رجع سامي باجازته.. اصلا محجيت ولابينت هل شي صار.. اكتفيت بحضنه.. طلبت منه يجمعني بزينه..
سامي:صعبه شوي!
-ليش؟
سامي:شلون ليش؟ وزوجهه؟ وابنهه؟
-بس هي مبينه ممرتاحه وياهم؟
سامي:نرتبلكم لقاء ثاني وشوفيها واتفقو.. اني ماعندي مانع..
-صدك؟ اشوف زينه؟ فدوة لعمرك حبيبي..
سامي:اي.. بس لازم نروح هناك كم يوم.. حتى نراقب ونعرف شوكت تطلع
-مااكدر اروح هناك!
سامي:لعد شلون؟
-مادري.. اريد اشوفهه بس مااريد ارجع هناك!
سامي:لا حبيبي.. عوفي الخوف .. اني وياج.. بكل خطوه تترددين بيها حتلكيني وراج!
-زين شوكت نروح؟
سامي:بالوقت الي يعجبج..
-اريد التقيها باسرع وقت.. واريدها يمي..
سامي:ماشي.. بس خل ارتاح هل يومين..
وصدك مرن اليومين.. بكل لحظه اتخيل نفسي بالمدينه السوده.. كرهتهه كره العمى.. احسها طلعت الدنيا من خشمي..
انطلقنا بيوم من صبح.. بس طبعا سامي ميأمن وحده بغير محافظه.. وهو كان بيهه مترفع وصار عقيد..يعني الحمايه يفترون ويا.. بس من يجي للبيت وشغلاتنه الخاصه نطلعهه سوى..
الطريق كله جسمي مشنج.. روحي مفرفحه.. بقيت اتذكر الطريق بيوم الي رجعت بي من كملت دراستي.. شلون كنت بين التعب وبين الفرحه برجعتي.. بين امنياتي راح تتحق.. وبين اللمة بنص اهلي.. كلهه طارت بيوم وليله..
كنا نمشي وورانه سياره بيهه اثنين.. بس من وصلنا للمدينه.. صارو هم قبلنا.. وبقو بينهم ع اتصال.. راحو يراقبون بيت عمي .. اني مااعرف شصارالي.. ردت بس ارجع واشوف بيتنه من بعيد.. ردت بس افوت بشارعنه.. طلبت من سامي.. كلي ماشي..
مشت السياره.. كلما تقترب من شارعنه اكثر.. روحي تنلچم بجرح عميق.. طلبت يمشي ع كيف.. لزمت ذراعه.. صفنت بالشارع.. مثل ماهو.. بس كم بيت متغيرات ومبنيات جديد.. وصلنه كبال بيتنه.. الباب نفسه.. النبكايه مبينه.. اختنكت خنك.. الباب كان مفتوح شوي منه.. ردت اشوف مكدرت.. بس كان اكو مي طالع من البيت..
اله شويه نزلت.. مااحس اله ايد سامي لزمتني.. باوعلي وكال خليج لترحين.. لزم اديه.. عصرهن حيل.. ردت يوكفن رجف.. موكفن.. صرت اباوع وابجي.. هنا كلشي الي.. ذكرياتي.. الحلوه والمره.. هنا كل الامي.. هنا كل اندفنت روحي.. شكد لعبنه وشكد حجينه.. وشكد تكابلنه واكلنه وزعلنه ورضينه.. ااااخ.. مااحس اله السياره حركت.. انكسرت ركبتي واني اشوف البيت.. لحد مااختفى.. غصات صارت ببلعومي.. ابلع ريك اريدها تروح ماكو..
انمردت مرد بذاك اليوم.. شوصف حالي.. شنو مضيعه ووين الكاه.. مضيعه كل شي ومالكيتهن.. لكيت بس اثار جروح ولچمات... ماترتاح .. يگلبي شوكت ترتاح..
سامي كلي نروح ع فندق.. كلتله لا.. اخذني لبيت عمي..
سامي:شبيج تخبلتي؟
-لااخذني.. بعدني مااتخبلت.. اريد اشوف زينه.. بعد مااتحمل اكثر.. خلص صبري..
سامي:ياعيني اخاف عليج؟! بالله اذوج؟
-انت ادخل ويايه..
سامي:لا مااكدر.. بس راح انتظرج برا.. رجع كلي دعوفي هاي السالفه وخلي الولد يراقبون وشوكت متطلع زينه ترحين تشوفيها؟
-لااا.. خل اخلص من هذا الحمل.. كافي تعبت.. خليني اشوفهه وكدامهم مخايفه منهم..
هز راسه وكال ماشي.. بس اكلي شي بالاول.. رحنا ع مطعم.. بقيت اباوع بالشوارع.. صدك هيج كرهتهن؟ شكد كنت احب هل مدينه.. شكد طلعنا بابا افترينه ومشينه مسافات طويله.. شكد خطت رجليه بشوارعهه.. هسه احسهه تخنكني.. احس جوهه ملوث بدم اهلي.. كرهت حتى الناس البيهه..
اكلت من لاجاره.. لان اعرف سامي يبقى يلح لحد مااكل يله اخلص..
كملنا وطلعنا.. دنيا ظهر.. شوارع وحشه ومزعجه..
وصلنه كبال بيت عمي.. تمنيت هاون يوكع عليهم ويفلش بيتهم عليهم.. بس اختي جوه.. الله اعلم شدتعاني هسه.. خابر سامي الولد... كانو بسياره مظلله براس الركن.. كلهم ابقو قريبين..
فتحلي الباب.. نزلت ..رجليه خدرانه مااحس بيهن..كل جسمي مااحس بي.. صرت عباره عن عيون وتمشي... بس اشوف.. ماافكر ولااحس ولاادري شكو.. ردت ادك الباب سامي دفع الباب وكلي فوتي.. بله مدكي..
سمعت صوت هوستهم.. لاكاني ابن زينه.. يشبهم طالع عليهم.. نوب جهال اخوهم راضي الكبير.. وصلت المطبخ.. باوعت كانت مرت عمي واكفه ع الطباخ.. باوعتلهه بنظره جامده.. انطيتهه نظره نصر عليهم... نظره تفسر كسرتي ورجعتي بكاملي الهم..
مرت عمي:هااا! يمه منين اجيتي؟
زينه اجت ..
زينه.. كمزتلي واجت حضنتني.. احس بدموعهه وبجيهه عتاب وشكوى..
حضنتهه ع صفحه.. باوعت لمرت عمي صافنه بعدهه.. وجهه صوفر..
-شبيج؟ ممصدكه؟ جني طالع الج؟
راحت .. رجعت وياهه عمي..
عمي:وين جنتي ياناقصه؟!
-اششش.. لتحجي.. مجايه اشوفك ولا جايه احجي وياك!
راد يقرب يضربني.. زينه صارت كدامي.. توسلته وهي تبجي.. عوفهه عمي الله يخليك.. اريد اشبع شوف منها وخليها تروح.. فدوه بس هل دقيقه
-زينه تعالي ويايه.. لتبقين يم ذول الوحوش..
جاوبتني بلا بس احسهه تطلب مني الح عليهه اكثر واخذهه ويايه..
لحيت عليهه.. وعمي يصيح ومتخبل مني.. اني اصلا تصرفت كأن هو مموجود.. مااعرف منين اجتني الجرأة.. بس ع كد الضيم الشفته منهم تقويت ..
دخلت اتمشى بأريحيه وماخذه راحتي كلش.. اباوع ع بيتهم بكل ركن وابتسم.. احس اني منتصره.. وصدك فتحت الاستقبال.. باوعت بيهه.. شفت واحد كاعد ع كرسي متحرك.. قربت اكثر.. صرت كباله..
كان عامر.. ايباااه.. شوف شصار بيك.. دواره هل دنيا مو؟
بس عيونه تتحرك.. كل جسمه ثابت.. ميكدر يحجي ولا يرد.. عمي تخبل من حجيت ويه عامر.. خطيه بيومهه زينه الي اكلت الخوف كله.. التمو راضي وجميل ورياض.. ولد عمي .. كل واحد بيهم يريد يهجم عليه.. بس مااعرف شنو الي منعهم.. مااشوف بس ايد سامي ع كتفي..
سامي:ليش تأخرتي؟
-اريد زينه تجي..
سامي باوع لزينه..
زينه:لا رانيه.. روحي لبيتج وزوجج.. اني هنا بيتي وابني..
-لا تصيرين جبانه! صرت مره جبانه وشفتي شصار بيه!
راضي كمز من يمه:اي صرتي جبانه وذبحتي امج وابوج!
سامي عاط بي:انتم اخر ناس تحجي! عندي ادله عليكم تروحكم ورا الشمس! وتعرفون كلش زين ع شنو!!كافي الي سويتو بيها! قسما بالله انهيكم من وجه الكره الارضيه! شمفكرين نفسكم! منو انتو؟
سكت الكل ع صوت سامي.. التفتت..علي.. احس صدك ورايه ظهر.. باوعت لزينه بتوسل.. اشرتله براسي.. ع الباب حتى تجي ويايه.. هزت راسهه لا.. كالت روحي .. دمعت عيوني عليهه.. اكيد مخوفيها ومهدديها
عمامي واعرفهم.. اليمشي بعروكهم مو دم.. سم..
طلعت خايبه.. ايد ورا وايد كدام.. التفتت ع بيتهم.. بداخلي اكول ليش يازينه ليش.. تبقين ويه قتلة اهلنا!
طبعا سامي مادري شلون ضبط اعصابه.. بس مقصر طول الطريق غلط وفشار عليهم.. مخله حجايه محجاهه.. السياره اله شوي طارت بينه..
غمضت عيني.. اريد من اغمض ارتاح.. ماكو.. افكار افكار.. مو عقل صار.. زين ومتخبلت..
وصلنا ع بغداد.. وصلني ع بيت. هو اصلا منزل.. احسه ضاج مني ومن اهلي وعمامي ومشاكلي.. شخط السياره كدامي وراح..
دخلت مادري بنفسي شنو..منو .. وشصار.. عبالك مثل الي فقد ذاكرته.. خليت راسي.. كبل نمت.. بس كعدت ..كعدت ويايه كل اوجاعي وهمومي..
منظر زينه.. عيونهه الخايفه.. حته حركتها تجاهه تخاف.. تخاف تحضني لو توصلني.. انكتب علينا البعاد والغربه .. وانكتب علينه نتفارك بلايه وداع..
ااااه.. والف اااااه.. عساهه ماتتعداكم حوبتنا .
بقيت انتظر سامي.. وشكد ساعات من عمري مرت بانتظاره.. اتصل بي ميرد عليه.. كله رفض.. طكت روحي .. اله شوي طلعت ورحت لبيتهم..
بدون مااحس.. كنت اغسل مواعين انهاريت .. الي واكفه انسان.. من دم ولحم.. كافي .. لشوكت وحدج لشوكت.. شلت الماعون بيدي وركعته..
تفلش.. رجعت وكعت للكاع واني ابجي.. لميته..
عفت الشغل كله.. ذبيت نفسي بالصاله.. ع الارضيه.. اباوع للسكف.. ماعندي شي اسوي.. سامي ومو يمي.. واكيد صار وقت ررحته للدوام..
ومرت الايام.. وحيده.. روحي لايبه.. ماارتاح بمكان.. اشتاق لسامي وهو مو يمي.. ع كد الالم والوحشه والخنكه.. فكرت اخذ اغراضي واروح يم رغد.. اي .. عاد مشاكل وصوت بشر يمي احسن من السجن الاني بي..
جهزت ملابسي وداريد اطلع.. بعدين كلت.. شدسوين.. وين رايحه..
اكعدي واسكتي.. قابل جديده عليج الظله وحدج..
ونزل سامي مجاز.. هنا كلت لازم اشوف حل للوحده الاني بيهه.. خلص صار اكثر من سنتين متزوجين.. همين حقي اصير ام..
عاد طفل يترس حظني واسمعه واخلص الوقت ويا..
تعمدت مااخذت احتياط.. قبل كنا متفقين ناخذ احتياط.. بيهه اني طول اجازته وطول ماهو يمي ماحميت نفسي من الحمل..
اروحله مشتاقه ومن صدك محتاجته.. بس يحظني ادوخ بين اديه.. كل شي بي يدوخني..
وخلصت اجازته.. يوم يمي ويومين يم رغد.. المهم هو موجود تحملت..
أنت تقرأ
ذكريات
Mystery / Thrillerالذكرايات لا تنسى بل هي فلم ينعاد في ذاكرتنا هنالك ذكريات حزينه ومؤلمه وهنالك ذكريات سعيده ؟ اي واحده ستختار😔
