كلبي راد يوكع.. الاوراق الي اشوفها كدامي هي لو خلاصي لو مماتي...
الضابط:تفضل.. ولتخلي احد يدخل ..
اخذت نفس طووويل.. معقوله الصار..ماتو خلص؟ زين منو الي سواهه وليش وكعت براسي؟ زين زينه وينها؟ مشفتها يمهم؟ معقوله عايشه؟ زين وينها اذا عايشه؟ يجوز هي قتلتهم وانهزمت؟ لالا ممعقوله.. شلون دافكر بزينه هيج اني؟ غبيه هاي اختج.. قطع تفكيري صوت الضابط..
احجيلي كل شي بالتفصيل.. لتحاولين اتلفين وادورين.. ترى مار عليه من اشكالج الالاف.. كلجن ك.... و... وتجن هنا تستشرفن.. يله احجي.. اسمعج اني تفضلي..
هزيت راسي بلا ودموعي تصب..
كال:شوفي ذني ميمشن عندي..اعترفي.. اول وتالي تنحكمين ويطيحون حظج.. تاكليلج عشرين سنه سجن هاي اذا مو اعدام...وهاا طبعا اذا ماوصلوج لسيادة الرئيس..
-لا ...لا.. الله يخليك ساعدني.. مسويت شي.. والنبي مقتلتهم! هم امي وابويه شلون اقتلهم!
عاط :اششش! كافي تتمسكنين..اعترفيع وفضيها..
-شعترف..ياعالم دخيلكم والله مو اني! مقتلتهم! مااكدر امسهم بكلمة شلون اقتلهم! روحو دورو القاتل الصدك مو اني؟! اختي مااعرف شنو صفى بيها دوروها!
كال باستهزاء:اختج اكيد مثلج..هي تعرف انج تحبين واحد ومخططه تشردين ويا؟
-منو هذا الواحد ومنو حجالكم عنه؟ اني ماعندي احد؟!!!
شال الاوراق الي اجته:شوفي هاي الادله كلها ضدج! القاضي بس يشوفهن ترحين اعدام..
بجيت:لا شنو دخيلكم ! والله مو اني والكعبه الشريفه مو اني.. ماقتلتهم.. وحق مصيبتي مو اني! ليش تريدون تخلوها براسي كوه؟!
اشو هذا تقرب عليه وبعد شعري عن ركبتي وبده يتلمس بيها ونظراته تكزز الواحد:شوفي اكدر اساعدج..بس مااكلج اطلعج واخلصج..لا بس اسرع الاجراءات يمي وبسرعه تنحكمين وتخلصين..
ابتعدت شوي..
كال:هاا؟ شكلج راح اتعبينا.. لعد حلال ع غيرنا وحرام علينا؟
عيطت وصرخت وما كأن احد يسمعني.. انهانيت هوايه والطاب والطالع يشمر حجي ويتحارش..من غير الفشار والطعن بشرفي.. اشكال المذله شفت بالتحقيق مال شرطه.. مااعرف شلون مرت ذيج الايام.. تقريبا ورا يومين انرفعت اوراقي للمحكمه واني بعدني بالتسفيرات كالو ماكو اطلاق سراح لحد ما قاضي التحقيق هو يشوف شنو يسوي.. عبالي راح اخلص من الشرطه وحجيهم الي ميرحم.. وكعت بالاتعس.. بده التحقيق من جديد.. بس هلمره وي قاضي تحقيق مو ضابط... الله ليوفقه هو والشرطه كلهم.. ماانساهه طول عمري المذله والفشار .. كل واحد منهم يريد ياخذ مني حاجته ويستغل وضعي.. بس اني استمريت ع نفس كلامي.. ومااكدر اعترف بشي اني مسويته.. مادري شلون استحملت كل هذا.. بعدني مستوعبت اهلي راحو وفقدتهم للابد ونوب سجن وتهمه باطله وماعرف شنو الغايه ومنو يريد يوصلني لهيج شي... ايام مرت لااكل ولاشرب.. بس مرات اعطش اشرب.. الليل مر مينجرع .. اتمنى انام واصحى اني ابيت اهلي وكل هذا مصار.. تمنيت انام مااكعد والحك اهلي.. عقلي وكف.. ردت بس افهم ليششش؟ ليشش؟
خلال ايام بدت جلسات محكمه..انحالت القضيه مالتي كلها لقاضي الجنايات.. اي خلولي جنايه اني ممسويتها.. بلوني بمصيبه موت وسجن وفقد وضياع...طبعا المحكمه هي الي خلتلي محامي.. اساسا محد اجاني لا عمامي ولا خوالي.. عن الحلال والحرام اجتني ام غسان وزوجها.. بس مره وحده وبعد ابد موصلتني.. حقها هم صدكت اني قاتله وخطر عليهم وع الكل...
من كنت ادخل للمحاكمه..ما اهتم شنو الحكم الي راح يصدر بيه.. كنت افرح من يكولولي ع الاغلب انتي اعدام.. اي اموت احسن..شنو حياتي الي راح اعيشها بهيج عار وخزي..شنو الحياة الي تخلص بين اربع حيطان.. واني الجبت عمري انتظر شوكت اتخرج واحقق احلامي.. اتعين واساعد اهلي بالمصروف.. اغير ببيتنا واشتري اثاث جديد.. وووو احلام هوايه..انتهت بكابوس مزعج مااعتقد راح ينتهي...
اول جلسه بالمحكمه..عمي اجه..اي عمي ابو عامر..مااعرف شنو الغايه من جيته..بس من صاحو باسماء الشهود..هو كان وياهم.. عمي اخو ابويه شهد ضدي..وحجه حجي خله شعر راسي يوكف.. كال اني احب واحد ولحد هسه ممعروف هو منو..وانه اهلي رادو يجبروني ع ابن عمي..واني بقيت اعاندهم علمود الحبيب الي بلوني بي..وصلت بي يكذب ويفتري عليه ويكول اكثر من مره تجاوز وتغلط عليهم.. اني صافنه ومااعرف شنو اكول.. شكول وشحجي..عمي مخله شي محجاه عني.. ليش اجيت اذا كل همك تكسرني وخليني عار؟ زين اني مو عرضك ليش هيج تحجي كدام القضاة والمحامين والناس الموجوده؟ ردت اموت بلحظتها.. باخر الجلسه القاضي كال عندج شي تكولي.. كمت واحس رجليه متشيلني ..سندت نفسي باديه ع محجر خشبي مال متهمين.. باوعت ع القاضي وبصوت يرجف..كلت والله اني بريئه..ماسويت شي..ماقتلتهم ماقتلتهم..
لحد مافقدت وكعت للكاع حتى اديه مسندتني بعد..ظليت كاعده ابجي وانحب وعمي بكل عين وكحه يباوعلي شامت.. خلصت الجلسه الاولى وتقررت جلسة ثانيه... رجعت منين مااجيت.. يوم كامل اني بس بجي.. كلام عمي مغاب عن بالي.. احس روحي تنعصر عصر من اذكر كل الصار بيه.. حتى ماشفتهم..مادفنتهم..ولا لمستهم لاخر مره.. شكد كانت ليله حلوه ذيج الليله وياهم.. ماشبعت منهم..لو ادري مانمت وكان بقيت كاعده حتى اعرف منو الي سواهه.. بس اني نفسي استغربت ذيج الليله التعب والنعاس الصار بيه.. كنت مثل الي مسويله بنج عام وهستوه صاحي..
اوف يايمه..بلعومها محزوز حز وابويه اوف عمت عيني عليك يابه.. متروح عن بالي صورته..لابس كلبيه بيضه وصايره حمره من الدم.. الكلبيه مشككه من كد الطعنات البجسمه... زينه ماكو اختفت.. مااعرف شنو مصيرها.. حتى بيت ابو غسان مكلولي من اجو.. كل ما اسألهم يكولون زينه ماعليج بيها..هي زينه ومبيها شي...
ذبيت راسي ع مخده جايفه يمكن الها قرن ممغسوله.. صبت دموعي واحس اني بدوامه.. اريد اطلع منها ماكو.. حيره والغاز مافهمتها شنو..
بعد شي يومين ..اجاني المحامي.. مادري شنو اكول..الله يحفظه لو الله يرحمه.. اي الله يرحمه افضل ...لان هو زين ومو باطل راح...
طلعت للمحامي وماعندي كل امل بالحياه.. مااريد اعيش..ولااريد يدافع عني.. اريد اموت وخلص..
كعدت كباله..سلم عليه وسألني عن حالي..
كال:شوفي رانيه..اني هنا حتى اساعدج..احجيلي كل شي ..لتضمين عني ابد.. ممكن شي تشوفي مو مهم عندج وهو يكون سبب براءتج..
-ماعندي شي احجي..
وصدك اني تعبت اعيد نفس الحجي انو اني مقتلتهم...
كال:اني راح اسأل وانتي جاوبيني.. بليله الحادث..احد اجاكم؟ حتى لو الصبح او ظهر..بذاك اليوم احد دخل الكم غريب اقارب؟
-لا مااجانه احد...
كال:ماشي.. مالاحظتي شي غريب صار قبل الحادث.. ؟ اي شي ممكن تشوفي بسيط احجي لتضمين..
-هاا؟ لا ماصار... بعدين صفنت اتذكرت التعب والخمول الي صارلي فجاءة.. كلتله:اتذكرت.. بليلتها تعبت تعب مو طبيعي.. حتى غفيت بالحديقه اتذكر وماما كعدتني رحت لفراشي.. بس مااحس بجسمي ولا اسيطر بالمشي..
كال:حلو.. زين كنتي تكدرين تميزين وتشوفين الي كبالج لو متدرين بنفسج شسوين؟
-اي اكدر اميز بس بصعوبه.. شفت زينه امدده وبعدها طلعت من الغرفه واني ماعرفت شنو صار بعدها..
كال:زين تذكرين اكلتي او شربتي شي بي طعم غريب او بعد مشربتي دختي؟
-ها؟ اي اي.. شربت شربت عادي..هذا الاكياس نحله بمي ونشربه..
كال:اي هنا الحجي..ركزي وياي هسه..راح نخلص ان شاء الله بس ساعديني.. اتذكري منو دخل الكم بذاك اليوم او حتى قبل ذاك اليوم..
-بذاك اليوم محد دخل النا.. بس قبلها بيت عمي كانو يمنا وصار خلاف وراحو..
كال:اي عفارم.. احجيلي شنو الخلاف وانتي طرف بي لو لا؟ وعمج عنده عداوة ويه والدج لو لا؟
-خلاف عائلي.. ومااعتقد اكو خلاف لانهم اخوة ويلتقون عادي ..
كال:لتكوليلي خلاف عائلي.. احجيلي.. اني هنا حتى انفعج.. مو علمود اخذ معلوماتج العائليه ولا شي.. بس حتى ادافع عنج..
اطمئنيت اله.. وهو فعلا شخص وجهه يجيب الطمأنينه.. سولفتله سبب الخلاف.. من بدايته لنهايته.. من كملت ابتسم وكالت هاي هي.. هنا الحجي.. ان شاء الله الجلسه الجايه ناخذ البراءة..
بقه يفهمني شنو اكول بالجلسه الجايه وشلون احجي.. بعدين راح.. بقيت اباوعله لحد مراح.. دعيت من كل كلبي تطلع الحقيقه وحتى لو متت بعدها المهم تنمحي عني وصمه العار ...
حضرت نفسي للجلسه الصبح.. وطبعا نفس ملابسي من اسبوعين ..اسبوعين اني بين المراكز والمحاكم... كنت كلش متأمله بهاي الجلسه.. من دخلت شفت المحامي.. انطاني نظره كلش مطمئنه.. باوعتله بتعب وياهه ابتسامه... اجو القضاه وبدت الجلسه.. فرحت هلمره عمي ماكو.. كافي عليه
أنت تقرأ
ذكريات
Mystery / Thrillerالذكرايات لا تنسى بل هي فلم ينعاد في ذاكرتنا هنالك ذكريات حزينه ومؤلمه وهنالك ذكريات سعيده ؟ اي واحده ستختار😔
