وها.. اجتنه جنسيه فرح بيد واحد منعرفه.. تعجبت من اجانه.. اخذتهه منه وتشكرته وراح.. ومرت الايام.. وصرت اطمس نفسي طمس .. بالحياه بالمدرسه بالطالبات بالشغل..
كنت كل اسبوع اعوف حصه .. مناخذ بيهه درس.. اكعد ويه الطالبات واسمع مشاكلهن.. صوت كلش اجتماعيه وياهن. احب اسمع الهن.. وبالنهايه هنه يسألني ست شنسوي بهيج حال.. مشاكل هوايه.. وكل سنه دفعه جديده..
حتى مااتذكرهن..
زينه بقت فتره بالبيت.. بس بعدهه شجعتهه تكمل السادس.. هي كانت مستسلمه وكاعده.. كوه قنعتها تقدم.. وصارت هي تقديم للخارجي وهي طلاك.. خلصت من جميل.. اني طلبت منه .. وهو بكل هدوء كال اي راح اطلك ماعندي اشكال بس تتنازل عن كل شي.. من حجيتلهه معارضت..
كالت اتنازل عن كل شي بس مو اطفالي.. كلتلها ارتاحي اصلا ميريدهم..
هو كان بوقتهه متزوج.. طبعا مرت عمي الحيه متعوفه.. وعبالهه راح نكطع نفسنه علي..
اطلكت.. وخلصنه.. ورجعنه لبغداد .. قدمت وبدت تدرس بالبيت.. كنت اساعدهه بالي اكدر علي.. اطفالهه خليتهم بحضانه.. علمود هي تكدر تقره.. يوميه اخذهم الصبح ويايه واخليهم بحضانه قريبه يم مدرستنه..
كان كل الي شوفنه عبالهم اطفالي..
كنت انكسر كسر من اسمعهه... اطفالج؟؟ ابلع الحسره واكول لا. اطفال اختي بس اني همين امهم..
ومرت ايام.. وامتحنت زينه.. نجحت الحمد لله.. وكملت النهائي وهمين نجحت.. كالت ماريد اقدم كليه.. اريد اصير كاتبه .. طاوعتهه وماضغطت عليها.. بقت تقريبا بالسنه كاعده بالبيت..
اني بهل سنه.. او اكثر من سنه.. شبه انسان.. الكملني هو وجود زينه والاطفال.. كانو شايلين جزء كبير من حزني مخلين بداله ضحكه ولعب وشقه.. بس مانسيت.. ولا راح انسى... الحبيته.. والظلمني.. والكسرني..
والعافني.. والغدر بيه كدام الناس الغربه.. وماانسى الوكفلي ..
بعد مرور سنه.. زينه قدمت ع تعيينات بالتربيه.. بصفه كاتبه.. وانقبلت بسرعه.. كلها شهر وباشرت دوام بس مو ويايه.. لا داومت بمديريه التربيه.. صارو الاطفال .. سيف روضه حبيبي وفروحه حضانه ويايه..
بقت فرح اسم ع مسمى.. صح جابت الفرح وياهه.. وصارت هي بنتي..
حتى تصيحلي وتصيح امها ماما.. بس كان هذا الفرح ناقص..
اجه فوك كوم احزان والم.. ماينمحي لا ماينمحي..
ومرت عشر سنوات ع يوم وفاة اهلي.. اتفقنه ناخذ اجازه من دوامنه.. نروح نزورهم.. اني هنا كانت اول زياره الي .. عشر سنوات اكلت مني وشربت....
وصلنه للمقبره.. نسيت انهم اندفنو.. صورتهم متروح من بالي.. كبال عيني اشوفهم كل مااغمض.. راح دمهم بلاذنب.. بس علمود لحظه طيش وتهور وعناد.. شفتهم.. قبر بصف الثاني.. حجي هواي عندي الهم.. عتاب..
وجع وحزن.. صرت بالنص.. احضن منو بيهم.. مااريد اطول بالمعاناة يم القبر.. فقدت وتخبلت اله شويه.. سنين مرت واني ممستوعبه الي صار..
رحنه زرنه الامام.. متكابلين وبين لحظه والثانيه تنزل دموعنه..
مانطلب غير بس الصبر ونستقر ونبقى ع نفس وضعنه.. منريد لااحد يجينا ولا يندحك بينا..
رجعنه ع بيتنه.. هو مو بيتنه .. بيت سامي وكاعدين بي.. كل اجور الكهرباء المي من يمه تندفع مندري بيهه.. مولد الشارع همين هو يدفعهم. من يوم الي راح ومارجع..
ايام طويله وابجي والوم نفسي.. ليش ردتي طفل.. ليش طيرتي من ايدج.. ليش خليتي نفسج بنار.. ارجع اجاوب نفسي.. هذا الصار عرفني بالناس..
نياتهم .. افكارهم.. شكد كنت اشتاقله.. شكد بجيت ع فراكه..
ليالي هواي مرت.. نكعد الصبح ننسى همومنه.. نروح لدواماتنه كلمن ع شغله.. نلتهي ويه التدريس والمشاكل الي نلاكيهه..
اني صرت كلش اجتماعيه..
يعني اذا طلعنه لمكان عام.. ويكعد احد بصفي مااكدر مااسولف.. ولا اكدر مااسأل.. مو بيدي .. الوحده المريت بيها سنين .. هي الخلتني هيج..
احب اسمع مشاكل الناس... احب احجي مااسكت.. لان ويه السكته تهيج هوايه اوجاع.. حتى بالمدرسه.. تقريبا صرت اني الباحثه بيهه..
اروح للطالبات.. اكعد وياهن.. كلش يحبني.. حتى من يصعدن مرحله يجن اذا عدهن شاغر يدخلن درسي..
حتى المديره كانت كلش راضيه عني.. تكول ياريت الكل مثلج ..
بگلبي اكلهه لا الله ليكولها ويصير بشر مثلي ويمر بالي مريت بي..
صديقاتي المدرسات حبابات.. صارت بينا طلعات وعزايم..
بس ماعرفن اني منو ع وجه التفصيل.. ماذكرت حتى زواجي من سامي..
الي يعرفو عني انه اثنين خوات وحيدات..
الكبيره الي هي اني ماتزوجت .. اختي اطلكت ورجعت يمي..
بالمنطقه لا كانو يعرفون.. يعرفون انه بيوم من الايام كنت زوجه سامي..
صعبه عليه من اكولهه...(كنت) ياريت بقيت كل العمر..
طبعا انقلت لاكثر من مدرسه.. وبكل مدرسه ادخلهه مااكدر مااحب طالباتي..
ايام وايام تمر... وكله من عمري.. سامي مو يمي.. متغيب عن بالي كل حركاته وسوالفه.. عطره.. رحت دورته واشتريت منه.. كل يوم اخلي منه الصبح واطلع.. ملابسه متفاركني وكت النوم..
مكدرت اطلعه من بالي ابد.. بس كنت اتجاهل گلبي هواي..
كنت اصبر بنفسي بوجود زينه والاطفال.. بالمدرسه والطالبات..
حتى زينه.. خفت افقدهه..
اجتني بيوم مستحيه ومدنكه.. عرفت عندها حجي..
كعدت كبالهه وكلت:هاا؟ شكو؟
زينه:مادري شحجي..
-شنو؟ شبيج؟
زينه:اليوم واحد من الموظفين ويانه..
-اي شبي؟
زينه:داز جماعه عليه..
-هاااا؟ زواج مو؟
زينه:اي
-وانتي شنو رأيج؟
زينه:مادري.. بكيفج انتي..
-نسأل عنه ونشوف.. اذا خوش ولد شكو بيهه..
زينه:بس هو ارمل وعنده ولد..
-هاا.. اذا اخلاقه زينه ليش لا.. بس تعالي صدك تسويها وتزوجين وترحين؟
دنكت وسكتت..
ضحكت وكلت:شرطي ميبعدج عني.. تأجرين يمي.. كبال عيني تكعدين..
غير هذا الحجي خل يروح..
زينه:اعتقد هو عنده بيت.. بس خاف ميقبل..
-اذا مقبل.. اخذي بس سيف.. فرح تبقى يمي..
التفتت ع فرح كانت تلعب وراهه.. اعتفست..
-شوفي.. اني مااريد اصير عثره بطريقج.. هم حقج تزوجين وتشوفين حياتج.. بس همين مااكدر اعوف فرح وسيف.. ع الاقل عوفي واحد منهم..
دنكت وكالت.. الله كريم من يكول تصير؟
ومرت الايام.. واجاني الي يريد زينه للدوام.. كان مبين اخلاق.. كل كلامه مثقف وواعي.. طبعا هو يكبرها 15 سنه.. وابنه عمره 7 سنوات.. يعني بكد سيوف.. سلم عليه.. وطلعنه للساحه.. كعدنه ع رحلات قديمه بيهه..
رحيم:شوفي يااخت زينه.. اني جايكم ع سنه الله ورسوله.. وصلني كلام انه انتي الحل بيدج..
-شنو الي بيدي.. زينه هي الي يمهه الحجي..
رحيم:لالا. انتي اختها ومنج تسمع.. احسها متردده بخصوص اطفالهه..
اني ماعندي مانع.. تريد تجيبهم تبقيهم.. حالهم حال ايمن ابني.. بصراحه مثل زينه واخلاقهه بعد مالكه..
دنكت وابتسمت.. :الله كريم.. اذا تتزوجون .. لتبعدها عني.. ماللي بس هي بالدنيا..
رحيم:واني همين.. مالي بس ابني هنا.. اخواني بالشمال.. وامي وابويه متوفين من زمان.. يعني ماعندي مانع انتقل وياهه ع المكان الي تطلبه..
-الله يقدم الي بي خير..
من اول لقاء حسيته وعرفته هو شنو.. وصدك مرت ايام.. طلع سائل عنا وعارف كل قصتنه.. ومابطل.. رجع جاب واحد اخوانه وزوجة اخو..
خطبو زينه.. بجيت فرح وخوف ..خوف لا ارجع افقدها واضيع بالوحده لحالي..
صارت خطبتهم رسمي وعقدو.. ماطولو غير كم شهر.. تزوجت زينه..
بيومها شبعت بجي عليهه.. شما تكبر تبقى بنظري صغيره..
خليت اطفالهه يمي.. وهي ورحيم تزوجو بالفندق.. لا هوسه ولا طكطكه..
رجعت للبيت.. رجعني واحد من اخوان رحيم..
بيد منا فرح وبيد منا سيف.. يشوفوني ابجي ويكولون شبيج مامه..
امسح دمعتي واحضنهم.. احس روحي اطيب..
غسلت الهم.. وبدلت الهم والي.. خليتهم بحضني ع جربايتي اني وسامي.. الي انهجرت من سنين.. نمنه وهم بحضني..
ثاني يوم الصبح.. تريكنه.. وبقينه ننظف ونلعب اني وياهم.. صوتهم مالي البيت عليه.. كملت شغل.. كعدت وهمه كبالي..
-نخابر ماما زينه؟
سيف:ايييي..
يله.. دكيت.. فتحت خط.. اول مره اسمع صوتهه مرتاحه.. فرحت الها.. ودعيت بكلبي عسى لا غابت ضحكتج.. وعسى كل عمرج افراح ومسرات..
طمنتني عنهه وعن رحيم.. كالت يجوز نطلع للشمال.. يم اخوانه..
هه تذكرت شهر عسلنا اني وسامي.. الي كان بس اسمه تخطيط بدون فعل.. بس مااكول سامي ماعنده كلمه.. لالا بالعكس .. هو البراسه يسوي وميهتم لاكبر واحد..
أنت تقرأ
ذكريات
Mystery / Thrillerالذكرايات لا تنسى بل هي فلم ينعاد في ذاكرتنا هنالك ذكريات حزينه ومؤلمه وهنالك ذكريات سعيده ؟ اي واحده ستختار😔
