آنين الليل الاحمر ....القصه حقيقيه ......
#الجزءالاول
#البارت_الثاني
بقلم ليلان العطواني ........
علاقتي بأخويه ماجد مثل علاقة الفاره والبزون منتراهم ابد هو شكوكي من اقل شي يعصب ويعيط كنت اكرهه وأكره حتى شوفته بالبيت ...ومرات اخاف منه بالذات من اشوفه بأيده سچينه ويلعب بيها احس يريد يكتلني.. مرات من ادخل غرفته انظفها ويه اختي سعاد اخاف احسها مال واحد ميت متروسه كتب دين وادعيه وع الحيطان معلك سكاكين بكل الانواع مخليها عرض بس اكثر شي كان يحبه سكينه هداها اله ماهر دائما يهتم بيها ....ومره من المرات دخلت غرفته انظفها شفتها گعدت العب .. دخل هو فجأه وشافني ....
_شسوين هنا ....
_كولشي ما اسوي انظف غير .. .
_وشبيج تگوليها من وره خشمچ ..ها ماعاجبچ...
_وخر خلي اكمل شغل ...
_ذبي السچين لا اخليها تلعب على رگبتچ...ههه..
_شنو اصلا ما اخاف منك انت بزونه متخاف منك هم تريد تحچي ...
_والله اشوفها بيوم من الايام تلعب على رگبتچ...
_ولي ولي عابتلك أرعن مسودن...
عفته ونزلت بس اني ولا نقطة دم بجسمي من الخوف مرعوبه هذا المسودن يسويها ....شفت أبويه دخل البيت ركضت عليه تلگيته بوست أيده ...
طلب مني اروح اصيح....
_بابا امي بالحمام گول اني اسويلك شتريد ...
_تعاي نزعيني حذائي تعبان....
_صار من عيوني ....
نزعته حذائه وأخذت الچاكيت مالته علگتها بالكنتور وجبتله مي ....گلي شغلي التلفزيون ...
_هلا عيوني ابو ساجد ....
_هلا بيچ وهيبه شكو ماكو ..
_ماكو شي عيوني انت اصبلك غده ...اسويلك چاي ..
_لا ما اشتهي بس حضري ملابس وخليهن بجنطه لان ناوي على سفر للموصل اني وكم واحد من جماعتي ...اطلع بالليل ..
_صار هسه دقايق والجنطه جاهزه....گدامك...
_اريدچ تنتبهين ع البيت وع البنات وبذات على وداد هاي بدت تكبر وتحله وعيون الناس عليها اني هاي السنه اذا مانجحت ازوجها لابن عمها انطيها ل محمد احسن شلي. بدوخة الرأس...
_مثل متحب عيوني شتفصل أحنه نلبس .....
من سمعت أبويه يگول لامي ازوجها ابن عمها صارت عيوني بگصتي عوع اي والله اني ازوج هذا المطفي الاحول كش شنو خلصت الرياجيل قابل والله اموت وما اخذه ....اعوف ماهر وازوج هذا يمه يمه ...
صعدت على غرفتي وطفيت الضوه ورفعت البرده گعدت اباوع على ماهر من الشباك شفته گاعد ويه ماجد بقت عيني عليه الحد ما دخل البيتهم اكلته اكل بعيوني ....
رجعت گعدت على چربايتي اگلب بالكتب اتذكرت عندي امتحان رياضيات فتحت الكتاب كولشي ممفتهمه منه وهالمره المدرسه مواعدتني اذا ما تنجح ما ادخل بكالوريا وإني لو اموت ما انجح ....شلون هسه ....فكرت شويه بعدها تذكرت باچر اغش على سوسن هاي شاطره ومحد يگدرلها ...
نعست ونمت ..ولصبح ما گعدت اله من سمعت صوت اختي سعاد ادگولي گومي مابقه وقت للدوام ...
گعدت ركض ركض غسلت وجهي وبدلت ونزلت لگيت السايق واگف بالباب ...وماجد گالب خلقته وساجد يسولف ويه ماهر ويضحك ....
سلمت عليهم وصعدت بالسياره ..ماجد أصر ماهر يصعد وبأنه اني طرت من الفرح تمنيت يگعد يمي بس هو گعد بالصدر وماجد وساجد گعدوا يمي ....
طول الطريق يباوعلي يسرق نظرات اني من اشوفه يباوعلي اتخبل گلبي يدگ بسرعه واتخربط وارجف ....
ابقه دايخه ...
وصلت للمدرسه تلگتني ورده تركض....
_صباح الخير وده حافظه للامتحان ...لو مثلي ...
_مثلچ فتحت الكتاب كلشي ممفتهمه من الجبر صعب المعادلات ما اعرف شلون احفظها....
_اني هم هچي
_اني راح اغش على سوسن هاي ذكيه وشاطره ...
_من تحلين عليها رديلي ....
_هي وينها خل اشوفها وافهمها.....
_هياتها بالساحه....سوسن ...سوسن...
_نعم خير ....
_خير اليصيبج اريد اغش عليج ....
_نعم نعم شنو مو اني الفگريه والمطفيه والجوعيه ....
_اهووووو ياحچايه ردي المكانچ ...هاي شبيچ معقوله انتي تزعلين مني ...
_شوفي عيني اني ما اغششچ اي اخاف المدرسه تلگفني ...
_هاااا هيچ صارت ....بسيطه اني اعلمچ....
_يمه يمه خفت ....اوي كساله..
_بس بس دگ الجرص خلي ندخل للصف نمتحن بس والله اله ابصطها واصيح حظها....عوفيها عليه...
دخلت ست وحيده ام الرياضيات ...تسأل محضرات قاريات لو كولشي ماكو .... هاي الاسئله كتبتها انتبهن عليه وحلن زين ولا تنسن نصف الجواب بمنطوق السؤال .....باوعت ع الاسئله دخت وخفت صعبه وما ادبرها باوعت على سوسن وجماعتها يجاوبن وإني واتباعي كولشي ماكو .....خلص الدرس سلمت الورقه فارغه ماكو جواب .....
شفت المدرسه تهز بأيدها وتعيب شطت نار ردت اتفل على وجها بس خفت توديني للمديره......طلعنا بالفرصه دورت على ورده ....
_هااا ولچ جاوبتي.....
_لا والله ولا سؤال بس نقطتين ذني عرفتهن وانتي ...
_ولا نقطه اصلا الورقه بيضه...
_ياااااا صدوگ....
_مثل ما اگولچ....هسه اريدج تسحلين سوسن وره الحمامات اريد ابصطها ..
_هسه خل أصبح هيام تقشمرها .....هيام تعالي جاي ....
_هااا وروده خير ....
_شوفي هيام اريد تقشمرين سوسن ادگوليلها عندي شغله وياج وتاخذيها وره الحمامات ....ومعليج بالباقي ....
_فريره هسه ....ماطول الدرس شاغر .....
بقيت اني وورده نراقب ونباوع على هيام وهي تجرجر سوسن وره الحمامات رحنه وراها ....
_هاا هيام شنو شغلتج وليش هنا تسولفيها ....
_روحي هيام خلص دورچ ... .
_شنو هاي شتريدن مني هاااا هسه اصيح البنات يجيبن المديره عليچن ....
_مديره هسه اراويچ ....شسوي بيچ وخلي المديره تفيدچ...
لزمناها گطعناها تگطع وكسرت واحد من سنونها ومزگت صدريتها وخليتهة حال الضيم حالها وعفناها تبچي وره الحمامات ....ورجعنا ع الصف....
واحنه گاعدين بالصف چانت ست اقبال تشرح الدرس مال القواعد ....اجت الفراشه تصيحنا اني وورده ....عرفنا سوسن مشتكيه بس معقوله هاي مسويتها ....هاي هددتها وهي تخاف .....
دخلنا على ست كريمه المديره واحنه خايفات لزمتنا ضربتنا كل وحده اربع عودات ....وگالت باچر متجن اله أولياء الأمور وياچن .....
ولحكايتنا بقيه انتظرونا ......
