيس مزعجه كلش..
مااعرف شكد اخذت وقت بنومتي.. كعدت راسي يريد ينفجر.. اباوع زينه ماكو يمي.. اكيد هسه دنيا ظهر واخذتني النومه.. بقيت بفراشي شويه واستغربت الهدوء الي يمي.. لا صوت امي..لاصوت الشغل الي تشتغله! زين زينه وينها.. كلت يجوز بالحديقه لو بالطرمه..
خليت رجلي ع الكاع احسها انطوت.. عجيب.. شنو راح اتكرم!
بيه مابيه وصلت باب الغرفه.. هو اصلا كان مفتوح.. احس غشاوة صارت ع عيني..اجيت اوكع من طولي... تقدمت خطوتين لاخ.. اشوف اكو نقط دم .. معقوله زينه جايتهه الشهريه وممنتبهه؟ لو بابا ذابح ديج اليوم؟ هيج اجه ابالي واكثر ضني بابا ذابح ...قبل بابا يجيب الديج هو يذبحه بايده جوه النبكايه... كلت اي بابا ذابح اليوم.. بعدين تقدمت خطويتن وكلت زين شجاب الدم لهناا؟ فتت من باب غرفه امي.. هي تصير ع يساري من نطلع من غرفتنا اني وزينه.. الباب ممسدود.. اكو فتحة صغيره دائما ماما وبابا يخلون طابوكه للباب حتى يفوتلهم هوى المبرده.. ردت اطلع كبل للمطبخ.. بس عيني طرفت لدم هوايه بغرفتهم.. بلاوعي دفعت باب الغرفه .. المنظر الي شفته مااتمنى لعدوي.. جمدت بمكاني! اريد احجي اريد اعيط اريد اصيح ماما بابا.. مااكدر.. اريد اقترب اشوف شنو الي صار وبيهم روح لولا؟ هم مكدرت......
المهشد هو دخلت رانيه لغرفة امها وابوها وكانو مذبوحين وابوها فوك الذبح طعنات ببطنه وجوانبه.....
يمكن عطت ويمكن لا.. يمكن وكعت للكاع ويمكن لا.. ماادري شنو صار بوقتهه.. بس لكيت جيرانه كلهم يمي.. ام غسان لازمتني تضرب بوجهي والبقيه داير مدايري.. يمكن كنت فاقده..لا مو يمكن اكيد فاقده.. اريد احجي واسألهم شصار بامي وابويه وشوكت وشلون وليش .. مااكدر احس غصه بنص بلعومي واكفه..ابلع ريك اريدها تروح حتى اكدر احجي ماكو.. بقيت بس اباوع بالعيون ويمكن نزلت دموع مني ويمكن اصلا منزلت من الصدمه..
اشوف حتى زلم ابيتنا تفتر.. مالحكت اوكف ع حيلي .. ومااشوف اله الشرطه ابيتنا.. اشوفهم بقو يحجون ويه جيرانه الزلم ودخلو للغرفه.. اريد ابعدهن عني واروح يم الشرطه واشوف امي وابويه وشنو صار.. مكدرت احس اديه مشلوله مااكدر احركها...
مااسمع بس الشرطه صاحو وين المدعوه رانيه؟ كمت ع حيلي اشو مااحس بس العته من ذراعي.. ويصيحون يله ويانه.. كلها الي بلبيت صاحت عوفوها ع كيفكم وليش ماخذيها ووو.. صار نوع من التوسل بيهم.. وهمه واحد يعت وواحد يجر.. بالنهايه محد كدر يوكفهم واخذوني للمركز بحجة تحقيق والاقوال وافاده ومن هل حجي..
وصلت ع المركز واني ممفتهمه الي ديصير.. اشكال تخوف ..وجوه غريبه.. كل الي موجودين يركضون ركض مو مشي.. الرايح والراجع يباوعلي بنظرة استحي من نفسي بيها.. شنو الي جابني؟ وين كنت؟ وليش جابوني؟ احس مخي راد يطك... منظر امي وابويه مثل لوحة بقت كبال عيني.. اريد اعيط واصرخ وانزل دمع بس مااكدر.. مااعرف شنو صارلي عبالك لساني انبلع..
دخلوني ع غرفة الضابط.. كان مدنك ..من دخلت رفع راسه وهي خزره وهي تعجب.. الشرطي كله هاي المتهمه سيدي.. وكف عقلي! شنو متهمه؟ وبشنو متهمه؟!! كال استريحي ست.. كعدت ع كرسي.. وهو يفتر كبالي.. يروح ويرجع نوب يحك بحنكه نوب يتخوصر ويمشي نوب يرفع بنطرونه.. بكلبي اكول خلوني ارجع ..اريد اشوف ماما وبابا.. اريد اشوف وين ودوهم.. بس مكدرت احجي ابد...
شويه ودخل ضابط لخ.. كله ها بديتو لو لا؟ رد علي لا والله بعد منتظرك حبيبي... اشو هذا الاجه تالي خله كرسيه كبالي كلش.. فتح رجلي ع عرضهن..من عندي استحيت اباوع ..بقيت بس مدنكه.. بده يحجي بس ممركزه شنو يحجي ويسألني.. وحتى اذا ردت اجاوب مااكدر لساني انربط بوقتهه.. مااحس اله واحد عاط حيل...احجي ليش قتلتيهم؟؟؟؟؟ واثناء مااسمع هاي الجمله واحد رفع راسي بيده وضربني راشدي كل قوته.. شويه وعيت ع اثر هذا الراشدي.. حتى لساني عرف ينطق عطت بصوت مشحوط مقتلتهم مقتلتهم!!
واحد كال:لج ام..... يا سا.... واشتغل فشار وغلط مينلبس علي ثوب...
الثاني يكله:هاي مبينه عدها واحد ساعدهه...
رجع يصيح عليه لج منو الي ساعدج وشلون دخلتي للبيت وبشنو ذبحتوهم؟!
كمت اعيط كل صوتي وفقدت اعاصبي كلش... حتى هم انصدمو يمكن.. مااعرف شكول كنت..المصيبه الي اجتني كافيه تهد جبل... صارو يحجون باسلوب وبس يردوني اسكت .. ناوشوني كلاص مي .. ماردت اخذه.. واحد منهم بصوت لين ومو عصبي وصياح كال.. ع الاقل اغسلي وجهج.. اخذت الكلاص منه انتبهت ايدي ترجف رجف ... حته الكلاص صار يرجف بيدي بللت ايدي شويه ومسحت ع وجهي.. من رفعت راسي شفتهم واحد يباوع بوجه الثاني.. وره شويه كعد عدل وكال.. اجتنه اخباريه انج قتلتي اهلج.. وانتي اذا ساعدتينه واعترفتي راح نساعدج .. لتعبينا ونتعبج.. احجي شنو الصار ليلة البارحه..
-ماقتلتهم والله! ماقتلتهم! اكو واحد يقتل امه وابو؟! جاوبني اكوووو؟
رد الثاني:اي اكو هوايه .. وخاصه مثلج..
شتقصد دخيل الله فهمني؟ اني ليش هنا ومنو الي خبر عني وليش مترحون ادورون عالقاتل ؟! اني بحلم لو هاي حقيقه؟ زين هو مقلب وانتو ناصبين عليه؟
واحد بيهم ضحك بصوت خشن ويخوف يرعد.... ظل يضحك واني احجي وابجي.. اي اتذكر كنت احجي بس مااتذكر بشنو ... مااعرف شلون انتهى التحقيق.. ماشفت نفسي اله وره شباك التوقيف.. ردت انفجر اله شوي.. فقدت كلشش.. صرت اضرب نفسي واعيط..مادري شنو صار بعدها.. غفيت فقدت مااعرف...شكد مر وقت هم مااعرف...
رجعو طلعوني..عرفت الوقت صبح.. اخذوني لضابط التحقيق.. امشي جثه بدون روح.. كعدت بالغرفه نفسها مال البارحه.. دخل ضابط بس مو نفسه مال البارحه.. هذا من دخل حتى الحمايه تركض وراه.. بقيت كاعده .. هو راح لمكتبه كعد وكلب اوراق هوايه.. جابوله هم اوراق كلوله هاي مال المتهمه رانيه ......
أنت تقرأ
ذكريات
Mystery / Thrillerالذكرايات لا تنسى بل هي فلم ينعاد في ذاكرتنا هنالك ذكريات حزينه ومؤلمه وهنالك ذكريات سعيده ؟ اي واحده ستختار😔
