ماعنده كلمه.. لالا بالعكس .. هو البراسه يسوي وميهتم لاكبر واحد..
عشت ايام اني والاطفال وحدنه.. كانت عطله صيفيه.. ماعندي دوام..
روحي من الدنيا هم.. اناشيد طيور الجنه حافظتهه وياهم.. الكارتون اتابعه وياهم واضحك ع ضحكهم.. تلفونات اثنين عندي.. اغلب الوقت يلعبون بيهه.. تمنيت زينه من ترجع تعوفهم يمي..
وصدك رجعت زينه.. كانت كلش مشتاقه لاطفالهه.. دموعهه موكفت..
كالت اخذهم.. اني مقبلت.. تفهمتني.. عافتهم يمي.. وبقو يمي ايام وشهور.. اني امهم.. حتى نسو يسألون ع زينه..
بيتهه شوي بعيد علينه.. بس هي يوميه تمر الهم.. تبوسهم وتجيب كل شي وياهه.. بس اني الكنت مانعتهه تاخذهم..
وبقو يمي سنين وسنين.. ودخلنه ب2017 ..وصار سيف اول متوسط .. فروحه رابع ابتدائي..
اني الاجيب واودي.. اقري وانيم.. اغسل واسمع الهم..
زينه صار عندها ولد من رحيم.. التهت بي.. ماانكر تضحيتهه لخاطري..
ايام هي تخابرني تبجي ع اطفالهه.. وتمنع نفسهه منهم .. كله علمودي..
اني مستمره بدوامي.. يوميه نطلع سوه ونرجع سوه..
رحيم دره مال الله.. دوم اشكر ربي علي.. ع الاقل وحده منا ترتاح..
كان يحب زينه.. عاقل وفاهم الحياه عدل.. كانت زينه تكلي وتسولفلي حياتهم.. يعني اذا عصبت زينه .. تكول يتركني ويطلع من المكان الاني بي.. لحد ما اني افشل من نفسي اروح اصالحه..
هي همين كلش حبته.. ميوكع من لسانهه.. نلتقي بالعطل اكثر شي.. خفت جيتهه علينه.. يعني مو مثل اول سنتين من تزوجت هي يوميه يمنه..
تعودت ع الوضع..
اما الوجع.. صار خفيف بداخلي.. يمرلي مثل نسمه تجرح جرح خفيف وتروح.. سامي.. صار لواء ركن.. تسلم هوايه مناصب مااكدر اكشف عنهه.. كنت اشوفه بالتلفزيون مرات.. بكل مره اشوفه بيهه.. ابجي بجي زعل وحركه وضيم.. لحد مايجون اطفالي.. سيف وفرح..
يمسحون دموعي باديهم الصغيره الناعمه.. احضنهم وارجع اصبر نفسي بنفسي..
المهم.. كدرت اكون انسانه.. اطلع.. اواجه.. احجي.. اسولف.. عندي اثنين اطفال ..
الي يشوفني ميكول ورايه كل هاي الجروح.. الي يشوفني شكد اجتماعيه واحب الناس واحب شغلي.. يكول هاي مرتاحه ماعدهه شي..
بس البگلب چويات وجروح كبيره.. حته الضحكه من تطلع مني.. متطلع كامله.. بيهه نقص.. ناقصني اهل اشبع منهم.. ناقصني سامي.. ناقصني طوله الحلو.. ناقصني صوته الخشن اسمعه بالبيت.. سنين واني مانسيتك.. ولانسيت لحظة من الي عشناهن سوه.. الي كلهن مايعدن 3 سنوات بس..
3 سنوات.. بيهن اصبر نفسي.. بيهن سلوتي.. بيهن ايامي الحلوه..بيهن وقود حياتي الاستمر بيهه..
صح كانن بعز تعبي ووجعي.. بس وجود سامي يمي نساني كل هذا..
ماانسى اول يوم دخل وشفته.. شكد كرهته.. وماانسى اليوم الي حضني بي واني بقمه انهياري.. ماانسى اليوم الي ايده لامست خدي.. اليوم الي طلبني للزواج.. الايام الي كنا نقضيها بالمرجوحه بحديقه بيتهم..
وبليله من الليالي.. كانت كلش صافنه .. بيهه نجوم هوايه.. تذكرت اليوم الي طلبت منه نبعد عن الناس ببعد النجم عن الارض.. هسه صار البعد بيني وبينه ببعد النجم عن الارض..
كل غصه بدونه تجرحني.. اله هوايه فديوات.. ادخل ع النت.. اشوفهن.. اشبع بجي واطلع.. صار بس يضحك.. قبل كان كله مخنزر وضايج..
هسه الابتسامه ترس وجه.. المناصب والمراتب الي وصل الهه يمكن هي الي مفرحته..
وبيوم.. مثل اي يوم.. اخذ اطفالي بيدي.. ورايحه بيهم للمدراس مالتهم.. اوصلهم بعدين اني اروح لدوامي.. طبعا مخليتهم بحي الله مدرسه..
فشوي كانن بعيدات المدارس الي همه بيهن.. عدنه خط.. اوصلهم بي.. وبعدين امشي مسافه اوصل مدرستي..
وكف الخط.. نزلنه.. لزمتهم واحد منا واحد منا.. سيارات هوايه.. اخاف عليهم.. شفت سيارات كلها مضلله وعاليه..
ردت اعبر.. بس كانن السيارات يشخطن شخط.. انتظرت يفوتن والاطفال بيدي.. حسيت السيارات خففت.. شلت دنكت.. شلت راسي.. احس جسمي انشل.. وبس كلب يدك بنص صدري..
وحده من السيارات المضلله..كانت الجامه نازله ع النص.. مبين منها سامي..
رأسا لمحني.. نزل الجامه اكثر.. بهل لحظه.. كل الي عشناهن صارن كبالي.. خطفت السياره وراحت.. راحت مثل ماراح صاحبهه..
احس نار كبت بجسمي.. بعد ماثلجت اطرافي من شفته.. هيج مرت السنين بينه وتغربنه.. والعشناهن؟ والحب البينا؟ وين كل هذا؟
نسيت الطريق منين.. الاطفال بيدي يصيحون مامه وصلينه..
لزمتهم من ايدهم.. مادري وين اروح وين اجي.. احس صرت ثوله..
مااكدرت اسيطر اكثر.. نزلت دموعي بالشارع.. امشي وامسح بيهن..
كبران ياسامي .. وحتى الكبر لايك عليك.. كل شي بيك حلو. طولك.. عيونك.. ضحكتك الي صرت اشوفهه هواي.. حتى الرتبه .. والللقب قبل اسمك...اللواء الركن.. مفصل عليك تفصال..
امشي واردد نيالج رغد.. نيالج.. انتي الحضيتي بي واني الخسرت..
هاي معركتي ويه الحياه.. دوم خسرانه بيهه..
وصلت للمدرسه حتى مااعرف منين ابدي الحصه.. ششرح وشكول..
طلعت.. كبل لسيف وفرح.. لكيتهم متكاودين ومنتظريني..
منظرهم يهز الكلب.. عرفت حجايه امي من تكول الاخو سند..
هيج شفت سيف.. لازم اخته ويخاف عليهه من الشارع لتعبر وتنضرب..
كان اطول منهه.. يدنك عليهه ويحاجيهه.. من شافني اشرلها..
رحت عليهم.. احس كنت ضايعه بهذا اليوم.. حضنتهم من روسهم.. اريد روحي ترجعلي.. وصلنه ع البيت.. تغدينه.. نامو الاطفال..
اني بقيت افتر بكل ركن بالبيت.. هنا كعدنه.. هنا حجينه.. هنا سولفنه وخلصت ليالينه..
امشي وابجي.. شجابك.. وليش طلعت.. نظره عيونه ماتروح عن بالي..
شكد تحمل ياكلب.. شكد بيك لسعات.. ااااخ..
تبعت من البحي ونمت..
كعدت للعصر.. كئيبه.. ضايجة.. بعدين ع سوالفزالاطفال عن يومهم.. ووجباتهم .. كعدت ادرسهم.. التهيت.. سويتلهم عشه.. تعشينا وعود ردت انام...
وكلهه تحچي بالمحنة🍁
وماكو ابن ادم يحن..
وانه مثل الناي دونك🎶
ويه كل شهگه نفس لازم اون💔
أنت تقرأ
ذكريات
Mistério / Suspenseالذكرايات لا تنسى بل هي فلم ينعاد في ذاكرتنا هنالك ذكريات حزينه ومؤلمه وهنالك ذكريات سعيده ؟ اي واحده ستختار😔
