ذكريات

Part 36 the end

ومرت الايام.. وماغاب عن بالي سامي.. امثل اني مابيه شي... امثل الراحه.. وصدك مابيه شي.. كل المريت بي مامتت ولا صار بيه شي..
عفيه گلب شكد قوي وصلف!
وبعد تقريبا شهر من يوم الي شفته.. طلعنه للباب .. اني واطفالي..
شفت سياره عاليه مظلله.. بس طلعنه السيايق نزل الجامه ودك هورن..
نوب نزل اجه كبالنه..
كال:صباح الخير ست.. ارجوج تجين ويايه.. لواء سامي دزاني عليج..
ردت اوكع من طولي من سمعت.. الاطفال بقو يباوعون بوجهي وبوجه
ردت ارفض كبل كال.. اترجاج ست.. اني الاتعاقب اذا مااجيتي..
وىباوعت للاطفال.. كال نوصلهم بطريقنه..
صعدت بالسياره.. الاطفال بصفي..كان..الهوى مكطوع يمكن ..
سيف:مامه.. منو سامي؟
-حبيبي .. صديق قديم...
فرح:مامه.. لتتأخرين علينه اليوم..
بستهه من راسهه.. ماشي بعد گلبي انتي..
وصلت الاطفال ع مدرستهم.. نوب طارت السياره طيور..
وصلنه لمقر عمل سامي.. الي جابني بقى يمشي ورايه.. يدليني منين ادخل ومنين افوت.. امشي وگلبي راد يطلع من مكانه..
وصلنه ع غرفته.. كان يمه واحد ..وهو لابس نظاره وديقره بورقه كدامه..
بس شافني نزع النظاره.. باوعلي وابتسم..
اشر للي يمه وطلع..
كام من مكانه.. شحلو طولك.. اجه كدامي.. مد اديه مثل الي يريد يحضني.. كبل رجعت خطوة..
هو رجع ابتسم ونزل ايده:شلونج؟ اخبارج؟
-عايشه.. وانته؟
سامي:الحمد لله.. وين ماوين.. ماجيتي ولاباركتيلي ؟!
سكتت ودنكت.. احس كلامه خيالي.. شديحجي هذا.. بيا وجه يريدني اجي.. بكلبي اكله تدري شصار بيه من بعدك لو متدري.. صفيت.. جثه بلايه روح.. عايشه بس بالاسم..
بقيت لحظات صافنه بعيونه.. محجيت ولا عتبت.. عيوني هي التكلمت..
كنت احس نظراته خجلانه تواجهني..
قطعت السكته الي صارت:دزيت عليه اليوم؟ اكو شي؟
رجع كعد بمكانه.. خله رجل ع رجل باوعلي وابتسم..:لا ماكو شي.. بس حبيت اشوف خاف محتاجة شي..
الدمع تجمع بعيني.. هيج تستكثرها عليه؟ تستكثر تكول حبيت اشوفج انتي!
بلحظتهه تمنيت اموت كبال عينه... اخر لحظه يمه.. اي ردت اموت يمه حتى يحس بيه شويه.. ردت ضميره يأنبه ..
سامي:استريحي!
كعدت ..صفنت ع الكاشي .. ماعندي شي اكول..
قدم ورقه كدامي.. باوعت .. شنو هاي؟
سامي:وقعي.. هذا طابو البيت.. حيصير باسمج.. واذا تردين غيره بس كولي..
-لا شكرا ممحتاجه .. ادفعلك ايجار اذا تريد..
سامي:ههههههههههههه ... رانيه.. كافي عناد.. بعدج راسج يابس مثل ماعفتج.. كولي شمحتاجه؟ اي شي تحتاجي كولي لتتردين..
دنكت باسف.. واني الاحتاجيتك ايام وليالي وشهور وسنين هسه جاي تكلي شمحتاجه..
-ابو فهد.. انساني.. وانسى ذيج السنين.. عدت وراحت.. مثلها مثل غيرهه.. ماريد منك شي.. بس اطلع من حياتنه.. عوفني استقر اني واطفالي..
ورجاءا لاادز احد بعد.. الجيران واطفالي يسألون!
سامي:لتخافين.. مرايد منج شي.. بس حبيت اعرف اخبارج..واذا تحتاجين اي شي باي وزاره او اي مكان بس كولي..
-لا شكرا.. ماامحتاجه شي.. حياتي مستقره وهادئه والحمد لله..
سامي هز راسه وابتسم..
كمت من مكاني.. هو همين كام ورايه..
سامي:رانيه.. سامحيني.. تبقين عزيزه وغاليه.. لتصرفين كأنج متعرفيني!
-هه.. شايف ابليس والجنه؟ هيج اني وياك منلتقي بعد..
سكت.. طلعت وسديت الباب.. احس روحي رادت تطلع.. بس ردت اطلع من البنايه وانزل دموعي واخلص.. مشيت بسرعه.. احس كل الناس تعرف بجرحي..
ابتعدت مسافه.. انفجرت بعد مااكدر.. بشر اني من دم ولحم.. مو حجاره..
اخذت تكسي..رجعت لدوامي.. كان طاير اول درسين..
مادري شلون كملت يومي.. يوميه اكول راح انسى.. راح اخلص..
تالي يطلع بوجهي بدون مقدمات..
بيومهه تكطعت روحي تكطع.. شسوي وارتاح.. اذب نفسي بنار واخلص..
مسحت دموعي وكلت خلص. كافي دمع.. كافي اذب حطب لروحي وهي صايره نار..
كمت وكملت كل شغلي.. اطفالي يمي.. بيتنه دافي.. اقنع بنفسي..
بس باقي نقص.. كبير كلش كبير.. 2
يشايلني عله چفك ماي...صار سنين..
لا انت شربتني ولا اني متبدي... 4
هيج صفيت اني .. لا اني الك ولا اني نسيتك.. بس اتصرف كأني تعودت.. وهو فعلا تعودت.. اصلا عيب بعد هل عمر.. الي راح يطب بال40 سنه اكول احبه واتمناه.. حتى اذا اجه ودك بابي.. وادري مستحيل هل شي..
هو التهى عني هوااي.. همين مراح اقبل.. راح اعيش لخاطر اطفالي..
اعيش احج لامي وابويه .. اعيش لخاطر زينه.. بنتي الثانيه..
بس مو العيشه الي تعرفوها.. عيشه بس بالاسم موجوده..
امشي بطرك جسمي.. بدون روح..
وهاي سنين عمري مرت.. واكلت مني وشربت.. واستمرت.. بس استمرت هاديه.. مستقره.. مابيهه تهجول وضياع..
بيهه اني.. بقيت مثل مااني.. ومثل ماكلت.. تعلاگه جروح...
النهايه

اللقاء الاخير بين سامي ورانيه كان قبل كم شهر...
ولهنا وانتهت..
التقيكم بقصه جديده.. واسفه من الي نزلت دموعهم.. بس هذا النصيب والقدر.. ع الرغم الحزن البيهه.. ورغم الكآبه الي مريتهه بسبب هل قصه ومن يوم الي حجولي .. بس اكو هوايه عبر.. اولها الصبر.. ثانيهه البلاء وثالثهه غدر اقرب الناس..
اتمنه عجبتكم الروايا شجعوني حته انزل بعد روايات 😊